رسولاں دے اعمال

4 جدوں پطرس تے یوحنا لوکاں نال گل کر رہے سن تے کاہن، ہیکل دا نگران تے صدوقی وی اوتھے آ گئے۔ 2 اوہ بڑے غصے چ سن کیونکہ رسول لوکاں نُوں تلیم دے رہے سن تے کُھلے عام دَس رہے سن کہ یسوع مُردیاں چوں زندہ ہو گیا اے۔ 3 ایس لئی اوہناں نے دونواں رسولاں نُوں گِرفتار کر کے اگلے دن تک قید کر دِتا کیونکہ شام ہو گئی سی۔ 4 پر رسولاں دِیاں گلاں سُنن والیاں وچوں بوہت سارے لوک ایمان لے آئے تے شاگرداں چ آدمیاں دی تعداد تقریباً 5 ہزار ہو گئی۔‏

5 اگلے دن یہودیاں دے حاکم،‏*‏ بزرگ تے شریعت دے عالم یروشلم چ کٹھے ہوئے۔ 6 اوہناں دے نال کائفا، یوحنا، سکندر، وڈا کاہن حنّا تے اوہدے بوہت سارے رشتے‌دار وی سن۔ 7 اوہناں نے پطرس تے یوحنا نُوں وچکار کھڑا کیتا تے اوہناں نُوں پچھن لگ پئے:‏ ”‏تُسی ایہہ کم کدے ناں تے کردے او؟ توانوں ایہہ اِختیار کنہے دِتا اے؟“‏ 8 پطرس پاک روح نال بھر گیا تے اوہنے کہیا:‏

‏”‏قوم دے حاکمو تے بزرگو، 9 جے ساڈی پچھ‌گچھ ایس لئی ہو رہی اے کیونکہ اَسی ایس لنگڑے بندے نال بھلا کیتا اے تے تُسی جاننا چاہندے او کہ ایہنوں کنہے ٹھیک کیتا اے 10 تے اَسی توانوں تے اِسرائیل دے سارے لوکاں نُوں دَسنا چاہنے آں کہ ناصرت دے یسوع مسیح دے ناں تے ایہہ بندہ تواڈے سامنے بالکل تندرست کھلوتا اے۔ ہاں، اوسے یسوع دے ناں تے جنہوں تُسی سُولی تے چڑھا دِتا سی۔ پر خدا نے اوہنوں مُردیاں چوں زندہ کر دِتا اے۔ 11 یسوع ”‏اوہی پتھر*‏ اے جنہوں مستریاں نے یعنی تُسی بے‌کار سمجھیا۔ پر اوہی کونے دا سب توں خاص پتھر بن گیا۔“‏ 12 اصل چ کسے ہور دے ذریعے نجات نئیں مِل سکدی کیونکہ خدا نے زمین تے کسے ہور نُوں نئیں چُنیا جدے ناں تے انساناں نُوں بچایا جائے۔“‏

13 جدوں مذہبی رہنماواں نے ویکھیا کہ پطرس تے یوحنا کِنّی دلیری نال گل کر رہے نیں تے اوہ بڑے حیران ہوئے کیونکہ اوہ دونویں گھٹ پڑھے لکھے*‏ تے عام بندے سن۔ فیر اوہ سمجھ گئے کہ اوہ دونویں یسوع دے نال ہوندے سن۔ 14 پر مذہبی رہنما اوہناں نُوں کوئی جواب نہ دے سکے کیونکہ اوہ بندہ جنہوں شفا ملی سی، اوہناں دِیاں اَکھاں دے سامنے پطرس تے یوحنا دے نال کھلوتا ہویا سی۔ 15 ایس لئی مذہبی رہنماواں نے اوہناں نُوں عدالت توں باہر گھل دِتا تے آپس چ صلاح مشورہ کرن لگ پئے۔ 16 اوہ کہہ رہے سن:‏ ”‏اَسی ایہناں بندیاں نال کیہہ کریئے؟ ایہناں نے بڑا انوکھا کم کیتا اے جدے بارے یروشلم دے سارے لوکاں نُوں پتہ اے تے اَسی وی ایس گل توں اِنکار نئیں کر سکدے۔ 17 ایس لئی اَسی ایہناں نُوں ڈرا دھمکا کے کہہ دینے آں کہ ایہہ اوس بندے*‏ دا ناں لے کے کسے نال وی گل نہ کرن تاکہ ایہہ گل ہور لوکاں تک نہ پھیلے۔“‏

18 فیر اوہناں نے دونواں نُوں بلا کے حکم دِتا کہ اوہ یسوع دا ناں لے کے کوئی گل نہ کرن تے نہ ای تلیم دین۔ 19 پر پطرس تے یوحنا نے جواب دِتا:‏ ”‏کیہہ خدا ایہہ چاہندا اے کہ اَسی اوہدی گل منن دی بجائے تواڈی گل منیے؟ تُسی آپ ای فیصلہ کرو۔ 20 پر اَسی فیصلہ کر لیا اے کہ اَسی لوکاں نُوں اوہناں گلاں بارے دَسدے رہواں گے جیہڑیاں اَسی ویکھیاں تے سُنیاں نیں۔“‏ 21 مذہبی رہنماواں نُوں پطرس تے یوحنا نُوں سزا دین دی کوئی وجہ نہ لبھی۔ ایس لئی اوہناں نے دونواں نُوں ہور ڈرا دھمکا کے چھڈ دِتا۔ نالے اوہناں نُوں لوکاں دا وی ڈر سی کیونکہ لوک اوس معجزے دی وجہ توں خدا دی وڈیائی کر رہے سن۔ 22 اصل چ جیس بندے نُوں شفا ملی سی، اوہدی عمر 40 سال توں زیادہ سی۔‏

23 پطرس تے یوحنا رِہا ہون توں بعد دُوجے شاگرداں کول گئے تے اوہناں نُوں اوہ ساریاں گلاں دَسیاں جیہڑیاں وڈے کاہناں تے بزرگاں نے کہیاں سن۔ 24 ایہہ سب کجھ سُنن دے بعد اوہناں نے مِل کے خدا کولوں ایہہ دُعا کیتی:‏

‏”‏اَے جہان دے مالک، تُوں ای اسمان، زمین، سمندر تے ایہناں دِیاں ساریاں چیزاں بنائیاں نیں۔ 25 تُوں ای اپنے خادم تے ساڈے پیو دادے داؤد نُوں پاک روح دِتی جدی رہنمائی چ اوہنے کہیا:‏ ”‏قوماں نُوں غصہ کیوں آیا تے لوکاں نے فضول گلاں تے دھیان کیوں دِتا؟ 26 زمین دے بادشاہ مقابلے لئی اُٹھ کھلوتے نیں تے حکمران اِک مُٹھ ہو کے یہوواہ تے اوہدے مسیح*‏ دے خلاف جمع ہو گئے نیں۔“‏ 27 ایہہ گلاں اوہدوں پوریاں ہوئیاں جدوں ہیرودیس، پُنطیُس پیلاطُس، غیریہودی تے اِسرائیلی لوک تیرے مسح کیتے ہوئے پاک خادم یسوع دے خلاف ایس شہر چ جمع ہوئے 28 تاکہ اوہ کم کرن جیہڑا تُوں اپنی طاقت*‏ تے مرضی نال پہلاں ای طے کیتا ہویا سی۔ 29 اَے یہوواہ، اوہناں دِیاں دھمکیاں وَل دھیان دے تے اپنے غلاماں نُوں ایس قابل بنا کہ اَسی دلیری نال تیرا کلام سُناندے رہیے۔ 30 تُوں اپنا ہتھ ودھا کے بیماراں نُوں شفا دیندا رہ تے اپنے پاک خادم یسوع دے ناں تے نشانیاں وکھاندا رہ تے حیران کرن والے کم کردا رہ۔“‏

31 جدوں اوہناں نے اپنی اِلتجا ختم کیتی تے اوہ گھر ہل گیا جِتھے اوہ جمع سن۔ اوہ سارے پاک روح نال بھر گئے تے دلیری نال خدادا کلام سُنان لگ پئے۔‏

32 ایمان لیان والے سارے لوک اِک دل تے اِک جان سن۔ اوہناں وچوں کوئی وی اپنی کسے چیز نُوں صرف اپنی نئیں سمجھدا سی سگوں اوہ ساریاں چیزاں رَل مِل کے استمال کردے سن۔ 33 رسول بڑے زبردست طریقے نال ایہہ گواہی دیندے رہے کہ مالک یسوع زندہ ہو گیا اے۔ خدا دی عظیم رحمت اوہناں ساریاں تے سی۔ 34 اصل چ اوہناں وچوں کوئی وی ضرورت‌مند نئیں سی کیونکہ جنہاں کول زمیناں تے گھر سن، اوہ اوہناں نُوں ویچ کے 35 پیسے رسولاں دے پیراں چ رکھ دیندے سن۔ فیر اوہ پیسیاں نُوں ہر اِک دی ضرورت دے مطابق وَنڈ دیندے سن۔ 36 اوتھے یوسف ناں دا اِک شاگرد وی سی۔ اوہ اِک لاوی سی تے قُبرص چ پیدا ہویا سی۔ رسول اوہنوں برنباس وی کہندے سن (‏جدا مطلب اے:‏ ”‏تسلی دا پُتر۔“‏)‏ 37 اوہنے اپنی زمین ویچ کے پیسے رسولاں دے پیراں چ رکھ دِتے۔‏