Peter and Ananias Laea​—Wanem Nao Iumi Savve Lanem From Diswan?

Olsem iu savve, laea hem samting iu talem wea no tru. Waswe, enitaem iu laea?—a Samfala wea big finis wea worshipim God, olketa laea tu. Maet iu savve long wanfala man long Bible wea hem laea. Nem bilong hem, Peter, and hem wanfala long 12-fala aposol bilong Jesus. Bae iumi storyim why nao gogo Peter hem laea.

Bihaen olketa arrestim Jesus, olketa tekem hem long haos bilong hae priest. Long datfala taem hem gogo for morning. Peter go insaed long area midol long haos bilong hae priest and no eniwan luksavve long hem. Bat taem Peter go klosap long fire, haosgele bilong hae priest wea letem hem kam insaed luksavve long hem. Hem sei long Peter: “Mi lukim iu tu iu gogo witim Jesus.” Peter fraet so hem denyim datwan.

Bible sei, bihaen datwan “narafala gele lukim hem” and sei: “Disfala man tu hem savve gogo witim Jesus.” Bat Peter denyim datwan moa. Then olketa narawan kam long hem and sei: “Iu wanfala disaepol bilong hem tu ia.”

Peter fraet fogud so hem sei: “Mi no savve long disfala man!” Datwan hem mek-thri team wea hem laea. Then wanfala kokorako hem krae and Jesus luk go long Peter. Peter tingim samting wea Jesus talem long hem tu-thri hour bifor. Hem sei: “Bihaen mek-thri taem wea iu sei iu no savve long mi, wanfala kokorako bae krae.” Peter sorre fogud and hem krae!

Waswe, samting olsem savve happen long iu tu?— Maet iu long skul and herem olketa student story abaotem Olketa Jehovah’s Witness. Wanfala pikinini maet sei: “Olketa no singim National Anthem,” and narawan sei: “Olketa no vote.” Then narawan maet sei tu: “Olketa no biliv long Jesus bikos olketa no celebratem Christmas.” Then wanfala sei long iu, “Iu tu wanfala Jehovah’s Witness, iaman?” Wanem nao bae iu talem?—

Iu mas redi evritaem mekem taem samting olsem happen long iu, bae iu savve wanem for talem. Peter no redi, so taem hem seke long samting wea happen, hem laea nao! Bat bihaen, hem barava sorre long wanem hem duim and God forgivim hem.

Nara disaepol bilong Jesus wea laea tu hem Ananias. Bat God no forgivim hem and waef bilong hem, Sapphira. Tufala disaed for laea. Iumi bae storyim why nao God no forgivim tufala.

Tenfala day bihaen Jesus lusim olketa aposol and go bak long heven, samting olsem 3,000 pipol nao baptaes long Jerusalem. Plande long olketa wea kam for celebratem day bilong Pentecost long Jerusalem, kam from olketa farawe kantri. Bihaen olketa baptaes olketa laek for stap lelebet taem long Jerusalem for lanem samfala samting moa. So samfala disaepol bilong Jesus iusim selen bilong olketa seleva for helpem olketa.

Ananias and waef bilong hem salem pis land for kasem selen for helpem olketa niu wan wea baptaes. Taem Ananias givim selen long olketa aposol, hem sei hem givim evri selen wea tufala kasem for datfala pis land. Bat hem laea! Hem keepim samfala selen for hemseleva! God mekem Peter luksavve long diswan, so Peter sei long Ananias: “Iu no laea long olketa man ia, God nao iu laea long hem.” Semtaem nomoa Ananias foldaon and dae nao! Samting olsem thrifala hour bihaen, waef bilong hem kam. Hem no savve wanem happen long hasband bilong hem, so hem tu laea. Semtaem nomoa hem foldaon and dae tu.

Iumi lanem barava important samting from diswan: Iumi evriwan mas talem tru samting evritaem! Bat iumi evriwan savve duim mistek, especially taem iumi young. Iumi hapi bikos Jehovah lovem iumi and willing for forgivim iumi, olsem hem duim long Peter, iaman?— Bat tingim, iumi mas no laea. Sapos enitaem iumi mistek and laea, iumi need for barava askem God for forgivim iumi. Masbi hem nao wanem Peter duim, dastawe God forgivim hem. Sapos iumi traem best for no laea moa, God bae forgivim iumi tu!