Jesus Datfala Hae Priest wea Barava Minim Iumi Gud

1-2. (a) Why nao Jehovah sendem kam Son blo hem lo earth? (b) Wat nao bae iumi storyim lo disfala article? (Hebrews 5:​7-9)

SAMTING olsem 2,000 years ago, Jehovah God sendem kam barava spesol Son blo hem lo earth. Why? Wanfala reason hem for mekem iumi kamap free from sin and dae and for finisim evri nogud samting wea Satan kosim. (John 3:16; 1 John 3:8) And Jehovah savve dat wat Jesus experiencem lo earth bae redyim hem for kamap Hae Priest wea kea abaotem iumi, tingim iumi, and barava minim iumi gud. Lo 29 C.E.a afta Jesus baptaes, hem start for duim datfala waka olsem Hae Priest.

² Lo disfala article, bae iumi storyim hao olketa samting wea Jesus experiencem lo earth helpem hem for kamap moa qualify olsem Hae Priest wea minim iumi gud. Taem iumi barava understandim wat nao mekem Jesus for kamap barava “fit” for duim waka blo hem, datwan bae helpem iumi for no hol bak for story lo Jehovah, even if iumi feel discourage bikos lo olketa mistek blo iumi.—Readim Hebrews 5:​7-9.

SON WEA GOD BARAVA LOVEM HEM KAM LO EARTH

3-4. Wat nao olketa big change wea Jesus experiencem taem hem kam lo earth?

³ Staka lo iumi experiencem olketa change lo laef, olsem taem iumi muv from hom blo iumi and lusim olketa famili and frens. Olketa change olsem hem no isi. Bat no eni change wea iumi man deal witim, hem olsem wat Jesus experiencem. No eni angel garem hae position winim Jesus lo heven. And Jehovah barava lovem hem and Jesus evritaem hapi for stap lo “raet hand” blo God and waka witim hem. (Ps. 16:11; Prov. 8:30) Nomata olsem, Philippians 2:7 sei Jesus hem willing for “lusim evri samting” for kam stap lo earth witim pipol wea no perfect.

⁴ Tingim tu laef blo Jesus taem hem born and growap olsem wanfala human. Jesus born insaed wanfala poor famili, iumi savve lo datwan bikos lo sakrifaes wea parents blo hem offerim afta hem born. (Lev. 12:8; Luke 2:24) And tu, taem wicked King Herod faendaot dat Jesus hem born, hem trae for killim hem dae. From datwan, famili blo Jesus mas ranawe and kamap refugee lo Egypt for lelebet taem. (Matt. 2:​13, 15) Datwan hem barava big change from laef wea Jesus garem lo heven!

5. Taem Jesus lo earth wat nao hem lukim, and hao nao datwan redyim hem for waka blo hem olsem Hae Priest? (Lukim tu piksa.)

⁵ Taem Jesus lo earth, hem lukim staka pipol safa. Jesus experiencem tu feeling for lusim olketa loved wan lo dae, luk olsem datwan includim dadi blo hem Joseph, wea adoptim hem. During lo ministry blo Jesus, hem meetim pipol wea garem leprosy, blind, paralaes, and olketa wea pikinini blo olketa dae, and hem barava feel sorre lo olketa. (Matt. 9:​2, 6; 15:30; 20:34; Mark 1:​40, 41; Luke 7:13) Hem tru, taem hem lo heven hem lukim pipol safa. Bat taem hem lo earth olsem wanfala human, hem barava feelim pain wea pipol kasem taem olketa safa. (Isa. 53:4) Wat Jesus experiencem taem hem lo earth helpem hem for understandim olketa feeling, hard taem, and pain wea pipol kasem. Hem experiencem olketa feeling wea iumi olketa man garem, includim wei for taed, sorre, and for feel nogud.

JESUS SHOWIM HEM TINGIM FEELING BLO PIPOL

6. Wat nao iumi savve lanem from tokpiksa blo profet Isaiah abaotem hao Jesus minim and tingim pipol? (Isaiah 42:3)

⁶ Taem Jesus duim ministry blo hem, Jesus barava showim dat hem tingim pipol wea olketa narawan treatim olketa nogud. Taem hem duim datwan, hem fulfillim profesi blo Isaiah. Lo olketa Hebrew Scripture, hem storyim hao olketa wea garem strong faith, samfala taem olketa olsem garden wea olketa watarem gud, or olketa bigfala tree. (Ps. 92:12; Isa. 61:3; Jer. 31:12) Bat olketa wea poor and no garem hope olketa olsem tol grass wea bend finis and olsem laet from wick wea klosap for dae, wea tufala olsem iusles samting nomoa. (Readim Isaiah 42:3; Matt. 12:20) Jehovah muvim profet Isaiah for iusim olketa tokpiksa hia for storyim profesi abaotem hao Jesus bae lovem and tingim olketa ordinary pipol wea olketa narawan ting daonem.

7-8. Hao nao Jesus fulfillim profesi blo Isaiah?

⁷ Gospel blo Matthew storyim hao Jesus fulfillim profesi blo Isaiah wea sei: “Hem bae no brekem tol grass wea bend finis, and hem bae no killim dae laet from wick wea klosap for dae.” Samfala lo olketa mirakol blo Jesus hem for helpem olketa wea olsem tol grass wea bend finis bikos pipol treatim olketa nogud or olketa wea no garem hope, wea olsem laet from wick wea klosap for dae. Wanfala lo olketa nao hem man wea leprosy kaikaim full body blo hem. Masbi datfala man no garem eni hope for gud bak and stap moa witim famili and frens blo hem. (Luke 5:​12, 13) Then narawan, hem datfala man wea deaf and no savve toktok gud. Ting abaotem hao hem feel taem hem lukim olketa narawan story bat hem nating minim wat olketa storyim. (Mark 7:​32, 33) Bat nara samting tu Jesus duim.

⁸ Staka Jew lo taem blo Jesus bilivim hao olketa wea sik or disable kasem datwan bikos God panisim olketa from olketa sin or from sin blo parents blo olketa. (John 9:2) From disfala rong biliv, pipol savve treatim nogud olketa wea safa. So Jesus fulfillim profesi blo Isaiah taem hem healim olketa wea safa and givim olketa hope for savve dat God lovem olketa. Hao nao datwan encouragem iumi distaem?

9. Hao nao Hebrews 4:​15, 16 showim dat Hae Priest blo iumi lo heven hem minim gud iumi pipol wea no perfect?

⁹ Readim Hebrews 4:​15, 16. Iumi savve sure dat Jesus bae evritaem minim iumi gud. So wat nao datwan minim? Man wea minim gud samwan hem understandim pain wea samwan kasem and datwan tasim heart blo hem. Greek word wea olketa transleitim for disfala toktok “minim,” hem savve minim for share insaed lo sem experience witim samwan and garem sem feeling olsem olketa. (Lukim tu Hebrews 10:​34, wea Paul iusim datfala sem Greek verb.) Olketa story lo Bible abaotem olketa mirakol blo Jesus hem barava showim hao Jesus feelim pain wea narawan kasem. Hem no just healim pipol bikos hem nao waka wea hem mas duim. Bat hem duim bikos hem barava kea and laek for helpem pipol. For example, taem hem healim datfala leprosy man, hem fit for standap farawe nomoa and duim datfala mirakol, bat hem tingim datfala man, so hem go and tasim hem. Maet datwan hem firstaem wea datfala leprosy man feelim samwan tasim hem bihaen staka year! From Jesus tingim datfala man wea deaf, Jesus leadim hem go from datfala crowd and healim hem. And taem wanfala Pharisee ting daonem datfala woman wea repent and wasim leg blo Jesus witim tias blo hem and draem witim hair blo hem, Jesus protectim hem and tok strong lo datfala Pharisee. (Matt. 8:3; Mark 7:33; Luke 7:44) Jesus no rejectim olketa wea safa from olketa sik or duim serious sin. Bat, hem welkamim olketa and showim hem lovem olketa. So iumi savve sure Jesus bae evritaem minim iumi gud tu.

FOLLOWIM EXAMPLE BLO HAE PRIEST BLO IUMI

10. Wat nao spiritual kaikai wea stap for helpem olketa wea deaf and blind? (Lukim tu piksa.)

¹⁰ From iumi olketa faithful follower blo Jesus, iumi traem best for followim example blo hem for showim love, tingim feeling blo pipol, and kaen lo olketa narawan. (1 Pet. 2:21; 3:8) Nomata iumi no savve healim pipol wea deaf or blind, iumi savve helpem olketa lo spiritual wei. For example, distaem olketa Bible pablikeson stap lo winim 100 saen languis. And for helpem olketa wea no savve lukluk gud, iumi garem olketa pablikeson lo braille lo winim 60 languis, and olketa audio description for olketa video hem stap lo winim 100 languis. Olketa spiritual kaikai olsem helpem olketa wea deaf and blind for fren klos witim Jehovah and Son blo hem.

11. Wat nao organization blo Jehovah duim wea showim olketa followim example blo Jesus for tingim evri difren kaen pipol? (Acts 2:​5-7, 33) (Lukim tu piksa.)

¹¹ Organization blo Jehovah waka hard for helpem evri difren kaen pipol. Tingim, bihaen Jesus resurrect hem pourimaot holy spirit lo olketa disaepol mekem each wan wea kam for festival blo Pentecost savve herem gud nius lo own “languis blo hem.” (Readim Acts 2:​5-7, 33.) For followim direction blo Jesus, organization provaedem olketa Bible pablikeson lo winim 1,000 languis, and samfala lo olketa languis hia no staka pipol nao iusim. For example, samfala Amerindian languis lo North and South America, samfala pipol nomoa iusim. Nomata olsem, olketa pablikeson blo iumi stap lo winim 160 lo olketa languis hia for mek sure staka pipol lane abaotem gud nius. Olketa pablikeson blo iumi stap tu lo winim 20 Romany languis. From datwan, staka thousand wea story lo olketa languis hia acceptim truth.

12. Wat nao samfala nara help wea organization blo Jehovah provaedem?

¹² Witim wei for organizem waka for talemaot gud nius, organization blo Jehovah provaedem tu relief supply for olketa wea kasem natural disaster. And staka thousand nao willing for volunteer for helpem olketa brata and sista blo olketa wea needim help. And tu, organization help for provaedem olketa ples for worship mekem pipol savve kam tugeta and lanem moa samting abaotem love blo God for olketa.

HAE PRIEST BLO IUMI SAVVE HELPEM IU

13. Wat nao samfala wei wea Jesus helpem iumi?

¹³ From Jesus hem nambawan shepherd blo iumi, hem mek sure each wan lo iumi kasem spiritual help wea iumi needim. (John 10:14; Eph. 4:7) Samfala taem, olketa situation lo laef mekem iumi feel olsem wanfala laet blo wick wea klosap for dae or tol grass wea bend finis. Maet iumi feel discourage bikos iumi kasem wanfala serious sik, duim mistek, or maet feel nogud lo wanfala brata or sista lo kongregeson. Iumi maet tingting tumas abaotem pain wea iumi deal and iumi no focus lo hope blo iumi for future. Bat remember, Jesus lukim wat iu deal witim and hem understandim feeling blo iu. From Jesus hem kea, hem bae duim samting for helpem iu. For example, hem savve iusim holy spirit for strongim iu taem iu no garem strong. (John 16:7; Titus 3:6) And tu, Jesus savve iusim “olketa man olsem present” and olketa brata and sista for encouragem, sapotim, and helpem iu.—Eph. 4:8.

14. Wat nao iumi savve duim taem iumi feel discourage?

¹⁴ If flame lo laet blo iu hem klosap for dae or iu feel olsem iu bend finis from iu discourage, ting raonem waka blo Jesus olsem Hae Priest blo iumi. Tingim dat Jehovah sendem Jesus kam lo earth no just for givim laef blo hem olsem ransom, bat for helpem Jesus minim gud olketa problem wea pipol wea no perfect feisim. Taem iumi discourage bikos lo wik point blo iumiseleva or iumi duim sin, Jesus redi and willing for helpem iumi lo barava “taem [wea] iumi needim help.”—Heb. 4:​15, 16.

15. Storyim experience wea showim hao samwan wea lusim Jehovah savve kasem help for kam bak lo kongregeson.

¹⁵ Jesus directim tu waka blo pipol blo hem for lukaotem and helpem olketa wea lusim Jehovah for kam bak. (Matt. 18:​12, 13) Tingim experience blo Stefano.b Bihaen hem aot from kongregeson for 12 years, hem disaed for attendim wanfala meeting. Hem sei: “Hem no isi, bat mi laek for kam bak moa insaed loving famili blo Jehovah. Olketa elder wea meet witim mi mekem mi feel welkam. Samfala taem, mi savve feel iusles and mi laek for givap. Bat olketa brata remindim mi dat Jehovah and Jesus laekem mi for gohed strong and no givap. Taem mi reinstate, full kongregeson hapi for welkamim mi and famili blo mi. Gogo waef blo mi willing for study, and distaem mifala famili worshipim Jehovah tugeta.” Masbi loving Hae Priest blo iumi hem hapi tumas for lukim hao olketa wea repent kasem help wea olketa needim for kam bak lo kongregeson!

16. Why nao iu hapi tumas for garem wanfala Hae Priest wea minim iumi gud?

¹⁶ Taem Jesus stap lo earth, hem helpem staka pipol lo barava taem wea olketa needim. Distaem, iumi savve barava sure dat hem bae helpem iumi lo enitaem wea iumi needim. And lo niu world wea klosap for kam, hem bae helpem olketa wea obey for kamap barava free from evri nogud samting wea kamaot from sin and wei for no perfect. Iumi barava thankiu lo God blo iumi Jehovah, wea bigfala love and mercy muvim hem for appointim Son blo hem for kamap Hae Priest wea barava minim iumi gud!