Waswe, Iu Tinghae Long Wanem God Givim Long Iu?
“Iumi kasem holy spirit bilong God. God givim iumi diswan mekem iumi minim olketa samting wea hem kaen tumas for givim long iumi.”—1 COR. 2:12.
1. Hao nao tingting bilong staka pipol long olketa gud samting wea olketa garem?
HEM wei bilong staka pipol for no tinghae long olketa gud samting wea olketa garem. Olsem example, man wea growap insaed long rich famili maet no tinghae long olketa gud samting wea hem garem. Maet samfala young wan, wea olketa no mature yet, no luksavve long wanem hem barava important samting long laef, so olketa no tinghae long olketa gud samting wea olketa garem.
2, 3. (a) Wanem nao important long staka young wan, and why nao olketa young Christian mas stap klia long kaen tingting olsem? (b) Wanem nao savve helpem iumi for tinghae long truth?
2 Iufala young wan, wanem nao hem important long laef bilong iu? Staka young wan long world distaem tinghae long olketa material samting nomoa. Olsem example, maet olketa laek garem gud waka, naes haos, or niu technology. Bat sapos olketa samting hia nomoa important long laef bilong iumi, bae iumi no fren gud witim God, wea datwan nao shud main important samting long laef bilong iumi. Sapos iu wanfala young wan wea growap long truth, datwan hem wanfala nambawan blessing from God. (Matt. 5:3) Sapos iu no tinghae long datfala blessing wea iu kasem from God, maet datwan bae spoelem laef bilong iu.
3 No letem datwan happen long iu. Iumi bae storyim samfala example long Bible wea bae helpem iu for tinghae long truth. Olketa example hia bae helpem olketa young wan and iumi evriwan for tinghae long olketa spiritual samting wea Jehovah givim long iumi.
SAMFALA WEA NO TINGHAE
4. Wanem nao 1 Samuel 8:1-5 talem abaotem tufala son bilong Samuel?
4 Bible story abaotem samfala wea savve long Jehovah from taem wea olketa smol, bat gogo olketa no tinghae long datwan. Tingim famili bilong profet Samuel. Hem faithful for worshipim Jehovah from taem wea hem smol. (1 Sam. 12:1-5) Samuel showimaot gudfala example, bat tufala boy bilong hem, Joel and Abijah, no followim example bilong hem. Tufala man for raverave and duim olketa nogud samting.—Readim 1 Samuel 8:1-5.
5, 6. Wanem training nao olketa son and granson bilong Josiah kasem, bat wanem nao olketa duim?
5 Olketa son bilong King Josiah tu olsem. Josiah lovem Jehovah and faithful long hem. Taem olketa faendem wanfala buk wea garem olketa Law bilong Jehovah and olketa readim datwan long Josiah, hem followim wanem datfala buk talem. Hem aotem wei for worshipim idol and spiritism from Judah, and hem encouragem olketa Israelite for obeyim Jehovah. (2 Ki. 22:8; 23:2, 3, 12-15, 24, 25) Gudfala training wea olketa son bilong Josiah kasem from dadi bilong olketa, hem nambawan spiritual blessing from God. Bat taem thrifala son bilong Josiah and wanfala granson bilong hem kamap king bihaen, no eniwan long olketa tinghae long datfala spiritual blessing wea olketa kasem.
6 Taem son bilong Josiah, Jehoahaz kamap king, hem duim olketa “samting wea Jehovah no hapi long hem.” Hem rul for thrifala month nomoa, then king bilong Egypt putim hem long prison, and gogo hem dae long there. (2 Ki. 23:31-34) Brata bilong hem Jehoiakim rul for 11-fala year. Hem tu no tinghae long gudfala training wea hem kasem from dadi bilong hem. From Jehoiakim duim staka nogud samting, Jeremiah sei olsem abaotem hem: “Bae olketa berem hem olsem hao olketa berem wanfala donkey.” (Jer. 22:17-19) Nara son bilong Josiah, Zedekiah, and granson bilong hem, Jehoiachin, tufala tu duim staka nogud samting, and nating followim gudfala example bilong Josiah.—2 Ki. 24:8, 9, 18, 19.
7, 8. (a) Hao nao Solomon showimaot hem no tinghae long gudfala training wea hem kasem? (b) Wanem nao iumi lanem from olketa Bible example wea iumi storyim?
7 King Solomon kasem gudfala training from dadi bilong hem David. Nomata long firstaem Solomon hem faithful long Jehovah, gogo hem no tinghae long training wea hem kasem and hem no faithful nao. Bible sei: “Taem Solomon hem olo, olketa waef bilong hem switim hem for worshipim olketa nara god, and hem no lovem God bilong hem Jehovah long full heart, olsem dadi bilong hem David.” (1 Ki. 11:4) Solomon hem spoelem wei wea hem fren witim Jehovah.
8 Evriwan hia kasem gudfala training taem olketa young and garem chance for fren gud witim Jehovah. Nomata olsem, olketa no followim gudfala training wea olketa kasem. Bat Bible storyim staka young wan wea followim training wea olketa kasem and gohed fren gud witim God. Distaem bae iumi storyim samfala young wan wea showimaot gudfala example.
SAMFALA WEA TINGHAE LONG TRAINING WEA OLKETA KASEM
9. Hao nao olketa son bilong Noah showimaot nambawan example? (Lukim piksa long start bilong study.)
9 Olketa son bilong Noah showimaot nambawan example. Olketa garem privilege for helpem Noah wakem ark for sevem famili bilong olketa. Olketa luksavve olketa mas obeyim Jehovah, and olketa go insaed long ark bifor Flood hem kam. (Gen. 7:1, 7) Wanem nao kamaot from wei wea olketa obey? Long Genesis 7:3 hem sei olketa tekem olketa animal insaed ark, “mekem olketa animal hia no finis from earth and gohed bornem pikinini bilong olketa.” Olketa man tu sev. From olketa son bilong Noah tinghae long training wea olketa kasem from dadi, olketa garem privilege for sevem olketa man for no finis from earth, and for startim tru worship moa.—Gen. 8:20; 9:18, 19.
10. Hao nao fofala young Israelite showimaot olketa tinghae long training wea olketa kasem?
10 Staka handred year bihaen, fofala young Israelite showimaot olketa luksavve long samting wea barava important long laef. Long 617 B.C.E., olketa long Babylon tekem Hananiah, Mishael, Azariah, and Daniel olsem prisoner go long Babylon. From olketa young, and kleva, and luk naes, hem isi for olketa garem gudfala laef long Babylon, bat olketa rejectim datwan. Fofala hia tingim olowe training wea olketa kasem and hao olketa worshipim Jehovah. From datwan Jehovah barava blessim olketa.—Readim Daniel 1:8, 11-15, 20.
11. Hao nao Jesus iusim wanem hem lanem from Dadi bilong hem for helpem nara pipol?
11 Jesus nao showimaot nambawan example for tinghae long olketa spiritual samting. Jesus barava tinghae long evri samting wea Dadi bilong hem, Jehovah, teachim long hem. Dastawe hem sei: “Mi storyim nomoa samting wea Dadi teachim long mi.” (John 8:28) Hem laek for storyim wanem hem lanem long nara pipol mekem olketa tu savve kasem gud samting from datwan. Hem sei: “Mi mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.” (Luke 4:18, 43) Pipol long world nating tinghae long olketa spiritual samting, dastawe Jesus givim warning long olketa disaepol bilong hem for “no olsem pipol long world.”—John 15:19.
TINGHAE LONG WANEM GOD GIVIM LONG IU
12. (a) Hao nao 2 Timothy 3:14-17 hem fitim staka young Christian distaem? (b) Wanem nao samfala kwestin wea olketa young Christian shud ting raonem?
12 Sapos dadi and mami bilong iu lovem Jehovah, training wea iu kasem from tufala hem wanfala nambawan blessing wea God givim long iu. Samting wea Bible talem abaotem Timothy maet hem fitim iu tu. (Readim 2 Timothy 3:14-17.) Dadi and mami bilong iu lanem iu abaotem Jehovah and wanem iu mas duim for mekem Hem hapi. Maet tufala lanem iu from taem wea iu baby yet. Diswan helpem iu for kamap “wise” and hem “savve sevem iu bikos iu garem faith long Christ Jesus.” And tu, hem helpem iu for “barava fit and redi” for duim waka bilong God. Bat waswe, iu barava tinghae long wanem God givim long iu? Ting raonem olketa kwestin hia: ‘Waswe, mi tinghae long wei wea mi insaed long bigfala sekson long bifor and distaem wea faithful for worshipim Jehovah? Waswe, mi tinghae long wei wea mi wanfala long samfala nomoa wea God savve long olketa? Waswe, mi luksavve mi garem spesol privilege for savve long truth?’
Waswe, iu tinghae long wei wea iu insaed long bigfala sekson long bifor and distaem wea faithful for worshipim Jehovah? (Paragraf 9, 10, 12 storyim diswan)
13, 14. Wanem nao samfala wea growap long truth maet laek for traem, bat why nao datwan hem krangge samting for duim? Storyim example.
13 Samfala young wan wea growap insaed truth maet no tinghae long spiritual paradaes wea iumi insaed and no luksavve world bilong Satan hem nogud tumas. Samfala laek for traem laef long world. Bat waswe, bae iu ran front long wanfala trak wea speed kam bikos iu laek for faendemaot sapos iu bae garekil or dae taem hem bangam iu? Datwan hem krangge samting for duim! Sem samting tu, hem krangge samting for traem laef long world bikos bae iu kasem barava nogud samting from datwan.—1 Pet. 4:4.
14 Gener, hem wanfala young brata long Asia wea growap long truth. Hem baptaes taem hem 12 year. Taem hem teenager, hem laek traem laef long world bikos hem tingse datwan bae mekem hem free for duim wanem hem laekem. Gener start for laea long famili bilong hem and duim haed olketa nogud samting. Taem hem kasem 15 year, hem start for drink and tok swear olsem olketa fren bilong hem. Staka taem hem savve kam bak leit long haos bikos hem savve plei snooker and olketa raf video game witim olketa fren bilong hem. Gogo hem luksavve olketa nogud samting wea hem duim no mekem hem hapi or satisfae. Distaem hem strong moa for worshipim Jehovah. Hem sei samfala taem hem still kasem test for duim samting wea pipol long world duim, bat wei wea Jehovah hapi long hem nao hem barava important.
15. Hem gud for iumi evriwan ting raonem wanem samting?
15 Nomata sapos dadi and mami bilong iu no worshipim Jehovah, hem gud for iu ting raonem nambawan privilege wea iu garem for savve long God and worshipim hem! Staka billion pipol stap long earth, and iu nao wanfala long olketa wea Jehovah leadim iu kam long hem. Datwan hem nambawan blessing! (John 6:44, 45) So nomata iumi growap insaed truth or nomoa, iumi evriwan savve barava hapi from iumi savve long truth. (Readim 1 Corinth 2:12.) Gener sei: “Mi man nating olsem ia, hao nao Jehovah wea ownim full universe hem savve long mi?” (Ps. 8:4) Wanfala Christian sista sei: “Olketa student savve feel praod sapos teacher hem savve long olketa. So for Jehovah wea hem Nambawan Teacher for savve long iumi, datwan hem bigfala privilege!”
WANEM NAO BAE IU CHUS FOR DUIM?
16. Wanem gud samting nao olketa young wan shud chus for duim?
16 Ting raonem privilege wea iu garem for savve long truth, and markem goal for worshipim Jehovah. Followim gudfala example bilong olketa long bifor wea faithful. No followim wei bilong staka young pipol long world wea spoelem laef bilong olketa and no garem eni hope for future.—2 Cor. 4:3, 4.
17-19. Why nao iumi willing for difren from pipol long world nomata datwan hem no isi?
17 Hem tru, olketa young wan, hem no isi for difren from pipol long world. Bat datwan hem wise samting for duim. Olsem example, tingim wanfala sportsman wea olketa chusim hem for plei long Olympic Games. For hem kamap fit for go long Olympic Games, hem mas difren from olketa fren bilong hem. Hem bae no duim staka samting wea bae tekem taem bilong hem for practice. Hem willing for difren from olketa fren bilong hem, mekem hem savve practice evritaem and kasem goal bilong hem.
18 Staka pipol long world no tingim olketa nogud samting wea savve kamaot from wanem olketa duim, bat pipol bilong Jehovah no olsem. Sapos iumi difren from pipol long world and stap klia long olketa nogud samting, olsem wei for durong, wea savve spoelem wei wea iumi fren witim Jehovah, bae iumi “hol strong long datfala tru laef.” (1 Tim. 6:19) Datfala sista wea iumi storyim finis hem sei: “Sapos iu strong for duim stret samting, bae iu barava hapi. Datwan bae pruvim iu strong for againstim world bilong Satan. And samting wea barava important, iu savve sure Jehovah hem barava hapi long iu! Hem nao gud samting wea iu savve kasem from iu difren!”
19 Olketa young wan, laef bilong iu bae iusles sapos iu aftarem nomoa samting wea iu savve kasem distaem. (Eccl. 9:2, 10) Iu savve why iu laef and iu savve iu garem chance for laef olowe. So, mekem olketa stret disison and no “followim . . . wei bilong olketa pipol long world.” Datwan bae mekem iu hapi and satisfae.—Eph. 4:17; Mal. 3:18.
20, 21. Wanem nao Jehovah laekem iumi for duim, and wanem nao bae iumi kasem long future sapos iumi followim wanem hem talem?
20 Sapos iumi duim stret samting, iumi savve hapi distaem and bae iumi laef olowe long niu world. Olketa blessing wea iumi kasem from Jehovah long niu world bae winim nao wanem iumi savve tingim. (Matt. 5:5; 19:29; 25:34) Nomata olsem, hem no givim olketa blessing hia long eniwan nomoa. Iumi mas obeyim hem. (Readim 1 John 5:3, 4.) Sapos iumi faithful for worshipim Jehovah distaem, bae iumi kasem gud samting!
21 Iumi kasem staka samting from Jehovah. Iumi garem stretfala savve long Bible and olketa tru samting abaotem God and olketa plan bilong hem. Iumi kasem privilege for garem nem bilong God and for talem pipol abaotem hem. Jehovah hem promis bae hem stap witim iumi and helpem iumi. (Ps. 118:7) Iumi evriwan, nomata iumi young or olo, laek for showimaot iumi tinghae long olketa spiritual samting wea Jehovah givim long iumi, and iumi laek for “praisem God for olowe.”—Rome 11:33-36; Ps. 33:12.