Wat Nao Mining blo Datfala Wild Animal wea Kala blo Hem Red wea Revelation Chapter 17 Storyim?

Ansa from Bible

Wild animal wea kala blo hem red wea Revelation chapter 17 storyim, hem symbol blo wanfala organization wea purpose blo hem for unitem and representim olketa nation lo world. Firstaem wea hem exist hem nao League of Nations wea distaem hem United Nations.

Hao for identifyim wild animal wea kala blo hem red

1. Wanfala politikol entity. Datfala wild animal wea kala blo hem red hem garem “sevenfala hed” wea hem representim “sevenfala maunten” and “sevenfala king,” or olketa man wea rul. (Revelation 17:​9, 10) Staka taem Bible iusim maunten and wild animal olsem symbol blo olketa gavman.​—Jeremiah 51:24, 25; Daniel 2:​44, 45; 7:​17, 23.

2. Representim politikol system blo world. Wild animal wea kala blo hem red wea Revelation chapter 13 storyim, hem representim politikol system blo hem. Tufala wild animal hia garem sevenfala hed, tenfala horn, and garem olketa nem wea barava spoelem God. (Revelation 13:1; 17:3) Olketa similarities hia hem no just happen olsem nomoa. Datfala wild animal wea kala blo hem red hem image or representim politikol system blo full world.​—Revelation 13:15.

3. Kasem paoa from olketa nara ruler. Datfala wild animal wea kala blo hem red “hem kamaot from,” or kasem paoa for rul from olketa nara ruler.​—Revelation 17:11, 17.

4. Hem join witim religion. Wei wea Bigfala Babylon, wea hem evri false religion lo world, sidaon antap wild animal wea kala blo hem red hem showim datfala wild animal hem kasem paoa from olketa religious grup hia.​—Revelation 17:​3-5.

5. No honorim God. Body blo datfala wild animal “fulap lo olketa nem wea barava spoelem God.”​—Revelation 17:3.

6. Lelebet taem hem no active. Datfala wild animal wea kala blo hem red bae stap lo “abyss,”a or no active for lelebet taem bat bae hem kamaot moa.​—Revelation 17:8.

Bible profesi fulfill

Lukim hao United Nations and League of Nations wea stap bifor lo hem, fulfillim olketa Bible profesi abaotem datfala wild animal wea kala blo hem red.

1. Wanfala politikol entity. United Nations sapotim politikol system taem hem protectim “sovereign equality blo evri Member blo hem.”b

2. Representim politikol system blo world. Lo 2011, United Nations hem garem 193 member state. So hem claimim hem representim big majority blo olketa nation and pipol lo world.

3. Kasem paoa from olketa nara ruler. United Nations exist from hem kasem paoa from olketa nation wea olketa member blo hem and paoa blo hem kam from olketa nomoa.

4. Hem join witim religion. League of Nations and United Nations continue for kasem sapot from olketa religion lo world.c

5. No honorim God. United Nations hem establish “for maintainim international peace and security.”d Hem tru, luk olsem disfala goal hem gud plan, bat UN hem no honorim God taem hem claimim dat hem bae duim samting wea only Kingdom blo God nomoa bae accomplishim.​—Psalm 46:9; Daniel 2:​44.

6. Lelebet taem hem no active. League of Nations, wea form no longtaem afta World War I for maintainim peace, hem no fit for preventim olketa faet wea gohed lo olketa ples lo world. Taem World War II hem start lo 1939 datfala League of Nations hem no stap nao. Lo 1945, afta World War II hem end, United Nations hem form. Olketa plan, wat hem duim, and structure blo hem klosap semsem olsem League of Nations.