یہوواہ ساڈیاں دُعاواں دا جواب کیویں دیندا اے

1، 2.‏ دُعا بارے شاید ساڈے ذہن چ کیہڑی گل آئے؟‏

کیہہ تُسی کدی سوچیا اے کہ پتہ نئیں یہوواہ میریاں دُعاواں دا جواب دے رہیا اے یاں نئیں؟ جے تُسی اِنج سوچدے او تے تُسی کلّے نئیں او۔ بوہت سارے بھین بھراواں نُوں اِنج ای لگدا اے، خاص کر اوس ویلے جدوں اوہ کسے مشکل چوں لنگھ رہے ہوندے نیں۔ جے اَسی وی مشکلاں دا سامنا کر رہے آں تے شاید سانوں وی ایہہ سمجھ نہ آئے کہ یہوواہ ساڈیاں دُعاواں دا جواب کیویں دے رہیا اے۔‏

² آؤ ویکھئے کہ اَسی ایہہ یقین کیوں رکھ سکنے آں کہ یہوواہ اپنے بندیاں دِیاں دُعاواں دا جواب دیندا اے۔ (‏1-‏یوحنا 5:‏15‏)‏ اَسی ایہناں سوالاں تے وی غور کراں گے:‏ سانوں کدی کدی اِنج کیوں لگ سکدا اے کہ یہوواہ ساڈیاں دُعاواں دا جواب نئیں دے رہیا؟ اَج یہوواہ ساڈیاں دُعاواں دا جواب کیہڑے طریقیاں نال دیندا اے؟‏

شاید یہوواہ ساڈی دُعا دا جواب اُنج نہ دَوے جِنج اَسی سوچنے آں

3.‏ یہوواہ کیوں چاہندا اے کہ اَسی اوہدے کولوں دُعا کریئے؟‏

³ بائبل چ سانوں ایس گل دا یقین دَوایا گیا اے کہ یہوواہ سانوں بوہت پیار کردا اے تے اوہدی نظر چ اَسی بوہت خاص آں۔ (‏حجی 2:‏7؛‏ 1-‏یوحنا 4:‏10‏)‏ ایس لئی اوہ سانوں دعوت دیندا اے کہ اَسی دُعا چ اوہدے کولوں مدد منگئے۔ (‏1-‏پطرس 5:‏6، 7‏)‏ اوہ ساڈی مدد کرنا چاہندا اے کہ اَسی اوہدے نیڑے رہ سکئے تے اپنیاں مشکلاں نُوں برداشت کر سکئے۔‏

4.‏ اَسی ایہہ کیویں جاننے آں کہ یہوواہ اپنے بندیاں دِیاں دُعاواں دا جواب دیندا اے؟ (‏تصویر نُوں وی ویکھو۔)‏

⁴ بائبل چ اَسی اکثر ایہہ گل پڑھنے آں کہ یہوواہ نے اپنے بندیاں دِیاں دُعاواں دا جواب دِتا۔ کیہہ تواڈے ذہن چ ایہدی کوئی مثال آندی اے؟ ذرا بادشاہ داؤد بارے سوچو۔ اوہنے ساری زندگی بڑے خطرناک دُشمناں دا سامنا کیتا تے اوہنے دُعا چ کئی وار یہوواہ کولوں مدد منگی۔ اِک واری اوہنے دُعا چ یہوواہ نُوں کہیا:‏ اَے یہوواہ!‏ میری دُعا سُن۔ میری اِلتجا تے کن لا۔ اپنی وفاداری تے صداقت دی وجہ توں مینوں جواب دے۔ (‏زبور 143:‏1)‏ یہوواہ نے داؤد دی دُعا دا جواب دِتا تے اوہنوں اوہدے دُشمناں توں چھڈایا۔ (‏1-‏سموئیل 19:‏10، 18-‏20؛ 2-‏سموئیل 5:‏17-‏25)‏ ایس لئی داؤد پورے یقین نال ایہہ گل کہہ سکدا سی:‏ یہوواہ اوہناں سارے لوکاں دے نیڑے وے جیہڑے اوہدے کولوں دُعا کردے نیں۔اَسی وی ایس گل دا یقین رکھ سکنے آں۔—‏زبور 145:‏18۔‏

5.‏ کیہہ ماضی چ یہوواہ نے اپنے بندیاں دِیاں دُعاواں دا جواب اُنج ای دِتا جِنج اوہ سوچ رہے سن؟ اِک مثال دَوو۔ (‏تصویر نُوں وی ویکھو۔)‏

⁵ یہوواہ ہمیشاں ساڈیاں دُعاواں دا جواب اُنج نئیں دیندا جِنج اَسی سوچ رہے ہُنے آں۔ پولُس رسول دے نال وی اِنج ای ہویا۔ اوہنے خدا کولوں اِلتجا کیتی کہ اوہ اوہدی اوس تکلیف نُوں ختم کر دَوے جیہڑی اِک کنڈے وانگوں اوہدے جسم چ چبھ‌دی رہندی سی۔ تِن موقعیاں تے پولُس رسول نے خاص طور تے ایس مشکل بارے دُعا کیتی۔ کیہہ یہوواہ نے اوہدیاں دُعاواں دا جواب دِتا؟ جی بالکل، پر اُنج نئیں جِنج اوہنے سوچیا سی۔ یہوواہ نے پولُس دی ایس تکلیف نُوں ختم تے نئیں کیتا پر اوہنے اوہنوں طاقت دِتی کہ اوہ ایس تکلیف دے باوجود وی وفاداری نال اوہدی خدمت کردا رہوے۔—‏2-‏کُرنتھیوں 12:‏7-‏10‏۔‏

6.‏ کدی کدار سانوں اِنج کیوں لگ سکدا اے کہ یہوواہ ساڈیاں دُعاواں دا جواب نئیں دے رہیا؟‏

⁶ ہو سکدا اے کہ کدی کدار یہوواہ ساڈیاں دُعاواں دا جواب وی فرق طریقے نال دَوے۔ پر اَسی ایس گل دا یقین رکھ سکنے آں کہ یہوواہ جاندا اے کہ ساڈے لئی کیہہ چنگا اے۔ اوہ ساڈے لئی اوس توں وی ودھ کے کر سکدا اے جو اَسی سوچنے یاں منگنے آں۔ (‏اِفسیوں 3:‏20‏)‏ ایس لئی کدی کدار اوہ ساڈیاں دُعاواں دا جواب ایہو جہے وقت تے ایہو جہے طریقے نال دیندا اے جدے بارے اَسی سوچیا وی نئیں ہوندا۔‏

7.‏ کدی کدار سانوں اپنیاں دُعاواں نُوں بدلن دی ضرورت کیوں ہو سکدی اے؟ اِک مثال دَوو۔‏

⁷ جدوں اَسی یہوواہ دی مرضی نُوں ہور چنگی طرحاں سمجھ جانے آں تے شاید سانوں اپنیاں دُعاواں نُوں بدلنا پووے۔ ایس بارے بھرا مارٹن دی مثال تے غور کرو۔ اوہنوں اوہدی شادی دے کجھ عرصے بعد ای نازیاں دے قیدی کیمپ چ گھل دِتا گیا۔ شروع چ اوہنے یہوواہ کولوں دُعا کیتی کہ اوہ اوہنوں ایس کیمپ توں آزادی دَوائے تاکہ اوہ اپنی بیوی دا خیال رکھ سکے تے دُبارہ توں مُنادی کرنا شروع کر سکے۔ پر دو ہفتے بعد وی اوہنوں نئیں لگ رہیا سی کہ اوہ ایس قید توں آزاد ہو سکے گا۔ ایس لئی اوہنے یہوواہ کولوں ایہہ دُعا کیتی:‏ ”‏یہوواہ میری مدد کر تاکہ مَیں سمجھ سکاں کہ میرے لئی تیری کیہہ مرضی اے۔“‏ فیر بھرا ایہہ سوچن لگ پیا کہ کیمپ چ دُوجے بھرا کیہڑیاں مشکلاں چوں لنگھ رہے نیں۔ اوہناں چوں زیادہ‌تر اپنے بیوی بچیاں لئی پریشان سن۔ فیر بھرا نے یہوواہ کولوں ایہہ دُعا کیتی:‏ ”‏یہوواہ مینوں ایہہ ذمے‌داری دین لئی بوہت شکریہ کہ مَیں اپنے بھراواں دا حوصلہ ودھاواں۔“‏ اوہنے اگلے نو سالاں تک اِنج ای کیتا۔‏

8.‏ دُعا کردے ویلے سانوں کیہڑی خاص گل یاد رکھنی چاہی دی اے؟‏

⁸ سانوں یاد رکھنا چاہی دا اے کہ یہوواہ دا اِک مقصد اے تے اوہ ایہنوں اپنے طے کیتے ہوئے وقت تے پورا کرے گا۔ ایس مقصد چ ایہہ شامل اے کہ اوہ ایہو جہے مسئلیاں نُوں جڑوں ختم کر دَوے گا جنہاں دا اَج سانوں سامنا کرنا پیندا اے، جیویں کہ قدرتی آفتاں، بیماری تے موت۔ یہوواہ اپنا ایہہ مقصد اپنی بادشاہی دے ذریعے پورا کرے گا۔ (‏دانی‌ایل 2:‏44؛‏ مکاشفہ 21:‏3، 4‏)‏ پر جدوں تک اوہ وقت نئیں آندا، یہوواہ نے شیطان نُوں ایس دُنیا تے حکومت کرن دی اجازت دِتی ہوئی اے۔‏b (‏یوحنا 12:‏31؛‏ مکاشفہ 12:‏9‏)‏ جے یہوواہ ہُن ای انساناں دے سارے مسئلیاں نُوں ختم کر دَوے گا تے اِنج لگے گا کہ جیویں شیطان بڑے چنگے طریقے نال ایس دُنیا تے حکمرانی کر رہیا اے۔ ایس لئی سانوں یہوواہ دے کجھ وعدے پورے ہون لئی اِنتظار کرنا پئے گا۔ پر ایہدا ایہہ مطلب نئیں کہ یہوواہ نے سانوں کلّا چھڈ دِتا اے۔ آؤ کجھ ایہو جہے طریقیاں تے غور کرنے آں جنہاں دے ذریعے یہوواہ ساڈی مدد کردا اے۔‏

اوہ طریقے جنہاں دے ذریعے اَج یہوواہ ساڈیاں دُعاواں دا جواب دیندا اے

9.‏ جدوں سانوں کوئی فیصلہ کرنا پیندا اے تے یہوواہ ساڈی مدد کیویں کردا اے؟ اِک مثال دَوو۔‏

⁹ یہوواہ سانوں دَنائی دیندا اے۔‏ یہوواہ نے وعدہ کیتا اے کہ اوہ سانوں دَنائی دَوے گا تاکہ اَسی چنگے فیصلے کر سکئے۔ سانوں خاص طور تے اوس ویلے دَنائی دی لوڑ ہوندی اے جدوں سانوں کوئی ایہو جیہا فیصلہ کرنا پیندا اے جدا اثر ساڈی پوری زندگی تے پئے گا، جیویں کہ شادی کرن یاں نہ کرن دا فیصلہ۔ (‏یعقوب 1:‏5‏)‏ ایس بارے ذرا اِک کنواری بھین دی مثال تے غور کرو جدا ناں ماریہ اے۔‏c بھین ماریہ بڑی خوشی نال پہل کار دے طور تے خدمت کر رہی سی۔ فیر اوہدی ملاقات اِک بھرا نال ہوئی۔ بھین دَسدی اے:‏ ”‏جیویں جیویں ساڈی دوستی گُوڑھی ہوندی گئی، اَسی اِک دُوجے نُوں ہور زیادہ پسند کرن لگ پئے۔ مینوں پتہ سی کہ مینوں کوئی نہ کوئی فیصلہ ضرور کرنا پووے گا۔ ایس لئی مَیں ایس معاملے بارے یہوواہ کولوں بوہت زیادہ دُعا کیتی۔ مینوں یہوواہ دی رہنمائی دی لوڑ سی پر مینوں پتہ سی کہ فیصلہ مینوں آپ ای کرنا پئے گا۔“‏ بھین ماریہ نُوں لگدا اے کہ یہوواہ نے اوہنوں دَنائی دے کے اوہدیاں دُعاواں دا جواب دِتا اے۔ پر یہوواہ نے اوہنوں دَنائی کیویں دِتی؟ جدوں اوہنے ساڈیاں کتاباں تے رسالیاں وچوں تحقیق کیتی تے اوہنوں کجھ ایہو جہے مضمون لبھے جنہاں چ اوہناں ای سوالاں دے جواب دِتے گئے سن جیہڑے اوہدے ذہن چ چل رہے سن۔ اوہنے اپنی امی دے مشوریاں نُوں وی منیا۔ ایہناں مشوریاں تے عمل کرن نال اوہنوں مدد ملی کہ اوہ اپنے احساسات نُوں سمجھ سکے۔ آخر چ اوہ اِک چنگا فیصلہ کرن دے قابل ہوئی۔‏

10.‏ فِلپّیوں 4:‏13 دے مطابق یہوواہ اپنے بندیاں دی مدد کرن لئی کیہہ کردا اے؟ اِک مثال دَوو۔ (‏تصویر نُوں وی ویکھو۔)‏

¹⁰ یہوواہ سانوں مشکلاں نُوں برداشت کرن دی طاقت دیندا اے۔‏ پولُس رسول وانگوں یہوواہ سانوں وی مشکلاں نُوں برداشت کرن دی طاقت دیندا اے۔ ‏(‏فِلپّیوں 4:‏13 نُوں پڑھو۔)‏ ذرا غور کرو کہ یہوواہ نے مشکلاں نُوں برداشت کرن چ بھرا بینجمن دی مدد کیویں کیتی۔ بینجمن تے اوہدے گھر والیاں نے اپنی زیادہ‌تر زندگی افریقہ دے پناہ گزین کیمپاں چ ای گزاری۔ اوہ کہندا اے:‏ ”‏مَیں وار وار یہوواہ کولوں دُعا کرنا ساں تے اوہنوں کہنا ساں کہ مینوں طاقت دے تاکہ مَیں اوہی کم کر سکاں جیہڑے اوہدی نظر چ صحی نیں۔ یہوواہ نے میریاں دُعاواں دا جواب دین لئی مینوں ذہنی سکون دِتا، مُنادی کردے رہن لئی دلیری دِتی تے ساڈی تنظیم دِیاں کتاباں تے رسالیاں دے ذریعے میری مدد کیتی تاکہ مَیں اوہدے نیڑے رہ سکاں۔“‏ بھرا نے اَگے کہیا:‏ ”‏جدوں مَیں اپنے بھین بھراواں دِیاں آپ‌بیتیاں چ پڑھیا کہ یہوواہ نے مشکلاں نُوں برداشت کرن چ اوہناں دی مدد کیویں کیتی تے میرا ایہہ عزم مضبوط ہویا کہ مَیں یہوواہ دا وفادار رہواں گا۔“‏

11، 12.‏ یہوواہ ساڈے ہم‌ایماناں دے ذریعے ساڈیاں دُعاواں دا جواب کیویں دیندا اے؟ (‏تصویر نُوں وی ویکھو۔)‏

¹¹ یہوواہ ساڈے ہم‌ایماناں نُوں اس تمال کردا اے۔‏ اپنی جان قربان کرن توں پہلے والی رات یسوع نے یہوواہ کولوں بوہت زیادہ دُعا کیتی۔ اوہنے اوہدے کولوں اِلتجا کیتی کہ اوہ اوہدے تے ایہہ اِلزام نہ آن دَوے کہ اوہنے یہوواہ دے ناں دی توہین کیتی اے۔ یہوواہ نے اِنج تے نئیں کیتا پر اوہنے اوہدا حوصلہ ودھان لئی اِک فرشتے نُوں ضرور گھلیا۔ (‏لُوقا 22:‏42، 43‏)‏ اَج یہوواہ ساڈی مدد کرن لئی وی ساڈے ہم‌ایماناں نُوں استمال کردا اے۔ ہو سکدا اے کہ بھین بھرا ساڈا حوصلہ ودھان لئی سانوں فون کرن یاں مِلن آن۔ سانوں ساریاں نُوں ایہو جہے موقعیاں دی تلاش چ رہنا چاہی دا اے جدے چ اَسی اپنے بھین بھراواں دا کسے چنگی گل نال حوصلہ ودھا سکئے۔—‏امثال 12:‏25۔‏

¹² ذرا اِک بھین دی مثال تے غور کرو جدا ناں مریم اے۔ اوہدے شوہر دے فوت ہون دے کجھ ہفتیاں بعد جدوں اوہ گھر چ کلّی سی تے اوہ بڑی دُکھی تے پریشان سی۔ اوہ بوہت زیادہ رو رہی سی نالے اوہدا دل کر رہیا سی کہ اوہ کُھل کے کسے نال گل کرے۔ اوہنے دَسیا:‏ ”‏میرے چ اینی طاقت نئیں سی کہ میں کسے نُوں فون کر سکاں۔ ایس لئی مَیں یہوواہ کولوں دُعا کرن لگ پئی۔ جدوں مَیں روندے روندے یہوواہ کولوں دُعا کر رہی ساں تے میرے فون دی گھنٹی وجی۔ اوہ فون کلیسیا دے اِک بزرگ نے کیتا سی۔“‏ اوس بزرگ نے تے اوہدی بیوی نے مریم نُوں بڑی تسلی دِتی۔ مریم نُوں ایس گل دا یقین ہو گیا کہ اصل چ یہوواہ نے اوس بزرگ دے دل چ ایہہ گل پائی سی کہ اوہ اوہنوں فون کرے۔‏

13.‏ اِک مثال دے کے دَسو کہ یہوواہ ساڈیاں دُعاواں دا جواب دین لئی اوہناں لوکاں نُوں کیویں استمال کردا اے جیہڑے اوہدی عبادت نئیں کردے؟‏

¹³ یہوواہ اوہناں لوکاں نُوں استمال کر سکدا اے جیہڑے اوہدی عبادت نئیں کردے۔‏ (‏امثال 21:‏1)‏ کدی کدار یہوواہ ساڈیاں دُعاواں دا جواب ایہو جہے لوکاں دے ذریعے دیندا اے جیہڑے اوہدی عبادت نئیں کردے۔ مثال لئی، اوہنے بادشاہ ارتخششتا دے دل چ ایہہ گل پائی کہ اوہ نحمیاہ نُوں یروشلیم واپس جان دی اجازت دَوے تاکہ اوہ ایس شہر نُوں دُبارہ بنان چ مدد کر سکے۔ (‏نحمیاہ 2:‏3-‏6)‏ اَج وی یہوواہ اوہناں لوکاں دے دل چ ساڈی مدد کرن دی خواہش پا سکدا اے جیہڑے اوہدی عبادت نئیں کردے۔‏

14.‏ بھین سُو ہین دے تجربے توں تواڈا حوصلہ کیویں ودھیا اے؟ (‏تصویر نُوں وی ویکھو۔)‏

¹⁴ اِک بھین جدا ناں سُو ہین اے، اوہنے ویکھیا اے کہ یہوواہ نے ڈاکٹر دے ذریعے اوہدی بڑی مدد کیتی اے۔ اوہدے پُتر نُوں بوہت ساریاں ذہنی بیماریاں نیں۔ جدوں اوہدے پُتر دا ایکسیڈنٹ ہویا تے اوہدی دیکھ‌بھال کرن لئی اوہنوں تے اوہدے شوہر نُوں اپنی نوکری چھڈنی پئی۔ ایس وجہ توں اوہناں دے حالات بڑے خراب ہو گئے۔ بھین سُو ہین کہندی اے کہ اوہنوں لگ رہیا سی کہ ہُن اوہدی بس ہو گئی اے۔ ایس لئی اوہنے دل کھول کے یہوواہ کولوں دُعا کیتی۔ فیر اِک ڈاکٹر دے دل چ اوہناں دی مدد کرن دا خیال آیا جدی وجہ توں اوہناں نُوں رہن لئی اِک مناسب گھر تے حکومت وَلّوں اِمداد ملی۔ بعد چ بھین سُو ہین نے کہیا:‏ ”‏اَسی یہوواہ دی مدد نُوں محسوس کیتا اے۔ اوہ واقعی دُعا دا سُنن والا اے۔“‏—‏زبور 65:‏2۔‏

دُعا دے جواب نُوں سمجھن تے قبول کرن لئی ایمان دی لوڑ اے

15.‏ کیہڑی چیز نے اِک بھین دی ایہہ سمجھن چ مدد کیتی کہ یہوواہ اوہدیاں دُعاواں دا جواب دے رہیا اے؟‏

¹⁵ یہوواہ ہمیشاں ساڈیاں دُعاواں دا جواب اِنج نئیں دیندا کہ اَسی حیران ہو جائیے۔ پر اوہ جو وی جواب دیندا اے، اوہ اوہدے وفادار رہن چ مدد کرن لئی کافی ہوندا اے۔ ایس لئی غور کردے رہوو کہ یہوواہ تواڈیاں دُعاواں دا جواب کیویں دے رہیا اے۔ اِک بھین جدا ناں یوکو اے، اوہنوں لگدا سی کہ یہوواہ اوہدیاں دُعاواں دا جواب نئیں دے رہیا۔ پر فیر اوہنے اِک ڈائری چ اوہناں گلاں بارے لکھنا شروع کر دِتا جنہاں بارے اوہنے یہوواہ کولوں دُعا کیتی سی۔ کجھ عرصے بعد جدوں اوہنے اپنی ڈائری نُوں ویکھیا تے اوہ سمجھ گئی کہ یہوواہ اوہدیاں زیادہ‌تر دُعاواں دا جواب دے چُکیا اے، کجھ ایہو جہیاں دُعاواں دا وی جنہاں بارے اوہ بُھل چکی سی۔ ایہہ بوہت ضروری اے کہ اَسی باقاعدگی نال ایس گل تے سوچ وچار کریئے کہ یہوواہ ساڈیاں دُعاواں دا جواب کیویں دے رہیا اے۔—‏زبور 66:‏19، 20۔‏

16.‏ جدوں دُعا دی گل آندی اے تے اَسی یہوواہ اُتے ایمان کیویں ظاہر کر سکنے آں؟ (‏عبرانیوں 11:‏6‏)‏

¹⁶ صرف دُعا کرن نال ای اَسی یہوواہ اُتے اپنا ایمان نئیں ظاہر کردے سگوں ایہدے جواب نُوں قبول کرن نال وی اَسی ایمان ظاہر کرنے آں۔ ‏(‏عبرانیوں 11:‏6 نُوں پڑھو۔)‏ ذرا بھرا مائیک تے اوہدی بیوی کریسی دی مثال تے غور کرو۔ اوہ بیت‌ایل چ خدمت کرنا چاہندے سن۔ بھرا مائیک کہندا اے:‏ ”‏اَسی کئی سالاں تک بیت‌ایل چ خدمت کرن لئی درخاست دیندے رہے۔ تے ایس بارے اَسی یہوواہ کولوں وار وار دُعا وی کیتی۔ پر سانوں بیت‌ایل نئیں بلا‌یا گیا۔“‏ بھرا مائیک تے بھین کریسی نُوں پورا یقین سی کہ یہوواہ جاندا اے کہ اوہ اوہدی خدمت چ زیادہ چنگی طرحاں کیہہ کر سکدے نیں۔ بھرا مائیک تے اوہدی بیوی اوہ کم کردے رہے، جو اوہ کر سکدے سن۔ اوہناں نے پہل‌کاراں دے طور تے ایہو جہے علاقیاں چ خدمت کیتی جتھے مبشراں دی زیادہ لوڑ سی تے تعمیر دے کم چ وی حصہ لیا۔ ہُن بھرا مائیک حلقے دا نگہبان اے تے اوہ تے اوہدی بیوی کلیسیاواں دا دورہ کردے نیں۔ اوہ کہندا اے:‏ ”‏یہوواہ نے ہمیشاں ساڈیاں دُعاواں دا جواب اُنج نئیں دِتا جیویں اَسی سوچ رہے ساں۔ پر اوہنے ساڈیاں دُعاواں دا جواب دِتا ضرور اے۔ کدی کدار تے اوہنے ساڈیاں دُعاواں دا جواب ساڈی سوچ توں وی ودھ کے دِتا اے۔“‏

17، 18.‏ زبور 86:‏6، 7 دے مطابق اَسی کیہڑی گل دا یقین رکھ سکنے آں؟‏

¹⁷ زبور 86:‏6، 7 نُوں پڑھو۔‏ داؤد نُوں ایس گل دا یقین سی کہ یہوواہ اوہدیاں دُعاواں نُوں سُن‌دا اے تے اوہناں دا جواب دیندا اے۔ تُسی وی ایس گل دا یقین رکھ سکدے او۔ ایس مضمون چ جیہڑیاں مثالاں دِتیاں گئیاں نیں، اوہناں توں پتہ چلدا اے کہ یہوواہ مشکلاں نُوں برداشت کرن لئی سانوں دَنائی تے طاقت دے سکدا اے۔ ساڈی مدد کرن لئی اوہ کلیسیا دے بھین بھراواں یاں ایہو جہے لوکاں نُوں وی استمال کر سکدا اے جیہڑے حالے اوہدی عبادت نئیں کر رہے۔‏

¹⁸ ہوسکدا اے کہ یہوواہ ہمیشاں ساڈیاں دُعاواں دا جواب اُنج نہ دَوے جِنج اَسی سوچ رہے ہُنے آں۔ پر اَسی جاننے آں کہ اوہ ساڈیاں دُعاواں دا جواب دے گا ضرور۔ اوہ سانوں صحی وقت تے اوہ سب کجھ دَوے گا جدی سانوں ضرورت اے۔ ایس لئی دُعا کردے رہوو تے ایس گل دا یقین رکھو کہ یہوواہ تواڈی دُعا ضرور سُنے گا۔ بھروسا رکھو کہ اوہ ہُن وی تواڈا خیال رکھے گا نالے نوِیں دُنیا چ اوہ ہر جان‌دار دی خواہش پوری کرے گا۔—‏زبور 145:‏16۔‏