Evritaem Forgivim Narawan

BIBLE PRINCIPLE: “Nomata sapos eniwan long iufala hem feel nogud long narawan, hem . . . mas evritaem forgivim hem. Iufala mas olsem Jehovah wea hem willing for forgivim iufala.”—Colossae 3:13.

Wanem nao diswan hem minim? Bible hem sei sin hem olsem kaon, and wei for forgive hem olsem iumi sei long narawan hem no need for changem bak datfala kaon. (Matthew 18:21-35) Wanfala buk storyim hao long Bible, datfala Greek word wea olketa transleitim “wei for forgive,” hem olsem wei wea man “disaed for talem narawan wea kaonem hem for no warim nao datfala kaon.” So taem iumi disaed for forgivim samwan wea duim samting wea mekem iumi feel nogud, hem minim iumi no expectim hem for sei sorre olowe or for duim eni nara samting for iumi. Hem normal samting for feel nogud taem samting olsem hem happen, and wei wea iumi forgivim narawan no minim iumi laekem wanem hem duim. Bat taem iumi forgivim samwan datwan minim bae iumi no gohed feel nogud long hem.

Waswe, hem fitim iumi distaem? Ia, bikos iumi evriwan sin. (Rome 3:23) So hem wise samting for evritaem forgivim narawan, bikos gogo bae iumi laekem olketa narawan for forgivim iumi. And tu, taem iumi forgivim narawan, datwan savve helpem iumi. Hao nao olsem?

Taem iumi gohed kros long samwan, datwan savve spoelem iumi. Hem savve mekem iumi for no hapi, and for no laek story witim datfala man. Wei for kros savve mekem iumi sik tu. Wanfala doctor sei: “Mifala luksavve taem man hem gohed for kros long narawan, datwan savve lead go long heart problem.”

Bat sapos iumi evritaem forgivim narawan, datwan savve helpem iumi for stap gud witim evriwan. And main important samting, taem iumi evritaem forgivim narawan, iumi followim example bilong God, wea evritaem forgivim olketa sin bilong iumi.—Mark 11:25; Ephesus 4:32; 5:1.