Luk Forward for Datfala Taon wea Bae Stap for Olowe

1. Wat nao Jesus sei bae happen lo Jerusalem lo first century?

SAMFALA day bifor Jesus Christ hem dae, hem talem wanfala klia profesi wea first fulfillment blo hem, hem during lo olketa last day blo datfala system blo olketa Jew. Hem givim warning dat wanday bae “army hem raonem Jerusalem.” (Luke 21:20) Jesus talem olketa follower blo hem, dat semtaem olketa lukim datfala army, wea hem nao army blo Rome, olketa mas kwiktaem lusim datfala ples.—Luke 21:​21, 22.

2. Wat nao kaonsel wea aposol Paul givim lo olketa Hebrew Christian lo Judea and Jerusalem?

² Just tu-thri year bifor army blo Rome raonem Jerusalem, aposol Paul raetem wanfala important leta wea distaem iumi kolem lo Bible buk Hebrews. Insaed datfala leta, Paul givim important kaonsel lo olketa Christian lo Judea and Jerusalem wea bae helpem olketa for redi for samting wea bae happen. So wat nao bae happen? Jerusalem bae distroe. If olketa Christian hia laek for laef, olketa mas redi for lusim olketa haos and bisnis blo olketa. So Paul raet olsem abaotem Jerusalem: “Iumi no garem wanfala taon lo hia wea stap for olowe.” Then hem sei moa: “Bat iumi barava weitim nao datfala taon wea bae kam.”—Heb. 13:14.

3. Wat nao “datfala taon wea garem strong faondeson,” and why nao iumi luk forward for datwan?

³ Taem olketa Christian disaed for lusim Jerusalem and Judea, maet staka pipol tok spoelem and laf lo olketa, bat wat olketa disaedem sevem laef blo olketa. Distaem, pipol mekfani lo iumi bikos iumi no putim trust blo iumi lo olketa man or trae for garem gud laef lo disfala world. Then, why nao iumi disaed olsem? Bikos iumi savve disfala system bae no stap for olowe. Iumi luk forward for “datfala taon wea garem strong faondeson” wea “bae kam,” wea hem nao Kingdom blo God.a (Heb. 11:10; Matt. 6:33) Each subheding lo disfala article bae storyim: (1) hao kaonsel blo Paul helpem olketa Christian lo first century for gohed luk forward for “datfala taon wea bae kam,” (2) hao Paul helpem olketa for redi for wat bae happen lo future, and (3) hao kaonsel blo Paul savve helpem iumi distaem.

TRUSTIM JEHOVAH WEA BAE NATING LUSIM IU

4. Why nao Jerusalem hem important ples for olketa Christian?

⁴ Lo bifor, Jerusalem hem important ples for olketa Christian. Christian kongregeson lo first century hem start lo there lo 33 C.E., and governing body tu hem stap lo there. And tu, staka Christian onam olketa haos and garem staka material samting lo datfala taon. Bat, Jesus warnim olketa follower blo hem for mas lusim Jerusalem and Judea tu.—Matt. 24:16.

5. Hao nao Paul redyim olketa Christian for wat bae happen?

⁵ For redyim olketa Christian for wat bae happen, Paul helpem olketa for focus lo hao Jehovah ting lo Jerusalem. Paul remindim olketa dat Jehovah rejectim finis temple, olketa priest, and olketa sakrifaes wea olketa offerim lo Jerusalem. (Heb. 8:13) Staka pipol wea stap lo datfala taon, olketa rejectim Messiah. Jerusalem bae no kamap main ples moa for pure worship, and hem bae distroe.—Luke 13:​34, 35.

6. Why nao reminder wea Paul talem lo Hebrews 13:​5, 6 hem kam lo raet taem for olketa Christian?

⁶ Taem Paul raet for olketa Hebrew Christian, pipol enjoyim laef lo Jerusalem. Wanfala man lo Rome for raet hem sei, lo datfala taem, Jerusalem hem “barava famous taon lo datfala part lo world.” Olketa Jew wea stap lo olketa nara ples savve go lo there evri year for celebratem olketa festival, and spendem staka selen, datwan mekem economy blo Jerusalem for barava gud. From economy hem gud olsem, samfala Christian tu kasem gud samting from datwan. Dastawe, Paul talem olketa: “Iufala mas no laekem tumas selen, bat iufala mas satisfae nomoa lo samting wea iufala garem.” Then hem quotem paoaful promis wea stap lo olketa Scripture, wea showim wat Jehovah promisim for each wan lo olketa servant blo hem: “Bae mi nating lusim iu, and bae mi hard for leavim iu.” (Readim Hebrews 13:​5, 6; Deut. 31:6; Ps. 118:6) Olketa Christian wea stap lo Jerusalem and Judea need for tingim datfala promis. Why nao olsem? Bikos no longtaem bihaen olketa kasem datfala leta, olketa mas lusim nao olketa haos blo olketa, bisnis blo olketa, and staka samting wea olketa garem. Then olketa mas deal witim wanfala niu laef lo nara ples wea bae hem no isi.

7. Why nao iumi shud strongim trust blo iumi lo Jehovah distaem?

⁷ Leson for iumi: Wat nao klosap for happen? “Bigfala trabol” bae start and disfala nogud system bae finis. (Matt. 24:21) Olsem olketa Christian lo first century, iumi mas gohed for lukaot and redi. (Luke 21:​34-36) During lo datfala big trabol, maet iumi mas lusim samfala samting or evriting wea iumi garem, and barava trustim dat Jehovah bae no enitaem lusim pipol blo hem. Nomata distaem tu, bifor datfala big trabol hem start, iumi garem chance for showim wat nao iumi really trustim. Hem gud for askem iumiseleva, ‘Hao, wat mi duim and olketa goal blo mi showim mi no trustim olketa riches, bat trustim God wea promis for provaed for mi?’ (1 Tim. 6:17) Hem tru, nomata iumi savve lanem samfala leson from wat hem happen lo first century, datfala “bigfala trabol” bae hem barava hard winim eni samting wea iumi bin experiencem. So hao nao bae iumi barava savve lo wat for duim taem datfala bigfala trabol hem start?

OBEYIM OLKETA WEA LEAD

8. Wat nao instruction wea Jesus givim lo olketa disaepol blo hem?

⁸ Tu-thri year bihaen olketa Hebrew Christian kasem leta blo Paul, olketa lukim army blo Rome kam raonem taon lo Jerusalem. Taem datwan happen, olketa savve dat hem taem nao for olketa mas ranawe from Jerusalem bikos klosap nao bae hem distroe. (Matt. 24:3; Luke 21:​20, 24) Bat olketa bae ranawe go lo wea? Bikos wat Jesus talem nomoa, hem for: “Olketa wea stap lo Judea mas ranawe go lo olketa maunten.” (Luke 21:21) Staka maunten nao stap lo datfala area. So which maunten nao bae olketa ranawe go lo hem?

9. Why nao maet olketa Christian wonder which maunten nao bae olketa narawe go lo hem? (Lukim tu map.)

⁹ Tingim samfala maunten wea maet olketa Christian savve ranawe go lo hem: olketa maunten lo Samaria, olketa maunten lo Galilee, Maunt Hermon and olketa maunten lo Lebanon, and olketa maunten lo nara saed blo Jordan River. (Lukim map.) Samfala taon wea stap lo olketa maunten hia, maet luk olsem hem sef ples for olketa go stap insaed. For example, datfala taon blo Gamla hem stap lo wanfala ridge wea raf lo wanfala hae maunten, and hem barava hard for kasem. Samfala Jew tingse datfala taon hem sef ples for olketa go stap insaed. Bat army blo Rome attakim Gamla and distroem, and killim dae staka pipol wea stap lo there.b

10-11. (a) Hao nao maet Jehovah givim direction lo olketa Christian? (Hebrews 13:​7, 17) (b) Hao nao olketa Christian kasem gud samting from olketa obeyim olketa wea lead? (Lukim tu piksa.)

¹⁰ Luk olsem Jehovah iusim olketa wea lead lo kongregeson for provaedem direction for olketa Christian. Wanfala man for raetem history Eusebius sei olsem: “Olketa lo kongregeson lo Jerusalem kasem direction from God thru lo olketa man wea God appointim, and olketa kasem komand for lusim datfala taon bifor war hem start and go setol lo wanfala taon lo Perea, wea olketa kolem lo Pella.” Luk olsem Pella nao hem gud choice for olketa Christian go lo hem. Hem no farawe from Jerusalem, and hem isi lelebet for olketa kasem. And tu, staka pipol wea stap lo datfala taon, hem olketa Gentile, and pipol hia no trae for faet againstim olketa blo Rome.—Lukim map.

¹¹ Olketa Christian wea ranawe go lo olketa maunten followim kaonsel blo Paul for ‘obeyim olketa wea lead’ lo kongregeson. (Readim Hebrews 13:​7, 17.) From datwan, pipol blo God olketa sev. History showim dat God hem no lusim olketa wea “weitim datfala taon wea garem strong faondeson,” wea hem nao kingdom blo God.—Heb. 11:10

12-13. Hao nao Jehovah givim direction lo pipol blo hem during lo olketa hard taem?

¹² Leson for iumi: Jehovah iusim olketa wea lead for givim specific direction for pipol blo hem. Bible garem staka example wea showim hao Jehovah iusim olketa shepherd for givim direction for pipol blo hem during lo olketa hard taem. (Deut. 31:23; Ps. 77:20) And distaem iumi lukim staka evidence wea showim hao Jehovah gohed for iusim olketa wea lead.

¹³ For example, taem COVID-19 pandemic hem start, ‘olketa wea lead’ givim direction wea iumi needim. Olketa elder kasem direction lo hao for provaedem spiritual kaikai wea olketa brata and sista needim. No longtaem afta datfala pandemic hem start, iumi iusim Internet, TV, and radio, for holem convention lo winim 500 languis, datwan hem firstaem lo history blo iumi. No enitaem olketa brata and sista stop for kasem spiritual kaikai. From datwan, iumi gohed for wan mind. Iumi confident dat nomata wat nao iumi feisim lo future, Jehovah bae gohed for iusim olketa wea lead for mekem olketa wise disison for iumi followim. Iumi trustim Jehovah and obeyim olketa komand blo hem, bat wat moa olketa nara quality wea iumi need for garem mekem iumi redi for datfala big trabol and for mekem wise disison during lo datfala barava hard taem?

SHOWIM LOVE LO EACH OTHER OLSEM OLKETA BRATA AND WELKAMIM OLKETA

14. Olsem Hebrews 13:​1-3 storyim, wat nao olketa quality wea olketa Christian need for showim during lo olketa last day lo system blo olketa Jew?

¹⁴ Taem datfala big trabol start, bae iumi need for showim love for each other winim enitaem bifor. Lo datfala taem, iumi bae need for followim example blo olketa Christian wea stap lo Jerusalem and Judea. Olketa evritaem showimaot love for each other. (Heb. 10:​32-34) Bat lo olketa year wea gogo for end blo datfala system blo olketa Jew, olketa Christian hia mas showimaot olketa “lovem each other olsem olketa brata” and “welkamim” narawan winim enitaem bifor.c (Readim Hebrews 13:​1-3.) Iumi bae need for duim sem samting taem iumi gogo for end blo disfala nogud system.

15. Why nao olketa Hebrew Christian need for showim love lo each other olsem olketa brata and for welkamim olketa bihaen olketa ranawe?

¹⁵ Taem army blo Rome raonem Jerusalem and then seke nomoa olketa lusim datfala ples, olketa Christian ranawe witim tu-thri tings blo olketa nomoa. (Matt. 24:​17, 18) Olketa mas depend lo each other taem olketa travel go lo olketa maunten and taem olketa setol lo niu hom blo olketa. For sure, staka lo olketa garem “urgent need,” and datwan givim chance for olketa Christian hia for showimaot olketa really lovem narawan olsem brata blo olketa and showimaot welkam lo wei for sapotim olketa and sharem wat olketa garem.—Titus 3:14.

16. Hao nao iumi savve showim love for olketa brata and sista wea needim help? (Lukim tu piksa.)

¹⁶ Leson for iumi: Love savve motivatim iumi for sapotim olketa brata and sista taem olketa needim help. Staka pipol blo God willing for givim spiritual help and material samting for olketa brata and sista wea kamap refugee bikos lo war and natural disaster. Wanfala sista lo Ukraine wea lusim hom blo hem bikos lo war hem sei: “Mifala lukim hand blo Jehovah leadim mifala and hem iusim olketa brata for helpem mifala. Olketa barava welkamim and helpem mifala lo Ukraine, Hungary, and hia lo Germany.” Olketa wea showimaot welkam lo olketa brata and sista and kea for need blo olketa, olketa olsem tul lo hand blo Jehovah.—Prov. 19:17; 2 Cor. 1:​3, 4.

17. Why nao hem important distaem for strongim go moa wei wea iumi lovem each other olsem brata and welkamim olketa?

¹⁷ For sure, lo future bae iumi barava needim help blo each other winim distaem. (Hab. 3:​16-18) Jehovah trainim iumi distaem for strongim go moa wei wea iumi lovem each other olsem brata and for welkamim olketa, bikos iumi bae barava need for garem olketa quality hia lo datfala taem.

WAT BAE HAPPEN LO FUTURE

18. Hao nao iumi savve followim example blo olketa Hebrew Christian lo first century?

¹⁸ Olsem history showim, olketa Christian wea ranawe go lo maunten olketa misstim datfala big trabol wea kasem Jerusalem. Olketa lusim datfala taon, bat no enitaem Jehovah lusim olketa. Waswe lo iumi distaem? Iumi no savve lo evri samting wea bae kamap lo future. Bat iumi savve lo datfala warning blo Jesus for iumi gohed redi. (Luke 12:40) And tu, iumi savve lo kaonsel wea Paul raetem lo leta blo hem for olketa Hebrew Christian, datfala kaonsel barava fitim olketa lo first century and hem barava fitim iumi tu. And iumi trustim promis blo Jehovah for each wan lo iumi dat hem bae hard for lusim iumi enitaem or leavim iumi. (Heb. 13:​5, 6) Iumi laek for gohed luk forward for datfala taon wea bae stap for olowe wea hem nao Kingdom blo God, and enjoyim olketa blessing wea hem bae givim for olowe.—Matt. 25:34.