LAEF BILONG CHRISTIAN
‘Diswan Barava Strongim Paul and Hem Thankiu Long God’
Taem kongregeson long Rome herem Paul bae visitim olketa, samfala brata long kongregeson travel for samting olsem 64 kilometer for meetim hem. Wanem nao tingting bilong Paul taem hem lukim olketa brata hia? Bible sei: “Taem Paul lukim olketa, diswan barava strongim hem and hem thankiu long God.” (Ac 28:15) Paul nao man for evritaem encouragem olketa long kongregeson wea hem visitim. Bat long datfala taem wea hem prisoner, hem nao kasem encouragement.—2Co 13:10.
Distaem olketa circuit overseer visitim olketa kongregeson for strongim olketa brata and sista. Olsem iumi, samfala taem olketa tu savve feel taed, wari, and feel wikdaon. So taem circuit overseer and waef bilong hem visitim kongregeson bilong iumi, wanem nao iumi savve duim for strongim tufala, mekem iumi evriwan strongim each other? —Ro 1:11, 12.
Sapotim preaching arrangement. Taem circuit overseer lukim olketa pablisa mekem sakrifaes for sapotim preaching waka long datfala spesol week, datwan savve encouragem hem. (1Th 1:2, 3; 2:20) Maet iu savve auxiliary pioneer long datfala month bilong visit. Waswe, iu savve waka witim circuit overseer or waef bilong hem long preaching, or tekem hem or waef long Bible study bilong iu? Tufala bae hapi for waka witim eni pablisa. And tufala laek for waka witim olketa niu pablisa, or olketa pablisa wea maet tingse olketa no savve gud long hao for preach.
Provaedem kaikai or ples for stap. Waswe, iu savve volunteer for feedim circuit overseer or provaedem ples for hem stap? Taem iu duim olsem, datwan showimaot iu lovem circuit overseer and waef bilong hem. Tufala no expectim big samting. Samting wea simpol hem fitim.—Lu 10:38-42.
Lisin long kaonsel and followim direction. Circuit overseer laekem tumas for helpem iumi for kamap gud long ministry and long wei wea iumi fren witim Jehovah. Maet samfala taem circuit overseer need for givim strongfala kaonsel long kongregeson. (1Co 5:1-5) Taem iumi obeyim and followim direction bilong hem datwan savve mekem hem for hapi.—Heb 13:17.
Showimaot wei for tinghae. Storyim long circuit overseer and waef bilong hem abaotem gud samting wea iu kasem from visit bilong tufala. Iu savve go story stret long tufala, raetem smol note or wanfala card.—Col 3:15.