یہوواہ دا ہتھ چھوٹا نئیں اے

1.‏ جدوں موسیٰ نے بنی‌اِسرائیل دی مصر چوں نِکلن چ رہنمائی کیتی تے اوہنے یہوواہ تے بھروسا کیویں ظاہر کیتا؟‏

عبرانیوں دے ناں خط چ ایہو جہے بوہت سارے لوکاں دا ذکر ہویا اے جیہڑے یہوواہ تے مضبوط ایمان رکھدے سن۔ اوہناں وچوں اِک موسیٰ نبی سی جنہے ایمان دی ودھیا مثال قائم کیتی۔ (‏عبرانیوں 3:‏2-‏5؛‏ 11:‏23-‏25‏)‏ جدوں اوہنے مصر چوں نِکلن چ بنی اِسرائیل دی رہنمائی کیتی تے اوہنے یہوواہ تے مضبوط ایمان ظاہر کیتا۔ اوہ فرعون تے مصر دی طاقت‌ور فوج توں وی نئیں ڈریا سگوں اوہنے یہوواہ دِیاں ہدیتاں مطابق بنی‌اِسرائیل دی بحرِقلزم نُوں پار کرن چ تے بعد چوں ویرانے چ وی رہنمائی کیتی۔ (‏عبرانیوں 11:‏27-‏29‏)‏ بوہت سارے اِسرائیلیاں نے ایس گل تے بھروسا کرنا چھڈ دِتا کہ یہوواہ اوہناں دِیاں ضرورتاں پوریاں کر سکدا اے۔ پر موسیٰ یہوواہ تے بھروسا کردا رہیا۔ تے یہوواہ نے وی اپنے بندیاں دا ساتھ نئیں چھڈیا۔ اوہ ویرانے چ بنی‌اِسرائیل نُوں معجزہ کر کے کھانا تے پانی دیندا رہیا۔‏a‏—‏خروج 15:‏22-‏25؛ زبور 78:‏23-‏25۔‏

2.‏ خدا نے موسیٰ کولوں ایہہ کیوں پچھیا:‏ کیہہ یہوواہ دا ہتھ ایناں چھوٹا اے؟ (‏گنتی 11:‏21-‏23)‏

² بھانویں کہ موسیٰ یہوواہ تے مضبوط ایمان رکھدا سی پر بنی‌اِسرائیل دے مصر چوں نِکلن دے تقریباً اِک سال بعد اوہ ایہہ سوچن لگ پیا کہ کیہہ یہوواہ واقعی اپنی قوم نُوں کھان لئی گوشت دَوے گا۔ موسیٰ نُوں سمجھ نئیں آ رہی سی کہ یہوواہ خدا ویرانے چ لکھاں اِسرائیلیاں لئی اینے زیادہ گوشت دا بندوبست کیویں کرے گا تاکہ اوہ سارے رَج کے ایہنوں کھان۔ یہوواہ نے موسیٰ نُوں پچھیا:‏ کیہہ یہوواہ دا ہتھ ایناں چھوٹا اے؟ ‏(‏گنتی 11:‏21-‏23 نُوں پڑھو۔)‏ یہوواہ دا ہتھ، اوہدی پاک روح یاں اوہدی طاقت وَل اشارہ کردا اے جدے ذریعے اوہ اپنی مرضی پوری کردا اے۔ اِک لحاظ نال یہوواہ موسیٰ کولوں ایہہ پچھ رہیا سی:‏ ”‏کیہہ تینوں لگدا اے کہ میرے چ اینی طاقت نئیں اے کہ مَیں اوہ کم کر سکاں جیہڑا مَیں کرنا چاہنا واں؟“‏

3.‏ سانوں موسیٰ تے بنی‌اِسرائیل دے واقعے تے کیوں غور کرنا چاہی دا اے؟‏

³ کیہہ تُسی کدی ایس گلوں پریشان ہوئے او کہ پتہ نئیں یہوواہ تواڈیاں تے تواڈے گھر والیاں دِیاں ضرورتاں پوریاں کرے گا یاں نئیں؟ بھانویں تُسی ایہدے بارے سوچیا ہوئے یاں نئیں، آؤ موسیٰ تے بنی‌اِسرائیل دی مثال تے غور کرئیے جنہاں نے ایس گل تے بھروسا ظاہر نئیں کیتا کہ یہوواہ اوہناں دِیاں ضرورتاں پوریاں کرے گا۔ اَسی کجھ ایتاں تے وی غور کراں گے جنہاں توں ایس گل تے ساڈا ایمان مضبوط ہو جائے گا کہ یہوواہ دا ہتھ ایناں چھوٹا نئیں اے کہ اوہ ساڈیاں ضرورتاں نہ پوریاں کر سکے۔‏

موسیٰ تے بنی‌اِسرائیل دی مثال توں سکھو

4.‏ بوہت سارے اِسرائیلی ایس گل تے شک کیوں کرن لگ پئے کہ یہوواہ اوہناں نُوں کھان پین دِیاں اوہ چیزاں دَوے گا یاں نئیں جیہڑیاں اوہ کھانا چاہندے نیں؟‏

⁴ بوہت سارے اِسرائیلیاں دے ذہن چ ایہہ شک کیوں آیا کہ یہوواہ اوہناں دا خیال رکھے گا یاں نئیں؟ جدوں بنی‌اِسرائیل مصر توں ملک کنعان جا رہے سن تے ایس دوران اوہناں نُوں تے اوہناں نال آن والی مِلی جُلی بِھیڑ نُوں کجھ عرصے لئی ویرانے چ رہنا پیا۔ (‏خروج 12:‏38؛ اِستثنا 8:‏15)‏ اوہ مِلی جُلی بِھیڑ تے بوہت سارے اِسرائیلی من کھا کھا کے اَک گئے سن تے بُڑ بُڑ کرن لگ پئے سن۔ (‏گنتی 11:‏4-‏6)‏ اوہناں نُوں کھان پین دِیاں اوہ چیزاں یاد آندیاں سن جیہڑیاں اوہ مصر چ کھاندے سن۔ ایس لئی جدوں اوہناں نے موسیٰ نال ایس بارے شکایت کیتی تے موسیٰ ایہہ محسوس کرن لگ پیا کہ اوہنوں ایہناں سارے لوکاں نُوں کھان لئی گوشت دینا پئے گا۔—‏گنتی 11:‏13، 14۔‏

5، 6.‏ بنی‌اِسرائیل نال جان والی مِلی جُلی بِھیڑ دا اوہناں تے جو اثر ہویا، اوہدے توں اَسی کیہہ سکھ سکنے آں؟‏

⁵ اِنج لگدا اے کہ اوہ مِلی جُلی بِھیڑ اوہناں چیزاں لئی شکرگزار نئیں سی جیہڑیاں یہوواہ اوہناں نُوں دے رہیا سی تے اوہناں دا اثر بنی‌اِسرائیل تے وی ہو رہیا سی۔ ساڈے نال وی اِنج ہو سکدا اے۔ جے ساڈے آلے دَوالے ایہو جہے لوک ہون گے جیہڑے ناشکرے نیں تے ساڈے دل چ وی اوہناں چیزاں لئی شکرگزاری گھٹ ہو جائے گی جیہڑیاں یہوواہ سانوں دے رہیا اے۔ ایہہ اوہدوں وی ہوسکدا اے جدوں اَسی اوہناں چیزاں بارے سوچن لگ پینے آں جیہڑیاں ساڈے کول پہلے ہوندیاں سن یاں اوہناں لوکاں کولوں سڑن لگ پینے آں جنہاں کول اوہ چیزاں نیں۔ پر جے اَسی اوہناں چیزاں تے راضی رہواں گے جیہڑیاں ہُن ساڈے کول نیں تے اَسی زیادہ خوش رہواں گے، فیر بھانویں ساڈے حالات جیہو جہے وی ہون۔‏

⁶ بنی‌اِسرائیل نُوں یاد رکھنا چاہی دا سی کہ یہوواہ نے اوہناں نُوں ایہہ یقین دَوایا اے کہ جدوں اوہ اپنی منزل تے پونچ جان گے تے اوہناں نُوں اوہناں دِیاں ضرورتاں توں وی ودھ کے چیزاں مِلن گیاں۔ پر ایہہ وعدہ ملک کنعان چ پورا ہونا سی، ویرانے چ نئیں۔ ایسے طرحاں سانوں ایہہ نئیں سوچنا چاہی دا کہ ایس دُنیا چ سانوں کیہڑیاں کیہڑیاں چیزاں نئیں مِل رہیاں سگوں سانوں ایس گل تے دھیان دینا چاہی دا اے کہ یہوواہ نے نوِیں دُنیا چ سانوں کیہڑیاں چیزاں دین دا وعدہ کیتا اے۔ اَسی ایہو جہیاں ایتاں تے وی غور کر سکنے آں جنہاں توں یہوواہ تے ساڈا بھروسا ودھے۔‏

7.‏ اَسی ایس گل دا پکا یقین کیوں رکھ سکنے آں کہ یہوواہ دا ہتھ چھوٹا نئیں اے؟‏

⁷ ایہناں ساریاں گلاں تے غور کرن توں بعد وی شاید تُسی سوچو کہ یہوواہ نے موسیٰ کولوں ایہہ کیوں پچھیا کہ کیہہ اوہدا ہتھ چھوٹا اے۔ یہوواہ شاید موسیٰ نُوں ایہہ سمجھانا چاہ رہیا سی کہ اوہ صرف ایہہ نہ سوچے کہ اوہدے چ کِنّی طاقت اے سگوں ایہہ وی سوچے کہ اَسی بھانویں جتھے مرضی ہوئیے، یہوواہ ساڈی مدد کر سکدا اے۔ بھانویں کہ بنی‌اِسرائیل ویرانے چ سن پر یہوواہ اوہناں نُوں گوشت دے سکدا سی۔ تے یہوواہ نے واقعی ایہہ ثابت کر دِتا کہ اوہ اپنے زورآور ہتھ تے طاقتور بازو نال کیہہ کجھ کر سکدا اے۔ (‏زبور 136:‏11، 12)‏ ایس لئی جدوں اَسی کسے مشکل چ ہُنے آں تے سانوں ایہہ نئیں سوچنا چاہی دا کہ یہوواہ دی مدد دا ہتھ ساڈے تک نئیں پونچ سکدا۔—‏زبور 138:‏6، 7۔‏

8.‏ اَسی اوہ غلطی کرن توں کیویں بچ سکنے آں جیہڑی ویرانے چ اِسرائیلیاں نے کیتی سی؟ (‏تصویر نُوں وی ویکھو۔)‏

⁸ چھیتی ای یہوواہ نے اپنے وعدے مطابق اِسرائیلیاں نُوں گوشت کھان لئی دِتا۔ پر کیویں؟ اوہنے معجزہ کر کے اوہناں نُوں بوہت سارے بٹیرے دِتے۔ پر بنی‌اِسرائیل شکرگزار ہون دی بجائے بٹیریاں تے ٹُٹ پئے۔ اوہ سارا دن، ساری رات تے اگلے دن وی بٹیرے کٹھے کردے رہے۔ اوہ جِنّے زیادہ بٹیرے کٹھے کر سکدے سن، اوہ کردے رہے۔ یہوواہ نُوں اوہناں تے بڑا غصہ آیا جنہاں نے لالچ کیتا سی تے اوہنے اوہناں نُوں سزا دِتی۔ (‏گنتی 11:‏31-‏34)‏ ایس واقعے توں اَسی اِک بڑا اہم سبق سکھنے آں۔ سانوں ضرورت توں زیادہ چیزاں حاصل کرن دا لالچ نئیں کرنا چاہی دا۔ بھانویں اَسی امیر آں یاں غریب، سانوں یہوواہ تے یسوع نال اپنی دوستی مضبوط کر کے ”‏اسمان تے اپنا مال“‏ جمع کرنا چاہی دا اے۔ (‏متی 6:‏19، 20؛‏ لُوقا 16:‏9‏)‏ جے اَسی اِنج کراں گے تے یہوواہ ساڈا خیال ضرور رکھے گا۔‏

9.‏ اَسی کیس گل دا پکا یقین رکھ سکنے آں؟‏

⁹ یہوواہ اَج وی اپنے طاقت‌ور ہتھ نال اپنے بندیاں دی مدد کردا اے۔ پر کیہہ ایہدا ایہہ مطلب اے کہ سانوں کدی وی پیسے دھیلے دی تنگی نئیں ہوئے گی یاں کھان پین دِیاں شیواں دی تھوڑ نئیں ہوئے گی؟ ایہہ گل نئیں اے۔‏b سگوں ایہدا مطلب ایہہ وے کہ جے سانوں ایہناں پریشانیاں دا سامنا ہووے گا تے یہوواہ سانوں کدی وی کلّا نئیں چھڈے گا۔ اوہ سانوں ہر طرحاں دی مشکل چ سنبھالے گا۔ ایس گل نُوں سمجھن لئی اَسی ایہناں دو معاملیاں تے غور کر سکنے آں:‏ (‏1)‏جدوں سانوں پیسے دھیلے دی تنگی دا سامنا ہوندا اے تے (‏2)‏جدوں اَسی ایس بارے منصوبے بنانے آں کہ بڑھاپے چ اَسی اپنیاں ضرورتاں کیویں پوریاں کراں گے۔‏

جدوں سانوں پیسے دھیلے دی تنگی دا سامنا ہوندا اے

10.‏ سانوں پیسے دھیلے بارے کیہڑیاں مشکلاں دا سامنا کرنا پے سکدا اے؟‏

¹⁰ جیویں جیویں ایس دُنیا دا خاتمہ نیڑے آ رہیا اے، سانوں پیسے دھیلے بارے ہور زیادہ مشکلاں دا سامنا ہو سکدا اے۔ حکومتاں دے بدلن، جنگاں، قدرتی آفتاں تے وباواں دی وجہ توں ساڈے حالات اِک دم بدل سکدے نیں۔ ایہدے علاوہ ساڈی نوکری وی جا سکدی اے۔ شاید ساڈے کول گھربار وی نہ رہوے۔ ایہو جہے حالاتاں چ شاید اپنے خاندان دِیاں ضرورتاں نُوں پورا کرن لئی سانوں نوِیں نوکری لبھنی پووے یاں اپنے خاندان نال کسے نوِیں جگہ شفٹ ہونا پووے۔ کیہڑی گل ساڈی مدد کر سکدی اے تاکہ اَسی ایہناں معاملیاں بارے فیصلے کردے ویلے یہوواہ دے طاقت‌ور ہتھ تے بھروسا رکھ سکئے؟‏

11.‏ کیہڑی چیز پیسے دھیلے دی تنگی نال نبڑن چ تواڈی مدد کر سکدی اے؟ (‏لُوقا 12:‏29-‏31‏)‏

¹¹ اپنے مسئلیاں نال نبڑن دا سب توں ودھیا طریقہ ایہہ وے کہ تُسی اپنیاں پریشانیاں یہوواہ نُوں دَسو۔ (‏اَمثال 16:‏3)‏ اوہدے کولوں مدد منگو تاکہ اوہ چنگے فیصلے کرن لئی توانوں سمجھ دَوے تے تواڈے دل نُوں سکون دَوے تاکہ تُسی اپنے حالاتاں بارے ”‏حدوں ودھ پریشان“‏ نہ ہووو۔ ‏(‏لُوقا 12:‏29-‏31 نُوں پڑھو۔)‏ اوہدے کولوں مدد منگو تاکہ تُسی اوہناں چیزاں تے راضی رہ سکو جیہڑیاں زندہ رہن لئی ضروری نیں۔ (‏1-‏تیمُتھیُس 6:‏7، 8‏)‏ تنظیم دِیاں کتاباں تے رسالیاں چوں ایس بارے تحقیق کرو کہ تُسی پیسے دھیلے دی تنگی نال نبڑن لئی کیہہ کر سکدے او۔ بوہت سارے بھین بھراواں نُوں jw.org تے دِتے گئے اوہناں مضموناں تے ویڈیوز توں بڑا فائدہ ہویا اے جنہاں چ ایس مسئلے نال نبڑن لئی مشورے دِتے گئے نیں۔‏

12.‏ نوکری بارے صحی فیصلہ کرن لئی اِک مسیحی اپنے آپ کولوں کیہڑے سوال پچھ سکدا اے؟‏

¹² کجھ بھین بھراواں نے ایہو جہی نوکری کرن دا فیصلہ کیتا جدی وجہ توں اوہناں نُوں اپنے گھر والیاں توں دُور کسے ہور جگہ جا کے رہنا پیا۔ پر بعد چوں اوہناں وچوں کئی بھین بھراواں نُوں ایہہ احساس ہویا کہ اوہناں دا ایہہ فیصلہ غلط سی۔ ایس لئی کوئی وی نوکری کرن توں پہلاں صرف ایہہ نہ سوچو کہ مینوں ایہدے توں کِنّے پیسے مِلن گے سگوں ایہہ وی سوچو کہ ایہدی وجہ توں میری تے میرے خاندان دی یہوواہ نال دوستی تے کیہہ اثر پئے گا۔ (‏لُوقا 14:‏28‏)‏ ایس بارے تُسی اپنے آپ کولوں ایہہ سوال پچھ سکدے او:‏ ”‏جے مَیں اپنی نوکری دی وجہ توں اپنے جیون ساتھی توں دُور رہواں گا تے ایہدی وجہ توں میری شادی‌شُدہ زندگی تے کیہہ اثر پئے گا؟ کیہہ کسے ہور جگہ جا کے نوکری کرن دی وجہ توں مَیں باقاعدگی نال عبادتاں تے مُنادی تے جا سکاں گا؟“‏ جے تواڈے بچے نیں تے توانوں اپنے آپ کولوں ایہہ اہم سوال وی پچھنا چاہی دا اے:‏ ”‏جے مَیں اپنے بچیاں دے نال نئیں رہواں گا تے کیہہ مَیں یہوواہ دے اصولاں تے ہدیتاں مطابق اوہناں دی تربیت کر سکاں گا؟“‏ (‏اِفسیوں 6:‏4‏)‏ یہوواہ دی سوچ مطابق فیصلے کرو نہ کہ اپنے اوہناں دوستاں تے رشتے‌داراں دی مرضی مطابق جیہڑے پاک کلام دے اصولاں نُوں نئیں من دے۔‏c ذرا مغربی ایشیا چ رہن والے اِک بھرا دی مثال تے غور کرو جدا ناں ٹونی اے۔ اوہنوں کئی ایہو جہیاں نوکریاں دی آفر ہوئی جنہاں لئی اوہنوں باہر دے ملک جانا پینا سی۔ بھرا ٹونی نے ایس معاملے بارے دُعا کرن تے اپنی بیوی نال مشورہ کرن توں بعد ایہہ فیصلہ کیتا کہ اوہ باہر دے ملک جا کے نوکری نئیں کرے گا سگوں اوہ دونویں مِل کے اپنے خرچیاں نُوں گھٹ کرن گے۔ اپنے ایس فیصلے بارے بھرا ٹونی کہندا اے:‏ ”‏مَیں بڑا خوش آں کہ مَیں صحی فیصلہ کیتا۔ ایہہ میرے لئی بڑے مان دی گل اے کہ مَیں یہوواہ بارے سکھن چ بوہت سارے لوکاں دی مدد کیتی اے۔ مَیں ایس گلوں وی بڑا خوش آں کہ میرے بچے یہوواہ نال پیار کردے نیں تے لگن نال اوہدی خدمت کر رہے نیں۔ اَسی ویکھیا اے کہ جے اَسی متی 6:‏33 چ لکھی گل تے عمل کرنے آں تے یہوواہ ساڈا خیال رکھدا اے۔“‏

جدوں اَسی بڑھاپے چ اپنیاں ضرورتاں پوریاں کرن بارے فیصلے کرنے آں

13.‏ اَسی ہُن کیہہ کر سکنے آں تاکہ بڑھاپے چ اپنیاں ضرورتاں پوریاں کرن لئی ساڈے کول تھوڑے بوہت پیسے ہون؟‏

¹³ یہوواہ تے ساڈے بھروسے دا اِمتحان اوہدوں وی ہو سکدا اے جدوں اَسی مستقبل بارے منصوبے بنانے آں تاکہ سانوں بڑھاپے چ مسئلیاں دا سامنا نہ ہوئے۔ بائبل چ سانوں کہیا گیا اے کہ اَسی محنت نال کم کرئیے تاکہ مستقبل چ اپنیاں ضرورتاں پوریاں کرن لئی ساڈے کول کجھ نہ کجھ ہوئے۔ (‏اَمثال 6:‏6-‏11)‏ جے ہو سکے تے اَسی آن والے وقت لئی کجھ پیسے بچا کے رکھ سکنے آں۔ ایہہ سچ اے کہ پیسے نال سانوں کسے حد تک فائدہ ہو سکدا اے پر سانوں اپنی زندگی چ پیسے نُوں سب توں زیادہ اہمیت نئیں دینی چاہی دی۔—‏واعظ 7:‏12۔‏

14.‏ سانوں اپنیاں مستقبل دِیاں ضرورتاں بارے منصوبے بناندے ویلے عبرانیوں 13:‏5 نُوں کیوں ذہن چ رکھنا چاہی دا اے؟‏

¹⁴ یسوع نے اِک امیر آدمی دی مثال دے کے دَسیا کہ اوہ بندہ بڑا بے‌وقوف ہوندا اے جیہڑا اپنا دھیان پیسے جمع کرن تے رکھدا اے پر ”‏خدا دی نظر چ امیر“‏ ہون دی کوشش نئیں کردا۔ (‏لُوقا 12:‏16-‏21‏)‏ کوئی نئیں جان دا کہ کل اوہدے نال کیہہ ہوئے گا۔ (‏اَمثال 23:‏4، 5؛‏ یعقوب 4:‏13-‏15‏)‏ پر مسیح دا شاگرد ہون دی وجہ توں سانوں اِک مشکل دا سامنا ضرور ہو سکدا اے۔ یسوع نے کہیا سی کہ اوہدا شاگرد بنن لئی سانوں اپنیاں ساریاں چیزاں نُوں ”‏قربان“‏ کرن لئی تیار ہونا چاہی دا اے۔ (‏لُوقا 14:‏33‏)‏ پہلی صدی چ یہودیہ چ رہن والے مسیحیاں نے خوشی نال اپنیاں چیزاں قربان کیتیاں۔ (‏عبرانیوں 10:‏34‏)‏ اَج وی بوہت سارے مسیحیاں نُوں ایس وجہ توں اپنی نوکری تے پیسے نُوں قربان کرنا پیندا اے کیونکہ اوہ سیاسی معاملیاں چ کسے دی حمایت نئیں کردے۔ (‏مُکاشفہ 13:‏16، 17‏)‏ اوہ ایہناں چیزاں نُوں قربان کرن لئی تیار کیوں ہوندے نیں؟ کیونکہ اوہ یہوواہ دے ایس وعدے تے پکا یقین رکھدے نیں:‏ مَیں توانوں کدی نئیں چھڈاں گا۔ مَیں توانوں کدی رد نئیں کراں گا۔ ‏(‏عبرانیوں 13:‏5 نُوں پڑھو۔)‏ ایہہ چنگی گل اے کہ اَسی آن والے وقت لئی کجھ پیسے جوڑئیے تاکہ اَسی اپنیاں ضرورتاں پوریاں کر سکئے۔ پر جے اچانک ساڈے تے کوئی مشکل آ جاندی اے تے سانوں یہوواہ تے بھروسا رکھن دی لوڑ اے۔‏

15.‏ مسیحی ماں پیو نُوں اپنے بچیاں بارے کیہو جہی سوچ رکھنی چاہی دی اے؟ (‏تصویر نُوں وی ویکھو۔)‏

¹⁵ کجھ مُلکاں چ میاں بیوی ایہہ سوچ کے بچے پیدا کردے نیں کہ اوہناں دے بچے بڑھاپے چ اوہناں دا سہارا بنن گے تے اوہناں دِیاں ضرورتاں پوریاں کرن گے۔ اِک لحاظ نال اوہ اپنے بچیاں نُوں اپنی پینشن سمجھدے نیں۔ پر بائبل چ دَسیا گیا اے کہ بچیاں نُوں ماں پیو لئی نئیں سگوں ماں پیو نُوں بچیاں لئی بچت کرنی چاہی دی اے۔ (‏2-‏کُرنتھیوں 12:‏14‏)‏ ایہہ سچ اے کہ ماں پیو نُوں بڑھاپے چ پیسیاں تے دُوجیاں چیزاں دی لوڑ ہوندی اے تے بوہت سارے بچے اوہناں دِیاں ضرورتاں نُوں پورا کرن لئی خوشی نال تیار ہوندے نیں۔ (‏1-‏تیمُتھیُس 5:‏4‏)‏ پر مسیحی ماں پیو نُوں ایہہ گل سمجھن دی لوڑ اے کہ اوہناں نُوں ایہہ سوچ کے اپنے بچیاں نُوں نئیں پالنا چاہی دا کہ اوہ وڈے ہو کے اوہناں نُوں بڑا پیسہ کما کے دین سگوں ایہہ سوچ کے پالنا چاہی دا اے کہ اوہ وڈے ہو کے یہوواہ دی خدمت کرن۔ایہو جہی سوچ رکھن نال اوہناں نُوں زیادہ خوشی ملے گی۔—‏3-‏یوحنا 4‏۔‏

16.‏ ماں پیو اپنے بچیاں دی مدد کیویں کر سکدے نیں تاکہ اوہ وڈے ہو کے اپنیاں ضرورتاں پوریاں کر سکن؟ (‏اِفسیوں 4:‏28‏)‏

¹⁶ ماپیو، جدوں تُسی بچیاں نُوں سکھاندے او کہ اوہ وڈے ہو کے اپنیاں ضرورتاں دا خیال کیویں رکھ سکدے نیں تے اوہناں نُوں اپنی مثال دے ذریعے یہوواہ تے بھروسا کرنا سکھاؤ۔ چھوٹی عمر توں ای اوہناں نُوں سکھاؤ کہ محنت نال کم کرنا کِنّاں ضروری اے۔ (‏اَمثال 29:‏21؛‏ اِفسیوں 4:‏28 نُوں پڑھو۔)‏ پر جیویں جیویں اوہ وڈے ہوندے نیں، اوہناں دی مدد کرو کہ اوہ سکول چ دل لا کے پڑھن۔ ماں پیو تحقیق کر کے بائبل دے کجھ ایہو جہے اصول لبھ سکدے نیں جنہاں دے ذریعے اوہ اپنے بچیاں دی ایہہ فیصلہ کرن چ مدد کر سکن کہ اوہناں نُوں کیہڑی تلیم حاصل کرنی چاہی دی اے۔ اِنج اوہناں دے بچے اَگے چل کے اپنیاں ضرورتاں پوریاں کر سکن گے تے ایہدے نال نال مُنادی چ زیادہ حصہ لے سکن گے، ایتھوں تک کہ پہل‌کار وی بن سکن گے۔‏

17.‏ اَسی کیس گل دا یقین رکھ سکنے آں؟‏

¹⁷ یہوواہ دے بندے ایس گل دا پکا یقین رکھ سکدے نیں کہ یہوواہ اوہناں دِیاں ضرورتاں نُوں پورا کرن دی طاقت وی رکھدا اے تے خواہش وی۔ جیویں جیویں ایس دُنیا دا خاتمہ نیڑے آ رہیا اے، یہوواہ تے ساڈے بھروسے دا ہور زیادہ اِمتحان ہوئے گا۔ پر بھانویں کجھ وی ہو جائے، آؤ ایہہ عزم کرئیے کہ اَسی ایس گل تے بھروسا کردے رہواں گے کہ یہوواہ اپنی طاقت دے ذریعے ساڈیاں ضرورتاں نُوں پورا کرے گا۔ ایس گل تے پورا یقین رکھو کہ اِنج کدی وی نئیں ہوئے گا کہ یہوواہ دا ہتھ چھوٹا ہوئے تے اوہدا بازو ساڈی مدد کرن لئی ساڈے تک نہ پونچے۔‏