Busy and Hapi for Worshipim God
JEHOVAH laekem iu for hapi. (Ps. 100:2) From iu wakaman bilong hem, iu busy tu. Maet taem iu no baptaes yet, iu no busy tumas. Bat bihaen iu baptaes iu busy long waka for selen and for duim olketa samting for worshipim God. Maet diswan mekem iu feel olsem iu garem staka samting for duim. Maet samfala taem iu feel nogud from iu no duim evri samting wea iu laek for duim. So hao nao iu savve gohed “for hapi long Jehovah” and iusim gud taem bilong iu for duim olketa samting hia?—Neh. 8:10.
From laef distaem hem no isi and iu garem staka samting for duim, iu need for garem gudfala schedule. Hem gud for tingim kaonsel wea aposol Paul talem wea savve helpem iumi long diswan. Hem sei: “Lukaot gud long wei bilong iufala. No duim olketa samting wea showimaot iufala krangge bat duim olketa samting wea showimaot iufala wise. Iufala mas iusim gud evri lelebet taem wea iufala garem, bikos iumi stap long taem wea nogud tumas.”—Eph. 5:15, 16.
Taem iu tingim datfala kaonsel, long wanem wei nao iu savve iusim gud taem bilong iu for duim study seleva, lukaftarem famili, go long ministry, waka for selen, and for duim olketa nara important samting?
Iu hapi tumas taem iu dedicatem iuseleva long God and baptaes! Iu hapi bikos iu savve long Jehovah and olketa plan bilong hem. Maet iu study hard for staka month mekem iu savve minim wanem iu lanem and for hapi. Bat datwan hem gud samting bikos iu no hard waka nating. Study wea iu duim barava changem laef bilong iu.
Iu mas gohed lane abaotem Jehovah mekem iu savve gohed hapi. Sapos hem no isi for iu garem taem for readim Bible and studyim, lukluk gud long schedule bilong iu. Nomata sapos iu iusim tu-thri minute nomoa evriday for studyim Bible and ting raonem, datwan bae helpem iu for fren gud witim Jehovah and iu bae hapi tu.
Staka pipol bilong God savve iusim taem wea olketa iusim for nara samting for duim olketa important samting. Tingim diswan, ‘Haomas taem nao mi iusim for readim olketa nara buk or niuspepa, lukluk long television, lisin long music, or duim samting wea mi interest long hem?’ Iumi savve hapi taem iumi duim olketa samting hia bat iumi mas no ova tumas long olketa. (1 Tim. 4:8) Sapos iu luksavve iu no iusim gud taem bilong iu, duim samting for changem schedule bilong iu.
Adam, wanfala elder wea garem thrifala pikinini hem talem wanem nao helpem hem. Hem sei: “Mi trae hard for garem laef wea simpol. Mi trae for no duim olketa samting wea iusim tumas taem bilong mi and for no garem olketa samting wea bae iusim staka taem for lukaftarem gud. Hem no minim mi no laek garem eni samting or no duim eni samting, bat mi hapi for duim hapitaem wea simpol nomoa.”
Mariusz, wanfala elder wea garem thrifala pikinini, hem sei: “Taem mi start for studyim Bible, mi garem hope for future nao. Samfala taem mi kasem hard taem and plande long olketa hard taem hia Jehovah nomoa savve abaotem. Nomata olsem, mi thankiu long Jehovah for helpem mi and mi hapi bikos mi savve mi bae kasem gud samting long future.” Disfala example showimaot taem iu ting raonem gud samting wea iu kasem from wanem iu disaedem, datwan savve mekem iu hapi and garem gudfala tingting abaotem future.
Story bilong Mariusz showimaot nomata man garem gudfala tingting, datwan no evritaem stopem hem for no wari. Bat kaen tingting olsem savve helpem iu for feel gud lelebet and savve long wanem for duim taem iu kasem hard taem. Bible hem sei: “Man wea safa hem tingim evriday hem nogud nomoa, bat man wea hapi hem olsem hem feast olowe.” (Prov. 15:15) Ting raonem tu love wea God showim long iu. Taem iu duim olsem, datwan bae helpem iu for lovem God and barava hapi long hem.—Matt. 22:37.
Famili savve barava hapi taem first samting long laef bilong olketa nao hem for worshipim Jehovah. Taem olketa long famili garem gudfala wei, datwan savve mekem olketa for no raoa tumas bat helpem olketa for fren gud and story gud tugeta. Sapos olsem, famili bae stap gud and evriwan bae wan mind.—Ps. 133:1.
Taem famili duim olketa spiritual samting tugeta, olketa bae barava hapi. Mariusz hem sei: “Mi tinghae long taem wea famili bilong mi savve duim olketa samting tugeta. Waef bilong mi barava sapotim mi. Hem savve waka witim mi long ministry or kam witim mi taem mi volunteer for klinim ples for convention, and hem savve gogo witim mi taem mi go long nara kongregeson for givim pablik tok. Diswan barava strongim mi.”
Bible talem olketa Christian for provaed for famili bilong olketa. (1 Tim. 5:8) Bat sapos waka for selen hem iusim tumas taem and strong bilong iu, datwan savve mekem iu no hapi long worship bilong iu for God. Sapos hem olsem, prea long Jehovah abaotem datwan. (Ps. 55:22) Samfala mas changem waka bilong olketa mekem Kingdom bilong God kamap first samting long laef bilong olketa. Olketa Christian mas no letem waka wea olketa duim for selen stopem olketa for no duim olketa samting for worshipim Jehovah, wea datwan nao important winim selen.—Prov. 22:3.
Maet hem gud for raetem wanfala list long olketa gud samting and nogud samting abaotem waka wea iu duim distaem or wea iu tingting for duim long future. Hem naes for garem big pei and waka wea iu hapi long hem. Bat waswe, waka wea iu duim distaem helpem iu and famili bilong iu for fren gud witim Jehovah? Ting raonem evri samting and disaedem olketa samting wea bae mekem worship bilong Jehovah kamap first samting long laef bilong iu.
Sapos waka wea iu duim distaem hem no helpem iu for gohed fren gud witim Jehovah, iu need for changem datwan. Plande Christian changem waka bilong olketa mekem olketa savve duim olketa spiritual samting. Wanfala brata long Poland hem sei: “Mi mas lusim waka bilong mi bikos plande taem mi mas travel go long nara ples for duim waka bilong mi. Waka hia mekem mi garem lelebet taem nomoa for duim olketa spiritual samting and for lukaftarem famili bilong mi.” Distaem brata hia garem waka wea mekem hem garem taem and strong for duim olketa samting hia.
Hapi for Helpem Olketa Narawan
Jesus sei: “Man wea givim samting hem barava hapi winim man wea kasem samting.” (Acts 20:35) Iumi garem olketa taem for givim samting long narawan. Iumi savve smile long narawan, sekhand, or thankiu for hard waka wea narawan duim long assignment bilong hem. Maet olketa samting hia nomoa iu need for duim mekem iu and narawan hapi.
Aposol Paul encouragem olketa Christian: “Tok kaen long olketa wea wikdaon and sapotim olketa wea no strong.” (1 Thess. 5:14) Olketa wea wikdaon maet tingse bae hem hard for olketa seleva stretem problem bilong olketa. Waswe, iu savve helpem olketa hia? Sapos iu savve wanfala Christian brata or sista no hapi tumas for worshipim Jehovah, trae for encouragem hem. Sapos iu duim olsem, datwan bae strongim iu tu. Samfala problem wea pipol kasem no eni man savve stretem. Bat iu savve duim samting wea showimaot iu tingim brata bilong iu and encouragem hem for trustim Jehovah. Olketa wea trustim Jehovah bae kasem gud samting.—Ps. 27:10; Isa. 59:1.
Nara samting wea iu savve duim tu hem for askem brata or sista wea no luk hapi tumas for go witim iu long ministry. Taem Jesus sendem 70 disaepol for go preach, hem “markem tufala man for waka tugeta.” (Luke 10:1) Wanem Jesus duim hem barava gud bikos tufala man wea waka tugeta encouragem narawan. Waswe, iu savve duim datwan tu for helpem narawan hapi moa long wanem hem duim for Jehovah?
Staka samting hem stret for iumi wari abaotem distaem. Nomata olsem, Paul encouragem iumi olsem: “Hapi evritaem long Lord. Mi talem iufala moa, iufala hapi!” (Phil. 4:4) From iu lovem God, obeyim hem, and gohed strong for duim waka wea hem givim long iu, iu garem hope for future. Datwan mekem iu hapi. Nara samting tu, Jehovah helpem iu long olketa hard taem and problem wea iu kasem distaem.—Rom. 2:6, 7.
Iumi bilivim niu world wea Jehovah promisim hem klosap tumas nao. Long niu world, iumi bae kasem staka blessing and barava hapi! (Ps. 37:34) So iumi savve hapi and no forgetim Jehovah blessim iumi distaem. Taem iumi duim olsem, iumi savve “hapi for worshipim Jehovah.”—Ps. 100:2.
[Diagram on page 8]
(For fully formatted text, see publication)
Maet iu need for changem hao iu iusim taem bilong iu mekem iu gohed hapi
HAPITAEM
LUKAFTAREM HAOS and FAMILI
WAKA
OLKETA MEETING
STUDY SELEVA
MINISTRY
[Olketa piksa long page 10]
Waswe, iu savve helpem narawan for hapi moa?