DEAL WITIM WEI WEA PRICE BLO EVRITING GO AP

Garem Hope

Hao, price blo olketa samting lo kantri blo iu hem go ap winim income blo iu? Hao, iu wari abaotem wei for provaedem need blo iu and blo olketa loved wans blo iu? If olsem, maet iu wari abaotem future blo iu. Nomata lo olketa hard situation olsem, hem important for iu garem hope.

WHY DATWAN IMPORTANT

Pipol wea garem hope no just wish nomoa for gud samting bae happen. Hope strongim olketa for duim samting and traem best for deal witim situation blo olketa. For example, research showim dat pipol wea garem hope . . .

olketa no givap nomata lo eni situation
olketa savve adjust
mekem olketa gud disison wea helpem olketa for healthy and garem gud laef

WAT IU SAVVE DUIM

First, tingim hao Bible savve helpem iu distaem. Bible garem olketa wise advaes wea savve helpem iu for deal witim wei wea price blo evriting go ap. Olketa advaes hia and olketa nara advaes savve helpem iu for deal witim situation lo laef blo iu distaem and hem bae helpem iu for deal witim eni challenge wea kamap lo future.

“Gudfala tingting bae protectim iu; wei for minim samting bae gaedem iu.”—Proverbs 2:11, New Century Version.

Second, tingim wat Bible talem abaotem future. Taem iu luksavve lo value blo wisdom wea stap insaed Bible, datwan bae mekem iu laek for studyim gud wat Bible talem abaotem future. For example, bae iu lanem dat God no laekem iu for garem “gudfala future and hope” nomoa, bat hem provaedem tu strong faondeson for datfala hope. (Jeremiah 29:11) Datfala faondeson hem Kingdom blo God.

WAT NAO KINGDOM BLO GOD, AND WAT NAO KINGDOM HIA BAE DUIM?

Kingdom blo God hem wanfala gavman wea bae rulim full earth. (Daniel 2:44; Matthew 6:10) Kingdom hia wea rul from heven bae finisim wei for safa and poor, and evriwan bae kasem peace and garem evriting wea olketa needim, olsem olketa scripture hia storyim.

“Bae iu hapi and bae iu garem gudfala laef.”—Psalm 128:2.

“Olketa [wea stap anda lo datfala Kingdom] bae no waka hard nating.”—Isaiah 65:23.

“Staka grain bae stap lo earth.”—Psalm 72:16.

Staka million pipol wea trustim olketa promis hia sure God “no savve laea.” (Titus 1:2) So hem gud for iu studyim and lukim seleva lo Bible. Hope wea Bible storyim bae strongim iu nomata iu deal witim economic problem, and sure hao evri problem hia bae finis lo future.