Depend lo Jehovah for Kasem Comfort

1. Describem situation blo olketa Jew wea stap olsem prisoner lo Babylon.

IMAGINIM feeling blo olketa Jew wea stap olsem prisoner lo Babylon. Olketa lukim taem hom blo olketa distroe. Jehovah letem olketa blo Babylon for tekem olketa for stap olsem prisoner lo difren kantri bikos lo sin blo olketa and sin blo laen dadi blo olketa. (2 Chron. 36:​15, 16, 20, 21) Hem tru, olketa lo Babylon savve letem prisoner blo olketa for lelebet free for garem normal laef. (Jer. 29:​4-7) Nomata olsem, laef hem no isi, and hem no laef wea olketa Jew chusim. Hao nao olketa feel abaotem situation blo olketa? Tingim toktok blo wanfala faithful Jew wea prisoner lo there, hem sei: “Saed lo olketa river lo Babylon, mifala sidaon. Mifala krae taem mifala tingim Zion.” (Ps. 137:1) Olketa Jew hia barava sorre tumas and needim comfort, bat hu nao bae comfortim olketa?

2-3. (a) Wat nao Jehovah duim for olketa Jew wea stap lo Babylon? (b) Wat nao bae iumi discussim lo disfala article?

² Jehovah hem ‘God wea givim comfort.’ (2 Cor. 1:3) From hem wanfala loving God, hem barava laek for comfortim olketa wea fren klos witim hem. Jehovah savve samfala lo olketa Jew prisoner hia bae acceptim discipline and kam bak lo hem. (Isa. 59:20) So winim 100 years bifor olketa kamap prisoner, hem iusim profet Isaiah for raetem Bible buk Isaiah. Why nao olsem? Isaiah sei: “God blo iufala hem sei: ‘Comfortim, comfortim pipol blo mi.’” (Isa. 40:1) Yes, Jehovah provaedem comfort wea olketa Jew hia needim thru lo buk wea Isaiah raetem.

³ Olsem olketa Jew wea stap lo Babylon, iumi tu needim comfort samfala taem. Lo disfala article, bae iumi storyim thrifala wei wea Jehovah comfortim olketa: (1) Hem promis for forgivim olketa wea repent, (2) hem givim hope lo pipol blo hem, and (3) hem helpem olketa for no fraet. Taem iumi discussim olketa point hia, tingim olketa gud samting iumi savve kasem from wat Jehovah talem for comfortim olketa.

JEHOVAH SHOWIM MERCY AND FORGIVIM IUMI

4. Hao nao Jehovah showimaot hem God blo mercy? (Isaiah 55:7)

⁴ Jehovah hem “Dadi wea kaen and sorre long iumi.” (2 Cor. 1:3) Hem showim datfala quality taem hem promis for forgivim olketa Jew lo Babylon wea repent. (Readim Isaiah 55:7.) Hem sei: “Witim loyal love wea stap for olowe bae mi showim mercy lo iu.” (Isa. 54:8) Hao nao Jehovah showim mercy? Nomata olketa Jew mas kasem panis for wat olketa duim, Jehovah promis bae olketa no stap lo Babylon for olowe. Olketa bae stap olsem prisoner for lelebet taem nomoa. (Isa. 40:2) Toktok hia mas barava comfortim and strongim olketa Jew wea repent wea stap olsem prisoner lo Babylon!

5. Why nao iumi garem staka reason for appreciatim forgiveness blo Jehovah winim olketa Jew bifor?

⁵ Wat nao iumi lanem? Jehovah willing for barava forgivim olketa servant blo hem. Iumi distaem garem staka reason for appreciatim forgiveness blo Jehovah winim olketa Jew bifor. Hao nao olsem? Iumi savve lo samting wea Jehovah duim for forgivim olketa sin blo iumi. Staka handred year afta Isaiah talem datfala profesi, Jehovah sendem kam beloved Son blo hem lo earth for provaedem ransom for evriwan wea repent. Base lo datfala sakrifaes, Jehovah savve completely rabemaot olketa sin blo iumi. (Acts 3:19; Isa. 1:18; Eph. 1:7) Jehovah hem God wea barava showimaot mercy!

6. Wat nao gud samting iumi kasem taem iumi focus lo mercy blo Jehovah? (Lukim tu piksa.)

⁶ Olketa comforting toktok blo Jehovah lo Isaiah 55:7 savve helpem iumi if iumi stragol witim guilty feeling. Samfala lo iumi maet gohed for feel guilty lo mistek wea iumi duim bifor, nomata iumi repent finis. Iumi savve feel olsem, especially taem iumi gohed safa bikos lo olketa nogud samting wea iumi kasem from mistek blo iumi. Bat, if iumi confessim sin blo iumi and stop for duim datwan, iumi savve sure Jehovah hem forgivim iumi. And taem Jehovah forgive, hem chus for no tingim moa olketa sin blo iumi. (Comparem Jeremiah 31:34.) So if Jehovah no gohed for tingim olketa past sin blo iumi, iumi tu shud olsem. Wat hem important lo Jehovah, hem wat iumi duim distaem, and no mistek wea iumi duim bifor. (Ezek. 33:​14-16) And klosap nao, Dadi blo iumi wea showim mercy bae mekem iumi completely free from olketa nogud samting wea iumi kasem from olketa mistek blo iumi.

7. Wat nao savve muvim iumi for askem help if iumi haedem wanfala sin?

⁷ Wat nao iumi shud duim if iumi gohed for garem guilty konsens bikos iumi haedem wanfala serious sin? Bible encouragem iumi for askem help from olketa elder. (Jas. 5:​14, 15) Bat, hem no isi for storyim rong wea iumi duim. Nomata olsem, if iumi repent and remember dat Jehovah and olketa faithful elder wea hem appointim bae showimaot love and mercy, datwan bae muvim iumi for story lo olketa. Tingim hao mercy blo Jehovah helpem wanfala brata wea nem blo hem Arthur,a wea konsens blo hem mekem hem feel guilty. Hem sei: “For samting olsem wan year, mi gohed for lukluk lo pornography. Bat bihaen mi herem wanfala tok abaotem konsens, mi confess lo waef blo mi and olketa elder. Taem mi duim datwan mi hapi, bat mi still feel guilty. Olketa elder remindim mi dat Jehovah no rejectim mi. Hem disciplinem iumi bikos hem lovem iumi. Kaenfala toktok blo olketa kasem heart blo mi and helpem mi for stretem tingting blo mi.” Tuday, Arthur serve olsem regular pioneer and ministerial servant. Hem barava comfortim iumi taem iumi savve hao Jehovah savve showim mercy if iumi repent!

JEHOVAH GIVIM IUMI HOPE

8. (a) Wat nao hope wea Jehovah givim lo olketa Jew prisoner? (b) Olsem Isaiah 40:​29-31 storyim, hao nao hope helpem olketa Jew wea repent?

⁸ Maet lo tingting blo iumi olketa man, situation blo olketa Jew wea stap olsem prisoner hem luk hopeles. Hard tumas for world paoa blo Babylon releasem olketa prisoner. (Isa. 14:17) Bat, Jehovah givim hope for pipol blo hem. Hem promis for mekem olketa kamap free, and no eni samting savve stopem hem. (Isa. 44:26; 55:12) Lo eye blo Jehovah, Babylon hem olsem dust nomoa. (Isa. 40:15) Hem olsem taem samwan blowim dust, and dust hem disappear. Hao nao datfala hope helpem olketa Jew prisoner? Hem comfortim olketa. Bat hem helpem olketa lo nara wei tu, Isaiah sei: “Olketa wea garem hope lo Jehovah bae kasem bak strong.” (Readim Isaiah 40:​29-31.) Yes, hope hem strongim olketa for ‘flae hae lo olketa wing olsem olketa eagle.’

9. Wat nao pruv wea mekem olketa Jew prisoner for trustim olketa promis blo Jehovah?

⁹ Jehovah givim pruv wea mekem olketa Jew fit for barava trustim olketa promis blo hem. Wat nao olketa pruv hia? Olketa Jew lukim hao olketa profesi hem fulfill. Olketa savve Assyria hem winim northern kingdom blo Israel and tekem olketa for kamap prisoner. (Isa. 8:4) Olketa lukim taem Babylon distroem Jerusalem and tekem olketa Jew for kamap prisoner. (Isa. 39:​5-7) Olketa savve dat olketa blo Babylon mekem King Zedekiah for blind and tekem hem go lo Babylon. (Jer. 39:7; Ezek. 12:​12, 13) Evri samting wea Jehovah talem hem kamap tru. (Isa. 42:9; 46:10) For sure, olketa samting hia mas barava strongim faith blo olketa dat promis blo Jehovah for mekem olketa kamap free, bae hem kamap tru!

10. Wat nao savve helpem iumi for keepim hope blo iumi strong lo olketa last day?

¹⁰ Wat nao iumi lanem? Taem iumi feel wikdaon, hope savve comfortim and helpem iumi for kasem bak strong. Iumi stap lo taem wea evri samting hem hard tumas and iumi feisim olketa paoaful enemy. Nomata olsem, iumi mas no discourage. Jehovah givim iumi nambawan hope, wea hem nao for laef olowe and garem tru peace and security. Iumi mas gohed for keepim datfala hope hem klia lo mind and heart blo iumi. Hope blo iumi hem olsem wanfala beautiful view, if window hem dirty hard for iumi lukim klia. Hao nao iumi savve klinim datfala tokpiksa window? Hem gud for iumi evritaem spendem taem for imaginim hao laef lo niu world bae barava gud tumas. Iumi savve readim olketa article, watchim video, or lisin lo olketa song wea story abaotem hope blo iumi. And iumi savve story witim Jehovah abaotem olketa promis blo hem wea iumi barava luk forward for hem fulfill.

11. Wat nao strongim wanfala sista wea garem serious health problem?

¹¹ Tingim hao hope comfortim and strongim wanfala sista wea nem blo hem Joy, wea garem serious health problem. Hem sei: “Taem mi barava feel nogud, mi storyim feeling blo mi lo Jehovah and mi savve dat hem understandim mi. Taem olsem, Jehovah givim mi strong wea winim strong blo miseleva.” (2 Cor. 4:7) And tu, Joy savve imaginim hemseleva lo niu world lo taem wea “no eniwan wea stap lo there bae sei: ‘Mi sik.’” (Isa. 33:24) If iumi tu storyim evriting lo heart blo iumi lo Jehovah and focus lo hope blo iumi, bae iumi savve kasem bak strong.

12. Wat nao olketa pruv wea mekem iumi trustim olketa promis blo Jehovah? (Lukim tu piksa.)

¹² Jehovah givim staka pruv for olketa Jew wea prisoner lo Babylon for trustim olketa promis blo hem, iumi tu garem staka pruv. Ting abaotem olketa profesi wea iumi lukim wea hem gohed for fulfill. For example, iumi lukim datfala world paoa wea stap distaem wea ‘part lo hem strong and part lo hem wik.’ (Dan. 2:​42, 43) Iumi herem nius tu abaotem ‘olketa earthquake wea sekem staka ples,’ and iumi share lo waka for preach lo “evri kantri.” (Matt. 24:​7, 14) Olketa profesi hia and staka narawan moa, strongim faith blo iumi lo olketa comforting promis blo Jehovah wea no fulfill yet.

JEHOVAH HELPEM IUMI FOR NO FRAET

13. (a) Wat nao samfala challenge wea olketa Jew bae feisim taem olketa kamap free? (b) Olsem Isaiah 41:​10-13 storyim, hao nao Jehovah comfortim olketa Jew wea prisoner lo Babylon?

¹³ Nomata Jehovah givim nambawan hope wea comfortim olketa Jew wea prisoner, hem savve tu bae olketa feisim samfala challenge taem wea olketa kamap free. Jehovah profesi hao klosap lo end blo taem wea olketa Jew stap olsem prisoner, wanfala King bae distroem olketa nation wea stap klosap and attakim Babylon. (Isa. 41:​2-5) Hao, lo datfala taem bae olketa Jew need for fraet? Jehovah talem profesi in advance, for comfortim olketa, hem sei: “Iu no fraet, bikos mi stap witim iu. Iu no wari, bikos mi nao God blo iu.” (Readim Isaiah 41:​10-13.) Wat nao hem minim taem hem sei “Mi nao God blo iu”? Hem no minim dat hem remindim olketa Jew for worshipim hem, bikos olketa savve finis olketa need for duim datwan. Bat hem remindim olketa dat hem gohed for saedem olketa.—Ps. 118:6.

14. Wat nao nara samting wea Jehovah duim for helpem olketa Jew for no fraet?

¹⁴ Jehovah helpem olketa Jew for no fraet tu taem hem remindim olketa lo bigfala paoa and knowledge wea hem garem. Hem askem olketa Jew for luk go ap lo olketa star lo heven. Hem talem olketa Jew dat hem no just creatim olketa star nomoa bat hem savve tu lo nem blo each star. (Isa. 40:​25-28) So, for hem savve lo nem blo each wan lo olketa servant blo hem, hem nating hard nomoa! And if Jehovah garem paoa for creatim olketa star, for sure hem garem paoa tu for helpem pipol blo hem. Tru nao, olketa Jew wea prisoner no garem eni reason for wari or fraet.

15. Hao nao God redyim olketa Jew for samting wea bae happen?

¹⁵ Jehovah redyim tu pipol blo hem for samting wea bae kamap. Lo nara part lo buk blo Isaiah, God talem datfala nation: “Go insaed olketa rum blo iufala, and satem kam door. Iufala haed insaed for lelebet taem go kasem taem kros blo God hem finis.” (Isa. 26:20) Luk olsem first fulfillment lo disfala verse hem taem King Cyrus tekovarem Babylon. Wanfala man for raet abaotem history blo olketa Greek bifor, hem storyim hao taem Cyrus hem enter lo Babylon, ‘hem givim order lo olketa soldia blo hem for killim dae eniwan wea no stap insaed lo haos blo olketa.’ Imaginim hao pipol wea stap insaed Babylon mas fraet tumas! Bat luk olsem olketa Jew olketa stap sef bikos olketa obeyim instruction blo Jehovah.

16. Why nao iumi shud no wari tumas abaotem olketa samting wea bae happen lo future? (Lukim tu piksa.)

¹⁶ Wat nao iumi lanem? Klosap nao bae iumi feisim big trabol wea winim eniting wea bin happen lo history. Taem hem start, pipol bae barava konfius and fraet. Bat pipol blo Jehovah bae no fraet. Iumi savve dat Jehovah hem God blo iumi. Iumi bae no fraet, bikos iumi luksavve ‘taem for God sevem iumi hem klosap.’ (Luke 21:28) Nomata taem olketa nation attakim iumi, iumi bae stand strong. Jehovah bae iusim olketa angel for protectim iumi and hem bae givim olketa instruction for sevem laef blo iumi. Hao nao bae iumi kasem olketa instruction hia? Iumi have tu weit and lukluk. Bat, luk olsem bae iumi kasem olketa instruction hia thru lo each kongregeson. Maet diswan nao “olketa rum” wea iumi bae go insaed for stap sef. Hao nao bae iumi savve redi for olketa samting wea bae happen lo future? Iumi mas fren klos witim olketa brata and sista, willing for obeyim direction from organization, and mas trustim dat Jehovah nao leadim organization blo iumi.—Heb. 10:​24, 25; 13:17.

17. Hao nao iu savve depend lo Jehovah for comfort?

¹⁷ Nomata laef hem no isi for olketa Jew wea stap olsem prisoner lo Babylon, Jehovah givim comfort wea olketa needim. Hem bae duim datwan for iumi tu. So nomata wat nao bae happen lo future, gohed depend lo Jehovah for comfort. Trustim bigfala mercy blo hem. Gohed focus lo hope blo iu. And remember, from Jehovah hem God blo iu, iu no need for fraetem eni samting.