سادہ طریقے نال تلیم دَوو

یسوع دی مثال

ویڈیو:‏ یسوع نے مثالاں دے کے سمجھایا کہ خدا نُوں ساڈی فکر اے

1.‏ ویڈیو ویکھو یاں متی 6:‏25-‏27 نُوں پڑھو۔‏ فیر ایہناں سوالاں تے غور کرو:‏

1. ‏(‏الف)‏ یسوع نے کیہڑیاں مثالاں دے کے سمجھایا کہ یہوواہ نُوں ساڈی فکر اے؟‏

2. ‏(‏ب)‏ بھانویں کہ یسوع پرندیاں بارے بوہت ساریاں گلاں جان‌دا سی پر فیر وی اوہنے اوہناں دی کیہڑی سادہ جہی گل نُوں مثال دین لئی استمال کیتا؟ ایہہ تلیم دین دا ودھیا طریقہ کیوں سی؟‏

اَسی یسوع دی مثال توں کیہہ سکھنے آں؟‏

2.‏ جدوں اَسی لوکاں نُوں سادہ طریقے نال تلیم دَواں گے تے اوہناں نُوں ساڈیاں گلاں یاد رہن گیاں تے اوہناں دے دل تے اثر وی کرن گیاں۔‏

یسوع دی مثال تے عمل کرو

3.‏ بوہت زیادہ نہ بولو۔‏ کسے موضوع بارے اپنی ساری معلومات نہ دَوو سگوں کتاب چ لکھیاں گلاں تے دھیان دَواؤ۔ بائبل کورس کرن والے بندے کولوں سوال پچھن دے بعد صبر نال اوہدے جواب دین دا اِنتظار کرو۔ جے اوہنوں صحی جواب نئیں پتہ یاں اوہ کوئی ایہو جہی گل کہندا اے جیہڑی بائبل دی تلیم دے مطابق نئیں اے تے اوہدے کولوں ہور سوال پچھو تاکہ اوہ آپ صحی نتیجے تک پونچے۔ جدوں اوہ خاص نکتے نُوں سمجھ جاندا اے تے فیر اَگے ودھو۔‏

4.‏ نوِیاں گلاں نُوں پرانیاں گلاں نال جوڑن چ بائبل کورس کرن والے دی مدد کرو۔‏ مثال لئی، مُردیاں دے جی اُٹھن بارے سبق شروع کرن توں پہلاں اوہناں گلاں دی دہرائی کرو جیہڑیاں اوہنے مُردیاں دی حالت بارے سکھ لئیاں نیں۔‏

5.‏ مثالاں نُوں سمجھ‌داری نال استمال کرو۔‏ کوئی مثال دین توں پہلاں اپنے آپ کولوں پچھو:‏

1. ‏(‏الف)‏ ”‏کیہہ ایہہ مثال سادہ اے؟“‏

2. ‏(‏ب)‏ ”‏کیہہ بائبل کورس کرن والے بندے نُوں ایہہ اسانی نال سمجھ آ جائے گی؟“‏

3. ‏(‏ج)‏ ”‏کیہہ اوہنوں خاص نکتہ وی یاد رہوے گا یاں صرف مثال ای یاد رہوے گی؟“‏