Iusim Olketa Marginal Reference

Olketa marginal reference lo Niu World Transleison blo Holy Scripture showim hao olketa verse lo Bible hem agree witim each other, hem helpem iu for faendem olketa nara scripture wea givim iu moa information abaotem wanfala verse. For faendem marginal reference, luk for wanfala smol leta wea stap saed lo wanfala word. Lo olketa Bible wea olketa printim, iu savve lukim olketa scripture wea join witim disfala verse taem iu luk for datfala sem smol leta lo column lo midol lo page or lo saed. Lo jw.org or lo JW Library^® app, tapim datfala smol leta for lukim olketa nara scripture.

Olketa marginal reference savve helpem iu for faendem olketa information lo daon and staka moa:

Sem story: Datfala marginal reference savve showim nara scripture wea garem sem story abaotem samting wea happen. For example, lukim 2 Samuel 24:1 and 1 Chronicles 21:1.

Quotation: Datfala marginal reference savve showim wea nao wanfala quote or toktok hem kam from. For example, lukim Matthew 4:4 and Deuteronomy 8:3.

Profesi wea fulfill: Datfala marginal reference savve showim scripture wea fulfillim wanfala profesi. For example, lukim Matthew 21:5 and Zechariah 9:9.