Wat Nao Bigfala Babylon?

Ansa from Bible

Buk blo Revelation story abaotem “wanfala woman” wea hem “paoaful jury woman” and hem garem “wanfala secret nem wea hem nao: ‘Bigfala Babylon.’” (Revelation 17:1, 3, 5) Disfala woman representim evri false religion lo world, wea no “laek bilivim truth abaotem God bat olketa chus for bilivim laea samting.”a (Romans 1:25) Nomata olketa religion hia difren lo staka samting, olketa evriwan leadim pipol awe for no worshipim tru God, Jehovah.—Deuteronomy 4:35.

Key for luksavve lo Bigfala Babylon

1. Bigfala Babylon hem wanfala symbol. Buk blo Revelation hem iusim “olketa saen,” so hem reasonable for sei dat Bigfala Babylon hem wanfala symbol, no wanfala literal woman. (Revelation 1:1) And tu, datfala jury woman wea “sidaon antap lo staka wata,” hem representim “olketa pipol, olketa crowd, olketa nation and olketa languis.” (Revelation 17:1, 15) Wanfala real woman no savve duim datwan.

2. Bigfala Babylon representim wanfala international entity. Bible kolem disfala woman “datfala big taon wea rul ovarem olketa king lo earth.” (Revelation 17:18) Dastawe, hem garem paoa and influencim olketa lo earth.

3. Bigfala Babylon hem wanfala religious entity, ino politikol or bisnis organization. Ancient Babylon hem wanfala religious city, hem famous taon bikos pipol lo there iusim “olketa magic samting.” (Isaiah 47:1, 12, 13; Jeremiah 50:1, 2, 38) For tok stret, pipol lo datfala city practicem false worship wea againstim datfala tru God, Jehovah. (Genesis 10:8, 9; 11:2-4, 8) Ruler blo Babylon tok praod and mekhae lo hemseleva winim Jehovah and worship blo hem. (Isaiah 14:4, 13, 14; Daniel 5:2-4, 23) Olsem tu, Bigfala Babylon hem well-known bikos lo wei for “duim spiritism.” Datwan showim dat hem wanfala religious organization.—Revelation 18:23.

   Bigfala Babylon hem no wanfala politikol entity, bikos “olketa king lo earth” sorre taem hem finis. (Revelation 17:1, 2; 18:9) Hem no olketa bisnis tu, bikos Bible sei hem difren from “olketa bisnisman lo earth.”—Revelation 18:11, 15.

4. 

   Photograph taken by courtesy of the British Museum

   Bigfala Babylon hem barava fit for representim false religion. Instead for olketa teachim pipol for fren klos lo tru God, Jehovah, false religion actually leadim pipol for worshipim olketa nara God. Bible kolem diswan spiritual prostitution. (Leviticus 20:6; Exodus 34:15, 16) Staka false religion continue for teachim olketa biliv wea kam from ancient Babylon, wea includim trinity, soul no savve dae, and wei for iusim olketa image lo worship. Olketa religion hia joinim worship blo olketa witim olketa samting blo world. Bible refer lo disfala wei for no faithful olsem spiritual adultery.—James 4:4.

   Wei wea false religion hem rich and show-off witim olketa samting hia hem barava fitim nao hao Bible describem Bigfala Babylon, hem sei “kaleko blo woman hia hem purple and red” and “hem werem olketa naes samting wea olketa wakem lo gold and olketa spesol ston and olketa pearl.” (Revelation 17:4) Bigfala Babylon hem source blo “olketa barava rabis samting lo earth,” or olketa teaching and akson wea barava no respectim God. (Revelation 17:5) Olketa member blo false religion hem “olketa pipol, olketa crowd, olketa nation and olketa languis” wea sapotim Bigfala Babylon.—Revelation 17:15.

Bigfala Babylon hem responsible for dae “blo evriwan wea olketa killim dae lo earth.” (Revelation 18:24) Thru aot history, false religion startim olketa war, sapotim terrorism, and olketa fail tu for teachim pipol truth abaotem Jehovah, God blo love. (1 John 4:8) Diswan contribute lo staka killing wea gohed.

Hao nao God ting lo Bigfala Babylon?

Lo tingting blo God, ‘olketa sin wea Bigfala Babylon duim hem hipap gogo kasem heven.’ (Revelation 18:4, 5) God hem kros tumas lo olketa false religion from olketa mekem pipol for garem tingting wea no stret abaotem hem and olketa treatim nogud lo olketa follower blo hem.

Wat nao bae happen lo Bigfala Babylon?

Bible sei ‘God hem judgem finis’ Bigfala Babylon. (Revelation 18:20) Lo symbolic wei, Bible profesi dat wanday bae God finisim evri false religion. (Revelation 18:8) Hem bae mekem wanfala wild animal wea kala blo hem red, wea representim wanfala paoaful politikol entity for attakim and completely distroem olketa false religion. (Revelation 17:16, 17) “Diswan nao samting wea bae kasem Babylon datfala big taon, and no eniwan bae lukim hem moa.” (Revelation 18:21) Dastawe, olketa wea laek for mekem God hapi mas “go aot from olketa,” and stap separate from false religion.—2 Corinthians 6:14-17.