Waswe, Hem Fitim for Prea Long Olketa Saint?

TAEM iumi kasem hard taem, iumi laek askem samwan for helpem iumi. Maet iumi askem wanfala fren for helpem iumi wea iumi savve hem bae minim iumi and wea kasem semkaen hard taem or problem. From datfala fren hem kaen long iumi and minim iumi, bae iumi barava tinghae long hem.

Samfala pipol wea kasem hard taem prea long olketa saint bikos olketa tingse olketa saint bae minim olketa. Olketa fraet for prea long God bikos olketa tingse God hem holy tumas. Olketa tingse olketa saint bae minim olketa bikos olketa saint tu kasem test and hard taem wea olketa man kasem. So olketa prea long olketa saint abaotem problem bilong olketa. Olsem example, olketa prea long “Saint” Anthony bilong Padua taem olketa lusim samting wea barava important long olketa. Taem animal bilong olketa sik, olketa prea long “Saint” Francis bilong Assisi, and taem olketa feel olsem olketa no wei nao, olketa prea long “Saint” Jude Thaddeus.

Bat waswe, wei for prea long olketa saint hem teaching wea kam from Bible? Iumi laek for prea long stretfala wei mekem God herem prea bilong iumi. So iumi laek for savve long tingting bilong God abaotem wei for prea long olketa saint.

WASWE, WEI FOR PREA LONG OLKETA SAINT HEM TEACHING WEA KAM FROM BIBLE?

Wei for prea long olketa saint hem samting wea Catholic Church teachim. Olketa bilivim olketa saint savve story long God for olketa. Datfala buk, New Catholic Encyclopedia hem sei: “Olketa saint savve go long God for askem Hem for showimaot mercy long olketa man.” So pipol wea prea long olketa saint tingse from olketa saint garem spesol position, olketa savve askem God for helpem olketa.

Waswe, disfala biliv hem kam from Bible? Samfala sei toktok bilong aposol Paul sapotim disfala biliv for prea long olketa saint. Olsem example, taem hem raet long olketa Christian long Rome, hem sei: “Olketa brata, from iumi biliv long Lord bilong iumi Jesus Christ and holy spirit bilong God mekem iumi for garem love, mi laekem tumas for iufala prea strong witim mi for God helpem mi.” (Rome 15:30) Waswe, Paul askem olketa Christian for story long God for hem? Nomoa. Toktok bilong Paul showimaot hem stret for iumi askem nara Christian for prea long God for helpem iumi. Bat datfala toktok no sapotim wei for prea long samwan wea iumi tingse hem stap long heven for askem God for helpem iumi. Hao nao iumi savve long datwan?

Long Gospel bilong John, Jesus sei: “Mi nao road, mi nao truth, and mi nao laef. Mi nomoa road for man go long Dadi long heven.” (John 14:6) Jesus sei tu: “Eni samting wea iufala askem long Dadi long nem bilong mi, hem bae givim long iufala.” (John 15:16, The New Jerusalem Bible) Jesus no talem iumi for prea long hem, then hem bae go story long God for iumi. Bat for God herem prea bilong iumi, iumi mas prea long God long nem bilong Jesus and no long eniwan moa.

Taem olketa disaepol askem Jesus for teachim olketa hao for prea, Jesus sei long olketa: “Taem iufala prea, iufala savve sei: ‘Dadi bilong mifala, mifala laekem nem bilong iu for holy.’” (Luke 11:2) So taem iumi prea, iumi mas no prea long Jesus or eni nara man, bat iumi mas prea long God. Toktok bilong Jesus hem barava showimaot klia iumi mas prea long God long nem bilong Jesus Christ and no long olketa saint.

Prea hem important part long worship bilong iumi and iumi mas worshipim God nomoa. Sapos iumi worshipim eni nara man datwan hem barava no followim wanem Bible talem. (John 4:23, 24; Revelation 19:9, 10) Dastawe iumi mas prea long God nomoa.

WASWE, HEM FITIM FOR IU FRAET FOR PREA LONG GOD?

Long Sermon bilong Jesus long Maunten, hem storyim tokpiksa abaotem pikinini wea askem dadi for givim hem kaikai. Waswe, bae dadi givim ston long pikinini bilong hem wea ask for bred? Or waswe, bae dadi givim snek long pikinini sapos hem ask for fish? (Matthew 7:9, 10) Hard for dadi wea lovem pikinini bilong hem for duim datwan!

Tingim sapos pikinini bilong iu hem barava laekem wanfala samting. Iu fren gud witim hem, and iu man wea olketa narawan no fraet for story witim iu. Nomata olsem, pikinini hia hem fraet for askem iu samting wea hem laekem, so hem talem narawan nao for kam askem iu. Hao nao bae iu feel? Hao sapos evritaem hem laekem samting hem askem narawan hia nao for kam story long iu, and iu luksavve hem bae gohed for duim olsem? Waswe, bae iu hapi long samting wea hem duim? Nomoa! Dadi and mami wea lovem pikinini bae laekem pikinini for no fraet for askem samting wea hem needim long tufala.

Taem Jesus explainim datfala tokpiksa abaotem pikinini wea askem kaikai, hem sei: “Iufala olketa man wea sin bat iufala givim olketa gudfala samting long olketa pikinini bilong iufala, iaman? Sapos olsem, Dadi bilong iufala long heven bae barava givim olketa gudfala samting wea iufala askem long hem tu!” (Matthew 7:11) Tru tumas, olketa dadi and mami laekem tumas for givim gud samting long pikinini bilong olketa. Dadi bilong iumi long heven tu hem barava laekem tumas for herem and ansarem prea bilong iumi.

God laekem iumi for prea long hem nomata maet iumi feel olsem iumi no fit for story witim hem. God no markem olketa narawan for herem olketa prea bilong iumi. Bible hem sei: “Putim evri hevi bilong iu long hand bilong Jehovah, and hem nao bae strongim iu.” (Psalm 55:22) Winim wei for prea long olketa saint or narawan nao for story long God for iumi, hem gud for tingim Jehovah God laekem tumas for herem olketa prea bilong iumi.

Dadi bilong iumi long heven hem tingim iumi wanwan. Taem iumi kasem problem hem laek for helpem iumi and hem laekem iumi for fren gud witim hem. (James 4:8) Iumi hapi tumas iumi savve prea long God, wea hem “herem prea” bilong iumi!—Psalm 65:2.