Waswe, Iu Tingim Yet?
Waswe, iu tingim yet samfala gud point from olketa Wastaoa blo disfala year? Trae ansarem olketa kwestin hia:
Wat nao motivatim iumi for givim glory lo Jehovah?
Iumi duim olsem bikos iumi barava respectim Jehovah and barava lovem hem. And iumi givim glory lo hem bikos iumi laekem olketa narawan for savve lo hem.—w25.01, p. 3.
If samwan mekem iumi feel nogud, hao nao iumi savve forgivim hem?
Iumi no just ignorem nomoa hao iumi feel, bat iumi mas no keepim kros and no gohed feel nogud, datwan savve protectim heart blo iumi.—w25.02, pp. 15-16.
Why nao disaepol Mark hem gud example for olketa young brata?
Mark willing for acceptim assignment for helpem narawan. Nomata hem feel nogud and sorre lelebet bikos lo situation blo hem, Mark gohed helpem olketa narawan. Hem gohed fren gud witim Paul and olketa nara mature Christian.—w25.04, p. 27.
Wat nao Jesus minim taem hem prea and sei: “Mi talemaot nem blo iu lo olketa”? (John 17:26)
Olketa disaepol blo hem savve finis lo nem blo God. Bat Jesus helpem olketa for savve gud go moa lo Jehovah, includim olketa purpose blo Hem, wat hem duim, and olketa quality blo hem.—w25.05, pp. 20-21.
If iumi hambol wat nao bae iumi luksavve?
Iumi bae luksavve dat iumi no savve lo samfala samting. For example, iumi no savve wat taem nao end bae kam or hao Jehovah bae duim samting lo datfala taem. And iumi no savve lo wat bae happen tumoro or wei wea Jehovah savve gud lo iumi.— w25.06, pp. 15-18.
Hao nao iumi savve kasem gud samting from wanfala article or wanfala pablik tok?
Iumi savve askem iumiseleva olsem: ‘Wat nao disfala information storyim wea savve convincim pipol? Hao, eni gud example wea mi savve iusim taem mi teachim disfala truth? Hu nao maet interest lo disfala topic?’—w25.07, p. 19.
Wat nao iumi savve lanem abaotem hao God forgive taem hem deal witim David?
Nomata David duim serious sin, taem hem barava repent, Jehovah forgivim hem. (1 Ki. 9:4, 5) Taem God forgivim samwan, hem forgetim olketa sin wea hem duim, or hem bae no accusim hem moa lo datfala sin.—w25.08, p. 17.
If Bible student faendem hard for acceptim wanfala point, wat nao bae iu duim?
If hem faendem hard for acceptim wanfala point afta iu trae for teachim hem from Bible, continue lo wat iutufala studyim and plan for kam bak moa lo datfala point lo nara taem.—w25.09, p. 24.
Lo wanem wei nao ‘sin garem paoa for trikim man’? (Heb. 3:13)
Sin savve mekem iumi for duim olketa rong samting. Hem savve trikim iumi tu for garem daot, olsem for daotem if God really lovem iumi.—w25.10, p. 16.
Wat nao thrifala samting wea savve mekem prea blo iumi moa deep?
(1) Iumi savve tingim olketa quality blo Jehovah. (2) Iumi savve ting abaotem wat iumi deal witim and mentionim datwan, olsem if iumi need for forgivim samwan. (3) No rush lo prea blo iumi. Datwan bae mekem hem moa isi for iumi talem tingting blo iumi lo Jehovah.—w25.10, pp. 19-20.
Hao nao iumi savve helpem olketa wea olo?
Iumi savve visitim or ringim olketa wea olo. Iumi savve go witim olketa tu for lukim doctor. Or iumi savve waka witim olketa olo lo olketa difren wei for duim ministry.—w25.11, pp. 6-7.
Wat nao olketa main samting wea savve mekem wanfala wedding honorim Jehovah?
Followim eni law blo gavman saed lo marit. Mek sure atmosphere lo datfala wedding and reception hem reflectim frut blo spirit blo God. Mas modest lo wat iu bae werem, and mas avoidim eni kastom wea againstim Bible. Story klia and witim respect taem iu discussim wedding plan blo iu.—w25.12, pp. 21-24.