رسولاں دے اعمال

5 حننیاہ ناں دے اِک آدمی تے اوہدی بیوی سفیرہ نے اپنی کجھ زمین ویچی۔ 2 پر اوہنے چپ‌چپیتے کجھ پیسے اپنے کول رکھ لئے۔ اوہدی ایس چالاکی بارے اوہدی بیوی نُوں وی پتہ سی۔ فیر اوہنے باقی پیسے جا کے رسولاں دے پیراں چ رکھ دِتے۔ 3 پر پطرس نے کہیا:‏ ”‏حننیاہ، کیہہ شیطان نے تیرے چ اینی جرأت پیدا کر دِتی اے کہ تُوں پاک روح نال جھوٹھ بولیں تے اپنی زمین دا کجھ پیسہ چالاکی نال اپنے کول رکھ لویں؟ 4 کیہہ اوہ زمین تیری ای نئیں سی؟ نالے اوہنوں ویچ کے جیہڑے پیسے ملے، اوہ وی تیرے ای نئیں سن؟ تے فیر تُوں ایناں گھٹیا کم کرن بارے کیوں سوچیا؟ تُوں انساناں نال نئیں سگوں خدا نال جھوٹھ بولیا اے۔“‏ 5 ایہہ سُن کے حننیاہ ڈِگ پیا تے مر گیا۔ جنہاں لوکاں نے وی ایس بارے سُنیا، اوہناں ساریاں دے دِلاں چ خدا دا خوف بہہ گیا۔ 6 فیر کجھ جوان بندیاں نے اُٹھ کے اوہدی لاش نُوں کفن چ لویٹیا تے لجا کے دفنا دِتا۔‏

7 ایہدے توں تقریباً 3 گھنٹے بعد اوہدی بیوی سفیرہ آئی۔ پر اوہنوں نئیں پتہ سی کہ اوہدے شوہر نال کیہہ ہویا اے۔ 8 پطرس نے اوہنوں پچھیا:‏ ”‏مینوں دَس کہ کیہہ تُسی دونواں نے زمین اینے ای پیسیاں دی ویچی اے؟“‏ اوہنے کہیا:‏ ”‏ہاں، اینے دی ای ویچی اے۔“‏ 9 ایس لئی پطرس نے اوہنوں کہیا:‏ ”‏تُسی دونواں نے آپس چ صلاح کر کے یہوواہ دی پاک روح نُوں کیوں اَزمایا؟ ویکھ، تیرے شوہر نُوں دفنان والے دروازے تے نیں تے اوہ تینوں وی چُک کے لے جان گے۔“‏ 10 اوہ اوسے ویلے پطرس دے پیراں چ ڈِگ پئی تے مر گئی۔ جدوں اوہ جوان بندے اندر آئے تے اوہناں نے ویکھیا کہ اوہ مر گئی اے۔ ایس لئی اوہناں نے اوہنوں وی لجا کے اوہدے شوہر کول دفنا دِتا۔ 11 ایہدی وجہ توں پوری کلیسیا*‏ تے اوہناں سارے لوکاں دے دل چ خدا دا خوف بہہ گیا جنہاں نے ایس واقعے بارے سُنیا۔‏

12 ایہدے علاوہ رسول لوکاں دے سامنے بوہت ساریاں نشانیاں وکھاندے رہے تے حیران کرن والے کم کردے رہے۔ اوہ سارے سلیمان دے برانڈے چ جمع ہوندے سن۔ 13 سچ اے کہ دُوجے*‏ اوہناں نال جمع ہون توں ڈردے سن، پر لوک اوہناں دی تعریف ضرور کردے سن۔ 14 ایہدے علاوہ بوہت سارے آدمی تے عورتاں مالک تے ایمان لیاندے رہے تے شاگرداں دی تعداد ودھدی گئی۔ 15 لوک بیماراں نُوں چونکاں چ لیا کے منجیاں تے چٹائیاں اُتے لٹا دیندے سن تاکہ جدوں پطرس اوتھوں لنگھے تے اوہدا پرچھانواں ای اوہناں تے پے جائے۔ 16 نالے یروشلم دے آلے دَوالے دے شہراں توں وی بوہت سارے لوک بیماراں نُوں تے ایہو جہے لوکاں نُوں اوتھے لیاندے سن جنہاں نُوں باغی فرشتے چِمبڑے ہوئے سن تے اوہ سارے ٹھیک ہو جاندے سن۔‏

17 پر اعلیٰ کاہن تے اوہدے ساتھی جیہڑے صدوقی فرقے دے سن، حسد دے مارے رسولاں دے خلاف اُٹھے۔ 18 اوہناں نے رسولاں نُوں گِرفتار کر کے جیل چ پا دِتا۔ 19 پر اوسے رات یہوواہ دے فرشتے نے جیل دا دروازہ کھول دِتا تے اوہناں نُوں باہر کڈھ کے کہیا:‏ 20 ‏”‏ہیکل چ جاؤ تے دلیری نال لوکاں نُوں زندگی دا پیغام سُناندے رہوو۔“‏ 21 ایہہ سُن کے رسول سویرے سویرے ہیکل چ گئے تے لوکاں نُوں تلیم دین لگ پئے۔‏

اوس ویلے اعلیٰ کاہن تے اوہدے ساتھیاں نے وڈی عدالت تے اِسرائیلی قوم دے بزرگاں دی ساری جماعت نُوں کٹھا کیتا۔ فیر اوہناں نے سپاہیاں نُوں گھلیا تاکہ اوہ رسولاں نُوں جیل چوں لیا کے اوہناں دے سامنے پیش کرن۔ 22 پر سپاہیاں نے اوتھے جا کے ویکھیا کہ رسول جیل چ نئیں نیں۔ ایس لئی اوہ واپس گئے 23 تے دَسیا:‏ ”‏جیل دا دروازہ بند سی تے تالا لگا ہویا سی۔ نالے پہرےدار وی اوتھے ای سن۔ پر جدوں اَسی دروازہ کھول کے ویکھیا تے اندر کوئی نئیں سی۔“‏ 24 جدوں ہیکل دے نگران تے وڈے کاہناں نے ایہہ سُنیا تے اوہ بڑے حیران ہو گئے تے سوچن لگ پئے کہ ہُن کیہہ ہوئے گا۔ 25 پر کسے نے آ کے اوہناں نُوں دَسیا:‏ ”‏ویکھو، تُسی جنہاں بندیاں نُوں قید کیتا سی، اوہ ہیکل چ دلیری نال لوکاں نُوں تلیم دے رہے نیں۔“‏ 26 فیر ہیکل دا نگران سپاہی لے کے رسولاں نُوں پھڑن لئی گیا۔ پر اوہناں نے رسولاں نال کوئی زور زبردستی نئیں کیتی کیونکہ اوہناں نُوں ڈر سی کہ کِتے لوک اوہناں نُوں پتھراں نال مار نہ دین۔‏

27 اوہناں نے رسولاں نُوں لیا کے وڈی عدالت دے سامنے کھڑا کیتا۔ فیر اعلیٰ کاہن نے رسولاں کولوں پچھ‌گچھ کیتی 28 تے کہیا:‏ ”‏اَسی توانوں سختی نال منع کیتا سی کہ اوس بندے دا ناں لے کے تلیم بالکل نہ دینا۔ پر تُسی تے سارے یروشلم چ اپنی تلیم پھیلا دِتی اے تے تُسی اوس بندے دا خون ساڈے سِر تے پان دا پکا ارادہ کیتا ہویا اے۔“‏ 29 پطرس تے دُوجے رسولاں نے جواب دِتا:‏ ”‏اَسی انساناں دی بجائے خدا دا حکم مناں گے کیونکہ اوہ ساڈا حاکم اے۔ 30 ساڈے پیو دادیاں دے خدا نے یسوع نُوں زندہ کیتا جنہوں تُسی سُولی*‏ تے ٹنگ کے مار دِتا سی۔ 31 خدا نے اوہنوں عظیم رہنما تے نجات‌دہندہ بنا کے اپنے سجے ہتھ بیہن دا مان بخشیا اے تاکہ اِسرائیل دے لوکاں نُوں توبہ کرن تے گُناہواں دی معافی حاصل کرن دا موقع ملے۔ 32 اَسی وی ایہناں گلاں دے گواہ واں تے پاک روح وی ایہناں دی گواہ اے۔ خدا ایہہ پاک روح اوہناں نُوں دیندا اے جیہڑے اوہنوں اپنا حاکم من دے نیں تے اوہدے حکماں تے چلدے نیں۔“‏

33 جدوں اوہناں نے ایہہ سُنیا تے اوہ غصے نال بھر گئے۔ اوہ رسولاں نُوں جانوں مارنا چاہندے سن۔ 34 پر فیر وڈی عدالت دا اِک ممبر گملی‌ایل کھڑا ہویا۔ اوہ اِک فریسی تے شریعت دا اُستاد سی تے سارے لوک اوہدی بڑی عزت کردے سن۔ اوہنے حکم دِتا کہ اوہ رسولاں نُوں تھوڑی دیر لئی باہر لے جان۔ 35 فیر اوہنے کہیا:‏ ”‏اِسرائیل دے بزرگو، سوچ سمجھ کے فیصلہ کرنا کہ تُسی ایہناں بندیاں نال کیہہ کرو گے۔ 36 یاد اے کجھ عرصہ پہلاں تھیوداس ناں دا اِک بندہ اُٹھیا سی جیہڑا اپنے آپ نُوں بڑی شے سمجھدا سی۔ اوہنے تقریباً 400 بندے اپنے مغر لا لئے سن۔ پر جدوں اوہ ماریا گیا تے اوہدے ساتھی نس بھج گئے تے اوہدی ٹولی ختم ہو گئی۔ 37 اوہدے بعد مردم‌شماری دے دِناں چ گلیل توں یہوداہ ناں دا بندہ اُٹھیا سی جنہے لوکاں نُوں اپنے مغر لا لیا سی۔ پر جدوں اوہ وی مر گیا تے اوہدے حمایتی وی ایدھر اودھر ہو گئے۔ 38 ایس معاملے چ مَیں توانوں ایہہ مشورہ دینا واں کہ ایہناں بندیاں دے کم چ دخل نہ دَوو سگوں ایہناں نُوں چھڈ دَوو۔ جے ایہہ تلیم یاں کم انساناں وَلّوں اے تے ایہہ ختم ہو جائے گا۔ 39 پر جے ایہہ خدا وَلّوں اے تے تُسی ایہنوں ختم نئیں کر سکو گے۔ کِتے اِنج نہ ہوئے کہ تُسی خدا نال لڑن والے بن جاؤ۔“‏ 40 اوہناں نے گملی‌ایل دا مشورہ من لیا تے رسولاں نُوں بلوا کے ماریا کُٹیا تے حکم دِتا کہ اوہ یسوع دا ناں لے کے تلیم نہ دین تے فیر اوہناں نُوں چھڈ دِتا۔‏

41 فیر رسول وڈی عدالت چوں چلے گئے۔ اوہ بڑے خوش سن کیونکہ اوہناں نُوں یسوع دے ناں دی وجہ توں بے‌عزت ہون دا مان ملیا سی۔ 42 اوہ ہر دن ہیکل چ تے گھر گھر جا کے تلیم دیندے رہے تے مسیح یسوع بارے خوش‌خبری سُناندے رہے۔‏