“Iu Barava Spesol”!

1-2. Wat nao savve helpem iumi for barava sure dat iumi spesol lo eye blo Jehovah?

SAMFALA lo olketa servant blo Jehovah wea hem lovem savve ting daonem olketa seleva. Maet samwan bin treatim olketa nogud, and datwan mekem olketa for feel iusles. Hao, enitaem iu feel olsem? Sapos olsem, wat nao savve helpem iu for barava sure dat iu spesol lo eye blo Jehovah?

² Wanfala samting wea savve helpem iu, hem for ting raonem olketa story lo Bible wea showim iumi hao Jehovah laekem pipol blo hem for treatim narawan. Son blo hem Jesus, kaen lo pipol and treatim olketa witim respect. Taem hem duim datwan, hem showim dat hem and Dadi blo hem barava kea abaotem olketa wea hambol and wea feel olsem olketa iusles. (John 5:19; Heb. 1:3) Lo disfala article bae iumi storyim, (1) hao Jesus helpem pipol for luksavve dat olketa important lo God and (2) hao iumiseleva savve convince dat iumi barava spesol lo eye blo God.—Hag. 2:7.

HAO JESUS HELPEM PIPOL FOR LUKSAVVE OLKETA IMPORTANT LO GOD

3. Hao nao Jesus treatim olketa blo Galilee wea kam lo hem for kasem help?

³ During lo mek-thri taem wea Jesus preach lo Galilee, pipol lo olketa area lo there kam for lisin lo hem and for hem kiurim sik blo olketa. Jesus lukim dat “olketa garekil and stap olobaot olsem olketa sheepsheep wea no garem shepherd.” (Matt. 9:36; lukim olketa English study note.) Olketa bigman lo religion blo olketa ting lo olketa olsem pipol wea no savve eniting, olketa even sei God cursim pipol hia. (John 7:​47-49; English study note) Bat Jesus hem kaen and respectim olketa, dastawe hem iusim taem blo hem for teachim olketa and kiurim sik blo olketa. (Matt. 9:35) And from Jesus laek for helpem staka pipol moa, hem trainim olketa aposol blo hem for duim preaching waka and givim olketa paoa for kiurim olketa difren kaen sik.—Matt. 10:​5-8.

4. Wat nao iumi lanem from hao Jesus treatim olketa wea pipol ting daonem wea kam lisin lo hem?

⁴ Wei wea Jesus kaen and respectim olketa wea kam lisin lo hem, showim dat hem and Dadi blo hem barava kea abaotem olketa wea pipol ting daonem. If iu worshipim Jehovah bat iu feel olsem iu no important lo hem, ting abaotem hao Jesus kea for olketa wea pipol ting daonem wea laek for lane abaotem hem. Taem iu duim olsem, hem savve helpem iu for barava sure dat iu spesol lo eye blo Jehovah.

5. Storyim situation blo datfala woman from Galilee wea Jesus meetim.

⁵ Jesus teachim olketa big crowd blo pipol, and hem helpem tu each person. For example, during lo ministry blo Jesus lo Galilee, hem meetim wanfala woman wea sik for 12 years from blood blo hem no stop for ran. (Mark 5:25) Saed lo Law blo Moses, datfala sik mekem woman hia for no klin, and eniwan wea tasim hem bae no klin tu. From datwan, hem bae no free for associate witim pipol. And tu, bae hem no savve hipap witim olketa narawan for worshipim Jehovah and tek part lo olketa festival. (Lev. 15:​19, 25) Masbi woman hia barava safa and feel olsem no eniwan lovem hem.—Mark 5:26.

6. Wat nao datfala woman duim mekem sik blo hem finis?

⁶ Disfala woman wea safa laekem Jesus for healim hem. Bat hem no go stret lo Jesus. Why nao olsem? Maet hem shame bikos lo sik blo hem. Or maet hem fraet nogud Jesus rejectim hem bikos hem kam insaed crowd taem hem no klin. So hem disaed for tasim kaleko blo Jesus, from hem barava sure if hem duim datwan bae hem gud bak. (Mark 5:​27, 28) And bikos lo faith blo hem, hem kamap gud nao! Then Jesus ask hu nao tasim hem, and woman hia talem nao wat hem duim. Hao nao Jesus treatim hem?

7. Taem datfala woman feel fraet, hao nao Jesus treatim hem? (Mark 5:34)

⁷ Jesus kaen and showim respect lo datfala woman. Hem lukim hao datfala woman hem “fraet and seksek fogud.” (Mark 5:33) From Jesus tingim feeling blo hem, Jesus story kaen lo hem. Hem even kolem hem “dota blo mi,” wea datwan hem no just showim respect nomoa, bat hem kaen and showimaot love. (Readim Mark 5:34.) English study note for datfala toktok hem sei diswan hem “only taem lo Bible wea Jesus iusim disfala toktok ‘dota’ lo wanfala woman, maet hem duim datwan bikos lo situation blo datfala woman and from hem ‘seksek fogud.’” Tingim, hao datwan mas mekem woman hia barava feel gud! If Jesus no story kaen lo datfala woman, maet bae hem gohed feel guilty lo wat hem duim nomata sik blo hem finis. Bat samting wea Jesus duim helpem hem for savve dat hem barava spesol dota blo loving Dadi blo hem lo heven.

8. Wat nao samfala challenge wea wanfala sista lo Brazil deal witim?

⁸ Distaem tu, samfala wea servem God olketa safa from health problem wea mekem olketa sorre and feel iusles. Maria,a wanfala regular pioneer lo Brazil hem disable taem hem born, hem no garem eni leg and no garem left hand tu. Hem sei: “Taem mi lo skul olketa savve bullyim mi bikos mi disable. Olketa savve kolem mi lo olketa nem wea mekem mi barava feel nogud. And samfala taem, even hao famili blo mi treatim mi savve mekem mi feel iusles.”

9. Wat nao helpem Maria for savve hem spesol lo Jehovah?

⁹ Wat nao helpem Maria? Taem hem kamap wanfala Jehovah’s Witness, olketa brata and sista comfortim and helpem hem for garem sem tingting blo Jehovah abaotem hemseleva. Hem sei: “If mi raetem nem blo evriwan wea helpem mi, notebuk blo mi bae no garem inaf spes! Mi thankiu lo Jehovah lo full heart blo mi from hem givim mi wanfala nambawan spiritual famili.” Olketa spiritual brata and sista blo Maria helpem hem for savve dat hem barava spesol lo eye blo God.

10. Wat nao olketa problem wea kasem Mary Magdalene? (Lukim tu piksa.)

¹⁰ Tingim nara woman wea Jesus helpem, hem nao Mary Magdalene. Sevenfala demon nao possesim hem! (Luke 8:2) From olketa demon kontrolem hem, maet hem duim samfala samting wea no luk stret, so pipol maet no laek kam klosap lo hem. During lo datfala nogud taem lo laef blo hem, masbi hem feel olsem pipol rejectim hem, hem no feel sef, and feel helples. Luk olsem Jesus raosem olketa demon hia wea mekem hem safa, and Mary Magdalene kamap wanfala faithful disaepol blo Jesus. Wat nao nara samting wea Jesus duim for helpem Mary Magdalene for luksavve dat hem barava spesol lo God?

11. Wat nao Jesus duim wea helpem Mary Magdalene savve dat hem spesol lo God? (Lukim tu piksa.)

¹¹ Jesus invaetem Mary Magdalene for joinim hem and olketa nara disaepol for go preach lo olketa difren ples.b From datwan, hem kasem staka gud samting bikos hem herem Jesus taem hem teachim olketa narawan. And tu, Jesus appear lo Mary Magdalene lo sem day wea hem resurrect. Hem wanfala lo olketa first disaepol wea Jesus story lo hem lo datfala day. Jesus even givim hem assignment for talem olketa aposol dat hem resurrect finis. Olketa samting hia wea Jesus duim helpem Mary Magdalene for savve hem barava spesol lo Jehovah!—John 20:​11-18.

12. Explainim why baekgraon blo Lidia mekem hem feel dat no eniwan lovem hem.

¹² Olsem situation blo Mary Magdalene, staka distaem stragol witim feeling for tingse no eniwan lovem olketa. Lidia, wanfala sista lo Spain storyim hao bifor hem born, mami blo hem laek for killim hem dae insaed bele. Lidia remember dat even taem hem smol pikinini, mami les lo hem and tok daonem hem. Hem sei: “Mi evritaem wish nomoa dat pipol bae acceptim and lovem mi. Mi feel olsem no eniwan bae fit for lovem mi, bikos mami blo mi bin mekem mi feel olsem mi wanfala nogud person.”

13. Wat nao helpem Lidia for savve hem spesol lo Jehovah?

¹³ Afta Lidia lanem truth, wei for prea and study and tu olketa kaenfala toktok and samting wea olketa brata and sista duim, hem helpem Lidia for luksavve dat hem spesol lo eye blo Jehovah. Hem sei: “Staka taem, hasband blo mi savve talem mi dat hem lovem mi tumas. Evritaem, hem remindim mi dat mi garem olketa gudfala wei. Olketa nara gud frens blo mi duim datwan tu.” Hao, iu savve tingim samwan wea iu savve helpem hem for luksavve dat hem spesol lo eye blo Jehovah?

HAO FOR GAREM SEM TINGTING BLO JEHOVAH ABAOTEM IUMISELEVA

14. Hao nao 1 Samuel 16:7 helpem iumi for lukim hao Jehovah ting lo pipol? (Lukim tu box “Why Nao Pipol blo Jehovah Spesol lo Hem?”)

¹⁴ Remember, hao Jehovah ting lo iu hem no olsem hao pipol lo world ting lo iu. (Readim 1 Samuel 16:7.) Hao Jehovah ting lo iu hem no base lo lukluk, position, or education blo iu. (Isa. 55:​8, 9) So instead for markem iuseleva witim olketa standard blo world, iusim standard blo Jehovah for lukim hao hem ting lo iu. Maet hem gud for readim olketa story lo Bible wea showim hao Jehovah ting lo olketa wea ting daonem olketa seleva samfala taem, olsem Elijah, Naomi, and Hannah. Maet hem gud tu for raetem daon olketa samting wea showim dat Jehovah barava lovem and tinghae lo iu. And tu, hem gud for readim moa information abaotem disfala subject insaed olketa pablikeson blo iumi.c

15. Why nao Jehovah ting lo Daniel olsem samwan wea “barava spesol”? (Daniel 9:23)

¹⁵ Luksavve dat wei wea iu faithful hem mekem iu spesol lo eye blo Jehovah. Wantaem, maet taem profet Daniel hem klosap 100 years old, hem “barava taed fogud” and feel discourage. (Dan. 9:​20, 21) Hao nao Jehovah encouragem hem? God sendem angel Gabriel for remindim Daniel dat hem “barava spesol” and talem hem dat God herem olketa prea blo hem. (Readim Daniel 9:23.) Why nao Daniel barava spesol lo God? Bikos Daniel lovem raeteous fasin and hem faithful. (Ezek. 14:14) Jehovah keepim datfala story insaed Bible for comfortim iumi. (Rom. 15:4) Jehovah savve lisin tu lo olketa prea blo iu and tinghae lo wei wea iu lovem stret samting and faithful for servem hem.—Mic. 6:​8, ftns.; Heb. 6:10.

16. Wat nao savve helpem iu for luksavve dat Jehovah hem wanfala loving Dadi?

¹⁶ Luksavve dat Jehovah hem Dadi wea lovem iu. Jehovah laekem tumas for helpem iu, no for judgem iu. (Ps. 130:3; Matt. 7:11; Luke 12:​6, 7) Staka wea stragol for deal witim wei for ting daonem olketa seleva kasem help taem olketa ting raonem datwan. For example, tingim Michelle, wanfala sista lo Spain wea hasband blo hem tok daonem hem for staka year and datwan mekem hem for feel iusles and feel olsem no eniwan lovem hem. Hem sei, “Taem mi feel iusles, mi trae for imaginim dat Jehovah karem mi lo arm blo hem and lovem mi and protectim mi.” (Ps. 28:9) Lauren, wanfala sista from South Africa, savve remindim hemseleva, and sei, “If Jehovah kaen tumas and iusim olketa rope blo love for pullim mi kam lo hem, and keepim mi klos lo hem for staka year finis, and hem even iusim mi for teachim olketa narawan, for sure hem ting lo mi olsem mi important lo hem and hem savve iusim mi for duim wat hem laekem.”—Hos. 11:4.

17. Wat nao savve helpem iu for barava sure dat Jehovah hapi lo iu? (Psalm 5:12) (Lukim tu piksa.)

¹⁷ Mas barava sure dat Jehovah hapi lo iu. (Readim Psalm 5:12.) David sei wei wea Jehovah hapi lo raeteous pipol blo hem, hem olsem “wanfala big shield” wea protectim olketa. Taem iu savve dat Jehovah hapi lo iu and sapotim iu, datwan savve protectim iu for no ting daonem iuseleva tumas. Hao nao bae iu savve dat Jehovah hapi lo iu? Olsem iumi storyim finis, Jehovah iusim Word blo hem for mekem iumi barava feel sure lo datwan. And tu, hem iusim olketa elder, klos frens, and olketa narawan for remindim iu dat iu spesol lo eye blo hem. Wat nao iu shud duim taem iu kasem olketa encouragement olsem?

18. Why nao iu shud acceptim olketa encouraging toktok from olketa narawan?

¹⁸ No rejectim olketa kaenfala toktok blo olketa wea savve gud lo iu and lovem iu. Tingim, Jehovah maet iusim olketa for helpem iu for luksavve dat hem hapi lo iu. Michelle, wea iumi storyim finis sei: “Isisi, mi lane for acceptim lo heart blo mi olketa kaenfala toktok from olketa narawan. Hem no isi, bat mi savve dat hem nao wat Jehovah laekem mi for duim.” Michelle kasem gud samting from loving help blo olketa elder. Distaem hem serve olsem wanfala pioneer and remote volunteer for Bethel.

19. Why nao iu savve barava sure dat iu spesol lo eye blo God?

¹⁹ Jesus kaen tumas for remindim iumi dat iumi barava important lo Dadi blo iumi lo heven. (Luke 12:24) So iumi savve sure dat iumi barava spesol lo Jehovah. Iumi mas no enitaem forgetim datwan! And iumi laek for duim best blo iumi for helpem olketa narawan for savve dat olketa barava spesol lo eye blo God!