Saport and Fasin for Kea From Planti Ples
OLKETA volunteer kam from olketa nara part long United States and nara kantri tu. Wanfala volunteer hem Tom (piksa antap), wea 29 year, wanfala fireman from Ottawa, Canada. Hem talem Wekap!: “Mi lukim olketa samting wea happen long TV and mi laek for saportim olketa fireman long New York wea duim sem waka wea mi duim. Mi draev go long New York long Friday and go long Ground Zero long Saturday and offer for help. Mi waka witim sekson wea iusim olketa baket nomoa for muvim rabis.
“Isisi mifala separatem datfala rabis, lelebet nomoa each taem, and lukluk for eni samting wea maet helpem mifala for luksavve hu nao olketa fireman wea dae. Mi faendem wanfala Halligan tul wea hem for openem door wea lok finis, and tu samfala samting for joinim wata pipe tugeta. Hem barava hard waka and tek longtaem. Samting olsem 50 volunteer waka for tufala hour for fulimap wanfala trak.
“Long Monday, September 17, mifala digim aot olketa body bilong samfala fireman wea ran go insaed datfala building long Tuesday bifor. Bae mi nating forgetim wanem mi lukim—evri man wea waka for sevem pipol stop waka, aotem hard hat and helmet, and standap—for showimaot respect for olketa fireman wea dae.
“Taem mi standap and lukim samting wea go ahed long Ground Zero, mi barava luksavve hao hem isi tumas for laef hem finis. Datwan mekem mi ting raonem laef, waka, and famili bilong mi. Nomata hem garem danger, waka bilong mi mekem man satisfae—hem helpem pipol and sevem laef tu.”
Olketa Witness Offerim Gudfala Help
First tufala day bilong datfala trabol, samting olsem 70 pipol lukaotem sef ples long world headquarters bilong Olketa Jehovah’s Witness. Samfala wea lusim rum long hotel and suitcase bilong olketa kasem ples for stap and samfala kaleko. Olketa kasem kaikai. Samting wea maet moa important, olketa kasem saport saed long feeling from olketa Christian elder wea garem savve.
Olketa Jehovah’s Witness sendem tu samfala emergency machine and tul for olketa search-and-rescue team wea waka long ples wea gogo olketa kolem Ground Zero. Olketa provaedem transport tu for fire department for tekem olketa fireman long datfala area. Ricardo (antap long raet), wanfala Witness wea 39 year wea waka for kolektem rabis, join witim planti handred narawan, wea muvim planti ton bilong rabis evriday. Hem talem Wekap!: “Samting wea mifala lukim hem mekem mifala feel hevi tumas, especially olketa fireman, wea lukaotem olketa wakfren bilong olketa wea lus. Mi lukim olketa digimaot wanfala fireman wea laef yet. Narafala fireman hem dae from wanfala dead body foldaon antap long hem. Planti fireman krae. Sorre feeling winim mi and mi krae. Long datfala day no eniwan moa brave winim olketa.”
“Taem and Samting wea Iumi No Expectim”
Planti thousand pipol dae long datfala trabol. Midolwan long olketa hem 14-fala Witness, wea stap long datfala area or klosap. Joyce Cummings, wea 65 year and born long Trinidad, go for lukim dentist klosap long World Trade Center. Sorre tumas, hem long taem bilong datfala trabol. Olketa tekem hem long wanfala hospital klosap from smoke spoelem hem. Olketa no savve sevem hem. Hem wanfala long staka example bilong pipol wea safa from “taem and samting wea iumi no expectim.” (Ecclesiastes 9:11) Pipol savve long hem olsem woman wea barava strong for talemaot gud nius.
Calvin Dawson (lukim box) hem waka long wanfala bisnis long mek-84 storey bilong south taoa. Hem stap long office bilong hem and lukim klia north taoa stretawe bihaen plane bangam datwan. Boss bilong hem, wea no stap long office, ringim hem long telephone for faendaot wanem nao happen. Hem sei: “Calvin trae for talem mi wanem hem lukim. Hem sei, ‘Pipol jamp go daon!’ Mi talem hem for lusim office and talem evri narawan for go aot tu.” Calvin no garem inaf taem. Boss bilong hem go ahed for sei: “Calvin hem wanfala nambawan man and mifala evriwan tinghae long hem, nomata mifala wea no spiritual pipol. Mifala tinghae long wei wea hem followim God and tingim nara pipol.”
Nara Witness wea dae hem James Amato (botom long opposite page), wanfala dadi wea garem fofala pikinini and wea captain long New York fire department. Olketa wea savve long hem sei wei wea hem brave mekem “hem savve go insaed building wea bone nomata pipol ranawe.” Bihaen hem dae olketa markem hem olsem chief bilong wanfala sekson long fire department.
Nara Witness fireman, wea duim datfala waka for sevenfala year finis, hem George DiPasquale. Hem maritim Melissa and garem dota wea 2 year, Georgia Rose. Hem elder long wanfala kongregeson bilong Olketa Jehovah’s Witness long Staten Island and hem stap long mek-10 storey bilong south taoa taem datwan hem foldaon. Hem tu dae taem hem trae for sevem nara pipol.
Hem tufala nomoa long planti handred fireman, police, and emergency wakman wea dae taem olketa barava brave for trae and sevem pipol. Iumi fit for mekhae long brave fasin bilong olketa man hia. Bihaen, mayor bilong New York City, Rudolph Giuliani talem wanfala grup fireman wea kasem position wea moa hae: “Wei wea iufala willing for go ahed and no fraet midolwan long barava nogud samting wea happen hem muvim mifala evriwan. . . . And. . . no eni example bilong brave fasin hem stap wea winim Fire Department bilong New York.”
Ministry Bilong Comfort
Long olketa day bihaen datfala bigfala trabol, samting olsem 900,000 Jehovah’s Witness long United States trae hard raonem full kantri for comfortim olketa wea feel sorre. Love for neiba muvim olketa for comfortim olketa wea lusim samwan long dae. (Matthew 22:39) Long ministry bilong olketa, olketa trae tu for point go long only trufala hope for olketa man wea safa.—2 Peter 3:13.
Olketa Witness showimaot fasin for kea long wei wea olketa deal witim pipol. Goal bilong olketa hem for offerim comfort from Bible and for followim naesfala example bilong Christ, wea hem sei: “Kam long mi, iufala evriwan wea waka hard and karem bigfala hevi, and mi bae strongim iufala. Karem yoke bilong mi and lanem samting from mi, from mi garem kwaet fasin and mi hambol long heart, and iufala bae faendem samting for strongim soul bilong iufala. From yoke bilong mi hem kaenfala and lod bilong mi hem no hevi.”—Matthew 11:28-30.
Olketa letem samfala elder from olketa kongregeson bilong Olketa Jehovah’s Witness long Manhattan go long Ground Zero area for story witim and comfortim olketa wea waka for sevem man long there. Gudfala samting kamaot from diswan. Olketa minister hia sei: “Olketa man garem wata long eye taem mifala sharem olketa scripture witim olketa.” Samfala long olketa wakman hia rest long wanfala boat long harbor. “Olketa luk olsem olketa no garem eni hope, witim hed wea hange daon and no savve deal witim wanem olketa lukim. Mifala sidaon witim olketa and sharem samfala Bible scripture. Olketa sei thankiu tumas for visit bilong mifala, and sei hao olketa barava needim disfala comfort.”
Planti taem, pipol wea olketa Witness meetim bihaen datfala trabol laekem samting for readim, and kasem free planti thousand brochure. Samfala hia hem Taem Samwan Wea Iu Lovem Hem Dae, Will There Ever Be a World Without War? and Which Way, God Him Really Care Long You-Me? Main wan wea olketa givimaot hem tufala issue bilong Awake!: “The New Look of Terrorism” (May 22, 2001) and “Coping With Post-traumatic Stress” (August 22, 2001). Planti taem olketa Witness explainim resurrection hope bilong Bible. (John 5:28, 29; Acts 24:15) Maet planti million pipol kasem disfala message bilong comfort.
Hem Shud Mekem Iumi Tingting
Olketa bigfala trabol olsem diswan long New York shud mekem iumi evriwan tingim hao nao iumi iusim laef bilong iumi. Waswe, iumi aftarem samting for iumiseleva nomoa, or iumi trae for duim samting for helpem nara pipol for hapi? Profet Micah hem ask: “Wanem nao Jehovah askem bak from iu bat for showim justice and for lovem kaenfala fasin and for hambol taem iu wakabaot witim God bilong iu?” (Micah 6:8) Hambol fasin shud muvim iumi for luk insaed Word bilong God for faendem trufala hope for olketa wea dae finis and for faendaot wanem God bae klosap duim mekem disfala earth kamap Paradaes moa. Sapos iu laek for kasem moa savve abaotem olketa promis bilong Bible, mifala encouragem iu for story witim Olketa Jehovah’s Witness long area bilong iu.—Isaiah 65:17, 21-25; Revelation 21:1-4.
[Box/Piksa long page 11]
PREA BILONG TATIANA
Widow bilong Calvin Dawson, Lena, hem talem Wekap! abaotem prea bilong dota bilong hem wea seven year hem talem tu-thri day bihaen hem savve dadi bilong hem bae no kam bak. Lena talem finis wanfala prea and Tatiana askem hem, “Mi savve talem wanfala prea, Mami?” Mami hem agree. Tatiana hem prea olsem: “Jehovah, Father bilong mifala long heven, mifala laek for sei thankiu for disfala kaikai and day bilong laef. And mifala laek for ask for spirit bilong iu stap witim mitufala Mami mekem mifala strong. And mifala laek for ask for spirit bilong iu stap witim Dadi, mekem hem strong taem hem kam bak. And taem hem kam bak, for hem mas naes, strong, and hapi and healthy, and bae mifala lukim hem moa. Long nem bilong Jesus . . . oh, and no forget for strongim Mami. Amen.”
From Lena no barava sure sapos Tatiana minim gud datfala samting wea happen, hem sei: “Tiana, datwan hem naes tumas. Bat, waswe, iu savve Dadi bae no kam bak?” Tatiana seke fogud. Hem sei, “Bae hem no kam bak?” “Nomoa,” mami bilong hem sei. “Mi tingse mi talem iu finis. Mi tingse iu minim hao Dadi bae no kam bak.” Tatiana hem sei: “Bat iu evritaem talem mi bae hem kam bak insaed niu world!” Gogo, from hem luksavve long mining bilong wanem dota bilong hem talem, Lena hem sei: “Mi sorre, Tatiana. Mi minim iu rong. Mi tingse iu ting Dadi bae kam bak tumoro.” Lena hem sei abaotem diswan: “Mi feel gud taem mi savve hao hem barava biliv long datfala niu world.”