Encouragem Each Other
1. Visit bilong olketa traveling overseer hem givim iumi chance for duim wanem samting?
1 Aposol Paul hem raet long kongregeson long Rome and hem sei: “Mi laekem tumas for lukim iufala, mekem mi savve givim samfala spiritual present long iufala for strongim iufala; or mekem iumi encouragem each other from faith bilong each other, faith bilong iufala and faith bilong mi.” (Rom. 1:11, 12) Visit bilong olketa traveling overseer long taem bilong iumi tu hem givim iumi chance for encouragem each other.
2. Why nao olketa announcem visit bilong circuit overseer thrifala month bifor hem kam?
2 Kongregeson: Long samting olsem thrifala month bifor circuit overseer visitim kongregeson, olketa announcem datwan. Diswan hem givim chance for iumi changem schedule bilong iumi for mekem iumi kasem evribit gud samting. (Eph. 5:15, 16) Sapos iu waka, maet iu savve askem boss bilong iu for taem off from waka mekem iu savve sapotim field service long datfala week. Samfala pablisa olketa markem taem for auxiliary pioneer long month bilong datfala visit. Sapos iu plan for no stap long datfala week, waswe, iu savve changem olketa plan bilong iu mekem iu savve stap bak?
3. Wanem samting nao maet iumiseleva duim long taem bilong visit for kasem encouragement?
3 Main goal bilong visit bilong circuit overseer hem for encouragem and trainim iumi long field ministry. Waswe, iu savve ask for waka witim hem, or waswe, iu savve waka witim waef bilong hem sapos hem marit? Circuit overseer hem hapi for waka witim olketa difren pablisa, insaed diswan hem maet olketa wea niu pablisa or olketa wea laek for kasem moa savve long ministry. Evriwan savve lane from story bilong hem and iusim eni idea wea hem maet storyim. (1 Cor. 4:16, 17) Taem iu invaetem hem for kaikai witim iu, datwan bae mekem chance for kaban tugeta hem kamap moa big. (Heb. 13:2) From olketa tok bilong hem change for fitim need bilong kongregeson, lisin gud long olketa tok hia.
4. Hao nao iumi savve encouragem circuit overseer bilong iumi?
4 Circuit Overseer: Aposol Paul hem olsem olketa brata long olketa kongregeson. Hem kasem olketa hard samting and wari, and hem needim and thankiu long encouragement wea hem kasem. (2 Cor. 11:26-28) Taem kongregeson long Rome savve hao Paul, wea hem prisoner long datfala taem, bae kam long datfala ples, samfala go long Market bilong Appius for meetim hem—datwan hem 74 kilometer! “Taem Paul lukim olketa, hem sei thankiu long God and kasem strong.” (Acts 28:15) Long sem wei tu iu savve encouragem circuit overseer bilong iu. Showimaot “bigfala respect” long hem long wei wea iu barava willing for sapotim visit bilong hem. (1 Tim. 5:17) Talemaot and showimaot wei wea iu barava tinghae long samting wea hem duim for helpem iu. Hem and waef bilong hem bae hapi tumas taem tufala lukim faith and love bilong iu and wei wea iu gohed strong.—2 Thess. 1:3, 4.
5. Why nao iumi evriwan needim encouragement distaem?
5 Long olketa “nogud taem wea hard for deal witim” distaem, iumi evriwan barava needim encouragement. (2 Tim. 3:1) Disaed distaem for iu kam and share evribit long spesol week bilong waka witim circuit overseer. Iumi evriwan—olketa traveling overseer and olketa pablisa long olketa kongregeson—savve share long hapi wei for encouragem each other. Long wei olsem, bae iumi tu “gohed for comfortim narawan and buildimap narawan.”—1 Thess. 5:11.