“Bae Mi No Fraetem Eniwan”
“Nomata olketa kam for faetem mi, long datfala taem tu bae mi trustim hem.”—PS. 27:3.
HAO NAO THRIFALA SCRIPTURE HIA HELPEM IU FOR NO FRAET?
1. Psalm 27 bae helpem iumi for ansarem olketa wanem kwestin?
WHY nao iumi duim moa samting long preaching waka nomata staka nogud samting happen long world distaem? Why nao iumi willing for iusim staka taem and strong bilong iumi for duim preaching waka, nomata world garem staka problem saed long selen distaem? Wanem nao savve helpem iumi for no fraet nomata staka pipol wari tumas abaotem samting wea bae happen long future? Iumi savve kasem ansa for olketa kwestin hia from wanfala singsing bilong King David long Psalm 27.
2. (a) Taem man fraet, datwan savve mekem hem feel hao? (b) Bat waswe long olketa wea trust long Jehovah?
2 Long Psalm 27:1, David hem sei: “Jehovah hem laet bilong mi and hem sevem mi. Hu nao bae mi fraet long hem? Jehovah hem sef ples bilong mi for haed. Bae mi no fraetem eniwan.” Taem man fraet fogud long wanfala samting, datwan savve mekem hem wiki gogo hem no savve duim eni samting nao. Bat man wea trust long Jehovah hem no fraet. (1 Pet. 3:14) Sapos Jehovah hem kamap sef ples bilong iumi for haed and iumi trust long hem, iumi “bae stap sef and no fraetem eni nogud samting.” (Prov. 1:33; 3:25) Why nao iumi fit for sei olsem?
“JEHOVAH HEM LAET BILONG MI AND HEM SEVEM MI”
3. Long wanem wei nao Jehovah hem laet bilong iumi, bat wanem nao iumiseleva mas duim?
3 Taem Bible hem sei “Jehovah hem laet bilong mi,” datwan minim Jehovah teachim iumi tru samting. (Ps. 27:1) Wanfala laet savve helpem iumi for luksavve long danger samting or eni samting wea satem road, bat laet hia hem no savve aotem datwan. Iumiseleva nao mas duim samting for misstim datfala danger. Long sem wei, Jehovah helpem iumi for luksavve long mining bilong olketa samting wea happen long world. Hem warnim iumi tu abaotem olketa danger samting bilong disfala nogud world. Hem givim iumi gudfala advaes insaed long Bible wea helpem iumi evritaem. Man wea raetem psalm sei olketa law bilong God mekem hem wise “winim olketa enemy” and “winim olketa teacher” bilong hem. Taem iumi followim olketa Bible principle, iumi tu savve kamap barava wise.—Ps. 119:98, 99, 130.
4. (a) Why nao David sei Jehovah sevem hem? (b) Wanem taem nao Jehovah bae sevem olketa wea worshipim hem?
4 Samting wea David talem long Psalm 27:1 showimaot hem no forgetim olketa samting wea Jehovah duim finis for sevem hem. Olsem example, Jehovah sevem hem from wanfala lion and wanfala bear. Jehovah helpem hem for winim datfala giant Goliath tu. Bihaen, Jehovah sevem David long 3-fala taem wea King Saul trae for spiarim hem. (1 Sam. 17:37, 49, 50; 18:11, 12; 19:10) Dastawe David sei: “Jehovah . . . hem sevem mi”! Olsem Jehovah sevem David, bae hem sevem pipol bilong hem tu. Wanem taem nao bae hem duim datwan? Bae hem sevem olketa “long datfala big trabol” wea bae kam.—Rev. 7:14; 2 Pet. 2:9.
TING GO BAK LONG OLKETA TAEM WEA JEHOVAH HELPEM IU
5, 6. (a) Hao nao iu feel taem iu ting go bak long olketa taem wea Jehovah helpem iu finis? (b) Why nao hem gud for iumi tingim wei wea Jehovah helpem pipol bilong hem long bifor?
5 Iumi savve lanem wanfala important samting wea bae helpem iumi for no fraet taem iumi readim Psalm 27:2, 3. (Readim.) David ting go bak long olketa taem wea Jehovah sevem hem. (1 Sam. 17:34-37) Datwan helpem hem for no fraet, and strongim hem for deal witim olketa barava hard samting. Waswe, iu tingim olketa taem wea Jehovah helpem iu finis? Waswe, datwan helpem iu for no fraet? Olsem example, waswe, enitaem iu prea strong long Jehovah abaotem wanfala hard samting wea kasem iu? Waswe, Jehovah helpem iu long wei for givim iu wisdom and strong for deal witim datwan? Waswe, Jehovah helpem iu for stretem wanfala problem wea spoelem hapi wea iu kasem long worship bilong hem? Or waswe, Jehovah helpem iu for duim samfala waka moa long organization bilong hem? (1 Cor. 16:9) Hao nao iu feel taem iu ting go bak long olketa samting hia? Taem iu ting go bak long olketa samting hia, datwan shud mekem iu luksavve Jehovah fit for helpem iu for stretem eni problem or winim eni hard samting wea kasem iu.—Rom. 5:3-5.
6 Wanem nao bae iumi duim sapos wanfala gavman laek for finisim organization bilong iumi Olketa Jehovah’s Witness? No longtaem go nomoa samfala man trae for duim datwan, bat olketa no fit for finisim iumi. Sapos iumi tingim wei wea Jehovah helpem pipol bilong hem long bifor, bae iumi no fraet nomata wanem samting kasem iumi long future.—Dan. 3:28.
TINGHAE LONG TRU WORSHIP
7, 8. (a) Wanem nao David askem long Jehovah long Psalm 27:4? (b) Wanem nao spiritual temple bilong Jehovah, and wanem nao iumi mas duim for worship long datfala temple?
7 Nara samting wea bae helpem iumi for no fraet hem for tinghae long tru worship. (Readim Psalm 27:4.) Long taem bilong David, “haos bilong Jehovah” hem datfala tabernacle, wea hem wanfala tent. David nao hem redyim evri samting for son bilong hem Solomon wakem wanfala temple wea luk naes tumas. Staka handred year bihaen, Jesus hem sei wanfala taem bae kam wea pipol bae no need for go long datfala temple for worshipim Jehovah. (John 4:21-23) Long Hebrew chapter 8 go kasem 10, aposol Paul sei wanfala spiritual temple hem start long 29 C.E. taem Jesus baptaes and givim hemseleva for duim wanem Jehovah laekem. (Heb. 10:10) Disfala spiritual temple hem arrangement wea Jehovah mekem for iumi savve worshipim hem long wei wea hem acceptim. Hem bae acceptim worship bilong iumi sapos iumi showimaot faith long ransom sakrifaes bilong Jesus. Wanem nao iumi mas duim for worship long datfala temple? Iumi mas prea long Jehovah “witim full heart and strongfala faith,” and iumi mas no fraet for preach long nara pipol abaotem hem. And tu, iumi worship long disfala temple taem iumi go long olketa meeting and duim Famili Worship. (Heb. 10:22-25) Sapos iumi tinghae long tru worship, bae iumi gohed for duim evri samting hia long olketa last day distaem.
8 Pipol bilong Jehovah raonem full world duim moa samting long ministry, lanem olketa niu languis, and muv go long olketa ples wea needim samfala pablisa moa for preach. Samting wea olketa duim showimaot olketa garem sem tingting olsem David wea raetem Psalm 27. Hem askem Jehovah for wanfala samting nomoa. Hem laek for “lukim naesfala wei bilong Jehovah, and gohed for lukluk long temple bilong hem.” Pipol bilong Jehovah distaem laekem hem for blessim olketa, and olketa laek for gohed worshipim hem nomata wanem samting hem happen.—Readim Psalm 27:6.
TRUST LONG GOD FOR HELPEM IU
9, 10. Wanem nao mining bilong samting wea David talem long Psalm 27:10?
9 Samting wea David talem showimaot hem barava trustim Jehovah for helpem hem. Hem sei: “Nomata sapos dadi and mami bilong mi lusim mi, Jehovah nao bae lukaftarem mi.” (Ps. 27:10) Iumi savve dadi and mami bilong David no lusim hem bikos long samting wea Bible talem long 1 Samuel chapter 22. Bat distaem datwan hem happen long staka pipol. Plande hia wea famili bilong olketa barava againstim olketa kasem help and protection long Christian kongregeson.
10 Jehovah bae lukaftarem pipol bilong hem nomata sapos olketa narawan lusim olketa. So iumi sure hem bae lukaftarem iumi tu long eni hard taem wea iumi kasem. Olsem example, sapos iumi wari abaotem hao for kasem need for famili bilong iumi, iumi shud no forgetim Jehovah bae helpem iumi. (Heb. 13:5, 6) Hem minim samting wea kasem iumi and hem savve wanem iumi needim tu.
11. Taem iumi showimaot iumi trustim Jehovah long wei for honest, datwan mekem pipol garem wanem tingting abaotem iumi? Storyim example.
11 Tingim Victoria, wea hem wanfala Bible study long Liberia. Man wea hem stap witim lusim hem and thrifala pikinini bilong hem. Nomata hem no garem haos and no garem waka, hem gohed studyim Bible gogo hem baptaes. Then wanday, gele bilong hem wea 13 year hem faendem wanfala paos wea garem staka selen insaed. Victoria and gele bilong hem no kaontem datfala selen, nogud datwan bae mekem tufala laek for keepim selen hia. Tufala kwiktaem lukaotem soldia wea ownim datfala basket. Taem tufala faendem hem, hem sei sapos evriwan honest olsem Olketa Jehovah’s Witness, pipol evriwea long world bae stap gud and garem peace. Victoria showim datfala soldia promis bilong Jehovah insaed long Bible abaotem niu world wea bae kam. From soldia hia tinghae long strongfala faith bilong Victoria and wei wea hem honest, hem givim bigfala reward long hem. Pipol evriwea long world savve Olketa Jehovah’s Witness honest. Iumi honest bikos iumi barava trustim Jehovah for lukaftarem iumi.
12. Taem iumi gohed worshipim Jehovah nomata iumi lusim waka or selen, datwan hem showimaot wanem samting? Storyim example.
12 Thomas hem wanfala anbaptaes pablisa long Sierra Leone. Hao nao bae iu feel sapos samting wea kasem Thomas hem kasem iu? Hem start for waka olsem skul teacher bat hem no kasem pei for klosap full year. Bifor Thomas fit for kasem selen hia hem mas interview witim man wea ranem skul. Man hia hem wanfala priest and hem talem Thomas datfala skul no acceptim teaching bilong Olketa Jehovah’s Witness. Datfala priest sei sapos Thomas laek for gohed waka hem mas lusim religion bilong hem. Thomas disaed for finis from datfala waka nomata hem no kasem datfala selen. Bihaen, Thomas kasem waka for repairim olketa radio and mobile phone. Staka experience showimaot bae iumi kasem wanem iumi needim sapos iumi trust long Jehovah. From Jehovah wakem evri samting and hem evritaem protectim pipol bilong hem, iumi savve hem bae lukaftarem iumi.
13. Why nao olketa brata and sista long olketa poor kantri barava busy long preaching waka?
13 Long staka poor kantri olketa brata and sista barava busy long preaching waka. Why nao olsem? Report bilong wanfala branch office hem sei: “Staka pipol wea laek studyim Bible olketa no waka for selen, so olketa garem moa taem for study. Olketa brata and sista tu garem moa taem for duim preaching waka. Staka pipol long territory luksavve distaem hem olketa last day bikos long olketa nogud samting wea happen long ples bilong olketa.” Long nara kantri staka pablisa garem winim thrifala Bible study. Wanfala missionary wea stap long there for winim 12-fala year hem sei: “Olketa brata and sista garem staka taem for preach and duim olketa Bible study bikos laef bilong olketa hem simpol and olketa no busy long staka samting.”
14. God savve protectim datfala big crowd long olketa wanem wei?
14 Jehovah promis for helpem, protectim, and sevem pipol bilong hem olsem wanfala grup, and iumi barava sure hem bae duim wanem hem promisim. (Ps. 37:28; 91:1-3) Bible hem sei wanfala big crowd nao bae sev long “datfala big trabol.” (Rev. 7:9, 14) So datwan minim God bae protectim datfala big crowd. Hem bae no letem eniwan for finisim evri pipol bilong hem long olketa last day bilong disfala world. Jehovah bae protectim olketa long narafala wei tu. Hem givim olketa evri samting wea olketa needim for helpem olketa for no givap and for gohed fren witim hem. And long Armageddon, Jehovah bae protectim pipol bilong hem taem hem sevem olketa.
“PLIS JEHOVAH, TEACHIM MI OLKETA WEI BILONG IU”
15, 16. Wanem gud samting nao iumi kasem taem iumi followim instruction wea kam from God? Storyim example.
15 For iumi no fraet iumi mas gohed kasem instruction from God. David hem sei: “Plis Jehovah, teachim mi olketa wei bilong iu, and leadim mi long stretfala road.” (Ps. 27:11) Sapos iumi laekem God for teachim iumi, iumi mas lisin gud long samting wea Bible talem and instruction from organization bilong Jehovah. Iumi mas kwiktaem for followim wanem iumi lanem tu. Olsem example, staka brata and sista duim samting finis for followim wise kaonsel wea organization talem for mekem laef bilong olketa simpol. Olketa changem bak kaon bilong olketa and salem samting wea olketa no needim. So taem economy long kantri hem kamap nogud, olketa no garem bigfala problem saed long selen. Distaem olketa no need for duim staka waka olsem bifor for peim samting wea olketa no barava needim, and olketa garem moa taem for duim ministry. Iumi evriwan shud tingim disfala kwestin, ‘Waswe, mi kwiktaem followim evri samting mi readim long Bible and olketa buk wea kam from datfala wakaman wea faithful and wise, nomata taem datwan hem no isi?’—Matt. 24:45.
16 Sapos iumi letem Jehovah for teachim and leadim iumi long laef, bae iumi no need for fraetem eni samting. Wanfala brata wea hem regular pioneer long America hem apply for difren position long company wea hem waka long hem. Sapos hem kasem datfala waka bae datwan helpem hem and full famili bilong hem for gohed pioneer. Bat boss bilong hem sei hard tumas for hem kasem datfala position bikos hem no garem pepa. Sapos semkaen samting hem kasem iu, waswe, bae iu sorre bikos iu chus for duim full-taem service and no go long college or university for kasem pepa? Tufala week bihaen, company sakem datfala boss and niu boss askem brata hia abaotem olketa goal bilong hem. Hem talem boss hem and waef bilong hem tufala Jehovah’s Witness, and tufala full-taem minister and laek for gohed long datfala waka. Semtaem nomoa, boss hia sei: “Dastawe iu difren from olketa narawan! Taem dadi bilong mi klosap for dae, tufala Jehovah’s Witness visitim hem evriday and readim Bible long hem. Long datfala taem mi disaed sapos enitaem mi garem chance for helpem eni Jehovah’s Witness, bae mi duim datwan.” Long next morning, brata hia kasem datfala position wea nara boss no laek givim long hem. Taem Kingdom hem first samting long laef bilong iumi, Jehovah bae givim iumi evri samting wea iumi needim, olsem hem promis for duim.—Matt. 6:33.
IUMI MAS GAREM FAITH AND HOPE
17. Wanem nao bae helpem iumi for no fraetem olketa samting wea bae happen long future?
17 David hem sei: “Sapos mi no bilivim bae mi lukim hao Jehovah hem gud tumas taem mi laef yet, bae mi no garem eni hope nao!” (Ps. 27:13) Tru nao, David garem faith long olketa promis bilong Jehovah and diswan mekem hem garem hope. Iumi tu mas garem faith and hope. Tingim hao nao bae laef bilong iumi sapos God no givim iumi eni hope and iumi no savve long olketa samting wea Psalm 27 story abaotem. So long olketa last day distaem, iumi mas gohed prea long Jehovah for strongim iumi and for sevem iumi long Armageddon.—Readim Psalm 27:14.
[Piksa long page 23]
Taem David ting go bak long olketa taem wea Jehovah sevem hem, datwan mekem hem no fraet
[Piksa long page 25]
Waswe, taem iumi no garem waka iumi iusim datfala chance for duim moa samting long ministry?