1925​—Wan Handred Year Go Finis

EXPECTATION HEM DELAY

Staka Bible Student expectim hao earth bae kamap Paradaes moa lo 1925. Why? Brata Albert Schroeder, wea bihaen hem kamap member blo Governing Body, hem sei: “Lo datfala taem, mifala biliv dat lo 1925, olketa anointed Christian wea still stap bae go ap lo heven for kamap part lo Kingdom blo God and olketa faithful man lo bifor, olsem Abraham, David and olketa narawan bae resurrect and serve olsem olketa prince lo earth anda lo Kingdom blo God lo heven.” During lo datfala year, taem olketa lukim datwan no happen, samfala brata and sista start for discourage.—Prov. 13:12.

Nomata samfala discourage, staka Bible Student gohed busy lo preaching waka and olketa start for luksavve dat olketa garem big responsibility for kamap Witness blo Jehovah. For example, tingim waka wea olketa duim for broadcastim message blo truth for staka pipol herem.

SAMFALA NIU RADIO STATION MOA

Bikos lo 1924 WBBR radio station hem barava successful, Olketa Bible Student buildim nara paoaful radio station klosap lo Chicago, Illinois. Kol-saen blo datfala niu radio station hem nao WORD. Brata Ralph Leffler, wea hem wanfala radio engineer wea buildim datfala station, hem sei: “Lo olketa cold winter naet, pipol savve lisin lo WORD nomata olketa stap farawe.” For example, wanfala famili stap farawe winim 5,000 kilometer (3,000 mi) lo Pilot Station, Alaska, and olketa tune in for lisin lo wanfala lo olketa first broadcast. Bihaen famili hia lisin lo datfala program, olketa raetem leta for olketa lo datfala radio station for sei thankiu for datfala encouraging spiritual program.

The Watch Tower blo December 1, 1925 storyim hao datfala radio station garem barava gud coverage, hem sei: “WORD hem wanfala lo olketa barava paoaful station lo United States, bikos datfala station iusim 5,000 watts. Pipol lo Atlantic go kasem Pacific, olsem Cuba and farawe go kasem olketa northern part lo Alaska savve herem disfala station. Staka wea bifor olketa no herem truth, olketa interest bikos olketa lisin lo disfala station.”

During lo datfala taem tu, Olketa Bible Student disaed for iusim radio for preachim gud nius lo Canada. Lo 1924, olketa buildim radio station wea kol-saen blo hem CHUC lo Saskatoon, Saskatchewan. Hem wanfala lo olketa first religious radio station lo Canada. Lo 1925, olketa need for muvim datfala smol station. So Watch Tower Society kamap owner blo datfala station and muvim datfala broadcasting studio go lo Regent Building, wea hem wanfala old theater lo Saskatoon wea olketa peim and renovatim for hem kamap studio.

Bikos lo datfala station, staka pipol wea stap lo farawe ples lo Saskatchewan herem gud nius. For example, Mrs. Graham wea stap farawe lo wanfala taon, raet kam for askem Bible literature bihaen hem lisin lo wanfala broadcast. Brata George Naish sei, “Hao hem ask hem olsem hem sei, ‘Plis teachim mi!’ so mifala sendem hem full set blo Studies in the Scriptures.” No longtaem bihaen, Mrs. Graham hem start for spredim Kingdom message go lo olketa nara farawe ples.

TRUTH HEM KAMAP MOA KLIA

Lo March 1, 1925, The Watch Tower magasin garem wanfala important article, wea garem title “Birth of the Nation.” Why nao disfala article hem barava important? For lelebet longtaem, Olketa Bible Student savve dat Satan garem organization blo hem wea includim olketa wicked spirit lo heven and includim olketa system blo false religion, bisnis, and politik lo disfala earth. Bat lo disfala article, “faithful and wise slave” helpem olketa brata and sista for luksavve dat Jehovah tu garem organization blo hem wea barava difren from organization blo Satan, and datfala organization hem againstim organization blo Satan. (Matt. 24:45) And tu, datfala faithful and wise slave explainim dat Kingdom blo God hem born, or start for rul lo 1914, and lo datfala year ‘war kamap lo heven,’ then Jesus and olketa angel torowem kam daon Satan and olketa demon blo hem from heven and distaem olketa stap lo earth.—Rev. 12:​7-9.

Samfala faendem hem hard for acceptim disfala niu understanding. From datwan, datfala article hem sei: “If eniwan readim disfala Watch Tower and no agree witim wat hem talem, hem gud for hem patient and weit lo Lord, and gohed keepim wanfala pure heart.”

Tom Eyre, wanfala colporteur (wea distaem iumi kolem pioneer) wea kam from Britain, hem storyim abaotem hao staka Bible Student feel abaotem datfala article: “Olketa brata hapi tumas abaotem disfala niu explanation abaotem Revelation 12. Taem mifala luksavve dat Kingdom hem start for rul lo heven, mifala barava hapi for sharem datfala gud nius witim olketa narawan. Hem muvim mifala for duim moa samting for preach and helpem mifala for lukim hao Jehovah hem gohed for leadim pipol blo hem for duim staka nambawan samting.”

KAMAP OLKETA WITNESS FOR JEHOVAH

Distaem, Olketa Jehovah’s Witness savve gud lo wat Isaiah 43:10 talem: “Jehovah hem sei, ‘Iufala nao olketa witness blo mi, yes, servant blo mi wea mi chusim finis.’” Bat, lo olketa year bifor 1925, olketa no iusim tumas disfala scripture lo olketa pablikeson blo iumi. Then datwan hem change. During lo 1925, elevenfala issue blo The Watch Tower magasin hem storyim subject abaotem Isaiah 43:10 and 12!

Lo end blo August 1925, Olketa Bible Student hipap lo wanfala convention lo Indianapolis, Indiana. Lo welkam message wea olketa raetem insaed datfala convention program, Joseph Rutherford sei: “Iumi kam lo disfala convention for kasem . . . strong from Lord mekem taem iumi go bak lo field iumi garem strong for gohed witness abaotem hem.” During lo datfala eit-day convention, evriwan wea attend kasem encouragement for witness abaotem Jehovah lo evri chance wea kamap.

Lo Saturday, August 29, Brata Rutherford givim tok wea garem title “A Call to Action.” Lo disfala tok, hem storyim why hem important for gohed witness, hem sei: “Jehovah hem sei lo pipol blo hem . . . : ‘Iufala nao witness blo mi . . . And mi nao God.’ Then olketa herem wanfala klia komand: ‘Standapim wanfala saen for olketa pipol.’ No eniwan moa lo earth savve standapim wanfala saen for olketa pipol except [pipol blo hem], wea olketa garem spirit blo Lord, and dastawe olketa nao witness blo hem.”—Isa. 43:12; 62:10.

Afta tok blo Brata Rutherford, evriwan lo audience agree for followim disfala resolution wea garem title “Message of Hope,” wea storyim hao only Kingdom blo God nomoa savve givim iumi real hope for kasem “olketa blessing blo peace, gud laef, gud health, laef olowe, freedom and hapi for olowe.” Bihaen, olketa transleitim datfala resolution lo samfala nara languis and olketa printim olsem wanfala tract. Olketa givimaot samting olsem 40 million copy blo datfala tract.

Lo datfala taem Olketa Bible Student no changem yet nem blo olketa for kamap Jehovah’s Witness, datwan kamap samfala year bihaen. Bat, olketa start for luksavve lo responsibility blo olketa for kamap olketa witness blo hem.

GO BAK FOR VISITIM OLKETA WEA INTEREST

Taem namba blo Olketa Bible Student gohed for increase evriwea lo world, olketa kasem encouragement tu for duim olketa return visit lo olketa wea showim dat olketa interest lo gud nius. Afta datfala campaign for givimaot disfala tract Message of Hope, datfala Bulletina hem sei: “Hem gud for arrange for duim olketa return visit lo olketa haos wea olketa pablisa no givim eni literature, bat olketa givim copy blo datfala tract Message of Hope.”

Lo Bulletin blo January 1925 hem garem disfala report from wanfala Bible Student wea stap lo Plano, Texas: “Mifala sapraes for faendaot dat territory wea mifala preach lo hem tu-thri taem, hem beta winim taem mifala duim olketa niu territory. Mifala preach lo wanfala smol taon lo territory blo mifala faev taems insaed ten years. . . . And no longtaem go nomoa, Sista Hendrix and mami blo mi preach lo there moa and givim staka buk winim eni nara taem.”

And wanfala colporteur lo Panama, hem sei: “Staka pipol wea raosem mi from haos blo olketa, wei blo olketa change taem mi visitim olketa lo second or lo third taem. Dis year mi iusim staka taem blo mi for go bak and visitim moa olketa wea mi bin preach lo olketa bifor, and mi garem staka gud experience witim samfala lo olketa.”

LUK FORWARD FOR OLKETA WAKA WEA BAE KAMAP

Insaed annual leta blo Brata Rutherford for evri colporteur, hem reviewim evriting wea olketa duim lo datfala year and storyim waka wea olketa luk forward for duim. Hem sei: “During lo past year iufala garem privilege for comfortim staka wea sorre. Disfala waka mekem iufala hapi tumas . . . Next year bae iufala garem staka chance for witness for God and kingdom blo hem and for iufala holem ap wanfala saen for olketa pipol lukim. . . . Iumi evriwan laek for continue for iusim voice blo iumi and praisem God and King blo iumi.”

Gogo for end blo 1925, olketa brata start for mekem plan for expandim olketa facility lo Brooklyn Bethel. Lo year 1926, hem nao start blo big construction project wea organization duim winim enitaem bifor.