سبق نمبر 59
تُسی اذیت دے باوجود وفادار رہ سکدے او
سارے مسیحیاں نُوں کدی نہ کدی مخالفت دا سامنا تے کرنا ای پووے گا۔ لوک تے شاید سانوں بوہت زیادہ اذیت وی دین۔ کیہہ سانوں ایس گل توں ڈر جانا چاہی دا اے؟
1. سانوں کیویں پتہ اے کہ سانوں اذیت دِتی جائے گی؟
بائبل چ صاف صاف دَسیا گیا اے کہ اوہناں ساریاں نُوں اذیت دِتی جائے گی جیہڑے مسیح یسوع دے پیروکار نیں تے خدا دی عبادت کرنا چاہندے نیں۔ (2-تیمُتھیُس 3:12) یسوع مسیح نُوں ایس لئی ستایا گیا سی کیونکہ اوہ دُنیا دا حصہ نئیں سی۔ اَسی وی ایس دُنیا دا حصہ نئیں، ایس لئی جدوں حکومتاں یاں مذہبی تنظیماں سانوں ستاندیاں نیں تے اَسی حیران نئیں ہوندے۔—یوحنا 15:18، 19۔
2. اَسی اذیت دا سامنا کرن لئی تیار کیویں ہو سکنے آں؟
ایہدے لئی ضروری اے کہ اَسی ہُن توں ای یہوواہ خدا تے اپنا بھروسا مضبوط کرئیے۔ ایس لئی ہر روز یہوواہ کولوں دُعا کرو،اوہدے کلام نُوں پڑھو تے باقاعدگی نال عبادتاں تے جاؤ۔ اِنج توانوں ہر طرحاں دی مخالفت تے اذیت نُوں سہن دی طاقت ملے گی، ایتھوں تک کہ تُسی اپنے گھر دے جیاں وَلّوں آن والی مخالفت تے اذیت دا مقابلہ وی کر سکو گے۔ پولُس رسول نُوں کئی وار اذیت دا سامنا کرنا پیا۔ پر فیر وی اوہنے کہیا کہ یہوواہ میرا مددگار اے۔ میں نئیں ڈراں گا۔—عبرانیوں 13:6۔
باقاعدگی نال مُنادی کر کے وی سانوں ہمت تے حوصلہ ملے گا۔ کیویں؟ مُنادی کرن نال اَسی یہوواہ تے بھروسا کرنا تے انساناں دے ڈر دا مقابلہ کرنا سکھاں گے۔ (امثال 29:25) جے تُسی ہُن اپنے اندر مُنادی کرن دی ہمت پیدا کرو گے تے تُسی اوہدوں وی مُنادی کردے رہوو گے جدوں حکومت وَلّوں ساڈے کم تے پابندی لا دِتی جاندی اے۔—1-تھسلُنیکیوں 2:2۔
3. سانوں اذیت سہن دا کیہہ فائدہ ہوندا اے؟
ایہہ سچ اے کہ سانوں اذیت سہن دا کوئی شوق نئیں پر جدوں اَسی اذیت دے باوجود وفادار رہنے آں تے ساڈا ایمان پکا ہوندا اے۔ نالے اَسی یہوواہ دے ہور نیڑے ہو جانے آں کیونکہ جدوں ساڈی ہمت ٹُٹن والی ہوندی اے تے یہوواہ سانوں سنبھال لیندا اے۔ (یعقوب 1:2-4 نُوں پڑھو۔) سانوں تکلیف چ ویکھ کے یہوواہ نُوں دُکھ ہوندا اے پر جدوں اَسی ثابتقدم رہنے آں تے اوہ بوہت خوش ہوندا اے۔ بائبل چ لکھیا اے کہ جے تُسی ایس لئی مشکلاں برداشت کردے او کیونکہ تُسی چنگے کم کردے او تے خدا دی نظر چ ایہہ چنگی گل اے۔ (1-پطرس 2:20) اذیت دے باوجود وفادار رہن والیاں نُوں یہوواہ بوہت ودھیا انعام دَوے گا۔ اوہ اِک نوِیں دُنیا چ ہمیشاں تک زندہ رہن گے جِتھے کوئی وی اوہناں دی مخالفت نئیں کرے گا۔—متی 24:13۔
ہور سوچوچار لئی
غور کرو کہ مخالفت تے اذیت دے باوجود اَسی یہوواہ دے وفادار کیویں رہ سکنے آں تے ایہدا سانوں کیہہ فائدہ ہوئے گا۔
4. تُسی گھروالیاں وَلّوں مخالفت دا سامنا کر سکدے او
یسوع مسیح نے دَسیا سی کہ جے اَسی یہوواہ دی عبادت کراں گے تے شاید ساڈے اپنے گھر والے ای ساڈے خلاف ہو جان گے۔ متی 10:34-36 نُوں پڑھو تے فیر ایس سوال تے گل بات کرو:
جدوں کوئی یہوواہ دی عبادت کرن دا فیصلہ کردا اے تے کدی کدار اوہدے گھر والے کیہہ کردے نیں؟
ایہدی اِک مثال ویکھن لئی ایہہ ویڈیو چلاؤ تے فیر ایس سوال تے گل بات کرو:
جے تواڈا کوئی دوست یاں رشتےدار توانوں یہوواہ دی خدمت کرن توں روکے تے تُسی کیہہ کرو گے؟
زبور 27:10 تے مرقس 10:29، 30 نُوں پڑھو۔ ہر ایت نُوں پڑھن دے بعد ایس سوال تے گل بات کرو:
جے تواڈا کوئی دوست یاں تواڈے گھر والے تواڈی مخالفت کردے نیں تے ایس ایت چ لکھی گل تواڈی مدد کیویں کر سکدی اے؟
5. اذیت دے باوجود یہوواہ دی عبادت کردے رہوو
مخالفت دے باوجود یہوواہ دی خدمت جاری رکھن لئی سانوں بڑی دلیری دی لوڑ ہوندی اے۔ ویڈیو چلاؤ تے فیر ایس سوال تے گل بات کرو:
ایس ویڈیو چ وکھائے گئے لوکاں دِیاں مثالاں توں توانوں دلیری کیویں مِلدی اے؟
اعمال 5:27-29 تے عبرانیوں 10:24، 25 نُوں پڑھو۔ ہر ایت نُوں پڑھن دے بعد ایس سوال تے گل بات کرو:
جے ساڈیاں عبادتاں تے مُنادی دے کم تے پابندی لا دِتی جائے تے فیر وی سانوں یہوواہ دی عبادت کیوں کردے رہنا چاہی دا اے؟
6. وفادار رہن چ یہوواہ تواڈی مدد کرے گا
پوری دُنیا چ ہر عمر دے یہوواہ دے گواہواں نے اذیت دے باوجود وفاداری نال یہوواہ دی خدمت کیتی اے۔ایہہ ویکھن لئی کہ کیہڑی چیز نے اوہناں دی مدد کیتی ویڈیو چلاؤ۔ فیر ایس سوال تے گل بات کرو:
کیہڑی چیز نے یہوواہ دے وفادار رہن چ ایہناں گواہواں دی مدد کیتی؟
رومیوں 8:35، 37-39 تے فِلپّیوں 4:13 نُوں پڑھو۔ ہر ایت نُوں پڑھن دے بعد ایس سوال تے گل بات کرو:
ایس ایت توں توانوں ایہہ حوصلہ کیویں مِلدا اے کہ تُسی ہر مشکل چ یہوواہ دے وفادار رہ سکدے او؟
متی 5:10-12 نُوں پڑھو تے فیر ایس سوال تے گل بات کرو:
تُسی اذیت چ وی خوش کیوں رہ سکدے او؟
یہوواہ دے لکھاں بندے اذیت تے مخالفت دے باوجود اوہدے وفادار رہے نیں۔ تُسی وی اِنج کر سکدے او۔
کجھ لوکاں دی رائے: ”میں اذیت دا سامنا نئیں کر سکدا۔“
ایہو جہے لوکاں نُوں کیہڑیاں ایتاں توں ہمت مِل سکدی اے؟
خلاصہ
جدوں اَسی اذیت دے باوجود یہوواہ دی خدمت کرنا جاری رکھنے آں تے اوہ ایہدے توں بوہت خوش ہوندا اے۔ اوہدی مدد نال اَسی اذیت چ وی وفادار رہ سکنے آں۔
دہرائی
مسیحیاں نُوں کیویں پتہ اے کہ اوہناں نُوں اذیت دِتی جائے گی؟
تُسی ہُن کیہہ کر سکدے او تاکہ تُسی اذیت سہن لئی تیار ہو جاؤ؟
کیہڑی چیز تواڈے ایس بھروسے نُوں مضبوط کر سکدی اے کہ تُسی ہر مشکل چ یہوواہ دے وفادار رہ سکدے او؟
ہور جانن لئی
ایس ویڈیو چ ویکھو کہ جدوں ساڈے اِک بھرا نُوں اوہدے ایمان دی وجہ توں جیل چ پایا گیا تے یہوواہ نے وفادار رہن چ اوہدی مدد کیویں کیتی۔
ایس ویڈیو چ ویکھو کہ اِک جوڑا کئی سالاں تک مخالفت دے باوجود وفاداری نال یہوواہ دی خدمت کیویں کردا رہیا۔
ایس مضمون چ پڑھو کہ تُسی اذیت دا سامنا کرن لئی اپنے اندر دلیری کیویں پیدا کر سکدے او۔
خود کو اذیت کا سامنا کرنے کے لیے ابھی سے تیار کریں (مینارِنگہبانی، جولائی 2019)
ایس مضمون چ پڑھو کہ سانوں اپنے گھر دے جیاں وَلّوں ہون والی مخالفت بارے کیہہ محسوس کرنا چاہی دا اے۔ نالے سانوں کیہہ کرنا چاہی دا اے تاکہ اَسی ایس مخالفت دے باوجود یہوواہ دے وفادار رہیے؟
سچائی ”امن نہیں بلکہ تلوار“ لاتی ہے (مینارِنگہبانی، اکتوبر 2017)