Hao for Impruvim Olketa Prea blo Iu

1-2. (a) Wat nao savve mekem hem no isi for iumi storyim really feeling blo iumi lo Jehovah? (b) Hao nao iumi savve dat Jehovah laek for lisin lo olketa prea blo iumi?

HAO, samtaems iu feel dat iu repeatim nomoa sem samting lo prea blo iu and iu no storyim really feeling blo iu lo Jehovah? Datwan savve happen lo iumi evriwan. Bikos samfala taem from iumi busy tumas iumi rush nomoa taem iumi prea. Or maet iumi faendem hem hard for iumi storyim really feeling blo iumi lo Jehovah bikos iumi tingse iumi no fit.

² Bible showim dat samting wea important lo Jehovah, hem no olketa toktok wea iumi talem, bat hem wei wea iumi hambol and prea from heart. Hem savve “herem samting wea hambol pipol askem.” (Ps. 10:17) Hem laek for lisin lo evri toktok wea iumi talem bikos hem barava interest lo iumi.—Ps. 139:​1-3.

3. Wat nao olketa kwestin wea iumi bae storyim lo disfala article?

³ So maet iumi ask: Why nao iumi shud no hol bak for story lo Jehovah? Hao nao iumi savve impruvim wei for prea mekem olketa prea blo iumi kamap moa deep? Hao nao wei for ting raonem prea blo olketa servant blo Jehovah lo Bible savve helpem iumi impruvim prea blo iumi? And wat nao iumi savve duim if wei for wari tumas hem mekem iumi hard for story lo Jehovah? Bae iumi storyim ansa blo olketa kwestin hia.

NO HOL BAK FOR STORYIM FEELING BLO IU LO JEHOVAH TAEM IU PREA

4. Wat nao savve helpem iumi for no hol bak for storyim feeling blo iumi lo Jehovah taem iumi prea? (Psalm 119:145)

⁴ Taem iumi luksavve Jehovah hem loyal fren wea laekem iumi for kasem gud samting, datwan bae mekem iumi for no hol bak for storyim feeling blo iumi lo hem. Man wea raetem Psalm 119 laek for garem kaen klos wei for fren olsem witim Jehovah. Hem feisim olketa problem lo laef. Olketa man for laea tok againstim hem. (Ps. 119:​23, 69, 78) And tu, hem mas deal witim olketa own wik point blo hem. (Ps. 119:5) Nomata olsem, hem no hol bak for storyim full heart blo hem lo Jehovah.—Readim Psalm 119:145.

5. Why nao iumi shud no letem negative feeling for stopem iumi for prea? Storyim example.

⁵ Nomata olketa wea duim serious mistek, Jehovah laekem olketa for prea lo hem. (Isa. 55:​6, 7) So iumi shud no letem olketa negative feeling for mekem iumi hol bak for prea. Tingim disfala example, wanfala pilot blo aeroplane savve dat if hem needim help, hem savve communicate witim olketa lo air traffic kontrol. Bat wat if hem mekem wanfala mistek or hem lus, hao, bae hem shame nao for contactim olketa? Nomoa. Lo sem wei tu, even if iumi duim sin or maet no savve wat for duim, iumi shud no shame for story lo Jehovah lo prea.—Ps. 119:​25, 176.

HAO FOR MEKEM PREA BLO IUMI MOA DEEP

6-7. Hao nao wei for ting raonem olketa quality blo Jehovah helpem iumi for mekem prea blo iumi moa deep? Storyim example. (Lukim tu footnote.)

⁶ Taem iumi feel free for story lo Jehovah and talem evri tingting and deep feeling blo iumi lo hem, olketa prea blo iumi bae kamap moa deep. So, wat nao iumi savve duim for mekem prea blo iumi hem kamap moa deep?

⁷ Tingim olketa quality blo Jehovah.a Taem iumi ting abaotem olketa quality blo Jehovah, datwan helpem iumi for feel free for storyim tingting blo iumi lo hem. (Ps. 145:​8, 9, 18) Tingim example blo Kristine, wanfala sista wea dadi blo hem raf tumas. Hem sei: “Mi faendem hem hard for ting lo Jehovah olsem wanfala Dadi. Mi feel dat bikos mi no perfect hem bae les lo mi.” Wat nao helpem hem? Hem sei: “Loyal love blo Jehovah nao mekem mi feel sef. Mi savve bae hem no let go lo hand blo mi. Even if mi foldaon bae hem helpem mi for getap. Datwan helpem mi for storyim evri hapi blo mi and evri sorre blo mi lo hem.”

8-9. Why nao hem gud for ting abaotem wat for talem bifor iu prea? Storyim example.

⁸ Ting abaotem wat for talem. Bifor iu prea, maet hem gud for askem iuseleva samfala kwestin. For example: ‘Wat nao specific problem wea mi deal witim distaem? Hao, eniwan duim samting lo mi wea mi need for forgivim? Hao, mi feisim wanfala niu challenge wea mi needim help blo Jehovah for winim?’ (2 Ki. 19:​15-19) Iumi savve tingim tu wat Jesus teachim abaotem prea, taem iumi ting raonem wat for talem abaotem nem blo Jehovah, Kingdom blo Hem, and will blo Hem.—Matt. 6:​9, 10.

⁹ Taem wanfala sista wea nem blo hem Aliska faendaot dat hasband blo hem bae dae from brain cancer, hem no isi for hem prea. Hem sei: “Mi barava wari tumas, so mind blo mi no klia and mi no savve wat for talem lo prea blo mi.” Wat nao helpem hem? Hem sei: “Bifor mi prea, mi ting raonem firstaem wat for talem, and datwan helpem mi for no focus nomoa lo miseleva. Taem mi duim diswan, hem helpem mi for no wari tumas and helpem mi for story gud lo Jehovah.”

10. Why nao iumi shud no rush lo prea blo iumi? (Lukim tu piksa.)

¹⁰ No rush lo prea blo iu. Olketa short prea savve deep tu, bat if iumi spendem staka taem for prea bae hem moa isi for iumi talem tingting blo iumi lo Jehovah.b Hasband blo Aliska, Elijah, hem sei: “Mi traem best for prea staka taem lo day, and hem mekem mi kam moa klos lo Jehovah taem mi spendem taem for prea. From Jehovah hem patient and willing for weit taem mi prea, mi no rush taem mi story witim hem.” Traem disfala idea, faendem taem and ples wea no eni samting savve disturbim iu taem iu prea, and maet iu savve prea big tu, and traem best for duim diswan evritaem.

TING RAONEM PREA BLO OLKETA SERVANT BLO GOD LO BIBLE

11. Wat nao gud samting iumi kasem taem iumi ting raonem prea blo olketa servant blo God lo Bible? (Lukim tu box “Hao, Situation blo Iu Hem Klosap Semsem Olsem blo Olketa?”)

¹¹ Iu savve kasem gud samting taem iu ting raonem olketa prea and singsing, or psalms, wea stap lo Bible. Taem iu ting raonem hao olketa servant blo God storyim deep feeling blo olketa, datwan bae motivatim iu for prea lo Jehovah from heart blo iu. Iu maet faendem tu olketa niu toktok for praisem Jehovah wea iu savve includim insaed prea blo iu. And maet iu faendem olketa prea wea barava fitim situation wea iu go thru lo hem.

12. Wat nao samfala kwestin wea iumi savve askem iumiseleva taem iumi readim wanfala prea lo Bible?

¹² Taem iumi readim wanfala prea lo Bible and ting raonem datwan, askem iuseleva: ‘Hu nao talem olketa toktok hia and wat nao situation blo hem? Hao, olketa toktok lo disfala prea hem fitim situation blo mi? Wat nao samfala leson wea mi savve lanem from diswan?’ Nomata maet iu need for duim samfala research moa, iu bae benefit from datwan. Tingim samfala example hia.

13. Wat nao wanfala leson wea iumi savve lanem from Hannah abaotem wei for prea? (1 Samuel 1:​10, 11) (Lukim tu piksa.)

¹³ Readim 1 Samuel 1:​10, 11. Taem Hannah talem disfala prea, hem feisim tufala big problem. Hem no savve garem pikinini, and nara waef blo hasband blo hem savve mekem laef blo hem hard tumas. (1 Sam. 1:​4-7) If iu feisim wanfala problem wea no savve finis, wat nao iu savve lanem from prea blo Hannah? Taem Hannah spendem taem for prea and talem evri wari blo hem lo God, hem kasem peace lo mind. (1 Sam. 1:​12, 18) Iumi tu savve kasem peace lo mind taem iumi “torowem go hevi blo [iumi] lo Jehovah” and talem hem hao iumi feel abaotem eni specific problem wea iumi feisim.—Ps. 55:22.

14. (a) Wat moa iumi lanem from example blo Hannah? (b) Hao nao iumi savve impruvim prea blo iumi taem iumi ting raonem olketa Scripture? (Lukim footnote.)

¹⁴ Samfala year bihaen son blo Hannah, Samuel hem born, hem tekem go lo Hae Priest Eli. (1 Sam. 1:​24-28) Hannah prea from heart blo hem, and storyim hao Jehovah protectim and kea for olketa loyal servant blo hem.c (1 Sam. 2:​1, 8, 9) Nomata olketa problem blo hem lo haos maet no finis, Hannah focus lo hao Jehovah blessim hem. Wat nao iumi lanem? Hem bae moa isi for iumi deal witim olketa challenge if iumi focus lo hao Jehovah sapotim iumi kam kasem distaem.

15. Taem iumi kasem injustice, wat nao iumi savve lanem from prea blo profet Jeremiah? (Jeremiah 12:1)

¹⁵ Readim Jeremiah 12:1. Wantaem, profet Jeremiah barava feel nogud bikos hem lukim laef blo wicked pipol hem gud nomoa. Hem feel nogud tu bikos olketa nara Israelite treatim hem nogud. (Jer. 20:​7, 8) Iumi tu savve feel olsem taem pipol mekfani lo iumi or taem iumi lukim pipol wea no honest laef blo olketa hem gud nomoa. Nomata Jeremiah talem Jehovah dat hem feel nogud, hem no kwestinim justice blo Hem. Taem hem lukim hao Jehovah disciplinem pipol blo hem wea bighed, datwan mekem hem for barava trustim justice blo God. (Jer. 32:19) Iumi tu savve feel free for story lo Jehovah abaotem eniting wea iumi feel nogud lo hem, and iumi trustim dat lo taem wea hem markem, hem bae stretem eni injustice wea iumi feisim.

16. If situation blo iumi hem mekem hem hard for iumi duim samfala samting, wat nao iumi savve lanem from Levite wea raetem Psalm 42? (Psalm 42:​1-4) (Lukim tu piksa.)

¹⁶ Readim Psalm 42:​1-4. Wanfala Levite wea situation blo hem mekem hem hard for worship lo temple witim olketa nara Israelite, hem nao raetem disfala song. Disfala psalm describem hao hem feel. Iumi tu maet feel olsem if iumi no savve lusim haos or iumi stap lo prison bikos lo faith blo iumi. Nomata feeling blo iumi maet no stedy, hem gud for iumi storyim datwan lo Jehovah. Maet diswan helpem iumi for understandim gud tingting blo iumiseleva and mekem iumi for ting lo situation blo iumi lo difren wei. For example, datfala Levite luksavve hem still garem olketa nara chance for praisem Jehovah. (Ps. 42:5) Hem ting raonem tu hao Jehovah gohed for lukaftarem hem. (Ps. 42:8) Wei for prea strong lo God savve helpem iumi for understandim feeling blo iumi, kasem bak balance tingting, and kasem strong for gohed and no givap.

17. (a) Wat nao iumi savve lanem from prea blo profet Jonah? (Jonah 2:​1, 2) (b) Taem iumi feisim hard taem, hao nao samfala toktok lo Psalms savve helpem iumi? (Lukim footnote.)

¹⁷ Readim Jonah 2:​1, 2. Profet Jonah talem disfala prea taem hem insaed bele blo wanfala big fish. Nomata hem savve dat hem disobeyim Jehovah, Jonah sure dat God bae herem hem. Lo prea blo hem, Jonah iusim staka toktok from Psalms.d Luk olsem hem savve gud lo olketa verse hia. Taem hem ting raonem olketa psalm hia, datwan mekem hem feel sure Jehovah bae helpem hem. Lo sem wei tu, if iumi traem best for memorizim samfala Bible verse, maet bae iumi tingim bak olketa verse hia and hem savve comfortim iumi taem iumi prea lo Jehovah lo olketa hard taem.

GOHED KAM KLOS LO JEHOVAH THRU LO PREA

18-19. If samfala taem iumi stragol for talem feeling blo iumi taem iumi prea, hao nao Romans 8:​26, 27 savve helpem iumi? Storyim example.

¹⁸ Readim Romans 8:​26, 27. Maet samfala taem iumi wari tumas gogo iumi no savve wat for talem. Bat help hem stap. Lo olketa taem olsem, holy spirit bae “begim” God for iumi. Wat nao datwan minim? Jehovah iusim spirit blo hem for mek sure olketa raetem daon staka prea insaed lo Bible. Taem iumi no savve talem klia tingting blo iumi, Jehovah savve ting lo olketa prea hia wea spirit muvim olketa man for raetem, for hem olsem request wea kam from iumi, and hem savve ansarem datwan.

¹⁹ Datwan helpem wanfala sista lo Russia wea nem blo hem Yelena. Olketa arrestim hem bikos hem prea and hem readim Bible. Yelena hem barava stress gogo hem no savve wat for talem taem hem prea. Hem sei: “Taem mi wari tumas and no savve wat for prea abaotem, mi remember dat Jehovah bae willing for acceptim olketa prea lo Bible wea olketa servant blo God bifor talem . . . for datwan olsem request wea kam from mi. . . . Diswan barava comfortim mi during lo hard taem wea mi deal witim.”

20. Taem iumi stress, hao nao iumi savve preparem mind blo iumi for prea?

²⁰ Taem iumi stress, hem savve hard for iumi focus taem iumi prea. For preparem mind blo iumi, iumi savve lisin lo olketa audio recording blo Psalms or readim big. And tu, olsem King David duim, iumi savve raetem daon olketa feeling blo iumi. (Ps. 18, 34, 142; superscription.) No eni rul hem stap abaotem wat iumi shud duim for preparem iumiseleva for prea. (Ps. 141:2) Duim wat hem best for iu.

21. Why nao iumi shud no hol bak for prea witim full heart blo iumi?

²¹ Hem barava comfortim iumi taem iumi savve dat Jehovah understandim feeling blo iumi even bifor iumi talem eni samting. (Ps. 139:4) Nomata olsem, hem hapi tumas for herem iumi talem olketa toktok wea showim iumi trustim hem. So no hol bak for prea lo Dadi blo iu lo heven. Lane from olketa prea wea stap lo Bible. Prea witim full heart blo iu. Storyim olketa hapi and olketa sorre blo iu lo hem. From Jehovah nao tru Fren blo iu, bae hem evritaem lo there for iu!