Ting Raonem Bigfala Love Bilong Jehovah for Iumi

1, 2. (a) Wanem nao mekem iumi barava sure Jehovah lovem pipol bilong hem? (b) Jehovah wakem iumi long wanem wei?

WANEM nao mekem iu barava sure Jehovah lovem pipol bilong hem? Tingim samting wea mekem samfala brata and sista barava sure Jehovah lovem olketa. For samfala year, olketa brata and sista encouragem wanfala sista wea nem bilong hem Taylene. Olketa encouragem hem for duim nomoa wanem hem fit for duim. Taylene sei: “Sapos Jehovah no lovem mi, bae hem no gohed for helpem mi long wei olsem.” Narafala sista, wea nem bilong hem Brigitte, hem lukaftarem tufala pikinini bilong hem bihaen hasband bilong hem dae. Hem sei: “Hem barava hard for lukaftarem olketa pikinini long disfala world bilong Satan, especially sapos iu wanfala singol dadi or mami. Bat mi sure Jehovah lovem mi, bikos hem helpem mi nomata mi kasem olketa barava hard taem, and hem nating letem samting wea mi no fit for winim for kasem mi.” (1 Cor. 10:13) Sandra hem kasem wanfala sik wea no savve finis. Long wanfala convention, wanfala sista kam and encouragem Sandra. Hasband bilong Sandra sei: “Nomata mifala no savve gud long datfala sista, mifala barava hapi long wei wea hem tingim mifala. Nomata olketa brata and sista duim smol samting nomoa for mifala, datwan mekem mifala luksavve Jehovah lovem mifala.”

² Jehovah wakem iumi long wei wea iumi laek for showimaot love long narawan and for savve olketa narawan lovem iumi. Bat samfala taem iumi savve feel wikdaon from iumi sik, iumi kasem problem saed long selen, or pipol long territory no interest long Kingdom message. Sapos iumi start for feel olsem Jehovah no lovem iumi, iumi mas no forget iumi barava spesol long Jehovah, and hem “hol strong long raet hand” bilong iumi and helpem iumi. Sapos iumi faithful long hem, bae hem nating lusim iumi.—Isa. 41:13; 49:15.

3. Wanem nao savve helpem iumi for barava sure Jehovah hem lovem iumi?

³ Olketa brata and sista wea iumi storyim finis barava sure God hem sapotim olketa long evri hard taem wea kasem olketa. Iumi tu savve sure Jehovah bae helpem iumi. (Ps. 118:6, 7) Long disfala study, bae iumi storyim fofala samting wea pruvim Jehovah hem lovem iumi. Olketa nao hem: (1) Olketa samting wea hem wakem, (2) Bible, (3) prea, and (4) datfala ransom. Taem iumi ting raonem olketa gudfala samting wea Jehovah duim for iumi, datwan savve helpem iumi for tinghae long bigfala love bilong Jehovah for iumi.—Readim Psalm 77:11, 12.

TING RAONEM OLKETA SAMTING WEA JEHOVAH WAKEM

4. Olketa samting wea Jehovah wakem showimaot wanem?

⁴ Bigfala love wea Jehovah garem for iumi hem showaot long olketa samting wea hem wakem. (Rome 1:20) Olsem example, Jehovah wakem earth long wei wea iumi savve gohed stap laef, and tu, for iumi savve enjoyim laef bilong iumi. Hem tru, iumi need for kaikai for stap laef, bat Jehovah provaedem staka difren kaen kaikai mekem iumi enjoyim olketa kaikai hia! (Eccl. 9:7) Wanfala sista wea nem bilong hem Catherine hem laekem tumas for lukim olketa samting wea God wakem, especially long taem bilong spring season long Canada. Hem sei: “Hem barava spesol for lukim evri samting start for grow moa, olsem olketa flaoa and for lukim olketa bird kam bak moa, and samfala bird wea luk naes tumas flae kam long ples wea mi putim kaikai for olketa aotsaed long window long kitchen bilong mi. Masbi Jehovah lovem iumi tumas dastawe hem givim staka samting olsem for iumi enjoyim.” Dadi bilong iumi long heven hem hapi tumas long olketa samting wea hem wakem, and hem laekem iumi for enjoyim tu.—Acts 14:16, 17.

5. Hao nao love bilong Jehovah hem showaot long wei wea hem wakem iumi?

⁵ Jehovah wakem iumi long wei wea iumi fit for duim gudfala waka and for enjoyim waka wea iumi duim. (Eccl. 2:24) Hem givim waka long iumi olketa man for fulimap earth and lukaftarem, and for lukaftarem tu olketa fish, olketa bird, and evri samting wea laef long earth. (Gen. 1:26-28) And hem wakem iumi long wei wea iumi fit for followim olketa naesfala wei bilong hem!—Eph. 5:1.

TINGHAE LONG BIBLE

6. Why nao iumi shud barava tinghae long Bible?

⁶ Jehovah givim iumi Bible bikos hem lovem iumi. Bible helpem iumi for savve gud long Jehovah and hao hem ting long iumi olketa man. Olsem example, Bible storyim hao Jehovah ting long olketa Israelite, wea staka taem olketa no obeyim hem. Psalm 78:38 hem sei: “Hem showimaot mercy long olketa. Hem forgivim sin bilong olketa and no finisim olketa. Plande taem hem kontrolem kros bilong hem, and hem no kros long olketa.” Taem iu ting raonem wanem disfala verse talem, datwan savve helpem iu for luksavve Jehovah barava lovem and tingim iu. Iumi savve sure Jehovah hem barava lovem iumi.—Readim 1 Peter 5:6, 7.

7. Why nao iumi shud ting long Bible olsem samting wea barava spesol?

⁷ Iumi shud ting long Bible olsem samting wea barava spesol. Why nao olsem? Bikos Bible nao Jehovah iusim for story kam long iumi. Taem parents and pikinini story gud long each other, datwan hem strongim love and trust wea olketa garem for each other. Jehovah hem Dadi wea lovem iumi. Nomata no enitaem iumi lukim hem or herem voice bilong hem, hem iusim Bible for story kam long iumi. Iumi shud evritaem herem wanem hem talem! (Isa. 30:20, 21) Jehovah laek for leadim and protectim iumi. Taem iumi readim Bible, datwan helpem iumi for savve gud long Jehovah and for trustim hem.—Readim Psalm 19:7-11; Proverbs 1:33.

8, 9. Wanem nao Jehovah laekem iumi for savve? Storyim wanfala example from Bible.

⁸ Jehovah laekem iumi for savve hem lovem iumi, and hem no lukluk nomoa long olketa wik point bilong iumi. Bat hem lukluk long olketa gudfala wei bilong iumi. (2 Chron. 16:9) Tingim example bilong King Jehoshaphat bilong Judah. Jehoshaphat mekem nogud disison for saedem King Ahab bilong Israel and go faetem olketa bilong Syria long Ramoth-gilead. Nomata 400 false profet talem wicked King Ahab hem bae winim datfala faet, trufala profet bilong Jehovah wea nem bilong hem Micaiah, talem Jehoshaphat and Ahab, tufala bae lus long datfala faet. And hem nao wanem hem happen. Ahab dae long datfala faet, and Jehoshaphat klosap lusim laef bilong hem tu. Bihaen long datfala faet, Jehovah iusim Jehu for givim kaonsel long Jehoshaphat from hem saedem Ahab. Nomata olsem, Jehu sei olsem long hem tu: “God lukim samfala gudfala wei bilong iu.”—2 Chron. 18:4, 5, 18-22, 33, 34; 19:1-3.

⁹ Long start bilong rul bilong Jehoshaphat, hem talem olketa prince, olketa Levite, and olketa priest for go long evri taon long Judah for teachim Law bilong Jehovah long pipol. From olketa barava duim gud disfala waka, datwan helpem pipol long olketa nara kantri tu for savve long Jehovah. (2 Chron. 17:3-10) So nomata Jehoshaphat mekem datfala nogud disison for saedem Ahab, Jehovah no forgetim olketa gudfala samting wea hem duim finis. Datfala example bilong Jehoshaphat barava encouragem iumi, bikos samfala taem iumi tu savve mekem samfala mistek. Bat sapos iumi duim best bilong iumi for Jehovah, hem bae gohed for lovem iumi and hem bae no forgetim olketa gudfala samting wea iumi duim.

TINGHAE LONG PRIVILEGE FOR PREA

10, 11. (a) Why nao prea hem wanfala barava spesol samting? (b) Long wanem wei nao God savve ansarem prea bilong iumi? (Lukim piksa long start bilong study.)

¹⁰ Dadi wea lovem olketa pikinini bilong hem bae lisin gud long olketa pikinini taem olketa laek for story witim hem. Hem laek for savve wanem olketa wari abaotem bikos hem lovem olketa. Dadi bilong iumi Jehovah hem olsem tu. Hem lisin long iumi taem iumi prea long hem. Hem nambawan privilege for iumi savve prea long Dadi bilong iumi long heven!

¹¹ Enitaem nomoa iumi savve prea long Jehovah. Hem fren bilong iumi, and hem willing evritaem for herem olketa prea bilong iumi. Taylene, wea iumi storyim finis, sei: “Iu savve talem eni samting long hem.” Taem iumi story long Jehovah from heart bilong iumi, hem savve ansarem prea bilong iumi long samfala difren wei. Maet ansa wea Jehovah givim hem kam from wanfala scripture, or wanfala article long olketa pablikeson bilong iumi. Or maet Jehovah iusim wanfala brata or sista for encouragem iumi. Jehovah herem olketa prea bilong iumi, and hem minim feeling bilong iumi nomata maet olketa narawan no minim datwan. From hem ansarem olketa prea bilong iumi, datwan pruvim hem barava lovem iumi.

12. Why nao iumi shud studyim and ting raonem olketa prea wea iumi savve readim insaed Bible? Storyim example.

¹² Iumi savve lanem staka samting from olketa prea insaed Bible. Samfala taem, maet hem gud for studyim samfala prea hia long famili worship bilong iu. Taem iumi ting raonem olketa prea bilong pipol bilong God bifor, datwan savve helpem iumi for talem olketa gudfala prea. Olsem example, iu savve studyim prea wea Jonah talem taem hem stap insaed bele bilong bigfala fish. (Jonah 1:17–2:10) Iu savve studyim prea wea Solomon talem from heart bilong hem taem olketa dedicatem temple. (1 Ki. 8:22-53) And iu savve ting raonem datfala Lord’s Prea. (Matt. 6:9-13) And barava important samting nao hem for iumi evritaem prea long God. Sapos iumi duim olsem, “peace bilong God wea winim nao wanem man savve minim bae gaedem heart and tingting bilong [iumi].” Datwan bae mekem iumi for gohed tinghae long bigfala love bilong Jehovah for iumi.—Phil. 4:6, 7.

SHOWIMAOT IU TINGHAE LONG RANSOM

13. Wanem gud samting nao iumi savve kasem from datfala ransom?

¹³ Ransom hem present wea Jehovah givim “mekem iumi savve kasem laef.” (1 John 4:9) Aposol Paul storyim disfala nambawan wei wea Jehovah showimaot love bilong hem, taem hem sei: “Christ hem dae for olketa man wea sin. Hem duim diswan taem iumi no strong yet. No staka man bae dae for wanfala man wea raeteous. Maet samwan willing for dae for wanfala gud man. Bat Christ hem dae for iumi taem iumi sin yet, wea diswan showimaot God hem lovem iumi.” (Rome 5:6-8) Ransom hem nambawan wei wea God showimaot love long iumi. Hem openem wei for iumi olketa man for savve fren gud witim God.

14, 15. Wanem gud samting nao olketa anointed Christian, and olketa wea garem hope for laef long earth, kasem from datfala ransom?

¹⁴ Jehovah showimaot love bilong hem long samfala Christian long spesol wei. (John 1:12, 13; 3:5-7) God anointim olketa long holy spirit, and from datwan olketa kamap “olketa pikinini bilong hem.” (Rome 8:15, 16) Samfala anointed Christian stap yet long earth. So hao nao Paul sei: “Hem mekem iumi for stap long heven from iumi wan mind witim Christ Jesus”? (Eph. 2:6) Hem bikos Jehovah givim olketa anointed Christian hope for laef olowe long heven.—Eph. 1:13, 14; Col. 1:5.

¹⁵ Olketa narawan wea showimaot faith long datfala ransom savve fren witim God. Olketa tu garem hope for kamap olketa pikinini bilong God and for laef olowe long paradaes long earth. Datfala ransom showimaot love wea Jehovah garem for evriwan. (John 3:16) Iumi hapi tumas for savve hao sapos iumi gohed faithful long God, iumi bae garem nambawan laef long niu world! So iumi laek for showimaot iumi tinghae long ransom, wea hem nambawan samting wea pruvim bigfala love bilong Jehovah for iumi.

SHOWIMAOT IU LOVEM JEHOVAH

16. Taem iumi ting raonem bigfala love bilong God for iumi, wanem nao iumi laek for duim?

¹⁶ Iumi no savve kaontem evri samting wea Jehovah duim wea showimaot hem lovem iumi. King David sei: “God bilong mi, olketa samting wea iu tingim hem barava spesol long mi, and olketa staka tumas! Sapos mi trae for kaontem olketa samting wea iu tingim, olketa staka tumas winim sandbis long saedsea.” (Ps. 139:17, 18) Taem iumi ting raonem staka difren wei wea Jehovah showimaot love long iumi, datwan mekem iumi tu for lovem hem and duim best bilong iumi for hem.

17, 18. Wanem nao samfala samting wea iumi savve duim for showimaot iumi lovem God?

¹⁷ Staka samting iumi savve duim for showimaot iumi lovem Jehovah. Olsem example, iumi savve showimaot iumi lovem Jehovah taem iumi strong for talemaot gud nius abaotem Kingdom long narawan. (Matt. 24:14; 28:19, 20) And tu, iumi savve showimaot iumi lovem God taem iumi gohed faithful nomata iumi kasem test. (Readim Psalm 84:11; James 1:2-5.) Nomata sapos iumi kasem barava hard taem, iumi savve sure Jehovah luksavve long samting wea kasem iumi and hem bae helpem iumi, bikos iumi spesol long hem.—Ps. 56:8.

¹⁸ Love wea iumi garem for Jehovah mekem iumi for ting raonem olketa gudfala samting wea Jehovah wakem. Iumi showimaot iumi lovem God and iumi tinghae long Bible taem iumi studyim gud Bible. Iumi evritaem prea long Jehovah bikos iumi lovem hem and laek for strongim wei wea iumi fren witim hem. And taem iumi ting raonem ransom sakrifaes bilong Jesus, datwan barava strongim love wea iumi garem for Jehovah. (1 John 2:1, 2) Olketa samting hia hem samfala wei for showimaot iumi tinghae long bigfala love bilong Jehovah for iumi.