رومیوں دے ناں خط
13 سانوں حاکماں دے تابعدار ہونا چاہی دا اے کیونکہ اوہناں نُوں اِختیار خدا دی اجازت نال ای ملیا اے۔ اوہناں کول جیہڑا وی عہدہ اے، اوہ خدا نے ای اوہناں نُوں دِتا اے۔ 2 ایس لئی جے کوئی حاکماں دے خلاف جاندا اے تے اوہ خدا دے اِنتظام دے خلاف جاندا اے تے اوہنوں سزا ملے گی۔ 3 صحی کم کرن والے حاکماں توں نئیں ڈردے سگوں غلط کم کرن والے ڈردے نیں۔ ایس لئی صحی کم کرو فیر توانوں حاکماں توں ڈرن دی ضرورت نئیں ہوئے گی سگوں اوہ تواڈی تعریف کرن گے۔ 4 حاکم خدا دے خادم نیں تے تواڈے فائدے لئی کم کردے نیں۔ پر جے تُسی غلط کم کردے او تے فیر توانوں ڈرنا چاہی دا اے کیونکہ اوہناں نُوں اِختیار* بِلاوجہ نئیں دِتا گیا سگوں اوہ خدا دے خادم دے طور تے غلط کم کرن والیاں نُوں سزا دیندے نیں۔
5 ایس لئی بوہت ضروری اے کہ تُسی اوہناں دے حکم منو۔ صرف ایس وجہ توں نئیں کہ اوہ توانوں سزا دین گے سگوں ایس لئی وی کہ تواڈا ضمیر صاف رہوے۔ 6 ایسے لئی تُسی ٹیکس وی تے دیندے او کیونکہ اوہ خدا دے خادماں دے طور تے عوام دی خدمت کردے رہندے نیں۔ 7 اوہناں دا جو حق بن دا اے، اوہ دَوو۔ جے حکومت ٹیکس منگدی اے تے ٹیکس دَوو، جے فیس* منگدی اے تے فیس دَوو، جدے توں ڈرنا چاہی دا اے، اوہدے توں ڈرو تے جدی عزت کرنی چاہی دی اے، اوہدی عزت کرو۔
8 کسے دے وی قرضدار ہون دی بجائے اِک دُوجے نال محبت کرن دا فرض نبھاؤ۔ جیہڑا دُوجیاں نال محبت کردا اے، اوہ شریعت نُوں پورا کردا اے 9 کیونکہ شریعت چ لکھیا اے: ”جنسیبدکاری نہ کرِیں، خون نہ کرِیں، چوری نہ کرِیں تے لالچ نہ کرِیں۔“ ایہدے علاوہ وی جِنّے حکم نیں، اوہناں دا نچوڑ ایہہ وے: ”تُوں اپنے گوانڈھی نال اوسے طرحاں محبت کر جیس طرحاں تُوں اپنے آپ نال کرنا ایں۔“ 10 جیہڑا محبت کردا اے، اوہ دُوجیاں نال بُرا سلوک نئیں کردا۔ اصل چ محبت کرن نال تُسی شریعت نُوں پورا کردے او۔
11 تُسی ایہناں گلاں تے ایس لئی وی عمل کرو کیونکہ توانوں پتہ اے کہ نیندر توں جاگن دا ویلا آ گیا اے۔ اصل چ جدوں اَسی ایمان لیائے ساں تے اوہدوں نجات پان دا ویلا ایناں نیڑے نئیں سی جِنّاں ہُن اے۔ 12 رات ختم ہون والی اے تے دن چڑھن والا اے۔ ایس لئی آؤ اَسی نھیرے دے کماں نُوں چھڈ دئیے تے روشنی دے ہتھیار بنھ لئیے۔* 13 آؤ، اپنا چالچلن نیک رکھیے بالکل اونویں ای جیویں لوک دن دے ویلے صحی کم کردے نیں۔ سانوں محفلاں چ رنگ رلیاں منان، حدوں ودھ شراب پین، جنسی بدکاری کرن، بےحیائی نال غلط کم کرن،* لڑائی جھگڑا کرن تے حسد کرن توں بچنا چاہی دا اے۔ 14 ایہدی بجائے آؤ اَسی پورے دھیان نال مالک یسوع مسیح دی مثال تے عمل کریئے* تے جسم دِیاں خواہشاں نُوں پورا کرن بارے نہ سوچئے۔*