Best Wei for Deal Witim Injustice

1-2. Wat nao reaction blo staka pipol taem olketa deal witim injustice, and wat nao bae iumi storyim lo disfala article?

IUMI stap lo world wea fulap lo injustice. Staka reason stap why pipol treatim nogud samwan, maet hem bikos hem rich or poor, gender blo hem, tribe wea hem kam from, or kala skin blo hem. And tu, pipol savve safa bikos lo olketa greedy bisnisman and olketa leader lo gavman wea corrupt wea kosim or mekem worse olketa problem saed lo environment. Olketa injustice olsem affectim iumi evriwan, maet hem kasem iumi or samwan wea iumi savve lo hem.

² Iumi no sapraes dat staka pipol kros bikos lo injustice wea olketa lukim lo world distaem. Iumi evriwan laek stap lo world wea iumi feel sef and evriwan treatim gud each other. Samfala laek for involve insaed olketa program for mekem olketa change kamap. Olketa savve saenem olketa petition, joinim protest, and sapotim olketa politikol leader wea promis for faet againstim injustice. Bat, iumi olketa Christian lanem dat iumi mas no “no part lo world” and iumi weit for Kingdom blo God for finisim evri injustice wea happen. (John 17:16) Nomata olsem, taem iumi lukim olketa treatim nogud samwan, iumi still savve feel nogud or even kros. Lo taem olsem, maet iumi wonder: ‘Wat nao mi shud duim? Eniting mi savve duim for stopem injustice distaem?’ Bae iumi ansarem tufala kwestin hia, bat firstaem bae iumi lukluk lo hao Jehovah and Jesus feel abaotem injustice.

JEHOVAH AND JESUS HEITIM INJUSTICE

3. Why nao iumi savve kros taem iumi lukim or kasem injustice? (Isaiah 5:7)

³ Bible storyim reason why iumi savve feel nogud taem iumi lukim or kasem injustice. Bible explainim dat Jehovah creatim iumi lo image blo hem and “hem lovem raeteous fasin and justice.” (Ps. 33:5; Gen. 1:26) Hem evritaem followim justice, and hem no laekem eniwan for duim samting wea no followim justice! (Deut. 32:​3, 4; Mic. 6:8; Zech. 7:9) For example, lo taem blo profet Isaiah, Jehovah herem “krae blo olketa man wea feel nogud” bikos staka Israelite treatim nogud olketa nara Israelite. (Readim Isaiah 5:7.) Jehovah duim samting for panisim olketa wea gohed for no laek followim Law blo hem and wea treatim nogud olketa narawan.—Isa. 5:​5, 13.

4. Hao nao Jesus feel taem hem lukim injustice? (Lukim tu piksa.)

⁴ Olsem Jehovah, Jesus tu lovem justice and heitim injustice. Wantaem, during lo ministry blo hem lo earth, hem lukim wanfala man wea disable, wea hand blo hem paralaes. Jesus barava sorre lo hem and healim hem, bat olketa religious leader nating sorre lo datfala man and olketa kros. Olketa warim nomoa for followim own tingting blo olketa abaotem Sabbath law winim wei for helpem datfala man wea safa. Hao nao Jesus feel abaotem datwan? Hem “feel nogud bikos olketa hia nating tingim datfala man.”—Mark 3:​1-6.

5. Wat nao iumi mas tingim taem iumi feel kros bikos lo injustice?

⁵ Olsem iumi lukim, Jehovah and Jesus kros taem olketa lukim injustice, so hem no rong for iumi feel olsem tu. (Eph. 4:26 and English study note “Be wrathful”) Bat, iumi mas tingim dat nomata iumi garem stret reason for kros, datwan bae no savve stretem injustice. And tingim tu, if iumi gohed for kros or no kontrolem kros blo iumi, datwan savve affectim feeling blo iumi and physical saed blo iumi. (Ps. 37:​1, 8; Jas. 1:20) So hao nao iumi shud deal witim injustice? Iumi savve lane from example blo Jesus.

HAO JESUS DEAL WITIM INJUSTICE

6. Wat nao olketa injustice wea gohed taem Jesus stap lo earth? (Lukim tu piksa.)

⁶ Taem Jesus stap lo earth, hem lukim staka injustice. Hem lukim taem olketa religious leader treatim nogud olketa pipol. (Matt. 23:​2-4) Hem savve tu hao olketa bigman blo Rome savve treatim pipol lo wei wea barava raf. Staka Jew laek for kasem independence from Rome. Samfala, olsem olketa Zealot, olketa even willing for faet for kasem datwan. Bat, Jesus hem no laek startim or join insaed eni movement for mekem olketa change kamap. Taem hem faendaot pipol laek for mekem hem kamap king, Jesus hem go from olketa.—John 6:15.

7-8. Why nao Jesus no trae for finisim injustice taem hem stap lo earth? (John 18:36)

⁷ Taem Jesus lo earth, hem no trae for waka witim olketa politikol system lo datfala taem for finisim injustice. Why nao olsem? Hem savve olketa man no garem raet or ability for rulim olketa seleva. (Ps. 146:3; Jer. 10:23) And hem hard tu for olketa stretem rut kos blo injustice. Satan datfala Devil, hem nao rulim world and hem wanfala nogud angel wea iusim paoa blo hem for mekem pipol for kosim injustice. (John 8:44; Eph. 2:2) And from no eniwan perfect, hem hard for samwan duim samting followim justice evritaem, nomata if hem laek for duim datwan.—Eccl. 7:20.

⁸ Jesus savve Kingdom blo God nomoa bae barava stretem rut kos blo injustice. From datwan, hem iusim full strong and taem blo hem for “preachim gud nius abaotem Kingdom blo God.” (Luke 8:1) Hem talem “olketa wea hangere and thirsty for samting wea stret” dat injustice and corruption bae finis. (Matt. 5:6 and English study note; Luke 18:​7, 8) Bat gavman blo God lo heven wea “no part lo disfala world” nomoa bae duim datwan, and bae hem no kamap thru lo wat pipol duim for mekem olketa change kamap.—Readim John 18:36.

FOLLOWIM EXAMPLE BLO JESUS FOR DEAL WITIM INJUSTICE

9. Wat nao mekem iu sure dat Kingdom blo God nomoa bae finisim evri injustice?

⁹ Distaem iumi lukim staka injustice winim wat Jesus lukim taem hem stap lo earth. Bat samting wea kosim injustice distaem hem no change, Satan and pipol wea no perfect wea hem gohed for kontrolem, olketa still gohed for kosim injustice lo “olketa last day” distaem. (2 Tim. 3:​1-5, 13; Rev. 12:12) Olsem Jesus, iumi savve Kingdom blo God nomoa bae finisim rut kos blo injustice. Bikos iumi barava sapotim datfala Kingdom, iumi no laek for involve insaed olketa march, protest, and olketa nara samting wea pipol lo world trae for duim for finisim injustice. Tingim experience blo wanfala sista wea nem blo hem Stacy.a Bifor Stacy lanem truth, hem evritaem joinim olketa grup wea laek for mekem olketa change kamap. Bat gogo hem start for daotem wat hem duim. Hem sei: “Taem mi insaed lo olketa protest, mi wonder if mi sapotim raet grup. Bat distaem wea mi sapotim Kingdom blo God, mi savve dat mi lo raet grup. Mi savve hao Jehovah bae stretem injustice, hem winim wat mi fit for duim.”—Ps. 72:​1, 4.

10. Olsem Matthew 5:​43-48 storyim, why nao iumi shud no joinim olketa movement blo world for mekem olketa change kamap? (Lukim tu piksa.)

¹⁰ Staka taem, olketa movement blo world for mekem olketa change kamap, hem join witim olketa independent tingting and wei for kros, wea datwan barava difren from example blo Jesus and wat hem teachim. (Eph. 4:31) Wanfala brata wea nem blo hem Jeffrey hem sei: “Mi savve nomata pipol sei olketa duim peaceful protest, situation savve change kwiktaem for kamap raf and pipol savve steal and distroem olketa tings.” Bat Jesus teachim iumi for lovem evri pipol, nomata olketa wea no agree witim iumi or persecutim iumi. (Readim Matthew 5:​43-48.) Iumi olketa Christian traem best for no duim eni samting wea no followim example wea Jesus showim for iumi.

11. Wat nao maet mekem hem hard samfala taem for iumi disaed strong for followim example blo Jesus?

¹¹ Nomata iumi savve Kingdom blo God nao bae finisim injustice for olowe, iumi maet faendem hem hard for followim example blo Jesus taem iumi kasem injustice. Tingim samting wea happen lo Janiya, wea deal witim injustice bikos lo kala skin blo hem. Hem sei: “Mi kros tumas. Mi feel nogud tu and mi laekem olketa for kasem panis for wat olketa duim. Then mi ting for joinim wanfala movement for protest againstim racism and wei for ting daonem nara pipol. Mi tingse for duim datwan hem nao stret wei for showim kros blo mi.” Bat gogo, Janiya luksavve hem need for changem tingting blo hem. Hem sei: “Tingting blo olketa narawan nao affectim mi, and datwan mekem mi for trustim olketa man winim wei for trustim Jehovah. So, mi disaed for lusim nao datfala movement.” Nomata hem stret for iumi kros, iumi mas careful for no letem datwan mekem iumi for teksaed lo olketa issue blo politik and community.—John 15:19.

12. Why nao hem wise for iumi careful lo olketa information wea iumi kasem?

¹² Taem iumi feisim injustice, wat nao savve helpem iumi for kontrolem kros blo iumi? Staka savve careful lo wat olketa readim, lisin lo hem, and watchim. Samfala social media fulap lo olketa post wea extram olketa story abaotem injustice, and promotim olketa movement for mekem olketa change kamap. Staka taem, olketa nius report savve givim information wea talem nomoa wansaed lo story. Even if iumi herem report abaotem wanfala injustice wea really happen, hao, wei for tingting tumas abaotem datwan bae helpem iumi? If iumi spendem staka taem for laek savve abaotem olketa information olsem, datwan maet mekem iumi for kros or feel discourage. (Prov. 24:10) Or datwan maet even mekem iumi for forgetim dat Kingdom blo God nao bae finisim evri wei for injustice.

13. Hao nao wei for followim gud schedule for duim Bible reading savve helpem iumi garem stret tingting abaotem injustice?

¹³ For followim gud schedule for duim Bible reading and meditation, savve helpem iumi for deal witim injustice. Wanfala sista wea nem blo hem Alia hem barava feel nogud taem hem lukim samfala pipol treatim nogud olketa lo community blo hem. And luk olsem olketa wea duim datwan nating kasem panis for wat olketa duim. Hem sei: “Mi mas sidaon and askem miseleva, ‘Hao, mi really bilivim dat Jehovah bae fixim olketa problem hia?’ During lo datfala taem nao mi readim Job 34:​22-29. Olketa verse hia remindim mi dat no eniwan savve haed from Jehovah. Only Jehovah nomoa savve hao for barava followim justice, and hem nomoa savve barava stretem evriting.” Taem iumi gohed for weitim Kingdom blo God for mekem tru justice for kamap, iumi still need for deal witim injustice distaem. Hao nao bae iumi duim datwan?

WAT IUMI SAVVE DUIM DISTAEM

14. Wat nao iumi savve duim distaem for followim justice? (Colossians 3:​10, 11)

¹⁴ Iumi no savve kontrolem wat pipol duim lo olketa narawan, bat iumi savve kontrolem wat iumiseleva duim. Olsem iumi storyim finis, iumi followim example blo Jesus for showim love. Datkaen love savve muvim iumi for treatim olketa narawan witim respect, nomata olketa wea kosim injustice tu. (Matt. 7:12; Rom. 12:17) Jehovah hem hapi taem iumi kaen lo evriwan and followim justice.—Readim Colossians 3:​10, 11.

15. Taem iumi sharem Bible truth, hao nao datwan help for katem daon injustice?

¹⁵ Best wei wea iumi savve deal witim injustice hem for sharem truth from Bible witim olketa narawan. Why nao iumi sei olsem? Bikos “knowledge abaotem Jehovah” savve changem samwan wea hem raf and violent for kamap samwan wea kaen and lovem peace. (Isa. 11:​6, 7, 9) Bifor wanfala man wea nem blo hem Jemal lanem truth, hem joinim wanfala grup for faet againstim gavman bikos olketa ting datfala gavman no followim justice. Hem sei: “Iu no savve forcem pipol for change. No eniwan forcem mi for change, bat truth wea mi lanem lo Bible nao changem mi.” Wat Jemal lanem motivatim hem for stop for faet. Taem truth lo Bible helpem staka moa pipol for change, datwan bae help for katem daon injustice wea pipol experiencem distaem.

16. Wat nao motivatim iu for sharem Kingdom hope lo pipol?

¹⁶ Olsem Jesus, iumi barava laek for talem pipol dat Kingdom blo God nomoa savve finisim injustice for olowe. Datfala hope savve encouragem pipol wea safa from injustice. (Jer. 29:11) Stacy, wea iumi storyim finis, sei: “Truth wea mi lanem helpem mi for deal witim olketa injustice wea mi lukim and wea kasem mi. Jehovah iusim Bible message for provaedem comfort for pipol.” For sharem datfala comforting Bible message abaotem wei wea injustice bae finis, iu need for prepare gud. Taem iu barava savve gud lo olketa truth insaed Bible wea iumi discussim lo disfala article, iu bae redi for storyim disfala topic witim respect if samwan storyim datwan lo skul or lo waka ples.b

17. Hao nao Jehovah helpem iumi for deal witim injustice distaem?

¹⁷ Iumi savve taem Satan gohed “rulim disfala world,” iumi bae gohed for feisim injustice. Nomata olsem, iumi garem help and iumi no hopeles taem iumi gohed weitim Jehovah for “aotem” Satan. (John 12:31) Thru lo Bible, Jehovah showim olketa reason why staka injustice hem gohed, and hem talem tu hao hem feel abaotem wei wea iumi safa bikos lo injustice. (Ps. 34:​17-19) Thru lo Son blo hem, Jehovah teachim iumi wat iumi shud duim for deal witim injustice distaem, and hao klosap nao Kingdom blo hem bae finisim injustice for olowe. (2 Pet. 3:13) Iumi laek gohed strong for preachim gud nius abaotem Kingdom, and gohed luk forward for taem wea earth bae fulap witim “justice and raeteous fasin.”—Isa. 9:7.