Buk blo Job Savve Helpem Iu Taem Iu Givim Kaonsel

1-2. Wat nao thrifala fren blo Job and Elihu bae faendem wea hem no isi for duim?

JOB hem wanfala man wea rich and staka pipol savve lo hem. Hem lusim evriting wea hem onam, and nius abaotem datwan spred evriwea lo datfala region. Taem thrifala fren blo Job, wea olketa nao Eliphaz, Bildad, and Zophar herem wat happen lo hem, olketa go lo Uz for comfortim Job. Bat taem olketa arrive olketa barava sapraes lo wat olketa lukim.

² Imaginim, evriting wea Job onam hem nomoa nao. Evri buluka, camel, and olketa donkey blo hem pipol stealim and evri sheepsheep blo hem dae. Olketa pikinini blo hem dae and pipol killim dae staka servant blo hem. And haos wea olketa pikinini blo Job dae insaed hem distroe tu. And samting wea worse go moa, Job kasem wanfala big sik. Body blo hem fulap lo olketa boela and hem pain fogud. Taem thrifala man hia farawe yet, olketa lukim Job sidaon lo asis and barava luk sorre. Wat nao reaction blo olketa? For sevenfala day, no eniwan lo olketa talem eni toktok lo Job wea barava safa. (Job 2:​12, 13) Wanfala young man wea nem blo hem Elihu arrive tu and hem sidaon klosap lo olketa man hia. Then Job start for story and cursim day wea hem born and hem wish nomoa hem dae. (Job 3:​1-3, 11) Hem klia, Job hem needim help! Wat olketa man hia talem and hao olketa talem datwan bae pruvim sapos olketa really tru fren blo Job and olketa really laek for comfortim hem.

3. Wat nao bae iumi storyim lo disfala article?

³ Jehovah iusim Moses for raetem insaed Bible wat thrifala fren blo Job and Elihu talem and duim. Hem important for savve dat samfala lo olketa samting wea Eliphaz talem luk olsem hem kam from wanfala wicked spirit. Bat, olketa samting wea Elihu talem hem kam from Jehovah. (Job 4:​12-16; 33:​24, 25) So iumi no sapraes, hao nomata buk blo Job garem samfala best advaes, hem garem tu samfala barava nogud advaes. Wanfala main important samting iumi savve lanem from buk blo Job nao, hem savve helpem iumi taem iumi need for givim kaonsel. Firstaem, bae iumi storyim nogud example blo thrifala fren blo Job. Then, iumi bae storyim gud example blo Elihu. Lo each example hia, bae iumi lanem hao olketa Israelite maet kasem gud samting from buk blo Job and hao iumi distaem tu savve kasem gud samting from datwan.

HAO THRIFALA FREN BLO JOB KAONSELEM HEM

4. Why nao thrifala fren blo Job fail for comfortim hem? (Lukim tu piksa.)

⁴ Bible sei thrifala fren blo Job olketa kam “for sorre witim Job and comfortim hem” afta olketa herem hard taem wea kasem Job. (Job 2:11) Bat, olketa fail for comfortim hem. Why? Maet lo thrifala reason hia. First, olketa no lisin gud lo Job for minim situation blo hem. For example, olketa ting God panisim Job bikos lo olketa sin wea hem duim, wea datwan hem no tru.a (Job 4:7; 11:14) Mek-tu, klosap evri kaonsel wea olketa talem lo Job no really helpem hem, nomata olketa kaonsel hia here olsem olketa wise toktok. (Job 13:12) Olketa talem tu olketa toktok wea no kaen wea mekem Job barava feel nogud. For example, tufala taem Bildad sei Job hem toktok tumas. (Job 8:2; 18:2) And olketa tok daonem Job tu. For example, Zophar comparem Job olsem wanfala “karangge man.” (Job 11:12) Mek-thri, nomata maet olketa no tok big taem olketa story lo Job, staka taem olketa tok daonem, tok spoelem, and accusim hem taem olketa story lo hem. (Job 15:​7-11) Really, olketa man hia trae for pruvim nomoa dat Job hem duim rong samting instead for comfortim or strongim faith blo hem.

5. Wat nao kamaot from kaonsel wea thrifala fren blo Job givim?

⁵ Iumi no sapraes why kaonsel wea thrifala fren blo Job givim nating helpem hem, bikos wat olketa talem lo Job barava spoelem hem. (Job 19:2) Datwan mekem iumi for minim tu why Job need for defendim reputation blo hem, wea mekem hem no tingting gud and hem talem samfala karangge toktok. (Job 6:​3, 26) Olketa fren blo Job no garem sem tingting olsem Jehovah, and olketa no tingim feeling blo Job. From datwan, olketa kamap olsem tul wea Satan iusim for discouragem Job. (Job 2:​4, 6) Hao nao disfala story maet helpem olketa lo bifor, and hao nao hem savve helpem iumi distaem?

6. Wat nao olketa leson wea olketa elder lo Israel lanem from nogud example blo thrifala fren blo Job?

⁶ Hao olketa Israelite maet kasem gud samting. Afta Jehovah formim nation blo Israel, Jehovah appointim olketa man wea qualify, olketa elder, for judgem datfala nation followim olketa raeteous standard blo hem. (Deut. 1:​15-18; 27:1) Olketa man hia need for barava lisin gud bifor olketa givim advaes or judgem wanfala case. (2 Chron. 19:6) And olketa need for ask kwestin tu winim wei for tingse olketa savve finis lo tru story. (Deut. 19:18) Olketa man hia for givim kaonsel lo Israel need for story kaen lo samwan wea kam for kasem help from olketa. Why? Bikos datwan bae helpem datfala person for feel free for storyim feeling blo hem lo olketa. (Ex. 22:​22-24) Datwan hem samfala leson wea olketa elder lo Israel maet lanem from story blo Job.

7. Hu lo Israel moa savve givim kaonsel, and hao nao maet story blo Job helpem olketa? (Proverbs 27:9)

⁷ Really, hem no olketa elder lo Israel nomoa savve givim kaonsel. Eniwan lo Israel, nomata hem young or olo, man or woman, savve givim advaes lo wanfala fren wea needim help, mekem hem gohed for worshipim Jehovah or for hem stretem wei blo hem. (Ps. 141:5) Wanfala tru fren savve givim kaen kaonsel olsem wea kam from heart. (Readim Proverbs 27:9.) Nogud example blo thrifala fren blo Job savve mekem olketa Israelite for luksavve lo wat olketa shud no talem and wat olketa shud no duim taem olketa givim kaonsel.

8. Wat nao iumi shud no duim taem iumi givim kaonsel? (Lukim tu piksa.)

⁸ Hao iumi savve kasem gud samting. Iumi olketa tru Christian laek for helpem olketa brata and sista taem olketa go thru lo olketa hard taem. Bat for duim datwan, iumi mas no followim nogud example blo thrifala fren blo Job. First, iumi shud mek sure iumi savve lo tru story firstaem bifor iumi givim kaonsel. Mek-tu, iumi shud no givim advaes base lo personal experience blo iumi nomoa olsem Eliphaz evritaem duim, bat advaes wea iumi givim shud base lo strong faondeson, wea hem nao Word blo God. (Job 4:8; 5:​3, 27) Mek-thri, iumi mas avoidim toktok wea no kaen or spoelem man. Remember, Eliphaz and tufala fren blo hem story abaotem samfala samting wea tru, dastawe, wanfala Bible raeta hem quotem tu toktok wea olketa talem. (Comparem Job 5:13 witim 1 Corinthians 3:19.) Nomata olsem, staka samting wea olketa talem abaotem God hem no tru and hem mekem Job feel nogud, so Jehovah sei olketa no talem tru samting. (Job 42:​7, 8) Gudfala kaonsel hem kaonsel wea iumi talem lo wei wea bae helpem samwan for luksavve dat Jehovah hem kaen or lovem olketa servant blo hem. Distaem, bae iumi storyim wat iumi savve lanem from example blo Elihu.

HAO ELIHU KAONSELEM JOB

9. Explainim why Job needim help afta thrifala fren blo hem finisim story blo olketa and hao Jehovah provaedem datfala help.

⁹ Afta Job and thrifala fren blo hem argue for lelebet longtaem and olketa stop, masbi datwan mekem olketa barava no hapi. Olketa man hia story tumas, dastawe 28 chapter lo Bible hem toktok blo olketa nomoa, and staka samting wea olketa talem showim olketa kros or from olketa feel nogud. Datwan mekem iumi for minim why Job hem still discourage! So hem still needim comfort and kaonsel. Hao nao Jehovah helpem Job? Hem iusim Elihu for givim hem kaonsel. Why nao Elihu no kwiktaem talem samting? Hem sei: “Mi young and iufala olo finis. Dastawe mi no toktok bikos mi respectim iufala.” (Job 32:​6, 7) Elihu wea young lo olketa luksavve lo samting wea staka distaem tu luksavve, hem nao: Olketa older wans laef longtaem and lanem staka samting, from datwan, olketa wise and garem experience lo laef, wea staka taem olketa wea young no garem datwan. Bat afta Elihu patient for lisin lo Job and thrifala fren blo hem, Elihu feel dat hem mas talem samting nao. Hem sei: “Nomata wanem nao age blo man, datwan no mekem hem wise, and ino olketa old man nomoa savve lo stret samting.” (Job 32:9) Wat moa Elihu talem, and lo wanem wei nao hem talem datwan?

10. Wat nao Elihu duim bifor hem kaonselem Job? (Job 33:​6, 7)

¹⁰ Bifor Elihu givim eni kaonsel lo Job, hem laekem mind blo Job for setol mekem hem redi for lisin lo hem. Wat nao Elihu duim? First, hemseleva mas kontrolem feeling blo hem. Iumi savve lo diswan, bikos Bible sei lo firstaem Elihu hem kros. (Job 32:​2-5) Nomata olsem, no enitaem Elihu tok spoelem Job from hem kros. Bat, hem talem toktok for strongim Job. For example, hem sei lo Job: “Lukim! Mi olsem iu nomoa front lo tru God.” (Readim Job 33:​6, 7.) Then Elihu talem klia dat hem lisin gud taem Job hem story. So hem repeatim moa olketa main samting from olketa toktok wea Job talem. (Job 32:11; 33:​8-11) And taem Elihu givim kaonsel moa lo Job, hem duim sem samting.—Job 34:​5, 6, 9; 35:​1-4.

11. Hao nao Elihu givim kaonsel lo Job? (Job 33:1)

¹¹ Taem Elihu givim kaonsel lo datfala faithful man Job, hem duim datwan lo wei wea showimaot respect. For example, Elihu iusim nem blo Job, samting wea nara thrifala fren blo Job no duim. (Readim Job 33:1.) Maet Elihu tingim wei wea hemseleva barava laek for story lo taem wea Job and thrifala fren blo hem argue. So, Elihu givim tu chance lo Job for story afta hem kaonselem Job. (Job 32:4; 33:32) And tu, Elihu warnim Job dat samfala samting wea Job bin talem hem no stret and lo kaenfala wei hem remindim Job abaotem wisdom, paoa, justice, and loyal love blo Jehovah. (Job 36:​18, 21-26; 37:​23, 24) For sure, gudfala kaonsel wea Elihu givim lo Job hem redyim mind blo Job for samfala moa kaonsel from Creator blo hem. (Job 38:​1-3) Hao nao example blo Elihu helpem olketa lo bifor, and hao nao hem helpem iumi distaem?

12. Hao nao Jehovah iusim olketa profet for helpem pipol blo hem, and hao nao maet olketa Israelite kasem gud samting from gud example blo Elihu?

¹² Hao olketa Israelite maet kasem gud samting. Lo history blo olketa Israelite, Jehovah appointim olketa profet for teachim and stretem datfala nation. For example, during lo taem blo olketa Judge, woman profet Deborah givim spiritual guidance for helpem datfala nation, and Jehovah iusim Samuel olsem spokesman blo Hem from taem hem young yet. (Judg. 4:​4-7; 5:7; 1 Sam. 3:​19, 20) Then during lo taem blo olketa king, Jehovah gohed iusim olketa profet for strongim pipol blo hem lo spiritual wei, and for stretem olketa wea no obeyim Jehovah. (2 Sam. 12:​1-4; Acts 3:24) Example blo Elihu wea stap insaed buk blo Job, savve helpem olketa faithful man and woman for savve wat for talem and hao for talem datwan taem olketa givim kaonsel.

13. Hao nao olketa Christian distaem savve encouragem olketa brata and sista?

¹³ Hao iumi savve kasem gud samting. Iumi olketa Christian distaem tu talemaot lo pipol will blo God wea stap insaed Word blo hem, Bible. Nara wei iumi duim datwan hem taem iumi iusim olketa toktok wea savve strongim and encouragem olketa brata and sista. (1 Cor. 14:3) Olketa elder need for evritaem tingim hao hem important for story lo wei wea bae “comfortim” olketa brata and sista wea sorre, even olketa wea maet feel nogud or wea isi for talem “karangge toktok.”—1 Thess. 5:14; Job 6:3.

14-15. Storyim hao wanfala elder savve followim example blo Elihu taem hem givim kaonsel.

¹⁴ Imaginim disfala situation. Wanfala elder herem dat wanfala sista lo kongregeson hem feel discourage. So, hem and nara brata visitim datfala sista for trae encouragem hem. Taem tufala visit, datfala sista storyim negative feeling wea hem garem. Hem storyim dat nomata hem attendim olketa meeting and go lo ministry, hem no really hapi. Wat nao datfala elder bae duim?

¹⁵ First, maet hem bae trae for savve why nao datfala sista hem feel olsem. For hem savve lo datwan, hem need for askem olketa kwestin and patient for lisin gud lo datfala sista. Maet sista hia feel dat hem no fit for kasem love blo God. Or maet hem barava “wari abaotem olketa samting lo laef.” (Luke 21:34) Mek-tu, elder hia bae lukaotem chance for praisem datfala sista. For example, hem savve praisem datfala sista bikos hem still savve attendim olketa meeting, and share lo ministry nomata hem feel discourage. And mek-thri, taem datfala elder minim situation blo sista hia and wat nao mekem hem feel discourage, elder bae iusim Bible for helpem hem for sure dat Jehovah lovem hem.—Gal. 2:20.

GOHED KASEM GUD SAMTING FROM BUK BLO JOB

16. Hao nao iumi savve gohed kasem gud samting from buk blo Job?

¹⁶ Iumi kasem staka gud samting taem iumi studyim buk blo Job! Olsem iumi lanem lo article bifor diswan, disfala buk blo Job teachim iumi why God letem wei for safa gohed and helpem iumi tu for no givap taem iumi safa. And olsem iumi lanem lo disfala article, iumi evriwan savve lane for givim kaonsel wea savve helpem samwan, taem iumi no followim nogud example blo thrifala fren blo Job, bat followim gudfala example blo Elihu. So next taem, bifor iu givim kaonsel lo samwan, hem gud for reviewim olketa leson wea iumi lanem from buk blo Job. And sapos iu bin readim finis buk blo Job, iu savve markem goal for readim bak moa disfala interesting buk. Iu bae faendem dat hem still savve helpem iu distaem, olsem hem helpem olketa wea stap lo taem wea olketa raetem buk hia.