سبق نمبر 07

یہوواہ کیہو جیہا خدا اے؟‏

چھپیا ہویا ایڈیشن

جدوں تُسی یہوواہ خدا بارے سوچدے او تے تواڈے ذہن چ اوہدی کیہو جہی تصویر بن دی اے؟ کیہہ توانوں لگدا اے کہ اوہ اِک بوہت ای عظیم ہستی اے جیہڑی ستاریاں وانگوں تواڈے توں بوہت دُور اے؟ یاں فیر تُسی ایہہ من دے او کہ خدا اسمانی بجلی وانگوں بس اِک طاقت اے پر کوئی حقیقی ہستی نئیں؟ اصل چ یہوواہ کیہو جہی ہستی اے؟ ایہدا جواب سانوں بائبل چوں مِلدا اے۔ ایہدے چ دَسیا گیا اے کہ خدا چ کیہڑیاں خوبیاں نیں تے اوہ ساڈی کِنّی فکر کردا اے۔‏

1.‏ اَسی خدا نُوں ویکھ کیوں نئیں سکدے؟‏

خدا روح اے۔‏ (‏یوحنا 4:‏24‏)‏ یہوواہ دا انساناں ورگا جسم نئیں اے۔ اوہ اسمان تے رہندا اے۔ اَسی نہ تے خدا نُوں ویکھ سکنے آں تے نہ ای اوس جگہ نُوں جِتھے اوہ رہندا اے۔‏

2.‏ یہوواہ کیہو جیہا خدا اے؟‏

ایہہ سچ اے کہ اَسی خدا نُوں ویکھ نئیں سکدے پر اوہ اِک حقیقی ہستی اے۔ اوہدے چ بوہت شان‌دار خوبیاں نیں جنہاں بارے سکھ کے اَسی اوہنوں پیار کرن لگ پینے آں۔ بائبل چ دَسیا گیا اے کہ خدا انصاف نُوں پسند کردا اے تے اپنے بندیاں دا ساتھ کدی نئیں چھڈدا۔ (‏زبور 37:‏28)‏ اوہ سارے انساناں نال بڑی شفقت تے رحم نال پیش آندا اے،‏ خاص کر دُکھی لوکاں نال۔ (‏یعقوب 5:‏11‏)‏ یہوواہ غمگین لوکاں دے نیڑے وے تے مصیبت دے ماریاں نُوں بچاندا اے۔ (‏زبور 34:‏18)‏ دلچسپی دی گل تے ایہہ وے کہ ساڈے کماں تے فیصلیاں توں یہوواہ یاں تے خوش ہوندا اے یاں فیر دُکھی۔ جے اَسی جان‌بجھ کے کوئی غلط کم کراں گے تے یہوواہ نُوں بوہت افسوس ہوئے گا۔ (‏زبور 78:‏40، 41)‏ پر جے اَسی چنگے کم کراں گے تے اوہنوں بوہت خوشی ہوئے گی۔—‏امثال 27:‏11 نُوں پڑھو۔‏

3.‏ یہوواہ ساڈے لئی پیار کیویں ظاہر کردا اے؟‏

بائبل چ دَسیا گیا اے کہ خدا محبت اے۔‏ (‏1-‏یوحنا 4:‏8‏)‏ ایہدا مطلب ایہہ وے کہ یہوواہ دی سب توں وڈی خوبی محبت اے۔ یہوواہ دو خاص طریقیاں نال ساڈے لئی اپنا پیار ظاہر کردا اے۔ اوہنے سانوں اپنا کلام دِتا اے نالے ساڈی خوشی لئی بوہت ساریاں چیزاں بنائیاں نیں۔ (‏اعمال 14:‏17 نُوں پڑھو۔)‏ مثال لئی ذرا سوچو کہ اوہنے سانوں کیویں بنایا اے۔ اوہنے سانوں فرق فرق صلاحیتاں دِتیاں نیں جیویں کہ اَسی ویکھ سکنے آں، سُن سکنے آں تے چکھ سکنے آں۔ ایس توں پتہ چلدا اے کہ خدا چاہندا اے کہ اَسی زندگی دا مزہ لئیے۔‏

ہور سوچ‌وچار لئی

سکھو کہ یہوواہ حیران کر دین والے کم کیویں کردا اے۔ فیر ویکھو کہ یہوواہ اپنیاں شان‌دار خوبیاں کیویں ظاہر کردا اے۔‏

4.‏ پاک روح یہوواہ دی زبردست طاقت اے

تصویراں:‏ 1.‏ کائنات خدا نے اپنی پاک روح نال بنائی۔ 2.‏ اِک بندہ پاک روح دے ذریعے خدا دا پیغام لکھ رہیا اے۔‏

جیویں اَسی اپنے ہتھاں نال کم کرنے آں اونویں ای یہوواہ خدا اپنی پاک روح نال کم کردا اے۔ بائبل توں پتہ چلدا اے کہ پاک روح کوئی ہستی نئیں سگوں اوہ طاقت اے جنہوں یہوواہ کوئی وی کم کرن لئی استمال کردا اے۔ لُوقا 11:‏13 تے اعمال 2:‏17 نُوں پڑھو تے فیر ایہناں سوالاں تے گل بات کرو:‏

ایہناں ایتاں توں پتہ چلدا اے کہ خدا اوہناں لوکاں نُوں اپنی پاک روح دیندا اے جیہڑے ایہدے لئی درخاست کردے نیں۔ فیر تواڈے خیال چ پاک روح اِک ہستی اے یاں اِک طاقت؟ تُسی جیہڑا جواب دِتا اے اوہدی وجہ کیہہ اے؟‏

خدا اپنی پاک روح نال بڑے شان‌دار کم کردا اے۔ زبور 104:‏30 تے 2-‏پطرس 1:‏20، 21 نُوں پڑھو تے فیر ایس سوال تے گل بات کرو:‏

یہوواہ نے اپنی پاک روح دے ذریعے کیہڑے کیہڑے کم کیتے نیں؟‏

5.‏ یہوواہ شان‌دار خوبیاں دا مالک اے

موسیٰ، یہوواہ خدا دا وفادار بندہ سی پر اوہ فیر وی اوہدے بارے ہور جاننا چاہندا سی۔ ایس لئی اوہنے خدا نُوں کہیا کہ مینوں اپنی راہ دَس تاکہ میں تینوں جان لواں۔ (‏خروج 33:‏13)‏ فیر یہوواہ نے موسیٰ نُوں اپنیاں کجھ خوبیاں بارے دَسیا۔ خروج 34:‏4-‏6 نُوں پڑھو تے فیر ایہناں سوالاں تے گل بات کرو:‏

یہوواہ خدا نے موسیٰ نُوں اپنیاں کیہڑیاں خوبیاں بارے دَسیا؟‏
توانوں یہوواہ دِیاں کیہڑیاں خوبیاں خاص طور تے پسند نیں؟‏

6.‏ یہوواہ خدا اپنے لوکاں دی فکر کردا اے

پرانے زمانے چ خدا دی قوم مصر چ غلام سی۔ اوتھے اوہناں تے بڑا ظلم کیتا جاندا سی۔ اوہناں دی تکلیف نُوں ویکھ کے خدا نُوں کیہو جیہا محسوس ہویا؟ آڈیو ریکارڈنگ چلاؤ تے ایتاں نُوں نال نال ویکھو۔ یاں فیر خروج 3:‏1-‏10 نُوں پڑھو تے فیر ایہناں سوالاں تے گل بات کرو:‏

آڈیو ریکارڈنگ:‏ یہوواہ اپنے بندیاں نُوں تکلیف چ ویکھ کے دُکھی ہویا (‏45:‏2)‏

ایہناں ایتاں دے مطابق انساناں نُوں تکلیف چ ویکھ کے یہوواہ کیہو جیہا محسوس کردا اے؟—‏ایت 7 تے 8 نُوں ویکھو۔‏
تواڈے خیال چ کیہہ خدا واقعی انساناں دی مدد کرنا چاہندا اے تے کیہہ اوہدے چ اِنج کرن دی طاقت وی ہے وے؟ جے ہاں تے کیوں، جے نئیں تے کیوں نئیں؟‏