Full-Taem Service Teachim Mifala “Samting wea Staka Man No Savve”

Story bilong Olivier Randriamora

“Mi savve hapi nomoa nomata taem mi garem lelebet samting or mi garem staka samting. Mi lanem samting wea staka man no savve: nomata wanem hem happen long laef bilong mi, nomata mi garem kaikai or mi hangre . . . Nomata wanem samting hem kasem mi, paoa wea mi kasem from God nao hem strongim mi for gohed.”—Phil. 4:12, 13.

DATFALA toktok bilong aposol Paul hem barava encouragem mi and waef bilong mi, Oly, for staka year. Olsem Paul, taem mitufala barava depend long Jehovah long assignment bilong mitufala long Madagascar, mifala lanem “samting wea staka man no savve.”

Taem Olketa Jehovah’s Witness start for studyim Bible witim mami bilong Oly long 1982, mitufala Oly engage finis. Mi tu start for studyim Bible, and bihaen, Oly hem join insaed datfala study. Mitufala marit long 1983, baptaes long 1985, and stretawe bihaen datwan mitufala duim auxiliary pioneer. Long July 1986 mitufala start for regular pioneer.

Long September 1987, mitufala kamap spesol pioneer. Firstfala assignment bilong mitufala hem long wanfala smol taon long northwest Madagascar, wea no eni kongregeson hem stap. Staka pipol from enikaen difren ples and tribe stap long Madagascar, and olketa garem staka difren kaen kastom. Main languis hem Malagasy, bat samfala difren languis hem stap tu. So mitufala traem best for lanem languis wea pipol iusim long assignment bilong mitufala, and datwan mekem pipol feel free for story witim mitufala.

Mi savve givim pablik tok evri Sunday nomata mitufala nomoa stap, then bihaen, Oly hem clap! Mitufala savve duim tu evri part long Theocratic Ministry Skul, and taem Oly givim tok hem act olsem hem story witim wanfala haosholder, nomata hem sidaon seleva. Mitufala hapi tumas taem circuit overseer hem visit kam and talem samfala difren idea long hao for duim olketa meeting!

Mifala no savve kasem allowance bilong mifala long semtaem evri month, bikos samfala taem post office no sendem kwiktaem. So mitufala lane for hapi nomata taem mifala garem lelebet samting nomoa. Wantaem, mitufala no garem bas fare for go long circuit assembly wea bae kamap 130 kilometer from taon wea mifala stap. Mitufala tingim advaes wea wanfala brata talem long mifala bifor. Hem sei: “Prea long Jehovah abaotem olketa problem bilong iu, bikos waka bilong hem nao iutufala duim.” So mitufala prea, and disaed for wakabaot go long assembly. Bat taem mitufala redi for go, seknomoa wanfala brata kam visitim mifala and givim mifala present. Datfala present hem selen wea barava fitim nao bas fare bilong mitufala!

DUIM CIRCUIT WAKA

Long February 1991, mi kasem assignment for duim circuit waka. Long datfala taem, grup bilong mifala garem 9-fala pablisa, wea 3-fala nao baptaes. Average namba wea attendim olketa meeting hem 50. Bihaen mi kasem training, mifala duim circuit waka long Antananarivo, wea hem kapitol bilong Madagascar. Long 1993, mifala kasem niu assignment for duim circuit waka long east saed long kantri. Laef long there hem barava difren from laef long taon.

Mifala mas wakabaot for kasem olketa kongregeson and isolated grup. Samfala taem mifala mas wakabaot 145 kilometer long olketa maunten long bush. Mifala trae for no tekem staka samting. Bat taem mi mas showim olketa slide long pablik tok wea mi givim, mifala mas karem moa samting. Oly hem karem slide projector, and mi karem battery bilong trak wea mifala iusim for paoa.

Staka taem for kasem next kongregeson mifala mas wakabaot samting olsem 40 kilometer insaed long wanfala day. Mifala klaemap and go daon long olketa maunten, akrosim olketa river, and wakabaot insaed long mud. Samfala taem mifala savve sleep long saed road nomoa sapos mifala no faendem wanfala vilij wea mifala savve sleep. Samfala taem mifala ask for sleep long haos bilong pipol wea mifala no savve long olketa. Bihaen mifala faendem ples for stap, mifala start for kuki. Oly hem askem pot for kuki and hem go long river or lake for tekem wata. Long semtaem mi go askem ax for katem firewood. Hem tek longtaem for duim evri samting. Samfala taem mifala baem kokorako wea mifala mas killim dae and klinim.

Bihaen mifala kaikai, mifala go tekem samfala wata moa for swim. Samfala taem mifala sleep long kitchen. Sapos ruf hem leak taem hem rain, mifala savve sidaon and lean long wall nomoa for sleep mekem mifala no tuwet.

Mitufala evritaem preach long pipol wea mifala stap witim. Taem mifala kasem kongregeson or grup wea mifala visitim, olketa brata and sista barava kaen and welkamim mitufala. Nomata mifala kasem olketa hard samting long road, wei wea olketa brata and sista tinghae long visit bilong mitufala mekem mifala no tingim moa datwan.

Taem mitufala stap long haos bilong olketa brata and sista, mifala hapi for duim olketa waka long haos witim olketa. Datwan mekem olketa garem taem for go preaching witim mifala. Mifala no expectim olketa brata and sista for givim olketa naes samting or eni spesol kaikai wea olketa no fit for peim.

VISITIM OLKETA ISOLATED GRUP

Mitufala hapi tumas for visitim olketa isolated grup, wea olketa brata redyim staka samting for mifala duim. Mifala no garem staka taem for rest. (Mark 6:31) Long wanfala ples, wanfala hasband and waef invaetem evri Bible study bilong olketa for kam long haos bilong olketa for mifala joinim study bilong olketa. Fotifala Bible study nao kam. Oly and datfala sista duim samting olsem 20-fala study, and mi witim datfala brata duim nara 20-fala. Taem wanfala study hem finis, semtaem nomoa mifala duim narawan moa. Long aftanun mifala stopem study firstaem for duim olketa meeting, then bihaen mifala gohed for duim olketa Bible study moa. Samfala taem mifala finisim olketa Bible study bihaen eit klok long naet!

Taem mifala duim circuit visit long nara grup, long wanfala morning long eit klok mifala evriwan lusim haos for wakabaot go long narafala vilij for preach. Mifala werem olketa old kaleko and wakabaot farawe long bush, gogo samting olsem midolday nao mifala kasem territory. Then mifala werem klin kaleko and stretawe start for preach. Mifala staka pablisa bat tu-thri haos nomoa stap, so insaed 30 minute nomoa mifala finisim full territory. Then mifala wakabaot go long next vilij. Bihaen mifala preach long there, mifala mas wakabaot for staka hour moa for kasem bak haos. Nomata mifala iusim staka taem and strong bilong mifala, mifala preach for wanfala hour nomoa, so long firstaem diswan mekem mitufala wiki lelebet. Bat olketa brata and sista nating komplen. Olketa hapi nomoa.

Wanfala isolated grup long Taviranambo stap antap long maunten. Wanfala Witness famili stap long there long haos wea garem wanfala rum nomoa. Olketa duim olketa meeting long wanfala smol haos wea stap klosap. Seknomoa, brata wea mifala stap witim hem singaot big and sei: “Olketa brata!” Then from nara maunten samwan singaot and sei: “Wat ia?” Then brata hia singaot moa: “Circuit overseer hem kam nao!” Then narawan ansa moa: “Okay!” Then narawan hia singaotem go moa datfala message mekem olketa wea stap farawe herem tu. No longtaem bihaen, evriwan kam nao, gogo taem meeting start winim 100 pipol hipap.

TRANSPORT HEM NO ISI

Long 1996, mitufala kasem niu assignment for duim circuit waka long olketa maunten area klosap long Antananarivo. Samfala samting long datfala circuit hem no isi tu. Transport for kasem olketa farawe ples hem no isi. Mifala mas visitim wanfala grup long Beankàna (Besakay), wea hem 240 kilometer from Antananarivo. Bihaen mifala stretem fare bilong mifala witim draeva, mifala go insaed smol trak bilong hem wea gogo for datfala ples. Samting olsem 30-fala nara passenger nao insaed and antap long trak. Samfala leidaon long ruf bilong trak and olketa narawan standap kam long bihaen.

Gogo, datfala trak hem nogud, so mifala wakabaot nao. Bihaen mifala wakabaot for longfala taem, wanfala big trak hem kam. Hem barava fulap finis witim pipol and kago. Nomata olsem, draeva hem stop nomoa. Mifala go insaed, bat mas standap nao. Then mifala kasem wanfala river bat bridge hem nogud. So mifala wakabaot moa. Gogo mifala kasem wanfala smol vilij wea samfala spesol pioneer stap. Nomata mifala no plan for visitim olketa, mifala go preaching witim olketa taem mifala weit for olketa fixim datfala bridge and for nara trak kam pas.

Bihaen wan week wanfala trak hem kam, and mifala go moa. Road hem barava nogud tumas. Staka taem mifala mas help for pushim trak insaed wata wea kasem knee, and plande taem mifala foldaon tu. Long early morning mifala go daon from trak long wanfala smol vilij. Then for kasem ples wea mifala go long hem, mifala wakabaot thru long olketa rice farm wea wata hem deep tumas.

Hem firstaem for mifala visitim datfala ples, so mifala disaed for preach long samfala wea waka long olketa rice farm and for askem wea nao olketa Witness stap. Mifala hapi tumas for faendaot olketa wakaman hia olketa spiritual brata bilong mifala!

ENCOURAGEM OLKETA NARAWAN FOR DUIM FULL-TAEM SERVICE

Mitufala hapi for lukim olketa gud samting wea kamaot from mifala encouragem olketa narawan for duim full-taem service. Taem mifala visitim wanfala kongregeson wea garem naenfala regular pioneer, mifala encouragem evriwan long olketa for markem goal for helpem wanfala pablisa for pioneer. Taem mifala kam bak six month bihaen, datfala kongregeson garem 22 regular pioneer. Tufala pioneer sista encouragem dadi bilong olketa wea tufala evriwan elder, for duim regular pioneer. Tufala brata hia encouragem nara elder moa for duim regular pioneer. Lelebet taem bihaen, datfala mek-thri elder hem kamap spesol pioneer. Then hem and waef bilong hem duim circuit waka. Waswe long nara tufala elder? Wanfala hem duim circuit waka, and narawan hem waka long Kingdom Hall construction.

From mifala luksavve mifala no savve duim disfala waka long strong bilong mifala seleva, mifala sei thankiu long Jehovah evriday for help bilong hem. Nomata samfala taem mifala feel taed and savve sik, mifala hapi taem mifala tingim gud samting wea kamaot from waka wea mifala duim. Jehovah hem blessim waka bilong hem and mitufala hapi for share long disfala waka. Distaem mitufala spesol pioneer. Tru tumas, mitufala lanem “samting wea staka man no savve,” wea hem nao for depend long Jehovah, wea strongim mitufala for gohed.

[Blurb long page 6]

Mitufala lanem “samting wea staka man no savve,” wea hem nao for depend long Jehovah

[Map/Olketa piksa long page 4]

Madagascar, wea olketa kolem Big Red Island, hem mek-foa island wea barava big tumas long earth. Graon long there hem red, and hem garem staka difren kaen plant and animal

[Piksa long page 5]

Saed long transport hem no isi

[Olketa piksa long page 5]

Mitufala hapi for join insaed Bible study bilong olketa narawan