DEUDERONOMI

1 Iet mahsen kan me Moses ndaiong Israel pwon nan sapwen Sordan nan sapwtehno, nan sapwtehn me mi mwohn Sop, nanpwungen Paran, Topel, Lapan, Aserod oh Disahp. 2 Rahn 11 aramas kin seiloangki sang Orep kohla Kades-parnea+ ni ahl me kolahng Nahna Seir. 3 Ni kapahisek en pahr,+ ni kaeisek ehun sounpwong, ni keieun rahn en sounpwongo, Moses koasoiaiong mehn Israel kan* mehkoaros me Siohwa ketin mahsanihong ih en padahkihong irail. 4 Met wiawi mwurin eh kalowehdi Sihon+ nanmwarkien mehn Amor kan, me kin kousoan nan Espon, oh Ok+ nanmwarkien Pasan, me kin kousoan nan Astarod, nan Edrei.+ 5 Ni palimesehn Sordan nan sapwen Mohap, Moses tepida kawehwehiong irail Kosonned wet,+ nda:

6 “Siohwa atail Koht ketin mahsanihong kitail nan Orep, ‘E wereilahr amwail mihmi wasa nahnahn wet.+ 7 Kumwail sohpeiwei oh mwesellahng wasa nahnahn en mehn Amor kan+ oh wasa koaros me karanih nan Arapa,+ wasa nahnahn kan, Sepihla, Nekep, oh oaroahro,+ sapwen mehn Kenan kan, oh Nahna Lepanon,+ kohdahla ni pillap laudo, pillap Iupreitis.+ 8 Kilang, I kaunopadahr sahpwo mwohmwail. Kumwail kohlongala oh sapwenikihla sahpw me Siohwa ketin kahukihong samamwail ko, Eipraam, Aisek,+ oh Seikop,+ pwe en ketikihong irail oh kadaudokarail.’+

9 “Oh I ndaiong kumwail ahnsowo, ‘I sohte kak kelehpw kahluwei kumwail.+ 10 Siohwa amwail Koht ketin katohtohweikumwailla, oh rahnwet kumwail tohtohla duwehte usuhn nanleng.+ 11 Siohwa, Koht en samamwail mehn mahs ako, en ketin katohtohweikumwailla+ pak kid tohtohsang kumwail ahnsou wet, oh en ketin kapaikumwailda duwehte me e ketin inoukihong kumwail.+ 12 Ia duwen ei kak kelehpw apwalih amwail wisik toutou kan oh amwail wisik kan oh amwail akamai kan?+ 13 Kumwail pilada ohl akan sang amwail keinek kan me loalokong, wehwehki ire kan, oh koahiek, oh I pahn idihada irail nin duwen kaun kei pohmwail.’+ 14 Kumwail sapengkin ie, ‘Dahme komw ndaiong kiht sen wiahn me mwahu.’ 15 Ngehi eri ale moangen amwail keinek kan, ohl loalokong oh koahiek kan, oh idihada irail nin duwen kaun kei pohmwail, kaunen meh kid, kaunen meh epwiki, kaunen meh limehk, oh kaunen meh ehk, oh kaunen amwail keinek kan.+

16 “Ni ahnsowo I padahkihong noumwail sounkopwung kan, ‘Ni amwail pahn karonge repenpwung ehu nanpwungen riamwail kan, kumwail pahn kopwung ni pwung pahrek+ nanpwungen aramas emen oh rie de mehn liki men me kousoan rehmwail.+ 17 Kumwail sohte pahn lipilipilki aramas ni amwail kopwung.+ Kumwail pahn karonge me tikitik men duwehte me lapalap men.+ Kumwail sohte pahn masak aramas,+ pwe kumwail kin kopwung ong Koht;+ oh ma repenpwung ehu me nohn apwal ong kumwail, kumwail pahn wadohng ie, oh I pahn karonge.’+ 18 Ni ahnsowo I padahkihong kumwail mehkoaros me kumwail pahn wia.

19 “Kitail eri mweselsang Orep oh karis kohla wasa koaros nan sapwtehn laud oh kamasepwehk+ me kumwail kilang ni atail kohkohla ni wasa nahnahn en mehn Amor kan,+ duwehte me Siohwa atail Koht ketin kehkehlingkihong kitail, oh kedekedeo kitail leledo Kades-parnea.+ 20 Ngehi eri ndaiong kumwail, ‘Kumwail leledohr wasa nahnahn en mehn Amor kan, me Siohwa atail Koht pahn ketikihong kitail. 21 Kilang, Siohwa amwail Koht ketikihongkumwailehr sahpwo. Kohdahla, sapwenikihla sahpwo, duwehte me Siohwa, Koht en samamwail mehn mahs ako, ketin mahsanihong kumwail.+ Kumwail dehr perki de masak.’

22 “Ahpw, kumwail koaros kohdo rehi oh nda, ‘Kitail kadarala ohl ekei mwohtail pwe ren dawih sahpwo ong kitail oh pwurodo ndaiong kitail mehnia ahl me kitail pahn keid ie oh soangen kahnimw dah kan me kitail pahn kolahng.’+ 23 Dahme kumwail ndao mwomwen mwahu ong ie, eri I pilada noumwail ohl 12, emen sang ehuehu keinek.+ 24 Irail eri mwesel oh kohdahla nan wasa nahnahn kan+ oh lella Wahun Eskol oh lipoahroke wasao. 25 Irail ale ekei wahnsahpwo oh wadohng kitail, oh re pwurekihdo rohng wet ong kitail, ‘Sahpw me Siohwa atail Koht pahn ketikihong kitailo me mwahu.’+ 26 Ahpw kumwail kahng kohdahla, oh kumwail uhwongada ruwes en Siohwa amwail Koht.+ 27 Kumwail kin kaukaulim nan amwail impwal kan oh ndinda, ‘Pwehki Siohwa ketin kalahdekin kitail me e ketin waikitailsang nan sapwen Isip pwehn ketikihong kitail rehn mehn Amor kan pwe ren kamwomwkitailla. 28 Soangen wasa dah me kitail kohkolahng ie? Riatail ko kahrehda atail nan kapehd tikitikla*+ ni ar nda, “Aramas ako kehlailsang oh reireisang kitail, oh arail kahnimw kan me laud oh kelpene kehlail leldahla nanleng,*+ oh se kilangada mehn Anak ko+ wasao.”’

29 “Eri I ndaiong kumwail, ‘Kumwail dehr saloh de masak pwehki irail.+ 30 Siohwa amwail Koht pahn ketin tiengwei mwohmwail oh mahwenkin kumwail,+ duwehte me e ketin wia nan Isip mwohn masamwail kan.+ 31 Oh ke kilang nan sapwtehno duwen Siohwa omw Koht eh ketin waiukada duwehte ohl emen eh kin wa nah pwutak, wasa koaros kumwail kohla ie lao kumwail leledo wasaht.’ 32 Ahpw mendahki mepwukat koaros, kumwail sohte pwosonla Siohwa amwail Koht,+ 33 me ketin tiengla mwohmwail ni amwail kohkohwei, pwehn rapahki wasa me kumwail pahn kauwada imwamwail impwal kan ie. E ketin pwarada ni kisiniei nipwong oh ni pelien depwek nin rahn pwehn kasalehiong kumwail ahl me kumwail pahn keid ie.+

34 “Erein ahnsou ko pwon Siohwa ketin karonge dahme kumwail ndinda, oh e ketin engiengda oh kahukihla,+ 35 ‘Sohte emen rehn aramas pwukat sang dih suwed wet pahn kilang sahpw mwahu me I kahukihla en kihong samamwail ko,+ 36 ihte Kalep nein Sepune. E pahn kilang sahpwo, oh I pahn kihong ih oh kadaudoke kan sahpw me e keid ieo, pwehki e kin idawehn Siohwa ni mohngiong unsek.+ 37 (Siohwa pil ketin engiengda pahi pwehki kumwail, oh e ketin mahsanih, “Ke pil sohte pahn iang pedolong nan sahpwo.+ 38 Sosua nein Nun, me kesihnen mwohmw,+ iei me pahn pedolong nan sahpwo.+ Kumwail kakehlailihada,*+ pwe e pahn kahluwa Israel en sapwenikihla sahpwo.”) 39 Oh pil, noumwail seri kan me kumwail nda me pahn wiahla me lohdi kei,+ noumwail seri kan me sehse dahme mwahu de dahme suwed rahnwet, irail me pahn pedolong, oh I pahn kihong irail sahpwo pwe ren sapwenikihla.+ 40 Ahpw kumwail, kumwail sohpeila oh mwesel kolahng sapwtehno sang ni ahl en Sehd Weitahtao.’+

41 “Kumwail eri ndaiong ie, ‘Se dipadahr ong Siohwa. Met se pahn kohdahla oh pei, duwehte me Siohwa at Koht ketin kehkehlingkihong kiht!’ Emenemen kumwail ahpw kaunopada eh tehtehn mahwen, oh kumwail medewe me mehkot mengei ehu en kohdahla pohn nahnao.+ 42 Ahpw Siohwa ketin mahsanihong ie, ‘Ndaiong irail: “Kumwail dehr kohdahla oh pei, pwe I sohte pahn ieiang kumwail.+ Ma kumwail kohdahla, kumwail pahn lohdi pahn amwail imwintihti kan.”’ 43 Ngehi eri koasoiong kumwail, ahpw kumwail sohte rong. Kumwail eri uhwongada sapwellimen Siohwa ruwes oh aklapalapda* oh songosong en kohdahla pohn nahnao. 44 Mehn Amor kan me kin kousoan ni nahnao ahpw kohieido rasehng loangalap kei pwehn tuhwong kumwail oh pwakih kumwail, oh re pwakihkumwailpeseng nan Seir lella Orma. 45 Kumwail eri pwurodo oh tepida sengiseng mwohn silangin Siohwa, ahpw Siohwa sohte ketin karonge kumwail de pil tehk kumwail. 46 Ihme kahrehda kumwail mihmihte nan Kades erein ahnsou reirei.

2 “Kitail eri sohpeila oh mwesel kolahng sapwtehno sang ni ahl en Sehd Weitahtao, duwehte me Siohwa ketin mahsanihong ie,+ oh kitail seiloangki rahn tohto pidakih Nahna Seir. 2 Siohwa eri ketin mahsanihong ie, 3 ‘E wereilahr amwail pidakih nahna wet. Met kumwail sohpeila paliepeng. 4 Oh kihong aramas ako kehkehlik wet: “Kumwail pahn keid limwahn irepen sapwen riamwail ko, kadaudok en Esau kan,+ me kin kousoan nan Seir,+ oh re pahn masak kumwail,+ oh kumwail uhdahn anahne kanahieng. 5 Kumwail dehpa peiong* irail, pwe I sohte pahn kihong kumwail sapwarail kan, de pil kisin wasa me patehn nehmwail pahn sokedi ie, pwehki I kihongehr Esau Nahna Seir nin duwen eh sohso.+ 6 Kumwail pahn kihong irail mwohni ong mwenge me kumwail pahn tungoale, oh kumwail pahn pwain pihl me kumwail pahn nim.+ 7 Pwe Siohwa amwail Koht ketin kapaiakumwaildahr ni mehkoaros me kumwail wiadahr. E uhdahn ketin mwahngih amwail kekeid nan sapwtehn laud wet. Sounpar 40 pwukat Siohwa amwail Koht ketin ieiang kumwail, oh kumwail ahneki soahng koaros me anahn.”’+ 8 Kitail eri keid limwahn riatail ko, kadaudok en Esau kan,+ me kin kousoan nan Seir, oh alu wasa me dohsang ahl en Arapa, sang Elad oh sang Esiongkeper.+

“Mwuri kitail sohpeila oh seiloak sang ni ahl en sapwtehn en Mohap.+ 9 Siohwa eri ketin mahsanihong ie, ‘Ke dehpa peiong de mahweniong Mohap, pwe I sohte pahn kihong uhk sapwe kan nin duwen sohso ehu pwehki I kihongehr Ar nin duwen sohso ehu ong kadaudok en Lohd kan.+ 10 (Mahso mehn Em+ kin kousoan wasao, pwihnen aramas me kehlail oh tohto oh reirei duwehte mehn Anak kan. 11 Mehn Repa kan+ pil duwehte mehn Anak kan,+ oh mehn Mohap kan kin kahdanekin irail mehn Em. 12 Mahso, mehn Or kan+ kin kousoan nan Seir, ahpw kadaudok en Esau kan kihsang irail wasao oh kamwomwirailla oh kousoanla nan arail wasa,+ duwehte me Israel pahn wiahiong sahpw me re pahn sapwenikio, sahpw me Siohwa uhdahn pahn ketikihong irail.) 13 Eri kumwail kohla oh kotehla Wahun Sihred.’ Kitail eri kotehla Wahun Sihred.+ 14 Ahnsou me kitail alialu sang Kades-parnea lao kitail kotehla Wahun Sihred iei sounpar 38, lao ohl akan me iang mahwen nan diho pwon sohrala sang kahnimpwalo, duwehte me Siohwa ketin kahukihong irail.+ 15 Limen Siohwa ketin uhwong irail pwehn ketikihsang irail nan kahnimpwalo lao irail sohla mie.+

16 “Ni ahnsowohte me ohl ako koaros me iang mahwen mehla sang nanpwungen aramas akan,+ 17 Siohwa ketin pwurehng mahsanihong ie, 18 ‘Rahnwet ke pahn keid limwahn sapwen Mohap, me iei Ar. 19 Ni omw karanih mehn Ammon kan, ke dehr kahpwalih de kalingeringerihada irail, pwe I sohte pahn kihong uhk sapwen mehn Ammon kan nin duwen sohso ehu, pwehki I kihongehr met kadaudok en Lohd kan nin duwen arail sohso.+ 20 Mahso met pil kin wia sapwen mehn Repa kan.+ (Mahso mehn Repa kan kin kousoan wasao, oh mehn Ammon kan kin kahdanekin irail mehn Samsum. 21 Irail aramas kehlail oh tohto oh reirei duwehte mehn Anak kan;+ ahpw Siohwa ketin kamwomwirailla mwohn mehn Ammon kan, oh mehn Ammon kan kasareirailla oh kousoanla nan arail wasa. 22 Ih met me e ketin wiahiong kadaudok en Esau kan, me kin kousoan nan Seir+ ahnsou wet, ni eh ketin kamwomwala mehn Or kan+ mwohrail, pwe ren kak kihsang sahpwo rehrail oh kousoanla nan arail wasa lel rahnwet. 23 A ong mehn Ap kan, irail kousoanla nan wasahn kousoan kan lella Kasa+ lao mehn Kaptor kan+ me kohsang Kaptor kamwomwirailla oh kousoanla nan arail wasa.)

24 “‘Eri, kumwail uhda oh kotehla Wahun Arnon.+ Kilang, I kihong Sihon+ mehn Amor, nanmwarkien Espon nan pehmwen. Eri tepida sapwenikihla sapweo, oh mahweniong ih. 25 Rahnwet I pahn tepida kihdiong masak pohn aramas koaros me mi pahnlahng me pahn rong duwen kowe. Re pahn pwunodada oh pahn rerrer* pwehki kowe.’+

26 “Ngehi eri kadarala meninkeder kei sang sapwtehn en Kedemod+ ong Nanmwarki Sihon nan Espon, iangahki mahsen popohl pwukat,+ 27 ‘Mweidohng ie I en kotehla sapwomwen. I pahn mihmihte pohn ahlo oh sohte pahn wetla palimaun de palimeing.+ 28 I pahn tungoalehte mwenge oh nimte pihl me komw pahn netikihong ie. Ihte mweidohng ie I en alu kotehla 29 —ih met me kadaudok en Esau kan me kin kousoan nan Seir oh mehn Mohap kan me kin kousoan nan Ar wiahiong ie—lao I kotehla Sordan nan sahpw me Siohwa atail Koht pahn ketikihong kitail.’ 30 Ahpw Nanmwarki Sihon nan Espon sohte mweidohng kitail en kotehla, pwehki Siohwa omw Koht ketin mweidohng ih* en keptakaila+ oh eh mohngiong en kekeluwakala, pwehn ketikihong ih nan pehmwen duwehte me wiawi met.+

31 “Siohwa eri ketin mahsanihong ie, ‘Kilang, I tepidahr kihong uhk Sihon oh sapwe. Eri tepida sapwenikihla sapweo.’+ 32 Ni Sihon eh kohieido iangahki nah aramas akan koaros pwe ren mahweniong kitail nan Sahas,+ 33 Siohwa atail Koht ketikihong kitail ih, pwe kitail en kalowehdi ih, nah pwutak kan, oh nah aramas ako koaros. 34 Kitail kalowehdi eh kahnimw kan koaros ahnsowo oh kamwomwala kahnimw ko koaros, iangahki ohl, lih oh seri kan. Kitail sohte mweidohng emen en pitila.+ 35 Kitail kulihasangete pelinmen kan ong pein kitail iangahki dipwisou lohdi kan sang kahnimw kan me kitail kalowehdi. 36 Sang Aroer,+ me mi ni keilen Wahun Arnon (iangahki kahnimw me mi nan wahwo), lella Kilead, sohte kisin kahnimw ehu me kitail sohte kak lellahng. Siohwa atail Koht ketikihong kitail irail koaros.+ 37 Ahpw, ke sohte kohla nan sapwen mehn Ammon kan,+ keilen Wahun Sappok pwon+ oh kahnimw kan en wasa nahnahn kan, de wasa teikan me Siohwa atail Koht ketin keinapwihdi.

3 “Kitail eri sohpeila oh kohdahla ni Ahl en Pasan. Oh Ok, nanmwarkien Pasan, kohieido iangahki nah aramas akan koaros pwe ren mahweniong kitail nan Edrei.+ 2 Siohwa eri ketin mahsanihong ie, ‘Ke dehr masak ih, pwe I pahn kihong ih oh nah aramas akan koaros oh sapwe nan pehmwen, oh ke pahn wiahiong ih duwehte me ke wiahiong Sihon nanmwarkien mehn Amor kan, me kin kousoan nan Espon.’ 3 Eri Siohwa atail Koht pil ketikihong Nanmwarki Ok en Pasan oh nah aramas akan koaros nan pehtail, oh kitail eri pousehlahte kemeirailla lao sohte emen nah aramas luhwehdi. 4 Kitail eri kalowehdi eh kahnimw kan koaros. Sohte kisin kahnimw me kitail sohte kihsang irail—kahnimw 60, sapwen Arkop pwon, wehin Ok nan Pasan.+ 5 Kahnimw pwukat koaros kelkihpene dihd ileile kan, ewen kehl kan, oh lepin tuhkehn kateng kan, iangahki kisin kahnimw tohto me sohte kelpene. 6 Ahpw, kitail kamwomwirailla,+ duwehte me kitail wiahiong Nanmwarki Sihon nan Espon, ni atail kamwomwala kahnimw koaros, iangahki ohl, lih oh seri kan.+ 7 Oh kitail ale pelinmen koaros oh dipwisou lohdi en kahnimw kan ong pein kitail.

8 “Ni ahnsowo kitail kihsang sapwen nanmwarkien mehn Amor riemen+ me kin kousoan nan sapwen Sordan, sang ni Wahun Arnon lella Nahna Ermon+ 9 (mahso mehn Saidon kan kin kahdaneki nahnao Sirion oh mehn Amor kan kin kahdaneki Senir), 10 kahnimw koaros nan wasa patapat en wasa ileo, Kilead pwon, oh Pasan pwon lella Saleka oh Edrei,+ kahnimw kan en wehin Ok nan Pasan. 11 Pwe Nanmwarki Ok en Pasan me wia kaimwiseklahn mehn Repa kan. Eh kohpwao wiawihkihda mete,* oh e mihmihte nan Rappa, kahnimw en mehn Ammon kan. E reireiki kiupid* duwau oh tehlapki kiupid pahieu, sang ni koasoandi en sosohng en kiupid. 12 Ni ahnsowo kitail sapwenikihla sahpw wet: sang Aroer,+ me mi limwahn Wahun Arnon, oh elep en wasa nahnahn Kilead, oh I kihong mehn Reupen kan oh mehn Kad kan kahnimw kan me mi wasao.+ 13 Oh elep en Kilead oh Pasan pwon me wia kisehn wehin Ok, I kihong elep keinek en Manase.+ Sapwen Arkop pwon, me wia kisehn Pasan, kin adaneki sapwen Repaim.

14 “Sair+ nein Manase ale sapwen Arkop pwon+ lella ni irepen sapwen mehn Kesur kan oh mehn Maakad kan+ oh kahdaneki kisin kahnimw en Pasan pwukat pein edeo, Apod-sair*+ leledo rahnwet. 15 Oh I kihong Makir Kilead.+ 16 Oh I kihong mehn Reupen kan oh mehn Kad kan+ sang Kilead lel Wahun Arnon. Nanwerengen wahwo me wia irepen sahpwo, oh lella Sappok, wahwo me wia irepen sapwen mehn Ammon kan, 17 oh Arapa oh Pillap Sordan oh keile kan, sang Kinnered lel Sehden Arapa, Sehd Soahl,* ni tepin ukada en Piska ni palimese.+

18 “Ngehi eri kihong kumwail kehkehlik wet: ‘Siohwa amwail Koht ketikihongkumwailehr sahpw wet pwe kumwail en sapwenikihla. Noumwail ohl kommwad koaros pahn onopadahng mahwen oh kotehla mwohn riamwail kan, mehn Israel kan.+ 19 Ihte amwail pwoud kan, noumwail seri kan, oh noumwail pelinmen kan (I uhdahn ese me kumwail naineki pelinmen tohto) me pahn mihmihte nan kahnimw kan me I kihongkumwailehr, 20 lao Siohwa ketin kakommoalehdi riamwail kan, duwehte me e ketin wiahiong kumwail, oh re pil pahn sapwenikihla sahpw me Siohwa amwail Koht pahn ketikihong irail palio Sordan. Mwuri kumwail pahn pwurodo, emenemen nan sapwe me I kihongkumwailehr.’+

21 “Ni ahnsowo I kihong Sosua kehkehlik wet:+ ‘Ke kilangki pein mesomw kan dahme Siohwa amwail Koht ketin wiahiong nanmwarki riemen pwukat. Siohwa pahn ketin wia soahngohte ong wehi kan koaros me ke pahn kotehla.+ 22 Kumwail sohte pahn masak irail, pwe Siohwa amwail Koht me ketin mahmahwenkin kumwail.’+

23 “Ni ahnsowo I peki rehn Siohwa, patohwan, 24 ‘Maing Kaun Wasa Lapalahpie Siohwa, komw ketin tepidahr kasalehiong sapwellimomwi ladu omwi lapalap oh roson en nin limomwi,+ pwe ihs koht en nanleng de nin sampah me kin wiahda soangen wiewia kapwuriamwei kan duwehte komwi?+ 25 Komw kupwurkalahngan oh ketin mweidohng ie I en kotehla oh kilang sahpw mwahwo me mi palio Sordan, sahpw nahnahn kaselel wet oh Lepanon.’+ 26 Ahpw Siohwa ketin engiengte pahi pwehki kumwail,+ oh e sohte ketin karonge ie. Ahpw, Siohwa ketin mahsanihong ie, ‘Eriher! Ke dehr pwurehng koasoiaiong ie duwen ire wet. 27 Kohdahla pohn kadoken Piska,+ oh kilengla palikapi oh paliepeng oh palieir oh palimese oh kilangki mesomw kan sahpwo, pwe ke sohte pahn kotehla Sordan wet.+ 28 Idihada Sosua+ oh kangoange ih oh kakehlakahda ih, pwehki ih me pahn kotehla+ mwohn aramas pwukat oh ih me pahn kahrehiong irail en sohsohki sahpw me ke pahn kilang.’ 29 Mepwukat koaros wiawi erein atail koukousoan nan wahu me mi mwohn Ped-peor.+

4 “Eri Israel, rong koasoandi kan oh kosonned kan me I pahn padahkihong kumwail en kapwaiada, pwe kumwail en mour+ oh pedolong oh sapwenikihla sahpw me Siohwa, Koht en samamwail mehn mahs ako, pahn ketikihong kumwail. 2 Kumwail sohte pahn kapatahiong mehkot ni mahsen me I kehkehlingkihong kumwail, de pil kihsang mehkot ie,+ pwe kumwail en kapwaiada kehkehlik kan en Siohwa amwail Koht me I kehkehlingkihong kumwail.

3 “Pein masamwail kan kilangehr dahme Siohwa ketin wiadahr me pid Paal en Pihor; Siohwa amwail Koht ketin kamwomwala aramas koaros me idawehn Paal en Pihor+ sang nanpwungamwail. 4 Ahpw kumwail koaros me tengediong Siohwa amwail Koht wie momourte rahnwet. 5 Kilang, I padahkihongkumwailehr koasoandi kan oh kosonned kan,+ duwehte me Siohwa ei Koht ketin kehkehlingkihong ie, pwe kumwail en kapwaiada mepwukat nan sahpw me kumwail pahn sapwenikihla. 6 Kumwail pahn idawehn mepwukat ni keneinei,+ pwehki met pahn kasalehda me kumwail ahneki erpit+ oh koahiek en wehwehki+ ire kan mwohn wehi teikan me pahn rong duwen koasoandi pwukat koaros, oh re pahn nda, ‘Wehi laud wet uhdahn pwihnen aramas ehu me loalokong oh koahiek en wehwehki ire kan.’+ 7 Pwe mehnia wehi laud me mie eh koht kan me karanih irail duwehte Siohwa atail Koht eh ketin karanih kitail ni ahnsou koaros me kitail kin likweriong ih?+ 8 Oh mehnia wehi laud me ahneki koasoandi pwung kan oh kosonned kan duwehte Kosonned wet pwon me I kihdiong mwohmwail rahnwet?+

9 “Ihte kanahieng oh mwasamwasahn pein kowe, pwe ken dehr manokehla soahng kan me mesomw kan kilangehr oh pwe mepwukat en dehr sohrasang nan omw mohngiong erein omw mour. Ke pil pahn padahkihong mepwukat noumw seri kan oh nein noumw seri kan.+ 10 Ni rahn me ke uh mwohn silangin Siohwa omw Koht nan Orep, Siohwa ketin mahsanihong ie, ‘Kapokonepene aramas akan rehi pwe I en mweidohng irail en rong ei mahsen kan,+ pwe irail en esehla lemmwikin ie+ erein rahn koaros me irail momour nin sampah oh irail en padahkihong neirail seri kan.’+

11 “Eri kumwail keido oh uh nin tepin nahnao, oh nahnao wie lullul leldalahng nanleng;* e rotorot, depwekin, oh rotorot mosul.+ 12 Oh Siohwa ketin tepida mahseniong kumwail sang nan kisinieio.+ Kumwail rong ngilen mahsen kan, ahpw sohte me kumwail kilang+—ihte kapitie.+ 13 Oh e ketin mahsanihong kumwail sapwellime inou lapo,+ me e ketin kehkehlingkihong kumwail en kapwaiada—Kosonned Eisek ko.*+ Mwurin mwo, e ketin ntingihedi kosonned ko pohn pelien takai patapat riapalio.+ 14 Ni ahnsowo Siohwa ketin kehkehlingkihong ie I en padahkihong kumwail koasoandi kan oh kosonned kan, me kumwail pahn kapwaiada nan sahpw me kumwail pahn pedolong oh sapwenikihla.

15 “Ihme kahrehda, mwasamwasahn pein kumwail—pwehki amwail sohte kilang mwohmw ehu ni rahn me Siohwa ketin mahseniong kumwail nan Orep sang nan kisinieio— 16 pwe kumwail en dehr kauweikumwailla ni amwail pahn pein wiahiong kumwail sansal perperda ehu me mwomwen dikedik, me mwomwen ohl de lih,+ 17 mwomwen mahn akan nin sampah de mwomwen menpihr kan me kin pihr pahnlahng,+ 18 mwomwen soahng kan me kin kerep pohn pwehl de mwomwen mwahmw me mi nan pihl kan pahn sampah.+ 19 Oh ni omw kilengdalahng nanleng oh kilang ketipin oh maram oh usu kan—karis en nanleng koaros—ke dehr pitida oh poaridiong irail oh papah irail.+ Siohwa omw Koht ketikihong mepwukat aramas koaros me mi nan sampah pwon. 20 Ahpw kumwail me Siohwa ketin ale oh kahluwahsang nan Isip, sang wasahn kisiniei mwehl,* pwe kumwail en wiahla sapwellime aramas,*+ duwehte me kumwail wia rahnwet.

21 “Siohwa ketin engiengda pahi pwehki kumwail,+ oh e ketin kahukihla me I sohte pahn kotehla Sordan de pedolong nan sahpw mwahu me Siohwa amwail Koht pahn ketikihong kumwail nin duwen sohso ehu.+ 22 Pwe I pahn mehla nan sahpwet; I sohte pahn kotehla Sordan,+ ahpw kumwail pahn kotehla oh sapwenikihla sahpw mwahu wet. 23 Eri kumwail kanahieng pwe kumwail de manokehla inou lap en Siohwa amwail Koht me e ketin wiahiong kumwail,+ oh kumwail dehpa pein wiahiong kumwail sansal perperda ehu, mwohmw en mehkot me Siohwa amwail Koht ketin keinapwihdi ong kumwail.+ 24 Pwe Siohwa amwail Koht rasehng kisiniei me kin ketin kamwomwala wasa,+ Koht emen me ketin kupwurki aramas en poadidiong ih kelehpw.+

25 “Ma kumwail pahn nainekihda seri kan oh pil nein noumwail seri kan oh kumwail kousoan nan sahpwo ahnsou reirei oh kumwail kauweikumwailla oh wiahda sansal perperda ehu+ sang mehkot sohte lipilipil oh kumwail wia me suwed mwohn silangin Siohwa amwail Koht oh kansensuwedih ih,+ 26 rahnwet, I wiahki nanleng oh sampah nin duwen sounkadehde kei ong kumwail, me kumwail uhdahn pahn mwadang sohrasang nan sahpw me kumwail pahn kotehla Sordan pwehn sapwenikihla. Kumwail sohte pahn mi mwo ahnsou werei, ahpw kumwail pahn mwomwla douluhl.+ 27 Siohwa pahn ketin kamwarangkumwailpeseng nan wehi kan,+ oh me malaulau keite rehmwail me pahn pitila+ nan wehi kan me Siohwa pahn ketin kasareikumwailla ie. 28 Wasao kumwail pahn anahne papah koht kan me aramas akan wiahda sang ni tuhke oh takai,+ koht kan me sohte kak kilang de rong de kang de ned.

29 “Ma ke rapahki Siohwa omw Koht sang wasao, ke uhdahn pahn diar ih,+ ma ke rapahki ih sang nan omw mohngiong unsek oh mour* unsek.+ 30 Ni omw pahn lelohng kahpwal laud oh mepwukat koaros wiawihong uhk ahnsou kei mwuhr, eri ke pahn pwurodo rehn Siohwa omw Koht oh rong kapitie.+ 31 Pwe Siohwa omw Koht iei Koht emen me kadek kalahngan.+ E sohte pahn ketin keseiukala de kamwomwuhkala de meliehla inou lap me e ketin kahukihong semomw mehn mahs ako.+

32 “Eri, idek duwen dahme wiawi mahso mwohn omw miehla, sang rahn me Koht ketin kapikada aramas nin sampah; rapahki sang imwin ehu pahnlahng kolahng imwin pahnlahng teio. Mie mehkot me inenen laud wiawiher de mie emen me rongehr mehkot me duwehte met?+ 33 Mie aramas kei me rongehr kapitien Koht ni eh ketin mahmahsen sang nan kisiniei duwehte me ke rongehr ahpw momourte?+ 34 De mie pak Koht song en ketikihsang wehi ehu ong pein ih sang pil ehu wehi, sang ni kopwung kan,* kilel kan, manaman kapwuriamwei kan,+ mahwen,+ nin lime roson oh manaman lapalap,+ oh wiewia kamasepwehk kan,+ duwehte me Siohwa amwail Koht ketin wiahiong kumwail nan Isip mwohn masamwail kan? 35 Mepwukat kasansalohng kumwail pwe kumwail en ese me Siohwa iei me Koht mehlelo;+ sohte pil emen tohrohr likin ih.+ 36 E ketin wiahiong uhk ken rong kapitie sang nanleng pwehn ketin kapwunguhkala, oh nin sampah e ketin wiahiong uhk ken kilang sapwellime kisiniei laud, oh ke rong sapwellime mahsen kan sang nan kisinieio.+

37 “Pwehki e ketin poakohng semomw mehn mahs ako oh pilada kadaudokarail,+ ke wisiksang nan Isip mwohn silangi sang ni sapwellime manaman lapalap. 38 E ketin kasarehla mwohmw wehi kan me laudsang oh kehlailsang uhk, pwehn ketin waiukala oh ketikihong uhk sapwarail nin duwen sohso ehu, duwehte me wiewiawi rahnwet.+ 39 Ihme kahrehda, rahnwet, ken ese oh katengehdiong nan omw mohngiong me Siohwa iei me Koht mehlel en nanleng oh nin sampah.+ Sohte pil emen tohrohr.+ 40 Ke pahn kapwaiada sapwellime koasoandi kan oh sapwellime kehkehlik kan me I kehkehlingkihong uhk rahnwet, pwe kowe oh noumw seri kan en pweida mwahu, pwe ken mour werei nan sahpw me Siohwa omw Koht pahn ketikihong uhk.”+

41 Ni ahnsowo Moses katohrehla kahnimw siluh ni palimesehn Sordan.+ 42 Ma mehmen kemehla emen ienge ni eh sohte nsenki oh e sohte kailongki ih mahso,+ e pahn tangalahng nan ehu kahnimw pwukat oh momour.+ 43 Kahnimw kan iei Peser+ nan sapwtehn me mi wasa patapat en wasa ile ong mehn Reupen kan, Ramod+ nan Kilead ong mehn Kad kan, oh Kolan+ nan Pasan ong mehn Manase kan.+

44 Ih met Kosonned+ me Moses kihdiong mwohn aramas en Israel kan. 45 Ih met mehn kataman kan, koasoandi kan, oh kosonned kan me Moses kihong mehn Israel kan mwurin arail kohieido sang nan Isip,+ 46 nan sapwen Sordan, nan wahu me mi palilahsang Ped-peor,+ nan sapwen Sihon Nanmwarkien mehn Amor kan, me kin kousoan nan Espon,+ me Moses oh mehn Israel kan kalowehdi mwurin arail kohieido sang nan Isip.+ 47 Oh re sapwenikihla sapweo oh sapwen Nanmwarki Ok+ en Pasan, nanmwarki riemen en mehn Amor kan me mi sapwen palimesehn Sordan, 48 sang Aroer,+ me mi ni keilen Wahun Arnon, kohdahla ni Nahna Saian, me iei Ermon,+ 49 oh Arapa pwon nan sapwen palimesehn Sordan, oh lella Sehden Arapa,* ni tepin ukada en Piska.+

5 Moses eri ekerodo Israel pwon oh ndaiong irail: “Israel, rong koasoandi kan oh kosonned kan me I pakapakairkihong kumwail rahnwet, oh kumwail pahn anahne esehla mepwukat oh kapwaiada ni keneinei. 2 Siohwa atail Koht ketin wiahda inou lap ehu rehtail nan Orep.+ 3 Kaidehn rehn samatail mehn mahs ako me Siohwa ketin wiahda inou lap wet, ahpw rehtail, kitail koaros me momour rahnwet. 4 Siohwa ketin mahseniong kumwail pohn nahnao sang nan kisinieio+ duwehte ohl emen eh pahn lokaiaiong emen ohl tohrohr. 5 I kesikesihnen nanpwungen Siohwa oh kumwail ahnsowo+ pwe I en ndaiong kumwail mahsen en Siohwa, pwe kumwail masak kisinieio oh sohte kohdahla pohn nahnao.+ E ketin mahsanih:

6 “‘Ngehi me Siohwa omw Koht, me waiukasang nan sapwen Isip, wasa me ke wia lidu ie.*+ 7 Ke sohte pahn ahneki koht teikan likin ngehi.*+

8 “‘Ke sohte pahn wiahiong uhk sansal perperda ehu+ de sansal en* mehkot me mi nanleng de nin sampah de nan pihl kan pahn sampah. 9 Ke sohte pahn poaridiong irail de pil papah irail,+ pwe ngehi, Siohwa omw Koht, iei Koht emen me kupwurki aramas en poadidiong ih kelehpw,+ me pahn wadohng seri kan kalokepen sapwung en ar pahpa kan, lel dih kesiluh oh dih kapahieu en irail kan me kin kailongkin ie,+ 10 ahpw pahn kasalehda limpoak loalopwoat* ong kadaudok en irail kan me kin poakohng ie oh kapwaiada ei kehkehlik kan lel dih kid.

11 “‘Ke dehr doadoahngki mwaren Siohwa omw Koht ni ahl soh katepe,+ pwe Siohwa uhdahn pahn kaloke me kin doadoahngki mware ni ahl soh katepe.+

12 “‘Kapwaiada rahnen Sapad pwe ken wiahki met rahn sarawi ehu duwehte me Siohwa omw Koht ketin kehkehlingkihong uhk.+ 13 Ke pahn doadoahk oh wiahda omw doadoahk koaros erein rahn weneu,+ 14 ahpw ni keisuhwen rahn iei sapad ong Siohwa omw Koht.+ Ke sohte pahn wia doadoahk sohte lipilipil,+ kowe de pil noumw pwutak de pil noumw serepein de pil noumw lidu ohl de pil noumw lidu serepein de pil noumw kouwol de pil noumw dongki de pil noumw mahn mand de pil noumw mehn liki men me kin mi nan amwail kahnimw kan,*+ pwe noumw lidu ohl oh lidu serepein en kommoal duwehte kowe.+ 15 Tamataman me ke wiahla lidu men nan sapwen Isip oh Siohwa omw Koht ketin waiukasang wasao nin lime roson oh manaman lapalap.+ Ihme kahrehda Siohwa omw Koht ketin kehkehlingkihong uhk ken kapwaiada rahnen Sapad.

16 “‘Kahkahki semomw oh inomw,+ duwehte me Siohwa omw Koht ketin kehkehlingkihong uhk, pwe ken mour werei oh pweida mwahu nan sahpw me Siohwa omw Koht pahn ketikihong uhk.+

17 “‘Ke dehr kemehla aramas.+

18 “‘Ke dehr kamwahl.+

19 “‘Ke dehr pirap.+

20 “‘Ke dehr wia kadehde likamw ong iengomw.+

21 “‘Ke dehr noahroke en iengomw eh pwoud.+ Ke dehr noahroke imwen iengomwo de pil eh mwaht de pil nah lidu ohl de pil nah lidu serepein de pil nah kouwol de pil nah dongki de pil mehkot me ahn iengomwo.’+

22 “Kehkehlik* pwukat me Siohwa ketin mahsanihong amwail mwomwohdiso pwon pohn nahnao, sang nan kisiniei, depwek oh rotorot mosul,+ ni kapitie laud, oh e sohte ketin kapatahiong mehkot; mwuri e ketin ntingihedi mepwukat pohn pelien takai patapat riapalio oh ketikihong ie takai ko.+

23 “Ahpw ni ahnsowohte me kumwail rongada ngihlo sang nan rotorot, nindoken nahnao eh wie lullul,+ amwail kaunen keinek kan koaros oh ohl mah kan ahpw kohdo rehi. 24 Eri kumwail nda, ‘Iet Siohwa atail Koht ketin kasalehiong kiht sapwellime lingan oh sapwellime roson, oh se rongehr kapitie sang nan kisiniei.+ Rahnwet se kilangehr me Koht kak ketin mahseniong aramas, oh aramaso kak momourte.+ 25 Eri, dahme se pahn mehkihla? Pwe kisiniei lapalap wet pahn kakete kamwomwkitala. Ma se pousehlahte rongorong kapitien Siohwa atail Koht, se uhdahn pahn mehla. 26 Pwe mie emen sang rehn aramas koaros me rongehr kapitien Koht ieias ni eh ketin mahmahsen sang nan kisiniei duwehte me se wia ahpw wie momour? 27 Komw pahn kohla karanih pwehn rong mehkoaros me Siohwa atail Koht pahn ketin mahsanih, oh komwi me pahn padahkihong kiht mehkoaros me Siohwa atail Koht ketin mahsanihong komwi, oh se pahn rong oh kapwaiada met.’+

28 “Eri Siohwa ketin karonge dahme kumwail koasoiaiong ie, oh Siohwa ketin mahsanihong ie, ‘I rongehr dahme aramas pwukat koasoiaiong uhk. Dahme irail ndahn me mwahu.+ 29 Ma ihte arail mohngiong kin ahnsou koaros lemmwikin ie+ oh kapwaiada ei kehkehlik kan koaros;+ eri irail oh neirail seri kan pahn pweida mwahu kohkohlahte!+ 30 Kohla ndaiong irail: “Kumwail pwuralahng imwamwail impwal kan.” 31 Ahpw ke pahn mihmi rehi wasaht, oh I pahn ndaiong uhk kehkehlik kan, koasoandi kan, oh kosonned kan koaros me ke pahn padahkihong irail oh re pahn kapwaiada nan sahpw me I pahn kihong irail pwe ren sapwenikihla.’ 32 Eri kumwail pahn kanahieng kapwaiada duwehte me Siohwa amwail Koht ketin kehkehlingkihong kumwail.+ Kumwail sohte pahn wetla ni palimaun de palimeing.+ 33 Kumwail pahn keid nan ahl koaros me Siohwa amwail Koht ketin kehkehlingkihong kumwail,+ pwe kumwail en mour oh pweida mwahu oh mour werei nan sahpw me kumwail pahn sapwenikihla.+

6 “Iet kehkehlik kan, koasoandi kan oh kosonned kan me Siohwa amwail Koht ketikihong ie pwe I en padahkihong kumwail, pwe kumwail en kapwaiada mepwukat ni amwail pahn kotehla nan sahpw me kumwail pahn sapwenikihla, 2 pwe ken lemmwiki Siohwa omw Koht oh kapwaiada sapwellime koasoandi kan oh sapwellime kehkehlik kan koaros me I kehkehlingkihong uhk—kowe oh noumw seri kan oh nein noumw seri kan+—erein omw mour, pwe ken mour werei.+ 3 Israel, ke anahne rong oh kapwaiada mepwukat ni keneinei, pwe kumwail en pweida mwahu oh uhdahn tohtohla nan sahpw me inenen pwelmwahu,* duwehte me Siohwa, Koht en semomw mehn mahs ako, ketin inoukihong uhk.

4 “Israel, rong: Siohwa atail Koht, Siohwa mehtehmen.+ 5 Ke anahne poakohng Siohwa omw Koht ni omw mohngiong unsek oh omw mour*+ unsek oh omw kehl unsek.+ 6 Mahsen pwukat me I kehkehlingkihong uhk rahnwet pahn mi nan omw mohngiong, 7 oh ke pahn katengehdi mepwukat nan en noumw seri kan+ mohngiong* oh koasoia mepwukat ni omw mwohndi nan imwomw oh ni omw alu nanial oh ni omw wendi oh ni omw pwourda.+ 8 Pirehiong ni pehmwen mepwukat nin duwen mehn kataman ehu, oh mepwukat pahn rasehng mehkot me pirapiriong ni temwomwen.*+ 9 Ntingihedi mepwukat ni uhren wenihmw kan en imwomwo oh ni omw ewen kehl kan.

10 “Ni Siohwa omw Koht eh ketin waiukodo nan sahpw me e ketin kahukihong semomw mehn mahs ako Eipraam, Aisek oh Seikop pwe en ketikihong uhk+—kahnimw laud oh kaselel kan me ke sohte kauwada,+ 11 ihmw kan me mie diren soahng mwahu kan koaros me ke sohte koadoahkihada, pwoaren nahk pihl kan me ke sohte weirada, oh mwetin kreip kan oh tuhke olip kan me ke sohte padokedi—oh ke tungoale oh nsenamwahula,+ 12 kanahieng pwe ken dehr manokehla Siohwa,+ me ketin waiukasang nan sapwen Isip, wasa me ke wia lidu ie.* 13 Ke pahn lemmwiki Siohwa omw Koht,+ oh ke pahn papah ih,+ oh ke pahn kahula ni mware.+ 14 Kumwail sohte pahn idawehn koht teikan, koht en wehi kan me kapilkumwailpene,+ 15 pwe Siohwa omw Koht me kin ketiket nanpwungamwail iei Koht emen me kupwurki aramas en poadidiong ih kelehpw.+ Ma ke sohte wia met, Siohwa omw Koht pahn ketin engiengda pahmw+ oh e pahn ketin kamwomwuhkala sang sampah wet.+

16 “Kumwail dehr kasonge+ Siohwa amwail Koht duwehte me kumwail kasonge ih nan Massah.+ 17 Kumwail pahn poadidiong kapwaiada kehkehlik kan en Siohwa amwail Koht oh sapwellime mehn kataman kan oh sapwellime kosonned kan me e ketin kehkehlingkihong uhk en kapwaiada. 18 Ke pahn wiahda dahme pwung oh mwahu mwohn silangin Siohwa, pwe ken pweida mwahu oh ken pedolong oh sapwenikihla sahpw mwahu me Siohwa ketin kahukihong semomw mehn mahs ako,+ 19 sang ni eh ketin kasarehsang mwohmw omw imwintihti koaros, duwehte me Siohwa ketin inoukidahr.+

20 “Ni ahnsou kohkohdo, ni noumw seri kan ar pahn idek rehmw, ‘Ia wehwehn mehn kataman kat, koasoandi kat, oh kosonned kat me Siohwa atail Koht ketin kehkehlingki?’ 21 eri ke pahn ndaiong noumw seri kan, ‘Se wiahla lidu kei ong Parao nan Isip, ahpw Siohwa ketin waikitodo sang nan Isip nin lime roson. 22 Eri mwohn masat kat Siohwa ketin usehlahte kadarodo kilel kan oh manaman kan me kapwuriamwei oh keper, pohn Isip,+ pohn Parao, oh pohn tohnimwe koaros.+ 23 Oh e ketin waikitasang wasao pwehn ketin waikitodo wasaht pwehn ketikihong kiht sahpw me e ketin kahukihong samat mehn mahs ako.+ 24 Siohwa eri ketin kehkehlingkihong kitail en kapwaiada koasoandi pwukat koaros oh lemmwiki Siohwa atail Koht pwe kitail en pweida mwahu ahnsou koaros,+ pwe kitail en kak momourte,+ duwehte atail momour rahnwet. 25 Oh ma kitail kanahieng kapwaiada kehkehlik pwukat koaros sang ni atail peikiong* Siohwa atail Koht, duwehte me e ketin kehkehlingkihong kitail,+ e pahn ketin kupwurkin kitail.’*

7 “Ni Siohwa omw Koht eh ketin waiukodo nan sahpw me ke pahn pedolong oh sapwenikihla,+ e pil pahn ketin kasarehla mwohmw wehi kan me towe tohto:+ mehn Id kan, mehn Kirkas kan, mehn Amor kan,+ mehn Kenan kan, mehn Peris kan, mehn Ip kan, oh mehn Sepus kan,+ wehi isuh me towe kan tohtohsang oh kehlailsang uhk.+ 2 Siohwa omw Koht pahn ketikihong uhk irail, oh ke pahn kaloweiraildi.+ Ke uhdahn pahn kamwomwirailla.+ Ke sohte pahn wiahda inou lap rehrail de pil poakeirailla.+ 3 Ke sohte pahn pwoudikinirailda. Dehr kihong noumw serepein kan rehn neirail pwutak kan de ale neirail serepein kan ong noumw pwutak kan.+ 4 Pwe irail pahn kahrehiong noumw seri kan ren sohla idawehn ie pwehn papah koht teikan;+ eri Siohwa pahn ketin engiengda pahmwail, oh e pahn ketin mwadang kamwomwuhkala.+

5 “Ahpw, iet me kumwail pahn wiahiong irail: Karangkehdi arail pei sarawi kan, kauwehla arail uhr sarawi kan,+ pelehdihsang arail tuhke sarawi kan,*+ oh isikala arail sansal perperda kan.+ 6 Pwe ke wia aramas sarawi ong Siohwa omw Koht, oh Siohwa omw Koht ketin piluhkadahr pwe ken wiahla sapwellime aramas, sapwellime aramas tohrohr,* sang nanpwungen aramas koaros me mi nin sampah.+

7 “Kaidehn kumwail me keieu tohto nanpwungen aramas koaros me kahrehda Siohwa eh ketin loalloalei kumwail oh pilkumwailda,+ pwe kumwail me keieu tikitik nanpwungen aramas koaros.+ 8 Ahpw, pwehki sapwellimen Siohwa limpoak ong kumwail oh pwehki eh ketin kolokol inou me e ketin kahukihong samamwail mehn mahs ako,+ Siohwa ketin waikumwaildo sang nin lime roson, pwehn kasaledengkumwailla* sang wasa me kumwail wia lidu ie,*+ sang ni manaman* en Parao nanmwarkien Isip. 9 Ke uhdahn ese me Siohwa omw Koht iei Koht mehlel, Koht lelepek, me kin ketin kolokol sapwellime inou lap oh limpoak loalopwoat ong kadaudok en irail kan me kin poakohng ih oh kapwaiada sapwellime kehkehlik kan lel dih kid.+ 10 Ahpw irail me kin kailongki ih e pahn ketin dupukohng irail ni eh pahn ketin kamwomwirailla.+ E sohte pahn pwand en kaloke irail kan me kin kailongki ih; e pahn ketin dupukohng irail. 11 Ihme kahrehda, ken kanahieng oh kolokol kehkehlik kan oh koasoandi kan oh kosonned kan me I kehkehlingkihong uhk rahnwet, ni omw pahn kapwaiada mepwukat.

12 “Ma kumwail pousehlahte rongorong kosonned pwukat oh kumwail kapwaiada mepwukat, Siohwa omw Koht pahn ketin kolokol inou lapo oh limpoak loalopwoat me e ketin kahukihong semomw mehn mahs ako. 13 E pahn ketin poakohng uhk oh kapaiaiukada oh katohtohweiukala. Ei, e pahn ketin kapaiahkin uhk seri tohto*+ oh wahn sapwomw, omw krein,* omw wain kapw, omw leh,+ koupwul sang noumw pelin kou kan oh sihmpwul sang noumw pelin sihpw kan, nan sahpw me e ketin kahukihong semomw mehn mahs ako me e pahn ketikihong uhk.+ 14 Ke pahn ahneki kapai laudsang aramas teikan koaros;+ sohte ohl de lih emen rehmwail pahn depwen, oh noumw pelinmen kan pahn neitik.+ 15 Siohwa pahn ketikihsang uhk soumwahu koaros, oh e sohte pahn ketikidohng uhk soumwahu suwed ko me ke ese duwe nan Isip.+ Ahpw, e pahn ketikidohng mepwukat pohn irail koaros me kin kailongkin uhk. 16 Ke pahn kamwomwala* aramas koaros me Siohwa omw Koht ketikihong uhk.+ Ke* sohte pahn poakeirailla,+ oh ke sohte pahn papah arail koht kan,+ pwehki met pahn wia lidip ehu ong uhk.+

17 “Ma ke pahn nda sang nan omw mohngiong, ‘Wehi pwukat tohtohsang kitail. Ia duwen ei kak kasareirailla?’+ 18 ke dehpa masak irail.+ Ke pahn katamankihong uhk dahme Siohwa omw Koht ketin wiahiong Parao oh Isip pwon,+ 19 kopwung* laud kan me mesomw kan kilangehr oh kilel kan oh manaman kapwuriamwei kan+ oh nin lime roson oh manaman lapalap, sang ni mepwukat Siohwa omw Koht ketin waiukodo.+ Ih met me Siohwa omw Koht pahn ketin wiahiong aramas koaros me ke kin masak.+ 20 Siohwa omw Koht pahn ketin kahrehiong irail en mworusala* lao irail me luhwehdi+ oh irail me rukusang uhk pahn sohrala. 21 Ke dehr salohda pwehki irail, pwe Siohwa omw Koht ketin ieiang uhk,+ Koht lapalap emen me aramas en lemmwiki oh wauneki.+

22 “Siohwa omw Koht pahn ketin ekisekis+ kasarehla wehi pwukat mwohmw. E sohte pahn mweimweiong uhk ken mwadangete kamwomwirailla, pwe mahn lawalo en nansapw kan en dehr tohtohla oh pil sohte keper ong uhk. 23 Siohwa omw Koht pahn ketikihong uhk irail oh kaloweiraildi douluhl lao irail kamwomwmwomwla.+ 24 E pahn ketikihong nan pehmwen arail nanmwarki kan,+ oh ke pahn kasohrehla adarail kan sang sampah.*+ Sohte me pahn pelianuhkada,+ lao ke kasohreirailla.+ 25 Kumwail pahn isikala arail koht en sansal perperda kan.+ Dehr inangihada silper oh kohl sang mepwukat de ale met ong pein kowe,+ pwe met de lidipihiukedi, pwe met wia mehkot kasaut ong Siohwa omw Koht.+ 26 Ke sohte pahn wahdo mehkot kasaut nan imwomwo oh wiahla mehkot me pahn kamwomwmwomwla duwehte met. Ke pahn kailongki douluhl met oh uhdahn kasautki, pwehki met mehkot me pahn kamwomwmwomwla.

8 “Kumwail pahn kanahieng kapwaiada kehkehlik koaros me I kihong kumwail rahnwet, pwe kumwail en momourte+ oh tohtohla oh pedolong oh sapwenikihla sahpw me Siohwa ketin kahukihong samamwail mehn mahs ako.+ 2 Tamataman ahl reirei me Siohwa omw Koht ketin kahluwaiuk loale nan sapwtehno erein sounpar 40 pwukat,+ pwe en ketin kahrehiong uhk ken aktikitikla oh ketin kasawihiuk+ pwe en ketin ese dahme mi nan omw mohngiong,+ ma ke pahn kapwaiada sapwellime kehkehlik kan de soh. 3 Eri e ketin kahrehiong uhk ken aktikitikla oh mweidohng uhk ken men mwengehda+ oh ketin katungoalehkin uhk manna,+ me ke sehse oh pil semomw ko sehse duwe, pwe en ketin kahrehiong uhk ken ese me aramas sohte kin mourki pilawahte pwe aramas kin mourki mahsen koaros me pwilisang ni doauesen Siohwa.+ 4 Likou me ke likawih sohte meringla, oh pil nehmw kan sohte mpwosada erein sounpar 40 pwukat.+ 5 Ke uhdahn ese nan omw mohngiong me duwehte ohl emen eh kin kapwungala nah pwutak, Siohwa omw Koht kin ketin kapwunguhkala.+

6 “Eri ke pahn kapwaiada kehkehlik kan en Siohwa omw Koht ni omw pahn kekeid nan sapwellime ahl akan oh lemmwiki ih. 7 Pwe Siohwa omw Koht pahn ketin waiukodo nan sahpw mwahu ehu,+ sahpw ehu me mie piletik kan,* utuhnpihl kan oh pihl ngeder me kin kusukusda nan wasa patapat en wahu oh nan wasa nahnahn kan, 8 sahpw ehu me mie wihd oh parli, tuhkehn kreip kan, tuhke pik kan, oh pwohmakraneid kan,+ sahpw ehu me mie lehn olip oh sukehn loangalap,+ 9 sahpw ehu me mwenge sohte pahn malaulaula oh ke pahn ahneki soahng koaros me anahn, sahpw ehu me mie takai kan me mete kin kohsang oh ke pahn ale prons sang nahna kan.

10 “Ni omw pahn tungoal oh medla, ke pahn kapingahki Siohwa omw Koht sahpw mwahu me e ketikihong uhk.+ 11 Kanahieng ken dehr manokehla Siohwa omw Koht ni omw sohte kapwaiada sapwellime kehkehlik kan, sapwellime kosonned kan, oh sapwellime koasoandi kan me I kehkehlingkihong uhk rahnwet. 12 Ni omw pahn tungoal oh medla oh kauwada ihmw kaselel kan oh kousoan loale,+ 13 ni noumw pelin kou oh pelin sihpw kan ar tohtohla oh noumw silper oh kohl tohtohla oh mehkoaros me ke ahneki tohtohla, 14 dehr mweidohng omw mohngiong en aklapalapala+ oh kahrehiong uhk ken manokehla Siohwa omw Koht, me ketin waiukodo sang nan sapwen Isip, wasa me ke wia lidu ie,*+ 15 me ketin kahluwaiuk nan sapwtehn laud oh kamasepwehk,+ wasa me mie serpent pwoisin kan oh skorpion kan oh pwehl madekeng me sohte pihl. E ketin kahrehiong pihl en pwilipwilsang nan paip kekeluwak+ 16 oh ketin katungoalehkin uhk manna+ nan sapwtehno, me semomw ko sehse duwe, pwe en ketin kahrehiong uhk ken aktikitikla+ oh kasawihiuk pwe ken paiekihda ni ahnsou kohkohdo.+ 17 Ma ke pahn nda nan omw mohngiong, ‘Pein ei manaman oh kehl en pehiet me kahrehiong ie I en kepwehpwehla,’+ 18 tamataman me Siohwa omw Koht me ketikihong uhk kehl pwe ken kepwehpwehla,+ pwe en ketin kapwaiada sapwellime inou lapo me e ketin kahukihong semomw mehn mahs ako, duwehte me e ketin wiadahr rahnwet.+

19 “Ma ke pahn manokehla Siohwa omw Koht oh ke idawehn koht teikan oh papah irail oh poaridiong irail, rahnwet I panawihekin kumwail me kumwail uhdahn pahn sohrala.+ 20 Duwehte wehi kan me Siohwa ketin kamwomwala mwohmwail, ih duwen amwail pahn sohrala, pwehki amwail sohte rong kapitien Siohwa amwail Koht.+

9 “Israel rong, rahnwet ke pahn kotehla Sordan+ pwehn kohlongala oh kihsang sapwen wehi kan me laudsang oh kehlailsang uhk,+ kahnimw laud kan me kelpene kehlail oh leldahla pahnlahng,*+ 2 aramas kehlail oh reirei kei, mehn Anak kan,+ me kumwail ese oh rong, ‘Ihs me kak pelian nein Anak kan?’ 3 Kahrehda, rahnwet ke pahn ese me Siohwa omw Koht pahn ketin kotehla mwohmw.+ E rasehng kisiniei me kin kamwomwala wasa,+ oh e pahn ketin kamwomwirailla. E pahn ketin kaloweiraildi mwohn mesomw kan pwe ken kak mwadangete kasareirailla* oh kasohreirailla, duwehte me Siohwa ketin inoukihonguhkehr.+

4 “Ni Siohwa omw Koht eh ketin kasareirailla mwohmw, ke dehr nda nan omw mohngiong, ‘Pwehki pein ei pwung me Siohwa ketin waiehdo pwe I en sapwenikihla sahpwet.’+ Ahpw, pwehki suwed en wehi pwukat+ me Siohwa pahn ketin kasareirailla mwohmw. 5 Kaidehn pwehki omw pwung de mehlel en omw mohngiong me ke pahn pedolong oh sapwenikihla sapwarailo. Ahpw, pwehki suwed en wehi pwukat me Siohwa omw Koht pahn ketin kasareirailla mwohmw+ oh pwe en ketin kapwaiada mahsen me Siohwa ketin kahukihong semomw mehn mahs ako, Eipraam,+ Aisek+ oh Seikop.+ 6 Eri, ken ese me kaidehn pwehki omw pwung me Siohwa omw Koht pahn ketikihong uhk sahpw mwahu wet pwe ken sapwenikihla, pwehki kowe aramas keptakai* men.+

7 “Tamataman—dehr manokehla—mwomwen omw kahngiangihada Siohwa omw Koht nan sapwtehno.+ Sang rahn me kumwail mweselsang sapwen Isip lao kumwail leledo wasaht, kumwail kin uhwongada Siohwa.+ 8 Pil nan Orep kumwail kahngiangihada Siohwa, oh Siohwa uhdahn ketin engiengda pahmwail kahrehda e kereniong kamwomwkumwailla.+ 9 Ni ei kohdahla pohn nahnao pwehn alehdi pelien takai patapat ko,+ pelien takai patapat en inou lap me Siohwa ketin wiahiong kumwail,+ I mihmihki pohn nahnao rahn 40 oh pwohng 40,+ sohte mwenge oh sohte nim pihl. 10 Siohwa eri ketikihong ie pelien takai patapat riapalio me ntingdi ni sapwellimen Koht rekileng, oh mahsen koaros me Siohwa ketin mahsanihong kumwail pohn nahnao sang nan kisinieio ni rahn me mwomwohdiso pokonpene, mi pohn takai ko.+ 11 Ni imwilahn rahn 40 oh pwohng 40, Siohwa ketikihong ie pelien takai patapat riapalio, pelien takai patapat en inou lapo, 12 oh Siohwa ketin mahsanihong ie, ‘Uhda, mwadang kohdihwei sang wasaht, pwehki noumw aramas ako me ke wahsang nan Isip kauweiraillahr.+ Re mwadangete sohpeisang ahl me I kehkehlingkihong irail en idawehn. Irail wiahiong irail sansal mete ehu.’+ 13 Siohwa eri ketin mahsanihong ie, ‘I kilangehr aramas pwukat, oh kilang! aramas keptakai* kei met.+ 14 Mweidohng ie, oh I pahn kamwomwirailla oh kasohrehla adarail kan sang sampah,* oh I pahn wiahiong uhk wehi ehu me kehlailsang oh tohtohsang irail.’+

15 “Ngehi eri sohpeila oh kohdihla sang pohn nahnao nindoken nahnao eh wie lullul,+ oh pelien takai patapat riapali en inou lapo mi nan pehi kat.+ 16 Ngehi eri kilengla oh kilangada me kumwail dipadahr ong Siohwa amwail Koht! Kumwail wiahiong kumwail sansal en koupwul mete ehu. Kumwail mwadangete sohpeisang ahl me Siohwa ketin kehkehlingkihong kumwail en idawehn.+ 17 Ngehi eri ale pelien takai patapat riapalio oh kesehdi pah oh pwalangpeseng mwohn masamwail kan.+ 18 Ngehi eri lukupoardiong mwohn silangin Siohwa, duwehte nin tapio, erein rahn 40 oh pwohng 40. I sohte mwenge de pil nim pihl,+ pwehki dihp koaros me kumwail wiahda ni amwail wia dahme suwed mwohn silangin Siohwa oh kansensuwedihala ih. 19 Pwe I masepwehkada pwehki Siohwa ketin engiengda kowahlap pahmwail,+ kahrehda e kereniong kamwomwkumwailla. Ahpw, Siohwa pil ketin karonge ie ahnsowo.+

20 “Siohwa uhdahn ketin engiengda pahn Aaron me kahrehda e kereniong kamwomwala ih,+ ahpw I pil kapakapki Aaron ni ngidingid ahnsowo. 21 Ngehi eri ale koupwul me kumwail wiahdao, kadehdepen dipamwail kan,+ oh isikala; I kamwutepene oh irispene douluhl lao e wiahla pwelpar, oh I kesehla pwelparo nan piletik me tangdihsang nahnao.+

22 “Oh kumwail pil kahngiangihada Siohwa nan Taperah,+ nan Massah+ oh nan Kiprod-attapa.+ 23 Ni Siohwa eh ketin kadarkumwailla sang Kades-parnea+ oh mahsanih, ‘Kohdahla oh sapwenikihla sahpw me I pahn kihong kumwail!’ ahpw kumwail pwurehng uhwongada ruwes en Siohwa amwail Koht,+ oh kumwail sohte pwosonla+ ih oh sohte peikiong ih. 24 Kumwail uhwongada Siohwa sangete ahnsou me I eseikumwailla.

25 “Ngehi eri usehlahte lukupoardiong mwohn silangin Siohwa erein rahn 40 oh pwohng 40,+ I lukupoardi ni ahl wet pwehki Siohwa ketin mahsanih me e pahn kamwomwkumwailla. 26 Ngehi eri tepida kapakapohng Siohwa ni ngidingid oh patohwan, ‘Maing Kaun Wasa Lapalahpie Siohwa, komw dehr ketin kamwomwala sapwellimomwi aramas kat. Irail me sapwellimomwi,*+ me komw ketin kasaledekihala* sang ni sapwellimomwi roson oh wahkihsang Isip nin limomwi roson.+ 27 Komw kupwurkalahngan oh ketin tamataman sapwellimomwi ladu ko Eipraam, Aisek oh Seikop.+ Komw dehr ketin tehk keptakai en aramas kat, ar suwed oh diparail.+ 28 Pwe aramas en sahpwo wasa me komw ketin waikitsang ieo en dehr nda: “Siohwa sohte kak wairaildo nan sahpw me e inoukihong irail, oh pwehki e kailongkin irail, e wairailla pwe en kemeirailla nan sapwtehno.”+ 29 Pwe irail sapwellimomwi aramas oh sapwellimomwi sohso,+ me komw ketikihdo sang ni sapwellimomwi roson lapalap oh nin limomwi kehlail.’+

10 “Ni ahnsowo Siohwa ketin mahsanihong ie, ‘Parada pelien takai patapat riapali duwehte mehn tapio ko,+ oh kohdahdo rehi pohn nahnao; ke pil pahn wiahiong uhk kohpwa en tuhke ehu. 2 Oh I pahn ntingihedi pohn pelien takai patapat ko mahsen ko me pwarada pohn pelien takai patapat en nin tapio, me ke pwalangpesengo, oh ke pahn kihdi mepwukat nan kohpwao.’ 3 Ngehi eri wiahda kohpwa ehu sang tuhke akesia oh parada pelien takai patapat riapali duwehte mehn tapio ko oh kohdahla pohn nahnao wa pelien takai patapat riapalio.+ 4 Siohwa eri ketin ntingihedi pohn pelien takai patapat ko mahsen ko me e ketin ntingihedi mwoweo,+ Kosonned Eisek ko,*+ me Siohwa ketin mahsanihong kumwail pohn nahnao sang nan kisinieio+ ni rahn me mwomwohdiso pokonpene;+ oh e ketikihong ie mepwukat. 5 Ngehi eri sohpeila oh kohdihla sang pohn nahnao+ oh kihdi pelien takai patapat ko nan kohpwa me I wiahdao, wasa me pelien takai patapat ko mihmi ie, duwehte me Siohwa ketin kehkehlingkihong ie.

6 “Mehn Israel ko eri mweselsang Peerod Pen-sahkan kohla Mosera. Wasao me Aaron mehla oh seridi ie,+ oh nah pwutak Eliesar wiliandi ih oh tepida papah nin duwen samworo men.+ 7 Sang wasao re mwesellahng Kudkoda, oh sang Kudkoda kohla Sotpada,+ sahpw ehu me mie piletik kan.*

8 “Ni ahnsowo Siohwa ketin katohrehla keinek en Lipai+ pwe ren wa kohpwahn inou lap en Siohwa,+ papah mwohn silangin Siohwa, oh kapaia aramas akan ni mware,+ duwehte me re kin wia leledo rahnwet. 9 Ihme kahrehda keinek en Lipai sohte ale pwaisarail de sohso rehn riarail kan. Siohwa iei ar sohso, duwehte me Siohwa omw Koht ketin mahsanihong irail.+ 10 Ngehi eri mihmi pohn nahnao duwehte me I wia nin tapio, rahn 40 oh pwohng 40,+ oh Siohwa pil ketin karonge ie ahnsowo.+ Siohwa sohte ketin kupwurki kamwomwuhkala. 11 Siohwa eri ketin mahsanihong ie, ‘Tiengla mwohn aramas ako, oh onopadahng mwesel, pwe ren kohlongala oh sapwenikihla sahpw me I kahukihong samarail mehn mahs ako me I pahn kihong irail.’+

12 “Eri Israel, dahme Siohwa omw Koht ketin kupwurki sang rehmw?+ Ihte met: ken lemmwiki Siohwa omw Koht,+ ken keid nan sapwellime ahl akan koaros,+ ken poakohng ih, ken papah Siohwa omw Koht sang nan omw mohngiong unsek oh mour* unsek,+ 13 oh ken kapwaiada sapwellimen Siohwa kehkehlik kan oh koasoandi kan me I kehkehlingkihong uhk rahnwet ong kamwahupomw.+ 14 Kilang, Siohwa omw Koht sapwellimanki nanleng, pil lahng me keieu ile,* oh sampah iangahki audepe kan koaros.+ 15 Ahpw ihte semomw mehn mahs ako me Siohwa ketin karanihala oh kasalehda sapwellime limpoak, oh e ketin pilkumwailda, me iei kadaudokarail kan,+ sang nanpwungen aramas akan koaros, duwehte me kumwail wia rahnwet. 16 Kumwail pahn kamwakelehda* mohngiongimwail kan+ oh tokedihsang amwail keptakai.*+ 17 Pwe Siohwa amwail Koht iei Koht en koht kan+ oh Kaunen kaun akan, Koht lapalap oh roson me aramas en lemmwiki oh wauneki, me sohte kin ketin lipilipilki aramas+ oh sohte kin ketin ale kisakis ni ahl sapwung. 18 E kin ketin kopwung ni pwung pahrek ong me sepwoupwou men oh liohdi men,+ oh e kin ketin poakohng mehn liki men me kin kousoan rehmwail,+ oh e kin ketikihong ih mwenge oh likou. 19 Kumwail pil pahn poakohng mehn liki men me kin kousoan rehmwail, pwe kumwail pil wia mehn liki kei nan sapwen Isip.+

20 “Ke pahn lemmwiki Siohwa omw Koht, ke pahn papah ih,+ ke pahn tengediong ih, oh ke pahn kahula ni mware. 21 Ih me ke pahn kapinga.+ Ih me omw Koht, me ketin wiahda soahng kapwuriamwei oh kamasepwehk koaros me mesomw kan kilangehr.+ 22 Ni semomw mehn mahs ako ar kohdihla Isip, irail meh 70,+ oh met Siohwa omw Koht ketin wiahiong uhk ken tohtohla duwehte usuhn nanleng.+

11 “Ke anahne poakohng Siohwa omw Koht+ oh ahnsou koaros kapwaiada omw pwukoa ong ih oh sapwellime koasoandi kan, sapwellime kosonned kan, oh sapwellime kehkehlik kan. 2 Kumwail ese me rahnwet I koasoakoasoiong kumwail, kaidehn noumwail seri kan me sehse de sohte kilang peneu sang rehn Siohwa amwail Koht,+ oh sapwellime roson lapalap,+ nin lime roson+ oh manaman lapalap. 3 Re sohte kilang sapwellime kilel kan oh soahng kan me e ketin wia nan Isip ong Parao nanmwarkien Isip oh sapweo pwon;+ 4 de dahme e ketin wiahiong karis en sounpei en Isip, nein Parao oahs kan oh were kurumahn mahwen kan, me pilen Sehd Weitahtao koaduhpwaliraildi ni ar pwakihkumwaildo, oh Siohwa ketin kamwomwirailla douluhl.*+ 5 Irail sohte kilang dahme e ketin wiahiong kumwail nan sapwtehno lao kumwail leledo wasaht, 6 de dahme e ketin wiahiong Dadan oh Apiram, nein Eliap, kadaudok en Reupen, ni ahnsou me sampah kohpeseng oh kadalleirahla, iangahki tohnimwara kan oh imwara impwal kan oh menmour koaros me idawehn ira, mwohn mesen Israel pwon.+ 7 Pein masamwail kan kilangehr soahng kapwuriamwei koaros me Siohwa ketin wiadahr.

8 “Kumwail pahn kapwaiada kehkehlik koaros me I kihong kumwail rahnwet, pwe kumwail en kehlailla oh kotehla oh pedolong nan sahpwo pwe kumwail en sapwenikihla, 9 oh pwe kumwail en mour werei+ nan sahpw me Siohwa ketin kahukihla en ketikihong samamwail mehn mahs ako oh kadaudokarail,+ sahpw ehu me inenen pwelmwahu.*+

10 “Sahpw me ke pahn sapwenikihlao sohte duwehte sapwen Isip, wasa me kumwail kohsang ie, wasa me ke kin padokedi omw werentuhke oh kadarpeseng pihl nan sahpw* duwehte mwetuwel en wahntuhke kan. 11 Ahpw sahpw me kumwail pahn kotehla oh pedolong oh sapwenikihla iei sahpw ehu me mie nahna kan oh wasa patapat en wahu kan.+ Sahpw me keteu kin kalakalamwur;+ 12 sahpw ehu me Siohwa omw Koht kin ketin apwahpwalih. Silangin Siohwa omw Koht kin ketin ahnsou koaros mahmahsanih sahpwo, sangete tepin pahr lel ni imwin pahr.

13 “Oh ma kumwail uhdahn pahn peikiong ei kehkehlik kan me I kehkehlingkihong kumwail rahnwet oh poakohng Siohwa amwail Koht oh papah ih sang nan amwail mohngiong unsek oh mour* unsek,+ 14 I pil pahn kihong sapwamwailo keteu ni ahnsou me kileldi, tepin ahnsoun keteu* oh ahnsoun keteu en mwuhr,* oh ke pahn kihpene omw krein oh omw wain kapw oh omw leh.+ 15 Oh I pahn wiahiong dihpw en wosada nan omw mohs kan ong noumw pelinmen kan, oh ke pahn tungoal oh medla.+ 16 Kumwail kanahieng pwe amwail mohngiong en dehr pitida oh sohpeila oh kaudokiong koht teikan oh poaridiong irail.+ 17 Ma kumwail wia met, Siohwa pahn ketin engiengda pahmwail, oh e pahn ketin ritingedi nanleng pwehn sohla keteu+ oh pwehl sohte pahn kapwarehda wahnsahpw oh kumwail pahn mwadang sohrasang nan sahpw mwahu me Siohwa pahn ketikihong kumwail.+

18 “Kumwail pahn katengehdi ei mahsen pwukat nan amwail mohngiong oh amwail mour* oh pirehiong ni pehmwail mepwukat nin duwen mehn kataman ehu, oh mepwukat pahn rasehng mehkot me pirapiriong pohn temwamwail.*+ 19 Kumwail padahkihong noumwail seri kan mepwukat, koasoia mepwukat ni omw mwohndi nan imwomw oh ni omw alu nanial oh ni omw wendi oh ni omw pwourda.+ 20 Ntingihedi mepwukat ni uhren wenihmw kan en imwomw oh ni omw ewen kehl kan, 21 pwe kumwail oh noumwail seri kan en mour werei+ nan sahpw me Siohwa ketin kahukihla en ketikihong samamwail mehn mahs ako,+ erein nanleng eh mihmihte pohn sampah.

22 “Ma kumwail kapwaiada ni keneinei kehkehlik wet me I kehkehlingkihong kumwail oh kumwail peikiong met, me iei poakohng Siohwa amwail Koht,+ keid nan sapwellime ahl koaros oh tengediong ih,+ 23 Siohwa pahn ketin kasarehla wehi pwukat koaros mwohmwail,+ oh kumwail pahn kalowehdi wehi kan me laudsang oh tohtohsang kumwail.+ 24 Wasa koaros me kumwail sokedi ie pahn wiahla sapwamwail.+ Irepen sapwamwail pahn sang ni sapwtehno kohdahla Lepanon, sang Pillapo, pillap Iupreitis, lella ni sehden palikapi.*+ 25 Sohte me pahn peliankumwailda.+ Siohwa amwail Koht pahn ketin kadarpeseng masak pohn sahpwo pwon duwen kumwail, wasa me kumwail keid ie,+ duwehte me e ketin inoukihong kumwail.

26 “Kilang, rahnwet I pahn kihdi mwohmwail kapai ehu oh keria ehu:+ 27 kumwail pahn ale kapai ma kumwail peikiong kehkehlik en Siohwa amwail Koht me I kehkehlingkihong kumwail rahnwet,+ 28 oh kumwail pahn riahla ma kumwail sohte peikiong kehkehlik en Siohwa amwail Koht+ oh sohpeisang ahl me I kehkehlingkihong kumwail rahnwet pwe kumwail en idawehn, oh kumwail idawehn koht kan me kumwail sehse.

29 “Ni Siohwa omw Koht eh pahn ketin waiukala nan sahpw me ke pahn sapwenikihla, ke pahn pakairki* kapai pohn Nahna Kerisim oh keria pohn Nahna Epal.+ 30 Nahna pwukat sou mi palio Sordan sallahng palikapi,* nan sapwen mehn Kenan kan me kin kousoan nan Arapa, palilahsang Kilkal, limwahn tuhke lapala kan nan More?+ 31 Kumwail pahn kotehla Sordan pwehn pedolong oh sapwenikihla sahpw me Siohwa amwail Koht pahn ketikihong kumwail.+ Ni amwail pahn sapwenikihla sahpwo oh kousoanla loale, 32 kumwail pahn kanahieng kapwaiada koasoandi kan oh kosonned kan koaros me I kihdiong mwohmwail rahnwet.+

12 “Iet koasoandi kan oh kosonned kan me kumwail pahn kanahieng kapwaiada erein rahn koaros me kumwail momour nan sahpw me Siohwa, Koht en samamwail mehn mahs ako pahn ketikihong kumwail en sapwenikihla. 2 Kumwail pahn kamwomwala douluhl wasa koaros me wehi kan me kumwail pahn kalowehdi kin papah arail koht kan,+ mehnda ma pohn nahna ile kan de pohn dohl kan de pahn tuhke losolos kan. 3 Kumwail pahn karangkehdi arail pei sarawi kan, pwalangpeseng arail uhr sarawi kan,+ isikala arail tuhke sarawi kan,* oh pelehdihsang arail koht en sansal perperda kan,+ oh kasohrehla douluhl adarail kan sang wasao.+

4 “Kumwail sohte pahn kaudokiong Siohwa amwail Koht duwehte ar kin kaudokiong ar koht kan.+ 5 Ahpw, kumwail rapahki Siohwa amwail Koht wasa koaros me e ketin pilada ie ong lingan en mware oh sapwellime wasahn kousoan nanpwungen amwail keinek kan koaros, oh kumwail kohla wasao.+ 6 Ih wasao me kumwail pahn wahla amwail meirong isihs kan,+ amwail meirong teikan, eisek kis ehun soahng kan me kumwail ahneki,+ kisakis sang pehmwail kan,+ amwail meirong en kahula, amwail meirong kan me kumwail nsenki wia,+ oh mesenihen noumwail pelin kou oh pelin sihpw.+ 7 Kumwail oh tohnimwamwail kan pahn tungoal wasao mwohn silangin Siohwa amwail Koht+ oh perenki mehkoaros me kumwail wiadahr,+ pwehki Siohwa omw Koht ketin kapaiaiukada.

8 “Kumwail sohte pahn wia duwehte me kitail kin wia rahnwet, pwe emenemen kin wiewia dahme e kin medewe me pwung, 9 pwehki kumwail saikinte leledo wasahn kommoal+ oh sohso me Siohwa omw Koht pahn ketikihong uhk. 10 Ni amwail kotehla Sordan+ oh kousoan nan sahpw me Siohwa amwail Koht pahn ketikihong kumwail en sapwenikihla, e uhdahn pahn ketin kakommoaleikumwaildi sang amwail imwintihti kan koaros me kapilkumwailpene, oh kumwail pahn kousoan wasao ni amwail sohte perki mehkot.+ 11 Kumwail pahn wahla mehkoaros me I kehkehlingkihong kumwail nan wasa me Siohwa amwail Koht ketin pilada ie ong lingan en mware+—amwail meirong isihs kan, amwail meirong teikan, eisek kis ehun soahng kan me kumwail ahneki,+ kisakis sang pehmwail kan, oh meirong en kahula koaros me kumwail kahukihong Siohwa. 12 Kumwail pahn pereperen mwohn silangin Siohwa amwail Koht,+ kumwail oh noumwail pwutak kan, noumwail serepein kan, noumwail lidu ohl oh lih akan, oh mehn Lipai me kin mi nan amwail kahnimw kan,* pwe mehn Lipai sohte ale pwaise de sohso rehmwail.+ 13 Kanahieng pwe ken dehr wiahda omw meirong isihs kan nan wasa teikan me ke mwahuki.+ 14 Ke pahn wia omw meirong isihs kan ihte wasa me Siohwa ketin pilada sang ehu sapwen omw keinek kan, oh ih wasao me ke pahn wia mehkoaros me I kehkehlingkihong uhk.+

15 “Ahpw ahnsou koaros me ke men tungoale uduk, ke kak kemehla mahn emen,+ nin duwen kapai me Siohwa omw Koht ketikihong uhk nan omw kahnimw kan koaros.* Aramas samin oh mwakelekel kak tungoale met, duwehte omw pahn tungoale kasel men de tie men. 16 Ahpw kumwail sohte pahn tungoale nta;+ ke pahn wudekihdiong nan pwehl duwehte pihl.+ 17 Ke sohte mweimwei en tungoale eisek kis ehun omw krein, omw wain kapw, omw leh, mesenihen noumw pelin kou oh pelin sihpw,+ meirong en kahula me ke kahukihla, omw meirong me ke nsenki wia, de kisakis sang pehmw kan nan omw kahnimw kan.* 18 Ke pahn tungoale mepwukat mwohn silangin Siohwa omw Koht nan wasa me Siohwa omw Koht pahn ketin pilada ie+—kowe oh noumw pwutak, noumw serepein, noumw ladu ohl oh lih, oh mehn Lipai me kin mi nan omw kahnimw kan;* oh ke pahn pereperenki mwohn silangin Siohwa omw Koht mehkoaros me ke wiahda. 19 Kanahieng ken dehr pohnsehsehla mehn Lipai+ erein omw momour nan sapwomw.

20 “Ni Siohwa omw Koht eh pahn ketin kalaudehla sapwomw,+ duwehte me e ketin inoukihong uhk,+ oh ke nda, ‘I men tungoale uduk,’ pwehki ke inangih tungoale uduk, ke pahn kak tungoale uduk ahnsou koaros me ke inangih.+ 21 Ma wasa me Siohwa omw Koht ketin pilada ie ong lingan en mware+ dohsang uhk, eri ke pahn kemehla ekei noumw pelin kou de ekei noumw pelin sihpw me Siohwa ketikihong uhk, duwehte me I kehkehlingkihong uhk, oh ke pahn tungoale nan omw kahnimw kan* ahnsou koaros me ke inangih. 22 Ke kak tungoale duwehte omw pahn tungoale kasel oh tie;+ aramas samin oh mwakelekel koaros kak tungoale. 23 Ihte koasoanehdi teng ken dehr tungoale nta,+ pwehki nta iei mour,*+ oh ke sohte pahn tungoale mour* iangahki uduk. 24 Ke sohte pahn tungoale nta. Ke pahn wudekihdiong nan pwehl duwehte pihl.+ 25 Ke sohte pahn tungoale nta, pwe kowe oh noumw seri kan en pweida mwahu, pwehki ke kin wia dahme pwung mwohn silangin Siohwa. 26 Ke pahn alehte soahng sarawi kan me ahmw oh omw meirong en kahula kan ni omw kohdo wasa me Siohwa pahn ketin pilada ie. 27 Ke pahn meirongki wasao omw meirong isihs kan, uduk oh nta,+ pohn pei sarawi en Siohwa omw Koht, oh ntahn omw meirong teikan pahn wudekiong limwahn pei sarawi+ en Siohwa omw Koht, ahpw ke kak tungoale uduko.

28 “Kanahieng peikiong mahsen koaros me I kehkehlingkihong uhk, pwe kowe oh noumw seri kan en pweida mwahu ahnsou koaros, pwehki ke kin wia dahme mwahu oh pwung mwohn silangin Siohwa omw Koht.

29 “Ni Siohwa omw Koht eh pahn ketin kamwomwala wehi kan me ke pahn kalowehdi,+ oh ke pahn kousoan nan sapwarail, 30 kanahieng ken dehr lohdi nan lidipohte me re lohdi loale mwurin arail kamwomwmwomwla mwohmw. Dehr idek duwen arail koht kan oh nda, ‘Ia duwen wehi pwukat ar kin epwehnki papah arail koht kan? I pil pahn wia soahngohte.’+ 31 Ke sohte pahn wia met ong Siohwa omw Koht, pwehki re kin wiahiong arail koht kan soahng kasaut koaros me Siohwa kin ketin kalahdeki, pwe re pil kin isikala neirail pwutak kan oh serepein kan ong arail koht kan nin duwen meirong kei.+ 32 Mahsen koaros me I kehkehlingkihong kumwail iei me kumwail pahn kanahieng kapwaiada.+ Kumwail sohte pahn kapatahiong mehkot ni mahsen ko, de pil kihsang mehkot ie.+

13 “Ma soukohp men de emen me kin kohpada sang ni ouraman kan pwarada nanpwungamwail oh inoukihda kilel ehu de mehkot kapwuriamwei, 2 oh kilelo de mehkot kapwuriamwei me e ndaiong uhk pweida ni eh nda, ‘Kita idawehn koht teikan,’ koht kan me ke sehse duwe, oh ‘kita papah irail,’ 3 ke sohte pahn rong en soukohpo de en sounouramano koasoi kan,+ pwe Siohwa amwail Koht kin ketin kasawih kumwail+ pwe en ketin ese ma kumwail poakohng Siohwa amwail Koht ni amwail mohngiong unsek oh mour* unsek.+ 4 Kumwail pahn idawehn Siohwa amwail Koht, kumwail pahn lemmwiki ih, kumwail pahn kapwaiada sapwellime kehkehlik kan, kumwail pahn rong kapitie; kumwail pahn papah ih oh kumwail pahn tengediong ih.+ 5 Ahpw soukohpo de sounouramano pahn kamakamala,+ pwehki e kangoange uhwong en wiawi ong Siohwa amwail Koht—me ketin waikumwailsang nan sapwen Isip oh kasaledekihiukala* sang wasa me ke wia lidu ie*—pwehn kasohpeiukasang ahl me Siohwa omw Koht ketin kehkehlingkihong uhk ken idawehn. Oh ke pahn kihsang dahme suwed nanpwungamwail.+

6 “Ma riomw, nein omw nohno pwutak, de noumw pwutak de noumw serepein de omw pwoud me ke kesempwalki de kompoakepahmw me keieu keren pahn song kasongeiuk ni rir oh nda, ‘Kita kohla oh papah koht teikan,’+ koht kan me kowe de pil semomw mehn mahs ako sehse duwe, 7 sang koht en wehi kan me kapilkumwailpene, mehnda ma re karanihiuk de dohsang uhk, sang ni ehu imwin sahpwo lella ni imwin sahpw teio, 8 ke sohte pahn dukiong ih de rong ih.+ Ke pil sohte pahn kasalehda me ke poakehla de pere ih; 9 ahpw, ke uhdahn pahn kemehla ih.+ Pehmwen me pahn tepin kohdiong powe pwehn kemehla, oh mwurin mwo pehn aramas koaros.+ 10 Oh ke pahn katehki takai lao e mehla,+ pwehki e song en kasohpeiukasang Siohwa omw Koht, me ketin waiukasang nan sapwen Isip, wasa me ke wia lidu ie.* 11 Eri Israel pwon pahn rong oh masepwehkada, oh re sohla pahn pwurehng wia mehkot suwed duwehte met nanpwungamwail.+

12 “Ma ke rongada koasoi wet nan ehu omw kahnimw kan me Siohwa omw Koht ketikihong uhk ken kousoan loale, 13 ‘Aramas soh katepe kei kohsang nanpwungamwail pwehn kahrehiong tohn arail kahnimw kan ren sohpeisang Koht oh nda: “Kitail kohla oh papah koht teikan,” koht kan me kumwail sehse,’ 14 ke pahn tehk duwen met, kasawih oh rapahki ni keneinei;+ oh ma e sansalda me e mehlel me soahng kasaut wet wiawiher nanpwungamwail, 15 ke uhdahn pahn kemehkihla tohn kahnimwo kedlahs.+ Kamwomwkihla+ kahnimwo oh mehkoaros me mi loale, iangahki pelinmen kan kedlahs. 16 Mwuri ke pahn kihpene dipwisou lohdi kan koaros nanwerengen wasahn tuhpenehn kahnimwo oh isikala kahnimwo, oh dipwisou lohdi kan pahn duwehte meirong isihs ong Siohwa omw Koht. E pahn wiahla koasoakoasoak en mohn kahnimw ehu kohkohlahte. E sohte pahn onohnsapahlda. 17 Ke sohte pahn ale mehkot me katohrohrla ong kamwomwmwomwla,*+ pwe Siohwa en ketin uhdihsang sapwellime engieng kowahlap oh kasalehiong uhk kadek kalahngan oh poakeiukala oh katohtohweiukala, duwehte me e ketin kahukihong semomw mehn mahs ako.+ 18 Pwe ke pahn peikiong* Siohwa omw Koht ni omw kapwaiada sapwellime kehkehlik kan koaros me I kehkehlingkihong uhk rahnwet, eri wia dahme pwung mwohn silangin Siohwa omw Koht.+

14 “Kumwail me sapwellimen Siohwa amwail Koht seri. Kumwail dehr leke paliwaramwail kan+ de sihpih padimwail kan* pwehki aramas mehla men.+ 2 Pwe ke wia aramas sarawi+ ong Siohwa omw Koht, oh Siohwa ketin piluhkadahr pwe ken wiahla sapwellime aramas, sapwellime aramas tohrohr,* sang nanpwungen aramas koaros me mi nin sampah.+

3 “Ke sohte pahn tungoale mehkot me kasaut.+ 4 Iet mahn akan me kumwail kak tungoale:+ kouwol, sihpw, kuht, 5 tie, kasel, rohpwoak, kuht en wel, andelop, sihpw en wel, oh sihpw en nahna. 6 Kumwail kak tungoale mahn me kikin neh kan kasangpeseng ni pali riau oh me kin pwurupwurehng rukoa kene mwenge. 7 Ahpw, kumwail sohte pahn tungoale mahn pwukat me kin pwurupwurehng rukoa kanarail mwenge de me kikin nehrail kasangpeseng: kamel, rapit, oh rak padser,* pwehki re kin pwurupwurehng rukoa kanarail mwenge ahpw kikin nehrail kan sohte kasangpeseng. Irail samin ong kumwail.+ 8 Oh pil pwihk pwehki kikin neh kan kasangpeseng ahpw sohte kin pwurupwurehng rukoa kene mwenge. Met samin ong kumwail. Kumwail sohte pahn tungoale udukarail kan de sair paliweren mahn mehla pwukat.

9 “Nanpwungen soahng koaros me kin mour nan pihl kan, kumwail kak tungoale mepwukat: Koaros me mie sikarail oh wunarail, kumwail kak tungoale.+ 10 Ahpw kumwail sohte pahn tungoale mehkoaros me sohte wune oh sike. Met samin ong kumwail.

11 “Kumwail kak tungoale menpihr mwakelekel koaros. 12 Ahpw kumwail sohte pahn tungoale mepwukat: ikel, oahk, puldur toantoal,+ 13 kaid weitahta, kaid toantoal oh soangen kaid teikan koaros, 14 soangen reipen* koaros, 15 ostris, likoht, kall, soangen palkon koaros, 16 likoht tikitik, likoht me saleng reirei, swan, 17 pelikan, puldur, kormorant, 18 sidoahk, soangen kewelik koaros, uhpoah, oh pwehk. 19 Soangen mahn tikitik koaros me mie ar pehnpihr pil samin ong kumwail. Kumwail sohte pahn tungoale. 20 Kumwail kak tungoale mahn koaros me kin pihr oh mwakelekel.

21 “Kumwail sohte pahn tungoale mahn emen me dierek mehla.+ Ke kak kihong mehn liki me kin kousoan nan omw kahnimw kan,* oh e kak tungoale, de ke kak netikihong mehn liki men. Pwe kowe aramas sarawi ong Siohwa omw Koht.

“Ke sohte pahn pwoailih kuht pwulopwul men nan pilendihdi en eh nohno.+

22 “Ke uhdahn pahn kihda eisek kis ehun mehkoaros me omw werentuhke kan kin kapwarehda nan mwaht kan ehuehu sounpar.+ 23 Ke pahn tungoale eisek kis ehun omw krein, omw wain kapw, omw leh, oh mesenihen noumw pelin kou oh noumw pelin sihpw mwohn silangin Siohwa omw Koht nan wasa me e ketin pilada ie ong lingan en mware,+ pwe ken esehla lemmwiki Siohwa omw Koht ahnsou koaros.+

24 “Ahpw ma seiloako me nohn reirei ong uhk oh ke sohte kak wa met kohla wasa me Siohwa omw Koht ketin pilada ie ong lingan en mware+ pwehki wasao dohsang uhk (pwehki Siohwa omw Koht pahn ketin kapaiaiuk), 25 eri ke kak netikihla met, oh wahda noumw mwohnio, seiloakla wasa me Siohwa omw Koht ketin pilada ie. 26 Mwuri ke kak doadoahngki noumw mwohnio ong soahng koaros me ke inangih—kou, sihpw, kuht kan, wain oh sakau teikan, oh soahng koaros me ke mwahuki; oh ke pahn tungoal wasao mwohn silangin Siohwa omw Koht oh peren, kowe oh tohn imwomw.+ 27 Oh dehr pohnsehsehla mehn Lipai me kin mi nan omw kahnimw kan,+ pwe e sohte ale pwaise de sohso rehmw.+

28 “Ni imwin sounpar siluh koaros, ke pahn wahdo eisek kis ehun wahnsapwomw kan koaros ong sounparo oh kihdi nan omw kahnimw kan.+ 29 Eri mehn Lipai, me sohte ale pwaise de sohso rehmw, mehn liki, me sepwoupwou, oh liohdi me kin mi nan omw kahnimw kan pahn kohdo oh tungoal lao re medla,+ pwe Siohwa omw Koht en ketin kapaiaiuk ni mehkoaros me ke kin wia.+

15 “Ni imwin sounpar isuh koaros, ke pahn irisala pweipwand kan.*+ 2 Iet wiepen kasaledek: Emenemen me kamangaiong mehn mpe mehkot pahn irisala* eh pweipwand. E sohte pahn idingkihong mehn mpe de rie en kapwurehiong mwohnio, pwe kasaledek ehu me wiawi ong Siohwa+ pahn lohkseli. 3 Ke pahn kak idingkihong mehn liki men en kapwurehiong uhk mwohni,+ ahpw ke pahn irisala soahng koaros me riomwo pweipwandkihong uhk. 4 Ahpw, sohte mehmen nanpwungamwail pahn semwehmwehla, pwe Siohwa pahn ketin kapaiaiukada+ nan sahpw me Siohwa omw Koht pahn ketikihong uhk ken sapwenikihla nin duwen sohso ehu, 5 ahpw ihte ma ke uhdahn peikiong kapitien Siohwa omw Koht oh kanahieng kapwaiada kehkehlik pwukat koaros me I kihong uhk rahnwet.+ 6 Pwe Siohwa omw Koht pahn ketin kapaiaiukada duwehte me e ketin inoukihong uhk, oh ke pahn kamangaiong wehi tohto mwohni,*+ ahpw ke sohte pahn anahne peki mwohni; oh ke pahn kaunda wehi tohto, ahpw irail sohte pahn kaunuhkada.+

7 “Ma emen riomw kan semwehmwehla nan ehu omw kahnimw kan nan sahpw me Siohwa omw Koht pahn ketikihong uhk, ke dehr kakeptakaila omw mohngiong de lehkohng riomw me semwehmweo.+ 8 Pwe ke pahn sapan ong ih+ oh uhdahn pahn kamangaiong* ih soahng koaros me e anahne. 9 Kanahieng ken dehr kolokol madamadau suwed wet nan omw mohngiong, ‘Keisuhwen pahr, pahr en kasaledek, kerendohr,’+ oh lehkohng riomw me semwehmweo oh sohte kihong ih mehkot. Ma e likweriong Siohwa kaulimkin uhk, met pahn wia dipomw.+ 10 Ke pahn kihong ih ni sapan,+ oh ke* sohte pahn kihong ih ni mehnseiren, pwe ih kahrepe wet me Siohwa omw Koht pahn ketin kapaiahki omw wiewia koaros oh doadoahk koaros.+ 11 Pwe ahnsou koaros e pahn kin mie aramas semwehmwe nan sahpwo.+ Ihme kahrehda I kehkehlingkihong uhk, ‘Ke pahn sapan ong riomw me lokolok oh semwehmwe nan sapwomw.’+

12 “Ma emen riomw kan, ohlen Ipru men de lihen Ipru men, netila rehmw oh papahkin uhk sounpar weneu, eri ni keisuhwen pahr ke pahn kasaledekihala.+ 13 Oh ma ke kasaledekihala, ke dehr kadarala ih kahiep. 14 Ke pahn sapankihong ih mehkot sang noumw pelinmen kan, omw wasahn kihsang kilin krein, oh omw wasahn tiak lehn olip oh kreip. Duwehte Siohwa omw Koht eh ketin kapaiaiukada, ke pahn kihong ih. 15 Tamataman me ke wiahla lidu men nan sapwen Isip oh Siohwa omw Koht ketin kasaledekihiukala.* Ihme kahrehda rahnwet I kehkehlingkihong uhk ken wia met.

16 “Ahpw ma e ndaiong uhk, ‘I sohte pahn kohieila sang rehmw!’ pwehki e poakohng uhk oh tohnimwomwo, pwe e kin peren ni eh mihmi rehmw,+ 17 eri ke pahn ale mehn dok ehu oh doakoahki salengeo ni wenihmw, oh e pahn wiahla noumw lidu erein eh mour. Ke pahn wiahiong soahngohte noumw lidu serepein. 18 Ke dehr wiahki met mehkot apwal ni omw kasaledekihala oh e mwesel sang rehmw, pwehki eh papahkin uhk sounpar weneu warohng pak riau en pweinen tohndoadoahk alahlda men, oh Siohwa omw Koht ketin kapaiaiukada ni mehkoaros.

19 “Ke pahn kasarawihong Siohwa omw Koht+ mesenih wol koaros en noumw pelin kou* oh noumw pelin sihpw. Ke sohte pahn doadoahngki mesenihen noumw pelin kou de pil sehk wunen mesenihen noumw pelin sihpw. 20 Kowe oh tohnimwomwo pahn tungoale met mwohn silangin Siohwa omw Koht ehuehu sounpar nan wasa me Siohwa pahn ketin pilada ie.+ 21 Ahpw ma mie mehkot sapwung ni paliwere—neh ohla, maskun de sapwung laud teikan ni paliwere—ke sohte pahn meirongkihong Siohwa omw Koht.+ 22 Ke pahn tungoale met nan omw kahnimw kan,* aramas samin oh mwakelekel koaros kak tungoale, duwehte omw kin tungoale kasel de tie men.+ 23 Ahpw ke sohte pahn tungoale nta;+ ke pahn wudekihdiong nan pwehl duwehte pihl.+

16 “Tamataman sounpwong en Apip,* oh kasarawih Pahsohpa ong Siohwa omw Koht,+ pwe nan sounpwong en Apip, Siohwa omw Koht ketin waiukasang Isip nipwong.+ 2 Oh ke pahn meirongki meirong en Pahsohpao ong Siohwa omw Koht,+ sang pelin sihpw oh pelin kou,+ nan wasa me Siohwa ketin pilada ie ong lingan en mware.+ 3 Ke sohte pahn tungoale mehkot me doal ihs iangahki met;+ erein rahn isuh ke pahn tungoale pilawa me sohte doal ihs, pilawahn lokolok, pwehki ke mweselsang sapwen Isip ni karuwaru.+ Wia met pwe ken tamataman rahn me ke mweselsang sapwen Isip erein omw mour.+ 4 Sohte ihs* pahn dierek rehmw nan sapwomw pwon erein rahn isuh,+ oh pil uduk me ke pahn meirongki nin soutik en keieun rahn sohte pahn mihmi pwohng ehu pwon lao lel nimenseng.+ 5 E sohte mweimwei ken meirongki meirong en Pahsohpa nan kahnimw sohte lipilipil me Siohwa omw Koht pahn ketikihong uhk. 6 Ahpw e pahn wiawi nan wasa me Siohwa omw Koht ketin pilada ie ong lingan en mware. Ke pahn meirongki meirong en Pahsohpa nin soutik ni ahnsowohte me ketipino kihrla,+ ni rahn* me ke mweselsang Isip. 7 Ke pahn kukihada met oh tungoale+ nan wasa me Siohwa omw Koht pahn ketin pilada ie,+ oh nimenseng ke kak pwurala nan imwomw impwal kan. 8 Erein rahn weneu ke pahn tungoale pilawa me sohte doal ihs, oh ni keisuhwen rahn e pahn mie kapokon sarawi ehu ong Siohwa omw Koht. Ke sohte pahn doadoahk.+

9 “Ke pahn wadek wihk isuh. Ke pahn tepikihda wadek wihk isuh sang ahnsou me ke tepin doadoahngki naipokos pwehn pelehdi krein kan me kesikesihnen.+ 10 Eri, ke pahn wia Kasarawien Wihk kan ong Siohwa omw Koht+ iangahki meirong me ke nsenki wiahda, me pahrekiong uwen me Siohwa omw Koht kin ketin kapaiahkin uhk.+ 11 Oh ke pahn pereperen mwohn silangin Siohwa omw Koht, kowe oh noumw pwutak, noumw serepein, noumw lidu ohl, noumw lidu lih, oh mehn Lipai me kin mi nan omw kahnimw kan,* mehn liki, me sepwoupwou oh liohdi, me kin mi rehmw, nan wasa me Siohwa omw Koht ketin pilada ie ong lingan en mware.+ 12 Tamataman me ke wiahla lidu men nan Isip,+ oh peikiong oh kapwaiada koasoandi pwukat.

13 “Ke pahn wia Kasarawien Impwal kan*+ erein rahn isuh ni omw pahn kihpene wahn krein kan sang omw wasahn kihsang kilin krein oh leh sang omw wasahn tiak olip oh wain sang omw wasahn tiak kreip. 14 Pereperen erein omw kasarawi,+ kowe oh noumw pwutak, noumw serepein, noumw lidu ohl, noumw lidu lih, mehn Lipai, mehn liki, me sepwoupwou oh liohdi, me kin mi nan omw kahnimw kan. 15 Erein rahn isuh ke pahn wia kasarawi+ ong Siohwa omw Koht nan wasa me Siohwa pahn ketin pilada ie, pwe Siohwa omw Koht pahn ketin kapaia omw wahnsahpw koaros oh mehkoaros me ke kin wia,+ oh ke pahn pereperente.+

16 “Pak siluh nan sounpar ehu, noumw ohl koaros pahn patohla mwohn silangin Siohwa omw Koht nan wasa me e ketin pilada ie: ni Kasarawien Pilawa me Sohte Doal Ihs,+ Kasarawien Wihk kan,+ oh Kasarawien Impwal kan,*+ oh sohte emen irail pahn patohla mwohn silangin Siohwa kahiep. 17 Kisakis me emenemen patohwanla pahn pahrekiong kapai me Siohwa omw Koht ketikihong uhk.+

18 “Ke pahn idihada sounkopwung kan+ oh kaun akan ong ehuehu keinek nan kahnimw koaros* me Siohwa omw Koht pahn ketikihong uhk, oh re pahn kopwung aramas akan ni pwung pahrek. 19 Ke sohte pahn kasapwungehla pwung pahrek,+ ke sohte pahn kasalehda me ke lipilipilki aramas,+ de ke sohte pahn ale kisakis ni ahl sapwung, pwe kisakiso kin karotongehla mesen me loalokong+ oh kawekala en me pwung men koasoi. 20 Pwung pahrek—ke pahn idawehn pwung pahrek,+ pwe ken momour oh sapwenikihla sahpw me Siohwa omw Koht pahn ketikihong uhk.

21 “Ke sohte pahn padokedi tuhke sohte lipilipil nin duwen tuhke sarawi ehu*+ limwahn pei sarawi me ke wiahda ong Siohwa omw Koht.

22 “Oh pil ke sohte pahn kauwada uhr sarawi ehu ong pein kowe,+ mehkot me Siohwa omw Koht kin ketin kalahdeki.

17 “Ke sohte pahn meirongkihong Siohwa omw Koht kouwol men de sihpw men me mie mehkot sapwung de ohla ni paliwere, pwe met wia mehkot kasaut ong Siohwa omw Koht.+

2 “Ma ohl emen de lih emen me dierek nan omw kahnimw kan me Siohwa omw Koht pahn ketikihong uhk, me kin wia dahme suwed mwohn silangin Siohwa omw Koht oh kauwehla sapwellime inou lap,+ 3 oh e sohpeila oh kaudokiong koht teikan oh poaridiong irail de ketipin de maram de karis en nanleng koaros,+ mehkot me I sohte kehkehlingki,+ 4 oh pakair kohwong uhk de ke rongada duwen met, eri ke pahn kasawih met ni keneinei. Ma e sansalda me e mehlel+ me soahng kasaut wet wiawiher nan Israel, 5 ke pahn wahieila ohl de lih me wia soahng suwed wet ni ewen kelen kahnimwo, oh ohlo de liho pahn anahne kostakaidi lao e mehla.+ 6 Sang ni kadehde* en sounkadehde riemen de sounkadehde silimen,+ aramaso uhdahn pahn kamakamala. E sohte pahn kamakamala sang ni kadehde en sounkadehde emen.+ 7 Pehn sounkadehde kan me pahn tepin kohdiong powe pwehn kemehla, oh mwurin mwo pehn aramas koaros. Ke pahn kihsang dahme suwed nanpwungamwail.+

8 “Ma repenpwung ehu pwarada nan ehu omw kahnimw kan me nohn apwal ong uhk en kopwung, mehnda ma e pidada kakerehdi nta+ de peki kopwung ehu me pwarada de tiahk lemei ehu me wiawiher de akamai teikan, ke pahn uhda oh kohla wasa me Siohwa omw Koht ketin pilada ie.+ 9 Kohla rehn samworo mehn Lipai kan oh rehn sounkopwung+ me kin papah ni ahnsowo, oh kihda omw iren kalelapak, oh re pahn padahkihong uhk arail pilipil.+ 10 Eri ke pahn wia duwehte pilipil me re padahkihong uhk nan wasa me Siohwa ketin pilada ie. Kanahieng ken wia mehkoaros me re kaweidkin uhk. 11 Ke pahn wia duwehte kosonned me re kasalehiong uhk oh duwehte pilipil me re ndaiong uhk.+ Ke dehpa wetla ni palimaun de palimeing sang ni pilipil me re padahkihong uhk.+ 12 Aramas me aklapalapda* ni eh sohte rong samworo me kin papah Siohwa omw Koht de sounkopwung pahn mehla.+ Ke pahn kihsang dahme suwed nan Israel.+ 13 Aramas koaros pahn rong met oh masepwehkada, oh re sohte pahn pwurehng aklapalapda.*+

14 “Ni omw pahn pedolong nan sahpw me Siohwa omw Koht pahn ketikihong uhk oh ke pahn sapwenikihla oh kousoanla loale, oh ke nda, ‘Mweidohng ie I en idihada emen nanmwarki pohi duwehte wehi kan me kapiliepene,’+ 15 ma met wiawi, ke uhdahn pahn idihada nanmwarki men me Siohwa omw Koht ketin pilada.+ Ke pahn idihada emen nanmwarki sang nanpwungen riomw kan. E sohte mweimwei ken idihada pohmw mehn liki men me kaidehn riomw. 16 Nanmwarkio sohte pahn alehda oahs tohto ong pein ih+ de kahrehiong aramas akan ren pwurala Isip pwehn ale pil ekei oahs kan,+ pwe Siohwa ketin mahsanihong kumwail, ‘Kumwail sohte pahn pwurehng pwurala nan ahl wet.’ 17 E pil sohte pahn pwoudikihda lih tohto, pwe eh mohngiong en dehr sohpeisang ie;+ oh pil e sohte pahn alehda silper oh kohl tohto ong pein ih.+ 18 Ni eh pahn ketidi nan mwoalen eh wehi, e pahn ntingihedi ong pein ih nan pwuhk ehu* pelien Kosonned wet, me wie nekinek rehn samworo mehn Lipai kan.+

19 “E pahn mihmi reh, oh e pahn wadek pwuhko erein eh mour,+ pwe en esehla lemmwiki Siohwa eh Koht oh kapwaiada mahsen en Kosonned wet koaros oh koasoandi pwukat.+ 20 Eri e sohte pahn kasapwilada pein ih pohn rie kan, oh e sohte pahn wetla ni palimaun de palimeing sang ni kehkehliko, pwe en mi pohn eh wehi ahnsou reirei, ih oh nah pwutak kan nanpwungen Israel.

18 “Samworo mehn Lipai kan, ahpw mehlel keinek en Lipai pwon, sohte pahn ale pwais de sohso rehn Israel. Irail pahn tungoale meirong kan sang kisiniei ong Siohwa, met iei eh sohso.+ 2 Eri sohte arail sohso rehn riarail kan. Siohwa iei me ar sohso, duwehte me e ketin mahsanihongirailehr.

3 “Eri iet pwuhng me samworo kan pahn ahneki sang rehn aramas akan: Mehmen me wiahda meirong ehu, mehnda ma kouwol men de sihpw men, e pahn kihong samworo pwopweo, aupah, oh kapehde. 4 Ke pahn kihong ih tepin wahn omw krein, omw wain kapw, omw leh, oh wunen sihpw me ke tepin sehkasang noumw pelin sihpw.+ 5 Siohwa omw Koht ketin pilada ih oh nah pwutak kan sang omw keinek kan koaros pwe ren papah ni mwaren Siohwa ahnsou koaros.+

6 “Ahpw ma mehn Lipai men kohkohsang nan ehu omw kahnimw kan nan Israel wasa me e kin kousoan ie+ oh e men kohla wasa me Siohwa ketin pilada ie,*+ 7 e kak papah wasao ni mwaren Siohwa eh Koht duwehte rie ko koaros, mehn Lipai kan, me kin papah wasao mwohn silangin Siohwa.+ 8 E pahn ale soangen uwen pwaisen mwenge duwehte irail,+ patehngete dahme e alehdi sang eh netikihla kepwe kan me e sohsohki.

9 “Ni omw pedolong nan sahpw me Siohwa omw Koht pahn ketikihong uhk, ke sohte pahn song alasang wiewia kasaut en wehi pwukat.+ 10 Sohte me pahn dierek rehmw me kin meirongkihla nah pwutak de serepein nan kisiniei,*+ me kin wia kosetipw,+ me kin wia akmanaman,+ me kin rapahki kilel kan+ me kin kasalehda duwen ahnsou kohkohdo,+ 11 me kin kolkihdi meteikan lokaiahn wunahni, me kin peki sawas rehn sounwunahni men+ de sounkosetipw men,+ de emen me kin koasoiong me melahr akan.+ 12 Pwe mehmen me kin wia mepwukat kasaut ong Siohwa, oh pwehki wiewia kasaut pwukat Siohwa omw Koht pahn ketin kasareirailla mwohmw. 13 Ke pahn kadehdehda me sohte karaunpomw mwohn silangin Siohwa omw Koht.+

14 “Pwe wehi pwukat me ke pahn kalowehdi kin rong irail me kin wia akmanaman+ oh kosetipw,+ ahpw Siohwa omw Koht sohte ketin mweidohng uhk ken wia soahng wet. 15 Siohwa omw Koht pahn ketikihong uhk soukohp men me duwehte ngehi sang nanpwungen riomw kan.+ Kumwail anahne rong ih. 16 Met iei pasapengpen dahme ke patohwan peki rehn Siohwa omw Koht nan Orep ni rahn me mwomwohdiso pokonpene+ ni omw nda, ‘Dehr mweidohng ie I en pwurehng rong kapitien Siohwa ei Koht de kilang kisiniei kalaimwun wet, pwe I en dehr mehla.’+ 17 Siohwa eri ketin mahsanihong ie, ‘Dahme irail ndahn me mwahu. 18 I pahn kihong irail soukohp men duwehte kowe sang nanpwungen riarail kan,+ oh I pahn kihdiong ei mahsen kan nan ewe,+ oh e pahn koasoiaiong irail mehkoaros me I kehkehlingkihong ih.+ 19 Ni mehlel, I pahn kapwukoahki aramas me sohte pahn rong ei mahsen kan me soukohpo pahn koasoia ni mwarei.+

20 “‘Ma soukohp men aklapalapda* oh koasoia mahsen kan ni mwarei me I sohte kehkehlingkihong ih en koasoia de koasoi ni eden koht teikan, soukohpo pahn mehla.+ 21 Ahpw, ke kakete nda nan omw mohngiong: “Ia duwen at pahn ese me Siohwa sohte ketin mahsanih met?” 22 Ni soukohpo eh koasoi ni mwaren Siohwa oh mahseno sohte pweida de sohte uhdahn wiawi, eri Siohwa sohte ketin mahsanih met. Soukohpo aklapalapda* oh koasoia met. Ke sohte pahn masak ih.’

19 “Ni Siohwa omw Koht eh pahn ketin kasohrehla wehi kan me sapweniki sahpw me Siohwa omw Koht pahn ketikihong uhk oh ke kihsang sapwarail oh kousoanla nan arail kahnimw kan oh imwarail kan,+ 2 ke pahn katohrehla kahnimw siluh nan sapwomw me Siohwa omw Koht pahn ketikihong uhk en sapwenikihla.+ 3 Ke pahn pwalangpeseng sahpw me Siohwa omw Koht ketikihong uhk en sapwenikihla ni pali siluh, oh kaunopada ahl kan pwe emen me kemehla aramas en kak tangalahng nan ehu kahnimw pwukat.

4 “Eri iet me pahn wiawi me pid emen me kemehla aramas me tangala nan wasao pwe en mour: Ni eh kemehla emen ienge ni eh sohte nsenki oh e sohte kailongki ih mahso;+ 5 karasepe ni ahnsou me ih oh iengeo kohla nanwel pwehn wesei tuwi oh e kapahda peho pwe en pelehki tuhke sile pwoat, ahpw moangen sileo pwupwusang ni mangileo oh lel iengeo oh e mehla, me kemehla iengeo anahne tangalahng ehu kahnimw pwukat pwe en mour.+ 6 Ahpw ma ahl me kolahng kahnimwo me nohn doh, pwehki eh lingeringer,* aramas me pahn ikih me mehlao*+ ele pahn pwakih ih, koledi oh kemehla ih. Ahpw, e sohte warohng mehla, pwehki eh sohte kailongki iengeo mahso.+ 7 Ihme kahrehda I kehkehlingkihong uhk: ‘Katohrehla kahnimw siluh.’

8 “Ma Siohwa omw Koht ketin kalaudehla sapwomw duwehte me e ketin kahukihong semomw mehn mahs ako+ oh e ketikihong uhk sahpwo pwon me e ketin inoukihda en ketikihong semomw mehn mahs ako+ 9 —ma ke kapwaiada kehkehlik pwukat koaros ni lelepek me I kihong uhk rahnwet, me iei poakohng Siohwa omw Koht oh ahnsou koaros keid nan sapwellime ahl akan+—eri ke pahn kapatahiong kahnimw siluh ong kahnimw siluh pwukat.+ 10 Ni ahl wet sohte ntahn aramas soh dipe pahn keredi+ nan sapwomw me Siohwa omw Koht pahn ketikihong uhk nin duwen sohso ehu, oh ke sohte pahn pwukoahkihdi dipen kamaramas.+

11 “Ahpw ma aramas emen kailongki ienge men+ oh e awiawih pwehn peiong ih oh kauwehla ih oh e mehla, oh aramaso tangala nan ehu kahnimw pwukat, 12 ohl mah kan en eh kahnimwo eri pahn ekerodo ih sang wasao oh wahla ih nan pehn aramas me pahn ikih me mehlao,* oh e pahn kamakamala.+ 13 Ke* sohte pahn poakehla ih, oh ke pahn kihsang dipen kakerehdi ntahn aramas soh dipe nan Israel,+ pwe ken kak pweida mwahu.

14 “Ni omw alehdi omw sohso nan sahpw me Siohwa omw Koht pahn ketikihong uhk en sapwenikihla, ke sohte pahn kamwakid pehs en sapwen mehn mpomw+ sang wasa me semomw mehn mahs ako koasoanehdi ie.

15 “Sounkadehde emente sohte kak kedipa* emen tohrohr duwen sapwung de dihp me e wiahda.+ Met anahne sansalda sang ni kadehde* en sounkadehde riemen de silimen.+ 16 Ma sounkadehde likamw men wia kadehde ong aramas emen oh kapwukoahki me e kauwehla kosonned kei,+ 17 aramas riemeno me akamai pahn uh mwohn silangin Siohwa, mwohn samworo kan oh sounkopwung kan me pahn papah ni ahnsowo.+ 18 Sounkopwung kan pahn kasawih ni keneinei,+ oh ma aramas me wia kadehdeo sounkadehde likamw men oh wiahda karaunlikamw ehu ong rieo, 19 kumwail pahn wiahiong ih duwehte dahme e koasoanehdi en wiahiong rieo,+ oh ke pahn kihsang dahme suwed nanpwungamwail.+ 20 Aramas teikan pahn rong oh masepwehkada, oh re sohte pahn pwurehng wia mehkot suwed duwehte met nanpwungamwail.+ 21 Ke* sohte pahn poakehla:+ Mour* ong mour,* pwoaren mas ong pwoaren mas, ngih pwoat ong ngih pwoat, peh ong peh, neh ong neh.+

20 “Ma ke pahn kohla mahweniong omw imwintihti kan oh ke kilangada neirail oahs kan, wararail kuruma kan oh neirail pwihnen sounpei kan me tohtohsang noumw, ke dehr masak irail, pwe Siohwa omw Koht me ketin waiukodo sang sapwen Isip pahn ketin ieiang uhk.+ 2 Ni amwail pahn kohla mahwen, samworo men pahn kohwei oh koasoiong aramas akan.+ 3 E pahn ndaiong irail, ‘Israel, rong, kumwail pahn mahweniong amwail imwintihti kan. Kumwail dehr nan kapehd tikitikla. Kumwail dehr perki de masak de rerrer pwehki irail, 4 pwe Siohwa amwail Koht pahn ketin iang kumwail karis pwe en ketin mahwenkin kumwail ong amwail imwintihti kan oh ketin doareikumwailla.’+

5 “Kaunen karis en sounpei kan pil pahn ndaiong aramas ako, ‘Ihs me kauwada ihmw kapw ehu oh saikinte tepida doadoahngki? En pwurala ni imwe. Ma soh, e pahn mehla nan mahwen oh emen tohrohr pahn tepida doadoahngki imweo. 6 Oh ihs me padokedi mwetin kreip ehu oh saikinte tepida dolung wah kan? En pwurala ni imwe. Ma soh, e pahn mehla nan mahwen oh emen tohrohr pahn tepida dolung wah ko. 7 Oh ihs me inoun pwopwoudiong lih emen oh saikinte pwoudikihda? En pwurala ni imwe.+ Ma soh, e pahn mehla nan mahwen oh emen tohrohr pahn pwoudikihda liho.’ 8 Kaunen karis en sounpei ko pahn pil idek rehn aramas ako, ‘Ihs me masepwehkada oh nan kapehd tikitikla?+ E pahn pwurala ni imwe, pwe en dehr kahrehiong sounpei teikan en nan kapehd tikitikla duwehte ih.’*+ 9 Ni kaunen karis en sounpei ko ar kaimwisekala ar koasoiong aramas ako, re pahn idihada kaunen sounpei kan pwe ren kahluwa aramas ako.

10 “Ma ke pahn kerenlahng kahnimw ehu pwehn mahweniong, ke pil pahn pakairkihong towe kan koasoandi en popohl.+ 11 Ma re pahn pwungki omw koasoandi oh ritingada ewen kelen kahnimwo ong uhk, aramas akan koaros me dierek wasao pahn wiahla noumw pwe ren wia doadoahk idihd kan, oh re pahn papahiuk.+ 12 Ahpw ma re kahng wiahda popohl rehmw oh mahweniong uhk, ke pahn kapilpene arail kahnimwo, 13 oh Siohwa omw Koht uhdahn pahn ketikihong kahnimwo nan pehmwen, oh ke pahn kemehkihla ohl akan koaros nan kahnimwo kedlahs. 14 Ahpw, lih akan, seri kan, pelinmen kan, oh mehkoaros me mi nan kahnimwo, dipwisou lohdi kan koaros, ke kak kulihasang ong pein kowe,+ oh ke pahn doadoahngki dipwisou lohdi kan sang omw imwintihti kan, me Siohwa omw Koht ketikihong uhk.+

15 “Ih met me ke pahn wiahiong kahnimw kan koaros me uhdahn dohsang uhk, kaidehn kahnimw kan en wehi pwukat me keren. 16 Ahpw nan kahnimw kan en aramas pwukat, me Siohwa omw Koht pahn ketikihong uhk nin duwen sohso ehu, ke sohte pahn mweidohng aramas akan* en momour.+ 17 Ke pahn kamwomwirailla douluhl, mehn Id kan, mehn Amor kan, mehn Kenan kan, mehn Peris kan, mehn Ip kan oh mehn Sepus kan,+ duwehte me Siohwa omw Koht ketin kehkehlingkihong uhk; 18 pwe ren dehr padahkihong kumwail en idawehn arail wiewia kasaut kan koaros me re kin wiahiong arail koht kan oh kahrehiong kumwail en dipada ong Siohwa amwail Koht.+

19 “Ma ke kapilpene kahnimw ehu pwehn kalowehdi oh ke kin mahmahweniong erein rahn tohto, ke sohte pahn kauwehla tuhke kan sang ni omw pelehkihdi sile. Ke kak tungoale wahntuhke kan, ahpw ke sohte pahn pelehdi tuhke ko.+ Pwe ia duwe, ke pahn kapilpene tuhkehn nansapw ehu duwehte omw pahn wiahiong aramas men? 20 Ihte tuhke pwoat me ke ese sohte kin wa ong mwenge me ke kak kauwehla. Ke kak pelehdi oh doadoahngki met pwehn kapilpene kahnimwo me mahweniong uhk, lao e lohdi.

21 “Ma aramas emen dierekda kamakamala nan mohs en sahpw me Siohwa omw Koht pahn ketikihong uhk en sapwenikihla oh sohte me ese ihs me kemehla ih, 2 ohl mah kan oh sounkopwung kan+ pahn kohieila oh sohngedi uwen doh en wasa me paliwar mehlao mi ie lellahng nan kahnimw kan me kapilpene wasao. 3 Eri ohl mah kan en kahnimw me keieu karanih paliwaro pahn ale koupwul men sang pelin kou, me saikinte wia doadoahk oh saikinte wa mehn wisik, 4 oh ohl mah kan en kahnimwo pahn kahre koupwulo kohdilahng wahu ehu me mie piletik, wasa me saikinte deideida de werentuhke kamwarak ie, oh re pahn katimpeseng tepinweren koupwulo wasao nan wahwo.+

5 “Oh samworo mehn Lipai kan pahn keiong wasao pwehki Siohwa omw Koht ketin pilirailda pwe ren papah ih+ oh pakairki kapai ni mwaren Siohwa.+ Re pahn pakairki duwen akamai koaros me pidada tiahk lemei ar pahn kapwungpwungla.+ 6 Eri ohl mah koaros en kahnimw me keieu karanih paliwar mehlao pahn omwiomw+ pohn koupwul me tepinwereo timpeseng nan wahwo, 7 oh re pahn nda, ‘Peht kat sohte kakerehdi nta wet, oh pil masat kat sohte kilang met ni eh wiawi. 8 Maing Siohwa, komw dehr ketin kapwukoahki met sapwellimomwi aramas en Israel kan, me komw ketin kasaledekala,*+ oh komw dehr ketin mweidohng dipen kakerehdi ntahn aramas soh dipe en mihmihte nanpwungen sapwellimomwi aramas en Israel kan.’+ Eri irail sohte pahn pwukoahkihdi dipen kamaramas. 9 Ni ahl wet ke pahn kihsang dipen kakerehdi ntahn aramas soh dipe sang nanpwungamwail ni omw wia dahme pwung mwohn silangin Siohwa.

10 “Ma ke pahn kohla mahweniong omw imwintihti kan oh Siohwa omw Koht ketin kaloweiraildi pwehki kowe oh ke koledi irail nin duwen me selidi kei,+ 11 oh ke kilangada lih kaselel men nanpwungen me selidi kan oh ke mwahukihda ih oh ke men ale ih nin duwen omw pwoud, 12 ke kak wahla ih nan imwomw. Liho pahn sihpih moange, kihsang kiki kan, 13 oh kihsang eh likoun me selidi, oh kousoan nan imwomwo. E pahn sengisengki eh pahpa oh eh nohno erein sounpwong ehu pwon,+ oh mwurin mwo ke kak wendi reh; ke pahn wiahla eh pwoud oh e pahn wiahla omw pwoud. 14 Ahpw ma ke sohte perenki ih, eri ke pahn mweidohng ih en kohla+ wasa me e men kohla ie. Ahpw ke sohte pahn netikihla de wiakauwe ih, pwehki ke kanamenekihala ih.

15 “Ma ohl emen pwoudiki lih riemen oh e poakohng emen sang meteio* oh ira koaros naitikihong ih pwutak kan oh pwutak meseniho iei nein lih me e sohte poakepoakeo,+ 16 ni rahn me ohlo kihong nah pwutak ko eh sohso, e sohte pahn mweimwei ong ih en wiahki pwutak me nein lih me e poakepoakeo nin duwen nah mesenih ni eh pohnsehsehla pwutak me nein lih me e sohte poakepoakeo, me meseniho. 17 Ohlo pahn pohnese pwutak me nein lih me e sohte poakepoakeo nin duwen mesenih ni eh kihong ih pwaise pak riapak sang mehkoaros me e ahneki, pwe ih me tepin kadaudoke.* Ih me ahneki pwuhng en mesenih.+

18 “Ma ohl emen naineki pwutak emen me keptakai oh kahngohdi oh e sohte kin peikiong eh pahpa de eh nohno,+ oh ira song kapwungala ih ahpw e kahng rong ira,+ 19 eh pahpa oh nohno pahn koledi ih oh wahla rehn ohl mah kan ni ewen kelen eh kahnimwo 20 oh ndaiong ohl mah kan en eh kahnimwo, ‘Nait pwutaket me keptakai oh kahngohdi, oh e kahng peikiong kiht. E mehwo+ oh kin kamamsakau.’+ 21 Mwuri ohl koaros en eh kahnimwo pahn katehki takai lao e mehla. Eri ke pahn kihsang dahme suwed nanpwungamwail, oh Israel pwon pahn rong oh masepwehkada.+

22 “Ma ohl emen wiahda dihp ehu me konehng kalokepen kamakamala oh e kamakamala+ oh ke langahda ih nin tuhke pwoat,+ 23 paliwere mehlao sohte pahn mihmi nin tuhkeo pwohng ehu pwon.+ Ke uhdahn pahn sarepedi ih ni rahnohte, pwehki emen me langada nin tuhke wia mehkot me Koht ketin keria,+ oh ke sohte pahn kasaminehla sapwomw me Siohwa omw Koht pahn ketikihong uhk nin duwen sohso ehu.+

22 “Ma ke kilang nein riomwo kouwol de nah sihpw eh alialuseli, ke dehr pohnsehsehla mahno.+ Ke uhdahn pahn kapwurelahng rehn riomwo. 2 Ahpw ma riomwo sohte kousoan limwahmw de ke sehse ih, ke pahn wahla mahno ni imwomwo, oh e pahn mihmi rehmw lao riomwo pahn rapahkihdo. Eri ke pahn kapwurehla reh.+ 3 Ih met me ke pahn wia ong nah dongki, eh likou, oh mehkot me salongasang rehn riomwo oh ke diarada. Ke sohte pahn pohnsehsehla met.

4 “Ma ke kilang nein riomwo dongki de nah kouwol pwupwudi nan ahlo, ke sohte pahn pohnsehsehla mahno. Ke uhdahn pahn sewese ih kapwourada mahno.+

5 “Lih emen sohte pahn likawih likoun ohl, oh pil ohl emen sohte pahn likawih likoun lih. Pwe mehmen me kin wia met kasaut ong Siohwa omw Koht.

6 “Ma ke diar pesen menpihr ehu ni keilen ahlo iangahki kisin menpihr kan de kutohr kan, mehnda ma nan tuhke de nanpwel, oh nohno mwomwohd pohn nah kisin menpihr ko de kutohr ko, ke sohte pahn wahsang nohno iangahki nah ko.+ 7 Ke anahne kadarala nohno, ahpw ke kak wahsang kisin menpihr ko. Wia met pwe ken pweida mwahu oh mour werei.

8 “Ma ke kauwada ihmw kapw ehu, ke pil pahn kihong kehl ong pohn ihmwo,+ pwe emen de pwupwudihsang ie oh omw peneinei sohte pahn pwukoahkihdi dipen kamaramas.

9 “Ke sohte pahn kamwarak soangen werentuhke riau+ nan omw mwetin kreip. Ma ke wia met, mehkoaros me kohsang werentuhke me ke kamwarako iangahki wahn mwetin kreipo pahn wisiklahng wasa sarawio.

10 “Ke sohte pahn kapatapene kouwol men oh dongki men pwe ren deipwel.+

11 “Ke sohte pahn likawih likou me wiawihkihda wunen sihpw oh linen patpene.+

12 “Ke pahn wiahda mehn kapwat ni keimw pahieu en likou me ke likawih.+

13 “Ma ohl emen pwoudikihda lih emen oh wendi reh ahpw mwuri e kailongkihla ih* 14 oh ohlo kedipahki liho wiewia suwed oh kahdsuwedihala ni eh nda: ‘I pwoudikihda lih menet, ahpw ni ei wendi reh, I sohte diar mehn kadehde me ih meipwon men,’ 15 en serepeino pahpa oh nohno pahn kihda mehn kadehde me serepeino meipwon ong ohl mah kan ni ewen kelen kahnimwo. 16 En serepeino pahpa pahn ndaiong ohl mah ko, ‘I kihong nei serepeinet rehn ohl menet en pwoudikihda, ahpw e kailongkihla* ih 17 oh e kedikedipahki eh wiewia suwed ni eh nda: “I diarada me sohte mehn kadehde me noumw serepeinet meipwon.” Eri iet kadehdepen nei serepeinet eh meipwon.’ Eri ira pahn pahkpeseng likowo mwohn ohl mah kan en kahnimwo. 18 Ohl mah kan+ en kahnimwo pahn ale ohlo oh kaloke.+ 19 Irail pahn koasoanediong ih en pwain silper sekel* 100 oh kihong mepwukat rehn en serepeino pahpao, pwehki ohlo kahdsuwedihala meipwon en Israel men,+ oh liho pahn pwopwoudikihte ohlo. E sohte pahn mweimwei ong ohlo en mweisang liho erein eh mour.

20 “Ahpw, ma kedipo me mehlel, oh sohte mehn kadehde me serepeino meipwon, 21 irail pahn wahdo serepeino ni wasahn pedolong en imwen eh pahpao, oh ohl akan en eh kahnimwo pahn katehki takai lao e mehla, pwehki eh wiadahr mwekid kanamenek ehu+ nan Israel ni eh wia tiahk samin me pid wia nsenen pwopwoud* nan imwen eh pahpao.+ Eri ke pahn kihsang dahme suwed nanpwungamwail.+

22 “Ma ohl emen dierekda eh wendi rehn lih emen me pwoudiki emen ohl tohrohr, ira koaros uhdahn pahn mehla, ohl me wendi rehn liho iangahki liho.+ Eri ke pahn kihsang dahme suwed nan Israel.

23 “Ma meipwon men inoun pwopwoudiong ohl emen, oh emen ohl tohrohr tuhwong serepeino nan kahnimwo oh wendi reh, 24 kumwail pahn wahla ira koaros ni ewen kelen kahnimwo oh katehki takai lao ira mehla, serepeino pwehki eh sohte wer nan kahnimwo oh ohlo pwehki eh kanamenekihala en iengeo pwoudo.+ Eri ke pahn kihsang dahme suwed nanpwungamwail.

25 “Ahpw, ma ohlo tuhwong serepein me inoun pwopwoudo nan mohso oh ohlo angkehlailiong serepeino, ohl me wendi reho kelehpw me pahn mehla, 26 oh ke sohte pahn wiahiong serepeino mehkot. Serepeino sohte wiahda dihp me warohng mehla. Met duwehte ohl emen eh peiong ienge men oh kemehla ih.+ 27 Pwe e tuhwong serepeino nan mohso, oh serepein me inoun pwopwoudo wer, ahpw sohte me sewesehda ih.

28 “Ma ohl emen tuhwong serepein meipwon men me sohte inoun pwopwoud oh e koledi serepeino oh wendi reh oh ira dierekda,+ 29 ohl me wendi rehn serepeino pahn anahne kihong en serepeino pahpao silper sekel 50, oh serepeino pahn wiahla eh pwoud.+ Pwehki ohlo kanamenekihala serepeino, e sohte pahn mweimwei ong ohlo en mweisang serepeino erein eh mour.

30 “Sohte ohl emen pahn ale en eh pahpao pwoud pwe e de kasohwauwihala eh pahpao.*+

23 “Sohte ohl emen me lekwusol ni eh kamwutepene wusole ko de me eh dipwisoun kaparaparo lupsang pahn kak pedolong nan mwomwohdisohn Siohwa.+

2 “Sohte seri men me ipwin nenek* pahn kak pedolong nan mwomwohdisohn Siohwa.+ Pil lel dih kaeisek, sohte emen kadaudoke kan pahn kak pedolong nan mwomwohdisohn Siohwa.

3 “Sohte mehn Ammon de mehn Mohap pahn kak pedolong nan mwomwohdisohn Siohwa.+ Pil lel dih kaeisek, sohte emen kadaudokara kan pahn kak pedolong nan mwomwohdisohn Siohwa, 4 pwehki re sohte sewesehkin kumwail mwenge oh pihl ni amwail kohkohsang Isip,+ oh pwehki re koadoadoahkih Palaam nein Peor sang Pedor en Mesopodamia pwehn keriaiukala.*+ 5 Ahpw Siohwa omw Koht ketin soikala karonge Palaam.+ Siohwa omw Koht ketin wekidala keriao ong ni kapai ehu ong kowe,+ pwehki Siohwa omw Koht ketin poakohng uhk.+ 6 Erein omw mour ke sohte pahn sewese irail en ahneki popohl oh paiamwahu.+

7 “Ke sohte pahn kailongki mehn Edom men, pwe ih riomw.+

“Ke sohte pahn kailongki mehn Isip men, pwe ke wiahla mehn liki men nan eh wehi.+ 8 Dih kesiluhwen seri kan me ipwidiong irail kak pedolong nan mwomwohdisohn Siohwa.

9 “Ni omw pahn kauwada imwomw impwal kan pwehn mahweniong omw imwintihti kan, ke pahn liksang mehkot suwed.*+ 10 Ma ohl emen saminla pwehki eh kakusiei pilen newe nipwong,+ e pahn kohieila likin kahnimpwalo oh sohte pwurehng pedolong nan kahnimpwalo. 11 Ni eh soutikpene, e pahn duhdu nan pihl, oh mwuri e pahn kak pwurala nan kahnimpwalo ahnsou me ketipin kihrla.+ 12 Ke pahn koasoanehdi wasa kis* likin kahnimpwalo pwe ken doadoahngki, oh ih wasao me ke pahn kohla ie. 13 Kisin kuwa pahn wia kisehn omw dipwisou kan. Ni omw pahn kohntutuk pwehn kainen, ke pahn weirkihda kuwao pwoahr ehu oh mwuri sarepedi omw kaineno. 14 Pwe Siohwa omw Koht ketiketseli nan omw kahnimpwal+ pwe en ketin kapituhkala oh ketikihong uhk omw imwintihti kan, oh omw kahnimpwalo pahn anahne sarawi,+ pwe en dehr ketin mahsanih mehkot samin rehmw oh sohla ketin ieiang uhk.

15 “Ke sohte pahn kapwurehla lidu men rehn eh soumas ni eh tangasang eh soumaso oh kohdo rehmw. 16 E kak kousoan wasa sohte lipilipil me e pilada nan ehu omw kahnimw kan, wasa me e mwahuki. Ke sohte pahn wiakauwe ih.+

17 “Sohte emen serepein en Israel pahn wiahla lihen netiki paliwere nan imwen kaudok ehu,+ oh pil sohte emen pwutak en Israel pahn wiahla ohlen netiki paliwere nan imwen kaudok ehu.+ 18 Sohte me pahn wahdo pweinen lihen netiki paliwere men de pweinen ohlen netiki paliwere men* nan tehnpesen Siohwa omw Koht pwehn kapwaiada inou ehu me e kahukihla, pwe mepwukat koaros wia mehkot kasaut ong Siohwa omw Koht.

19 “Ke sohte pahn wiahiong riomw en pwain wihn ni omw pahn kamangaiong ih mwohni,+ mwenge, de mehkot sohte lipilipil. 20 Ke kak wiahiong mehn liki men en pwain wihn,+ ahpw ke sohte pahn wiahiong riomw en pwain wihn,+ pwe Siohwa omw Koht en ketin kapaiaiukada ni mehkoaros me ke wiahda nan sahpw me ke pahn sapwenikihla.+

21 “Ma ke kahukihla inou ehu ong Siohwa omw Koht,+ ke dehr pwand en kapwaiada.+ Pwe Siohwa omw Koht uhdahn pahn ketin kupwurki ken wia met; pwe ma soh, met pahn wia dipomw.+ 22 Ahpw ma ke sohte kahukihla inou ehu, ke sohte pahn pwukoahkihdi dihp.+ 23 Ke pahn kapwaiada dahme ke nda me ke pahn wia,+ oh ke pahn kapwaiada dahme ewomw kahukihla nin duwen meirong ehu me ke nsenki wiahda ong Siohwa omw Koht.+

24 “Ma ke pedolong nan mwetin kreip en mehn mpomw, ke kak kang kreip uwen me ke inengieng, ahpw ke sohte pahn kihdiong nan omw kopwou.+

25 “Ma ke pedolong nan mwetin krein en mehn mpomw, ke kak dolung kadoken krein me mahier, ahpw ke sohte pahn doadoahngki naipokos pwehn pelehdi en mehn mpomw eh krein.+

24 “Ma ohl emen pwoudikihda lih emen ahpw liho sohte kaperenda ih pwehki e diarada mehkot kanamenek duwen liho, e pahn ntingihada kisinlikoun kamweid ong liho+ oh kihong ih, oh kadarala ih sang nan imweo.+ 2 Mwurin liho eh pahn kohkohsang ni imwen ohlo, liho kak pwoudikihda emen ohl tohrohr.+ 3 Ma ohl keriemeno kailongkihla* liho oh ntingihada kisinlikoun kamweid ong liho oh kihong ih oh kadarala ih sang nan imweo de ma ohl keriemeno me pwoudikihda liho pahn mehla, 4 tepin en liho pwoudo me kadarala iho sohte pahn mweimwei en pwurehng ale liho nin duwen eh pwoud mwurin liho eh saminlahr, pwe met mehkot kasaut ong Siohwa. Ke sohte pahn wahdo dihp nan sahpw me Siohwa omw Koht pahn ketikihong uhk nin duwen sohso ehu.

5 “Ni ohl emen eh ahpwtehn pwopwoudida, e sohte pahn iang karis en sounpei de ale pwukoa teikan. E pahn saledeksang pwukoa koaros erein sounpar ehu oh mihmi nan ihmw oh kaperenda eh pwoud.+

6 “Sohte me pahn kihsang mehn ngidar pilawa* de takain ngidar pilawa* nin duwen kilelepen eh pweipwand,+ pwe met pahn kihsang en emen eh tehtehn komour* nin duwen kilelepen eh pweipwand.

7 “Ma emen dierekda me e pirapahla emen* rie mehn Israel kan oh e kin wiakauwe ih oh netikihla,+ me pirapo pahn mehla.+ Ke pahn kihsang dahme suwed nanpwungamwail.+

8 “Ni soumwahu tokutok eh pwarada,* ke uhdahn pahn kanahieng ken wia mehkoaros me samworo mehn Lipai kan pahn kaweidkin kumwail.+ Kanahieng kumwail en wia duwehte me I kehkehlingkihong irail. 9 Tamataman dahme Siohwa omw Koht ketin wiahiong Miriam ni amwail kohkohdo sang Isip.+

10 “Ma ke pahn kamangaiong mehn mpomw mehkot,+ ke sohte pahn pedolong nan imwe pwehn kihsang dahme e kihda nin duwen kilelepen eh pweipwand. 11 Ke pahn kesihnen likio, oh aramas me pweipwando pahn wahieido rehmw likio dahme e pahn kihong uhk nin duwen kilelepen eh pweipwand. 12 Oh ma aramaso semwehmwe, ke sohte pahn kohla meir ni omw kolokolete dahme e kihda nin duwen kilelepen eh pweipwand.+ 13 Ke uhdahn pahn kapwurelahng ih dahme e kihda nin duwen kilelepen eh pweipwand ni ahnsowohte me ketipin kihrla, oh e pahn kohla meir nan eh likou puhpo,+ oh e pahn kapaiaiuk; oh Siohwa omw Koht pahn ketin wiahki met wiewia pwung ehu.

14 “Ke sohte pahn widingehdi tohndoadoahk alahlda men me mi nan kahpwal oh semwehmwe, mehnda ma emen riomw de mehn liki men me kin kousoan nan sapwomw, nan omw kahnimw kan.*+ 15 Ke pahn kihong ih pweinen eh doadoahk rahnohte,+ mwohn ketipino eh kihrla, pwehki e semwehmwe oh e anahne mwohnio ong eh mour.* Pwe ma soh, e pahn likweriong Siohwa kaulimkin uhk, oh ke pahn pwukoahkihdi dihp.+

16 “Pahpa kan sohte pahn kamakamkihla dahme neirail seri kan wiahda, oh seri kan sohte pahn kamakamkihla dahme arail pahpa kan wiahda.+ Aramas emen pahn kamakamkihla pein dipe.+

17 “Ke sohte pahn kasapwungehla kopwung en mehn liki de me sepwoupwou,+ oh ke sohte pahn kihsang en liohdi men likou puhp nin duwen kilelepen eh pweipwand.+ 18 Tamataman me ke wiahla lidu men nan Isip, oh Siohwa omw Koht ketin kasaledekihiukala* sang wasao.+ Ihme kahrehda I kehkehlingkihong uhk ken wia met.

19 “Ni omw pahn dolung wahn omw mwaht oh ke manokehla ehu kapakap nan mwahto, ke dehr pwurala ale. E pahn mihmihte mwo ong mehn liki kan, me sepwoupwou, oh liohdi,+ pwe Siohwa omw Koht en ketin kapaiaiuk ni mehkoaros me ke pahn kin wia.+

20 “Ni omw pahn itik* omw tuhkehn olip, ke sohte pahn pwurehng itik rahn tuhkeo. Dahme luhwehdi pahn mihmihte ong mehn liki kan, me sepwoupwou, oh liohdi.+

21 “Ni omw pahn kihpene kreip kan sang omw mwetin kreip, ke sohte pahn pwurehng pwurala kihpene luhwen kreip kan. Re pahn mihmihte ong mehn liki kan, me sepwoupwou, oh liohdi. 22 Tamataman me ke wiahla lidu men nan sapwen Isip. Ihme kahrehda I kehkehlingkihong uhk ken wia met.

25 “Ni akamai ehu eh wiawi nanpwungen aramas riemen, ira pahn kohla rehn sounkopwung kan,+ oh irail pahn kopwung ira oh koasoanehdi ihs me pwung oh ihs me sapwung.+ 2 Ma me sapwungo warohng wowoki,+ sounkopwungo pahn koasoanehdi en wendi wekidekdi, oh e pahn wowoki mwohn mese. Uwen tohtohn wowoki pahn pahrekiong suwed en eh wiewia. 3 E kak wokih ih lao lel pak 40,+ ahpw sohte daulih. Ma e pahn doulahte wokih ih tohtohsang met, riomwo pahn sohla wauwi mwohn mesomw kan.

4 “Ke sohte pahn pirepene ewen kouwol men ni eh kin katohrepeseng kilin krein.+

5 “Ma pirien en pwutak kei kin kousoanpene oh emen irail mehla oh sohte nah seri, lih me pwoudiki me mehlao sohte pahn pwoudikihda emen likin peneineio. Rien en liho pwoudo pahn kohla reh, pwoudikihda oh kapwaiada eh pwukoa ong liho.+ 6 Mesenih me liho pahn naitikihada pahn wa eden me melahro,+ pwe edeo en dehr sohrala nan Israel.+

7 “Ma ohlo sohte men pwoudiki en rieo pwoudo, eri en rieo pwoudo pahn kohla rehn ohl mah kan ni ewen kelen kahnimwo oh nda, ‘Rien ei pwoudo kahng kolokol eden rieo nan Israel. E sohte pwungki en kapwaiada eh pwukoa ong ie oh pwoudkiniehda.’ 8 Ohl mah kan en eh kahnimwo pahn likwerih ohlo oh koasoiong ih. Ma e pahn ngihtehtehki eh nda, ‘I sohte men pwoudiki liho,’ 9 eri en rieo pwoudo pahn kohla rehn ohlo mwohn ohl mah ko, kihsang en ohlo suht ni neho,+ kendipiong ni meseo, oh nda, ‘Ih met me pahn wiawihong ohl me sohte pahn kihong rieo kadaudoke.’ 10 Mwurin mwo eden en ohlo peneinei* nan Israel pahn adanekihla ‘Imwen aramas me eh suhto kohsang.’

11 “Ma ohl riemen peida oh en emen eh pwoud keila pwehn pere eh pwoudo sang lahp me kemekeme iho oh liho doahkala oh koledi nein ohlo dipwisoun kaparaparo, 12 ke pahn lupukasang pehn liho. Ke* sohte pahn poakehla.

13 “Ke sohte pahn kolokol nan omw kopwou soangen takain paun riau,+ ehu me laud oh ehu me tikitik. 14 Ke sohte pahn kolokol nan imwomw soangen mehn deudeu riau ong mehn sosohng,*+ ehu me laud oh ehu me tikitik. 15 Ke pahn kolokolete mehn paun me pwung oh mehlel oh mehn sosohng me pwung oh mehlel, pwe ken mour werei nan sahpw me Siohwa omw Koht pahn ketikihong uhk.+ 16 Pwe aramas mwersuwed koaros me kin wia soahng wet kasaut ong Siohwa omw Koht.+

17 “Tamataman dahme Amalek wiahiong uhk ni amwail kohkohdo sang Isip,+ 18 duwen eh tuhwong uhk pohn ahlo oh mahweniong irail koaros me pwapwand kohdo mwurimw ni omw pwangadahr oh solahr angimw. E sohte lemmwiki Koht. 19 Ni Siohwa omw Koht eh ketin kakommoaleiukedi sang omw imwintihti kan koaros me kapiluhkpene nan sahpw me Siohwa omw Koht pahn ketikihong uhk nin duwen sohso ehu pwe ken sapwenikihla,+ ke pahn kasohrehla katamanpen Amalek sang sampah.*+ Ke dehpa manokehla.

26 “Ni omw pahn pedolong nan sahpw me Siohwa omw Koht pahn ketikihong uhk nin duwen sohso ehu oh ke sapwenikihla sahpwo oh kousoanla loale, 2 ke pahn ale ekei tepin wahnsahpw kan sang rahk koaros en sahpw me Siohwa omw Koht pahn ketikihong uhk, oh kihdi mepwukat nan kopwou ehu oh kohla wasa me Siohwa omw Koht ketin pilada ie ong lingan en mware.+ 3 Ke pahn kohla rehn samworo me pahn papah ni ahnsowo oh ndaiong ih, ‘Rahnwet I patohwan kadehde ong Siohwa omw Koht me I kodohr nan sahpw me Siohwa ketin kahukihong samatail mehn mahs ako me e pahn ketikihong kitail.’+

4 “Samworo eri pahn ale kopwowo sang nan pehmwen oh kihdi mwohn pei sarawi en Siohwa omw Koht. 5 Mwuri ke pahn patohwan mwohn silangin Siohwa omw Koht, ‘Semeio mehn Aram+ men me kin kohkohseli,* oh e kohdihla Isip+ oh kousoan wasao nin duwen mehn liki men, iangahki me malaulau nan eh peneinei.+ Ahpw wasao e wiahla wehi laud ehu, me kehlail oh tohto.+ 6 Oh mehn Isip kan wiakauwe oh kalokei kitail oh kaliduwih kitail ni lemei.+ 7 Kitail eri tepida likweriong Siohwa, Koht en samatail mehn mahs ako, oh Siohwa ketin karonge ngilatail kan oh mahsanihada atail lokolok oh apwal.+ 8 Eri Siohwa ketin waikitaildo sang Isip nin lime roson oh manaman lapalap+ oh sang ni wiewia kamasepwehk kan oh kilel kan oh manaman kapwuriamwei kan.+ 9 Mwuri e ketin waikitaildo wasaht oh ketikihong kitail sahpwet, sahpw ehu me inenen pwelmwahu.*+ 10 Met I wahdohr tepin wahnsahpw en sahpw me Siohwa ketikihong ie.’+

“Ke pahn kihdi met mwohn silangin Siohwa omw Koht oh poaridi mwohn silangin Siohwa omw Koht. 11 Ke pahn perenkihda soahng mwahu koaros me Siohwa omw Koht ketikihong uhk oh tohnimwomw, kowe oh mehn Lipai oh mehn liki me kin kousoan nanpwungamwail.+

12 “Ni omw pahn kanekehla omw katohrehsang eisek kis ehun+ wahn sapwomw kan koaros ni kesiluhwen sounpar, pahr en eisek kis, ke pahn kihong mehn Lipai, mehn liki kan, me sepwoupwou, oh liohdi, oh re pahn tungoal lao re medla nan omw kahnimw kan.*+ 13 Mwuri ke pahn patohwan mwohn silangin Siohwa omw Koht, ‘I kihsangehr soahng sarawi pwukat nan imwei oh kihong mehn Lipai, mehn liki kan, me sepwoupwou, oh liohdi,+ duwehte me komw ketin kehkehlingkihong ie. I sohte kauwehla de pohnsehsehla sapwellimomwi kehkehlik kan. 14 I sohte tungoale mehkot sarawi erein ei mwahiei de kihsang met ni ei samin de doadoahngki met ong me melahr akan. I peikiong kapitien Siohwa ei Koht oh wiahda mehkoaros me komw ketin kehkehlingkihong ie. 15 Eri komw ketin mahsendihdo sang sapwellimomwi wasahn kousoan sarawi nanleng, oh komw ketin kapaia sapwellimomwi aramas akan Israel oh sahpw me komw ketikihong kiht,+ duwehte me komw ketin kahukihong samat mehn mahs ako,+ sahpw ehu me inenen pwelmwahu.’*+

16 “Rahnwet Siohwa omw Koht ketin kehkehlingkihong uhk ken kapwaiada koasoandi oh kosonned pwukat. Ke pahn kapwaiada mepwukat sang nan omw mohngiong unsek+ oh mour* unsek. 17 Rahnwet ke alehdi mahsen wet sang rehn Siohwa me e pahn ketin wiahla omw Koht ni omw pahn weid nan sapwellime ahl akan oh kapwaiada sapwellime koasoandi kan,+ sapwellime kehkehlik kan,+ oh sapwellime kosonned kan,+ oh ni omw pahn rong kapitie. 18 Oh rahnwet Siohwa ketin alehdi koasoi wet sang rehmw me ke pahn wiahla sapwellime aramas, sapwellime aramas tohrohr,*+ duwehte me e ketin inoukihong uhk, oh me ke pahn kapwaiada sapwellime kehkehlik kan koaros 19 oh me e pahn ketin kasapwiluhkada pohn wehi teikan koaros me e ketin wiahda,+ oh e pahn ketikihong uhk kaping oh ndand oh lingan ni omw kadehdehda me ke wia aramas sarawi ong Siohwa omw Koht,+ duwehte me e ketin inoukihda.”

27 Moses iangahki ohl mah kan en Israel ahpw kehkehlingkihong aramas ako, nda: “Kumwail kapwaiada kehkehlik koaros me I pahn kihong kumwail rahnwet. 2 Oh ni rahn me kumwail pahn kotehla Sordan kohla nan sahpw me Siohwa omw Koht pahn ketikihong uhk, kumwail pahn kauwada takai lapala kei oh plasderihala mepwukat.*+ 3 Kowe eri ntingihedi mahsen en Kosonned wet koaros pohn takai ko ni omw pahn kotehla Sordan, pwe ken pedolong nan sahpw me Siohwa omw Koht pahn ketikihong uhk, sahpw ehu me inenen pwelmwahu,* duwehte me Siohwa, Koht en semomw mehn mahs ako ketin inoukihong uhk.+ 4 Ni amwail pahn kotehla Sordan, kumwail pahn kauwada takai pwukat pohn Nahna Epal+ oh plasderihala mepwukat,* duwehte me I kehkehlingkihong kumwail rahnwet. 5 Ke pil pahn kauwada pei sarawi ehu wasao ong Siohwa omw Koht, pei sarawi takai ehu. Ke sohte pahn doadoahngki dipwisoun doadoahk mete pwehn parada takai pwukat.+ 6 Ke pahn kauwada pei sarawi ong Siohwa omw Koht me wiawihkihda takai me sohte perperda oh wiahda meirong isihs ong Siohwa omw Koht powe. 7 Ke pahn wiahda meirong en kaminimin kan+ oh tungoalehla mepwukat wasao,+ oh ke pahn pereperen mwohn silangin Siohwa omw Koht.+ 8 Oh ntingihedi ni sansal mahsen en Kosonned wet koaros pohn takai ko.”+

9 Moses oh samworo mehn Lipai kan eri koasoiong Israel pwon, nda: “Israel, nennenla oh rong. Rahnwet ke wiahla aramas en Siohwa omw Koht.+ 10 Ke pahn rong kapitien Siohwa omw Koht oh kapwaiada sapwellime kehkehlik kan+ oh koasoandi kan, me I kehkehlingkihong uhk rahnwet.”

11 Rahno Moses kehkehlingkihong aramas ako: 12 “Keinek pwukat pahn kesihnen pohn Nahna Kerisim+ pwehn kapaia aramas ako ni amwail kotehla Sordan: Simion, Lipai, Suda, Isakar, Sosep oh Pensamin. 13 Oh keinek pwukat pahn kesihnen pohn Nahna Epal+ pwehn pakairki keria: Reupen, Kad, Aser, Sepulon, Dan oh Napdali. 14 Oh mehn Lipai kan pahn sapengki aramas koaros en Israel ni ngihl laud:+

15 “‘Aramas emen me kin wiahda sansal perperda ehu+ de sansal mete ehu,+ mehkot me kasaut ong Siohwa,+ wiepen pehn tohndoadoahk saman men,* oh ekihla met en riahla.’ (Oh aramas akan koaros pahn sapeng, nda, ‘Amen!’*)

16 “‘Aramas emen me kin mwamwahliki eh pahpa de nohno en riahla.’+ (Oh aramas akan koaros pahn nda, ‘Amen!’)

17 “‘Aramas emen me kin kamwakid pehs en sapwen mehn mpe+ en riahla.’ (Oh aramas akan koaros pahn nda, ‘Amen!’)

18 “‘Aramas emen me kin kahrehiong aramas maskun men en sehsehla ahlo en riahla.’+ (Oh aramas akan koaros pahn nda, ‘Amen!’)

19 “‘Aramas emen me kin kasapwungehla kopwung+ en mehn liki men, me sepwoupwou men, de liohdi men en riahla.’+ (Oh aramas akan koaros pahn nda, ‘Amen!’)

20 “‘Aramas emen me kin wendi rehn en eh pahpa pwoud en riahla, pwe e kasohwauwihala eh pahpao.’*+ (Oh aramas akan koaros pahn nda, ‘Amen!’)

21 “‘Aramas emen me kin eng rehn mahn emen en riahla.’+ (Oh aramas akan koaros pahn nda, ‘Amen!’)

22 “‘Aramas emen me kin wendi rehn rie serepein en riahla, nein eh pahpao serepein de nein eh nohno serepein.’+ (Oh aramas akan koaros pahn nda, ‘Amen!’)

23 “‘Aramas emen me kin wendi rehn en eh pwoudo nohno en riahla.’+ (Oh aramas akan koaros pahn nda, ‘Amen!’)

24 “‘Aramas emen me kin rukula oh kemehla mehn mpe en riahla.’+ (Oh aramas akan koaros pahn nda, ‘Amen!’)

25 “‘Aramas emen me kin ale mwohni pwehn kemehla* aramas emen me sohte dipe en riahla.’+ (Oh aramas akan koaros pahn nda, ‘Amen!’)

26 “‘Aramas emen me sohte pahn utung mahsen kan en Kosonned wet ni eh sohte kapwaiada mepwukat en riahla.’+ (Oh aramas akan koaros pahn nda, ‘Amen!’)

28 “Oh ma ke uhdahn pahn rong kapitien Siohwa omw Koht ni omw kanahieng kapwaiada sapwellime kehkehlik kan koaros me I kehkehlingkihong uhk rahnwet, Siohwa omw Koht uhdahn pahn ketin kasapwiluhkada pohn wehi teikan koaros nin sampah.+ 2 Kapai pwukat koaros pahn kohdi pohmw oh poweiukedi+ pwehki ke kin rongorong kapitien Siohwa omw Koht:

3 “Kapai pahn kohwong uhk nan kahnimw, oh kapai pahn kohwong uhk nan mohs.+

4 “Kapai pahn kohwong noumw seri kan*+ oh wahn sapwomw oh wahn noumw pelinmen kan, noumw koupwul oh sihmpwul.+

5 “Kapai pahn kohwong omw kopwou+ oh noumw pwohl en kapal pilawa.+

6 “Kapai pahn kohwong uhk ni mehkoaros me ke kin wia.*

7 “Siohwa pahn ketin kahrehiong omw imwintihti kan me uhwong uhk en lohdi mwohmw.+ Re pahn mahweniong uhk sang wasa ehu, ahpw re pahn tangasang uhk wasa isuh.+ 8 Siohwa pahn ketin kehkehlingki me kapai en kohwong omw imwen nahk+ oh mehkoaros me ke kin wia, oh e uhdahn pahn ketin kapaiaiukada nan sahpw me Siohwa omw Koht pahn ketikihong uhk. 9 Siohwa pahn ketin wiahkinuhkala aramas sarawi ong ih,+ duwehte me e ketin kahukihong uhk,+ pwehki omw pousehlahte kapwaiada kehkehlik kan en Siohwa omw Koht oh kekeid nan sapwellime ahl akan. 10 Aramas akan koaros nin sampah pahn anahne kilang me mwaren Siohwa mi pohmw,+ oh re pahn masak uhk.+

11 “Siohwa pahn ketin kahrehiong uhk en naineki seri tohto oh pelinmen tohto oh wahnsahpw tohto+ nan sahpw me Siohwa ketin kahukihong semomw mehn mahs ako me e pahn ketikihong uhk.+ 12 Siohwa pahn ketin ritingadahng uhk sapwellime imwen nahk mwahu, nanleng, pwe en ketin kamwerehdi keteu ni ahnsou me kileldi+ oh ketin kapaiahda mehkoaros me ke kin wia. Ke pahn kamangaiong wehi tohto mwohni, ahpw ke sohte pahn anahne peki mwohni.+ 13 Siohwa pahn ketin wiahkinuhkala moahng a kaidehn pwadaiki; oh ke pahn mi powe+ a kaidehn pah, ma ke kin peikiong kehkehlik kan en Siohwa omw Koht me I kehkehlingkihong uhk rahnwet ken kapwaiada oh wia. 14 Ke sohte pahn wetla ni palimaun de palimeing sang mahsen kan koaros me I kehkehlingkihong uhk rahnwet,+ oh ke sohte pahn idawehn koht teikan pwehn papah irail.+

15 “Ahpw ma ke sohte pahn rong kapitien Siohwa omw Koht ni omw sohte kanahieng kapwaiada sapwellime kehkehlik kan oh koasoandi kan koaros me I kehkehlingkihong uhk rahnwet, keria pwukat koaros pahn kohdi pohmw oh poweiukedi:+

16 “Ke pahn riahla nan kahnimw, oh ke pahn riahla nan mohs.+

17 “Omw kopwou+ oh noumw pwohl en kapal pilawa pahn riahla.+

18 “Noumw seri kan*+ oh wahn sapwomw oh noumw koupwul oh sihmpwul pahn riahla.+

19 “Ke pahn riahla ni mehkoaros me ke kin wia.*

20 “Siohwa pahn ketikidiong pohmw keria, pingiping oh kalokolok ni mehkoaros me ke kin wia lao ke kamwomwmwomwla oh mwadangete sohrala, pwehki omw wiewia suwed kan oh omw keseiehla.+ 21 Siohwa pahn ketin kahrehiong soumwahu en mihmi rehmw lao e ketin kasohreiukala sang sahpw me ke pahn sapwenikihla.+ 22 Siohwa pahn ketin kalokehkin uhk limengimeng, soumwahu karakar,+ weitahta ni kili, karakar sang soumwahu, kedlahs+ oh kalokehki omw tuhke kan kisinieng karakar oh eniep;+ oh re pahn kalokeiuk lao ke sohrala. 23 Pahnlahng me mi pohmw pahn wiahla prons, oh sampah me mi pahmw pahn wiahla mete.+ 24 Siohwa pahn ketin wiahiong keteu en nan sapwomw en pihk oh pwelpar me pahn kohdiong pohmw sang nanleng lao ke kamwomwmwomwla. 25 Siohwa pahn ketin kahrehiong uhk ken lohdi mwohn omw imwintihti kan.+ Ke pahn mahweniong irail sang wasa ehu, ahpw ke pahn tangasang irail wasa isuh; oh ke pahn wiahla mehkot kamasepwehk ehu ong wehi kan koaros nin sampah.+ 26 Oh paliwaramwail mehla kan pahn wiahla kenen menpihr en pahnlahng koaros oh mahn en nansapw, sohte me pahn karawanirailla.+

27 “Siohwa pahn ketin kalokehkin uhk mpwos en Isip kan, mpwos me kohda wasahn kainen mwenge, oh soangen soumwahu en kili kan, soahng kan me ke sohte kak mwahulahsang. 28 Siohwa pahn ketin kalokehkin uhk sahliel oh maskun+ oh pingiping. 29 Ke pahn dedehmseli nin souwas, duwehte me maskun men eh kin dedehmseli nan rotorot,+ oh ke sohte pahn pweida ni mehkoaros me ke wia; oh aramas pahn kin widingeiuk oh pirapaiuk ahnsou koaros oh sohte me pahn doareiukala.+ 30 Ke pahn inoun pwopwoudiong lih emen, ahpw emen ohl tohrohr pahn angkehlailiong ih. Ke pahn kauwada ihmw ehu, ahpw ke sohte pahn kousoan loale.+ Ke pahn padokedi mwetin kreip ehu, ahpw ke sohte pahn tepida dolung wah kan.+ 31 Noumw kouwol pahn kamakamala mwohn mesomw kan, ahpw ke sohte pahn tungoale uduke kan. Noumw dongki pahn pirapala mwohmw, ahpw e sohte pahn kapwurpwurdohng uhk. Noumw sihpw pahn kohieng omw imwintihti kan, ahpw sohte me pahn doareiukala. 32 Noumw pwutak kan oh noumw serepein kan pahn kohieng aramas teikan+ ni omw kilikilang, oh ke pahn men tuhwong irail ahnsou koaros, ahpw ke sohte kak wia mehkot. 33 Aramas akan me ke sehse pahn tungoalehla wahn sapwomw oh wahn omw doadoahk koaros,+ oh aramas pahn kin widingeiuk oh kalokeiuk ahnsou koaros. 34 Ke pahn sahlielkihla dahme mesomw kan kin kilang.

35 “Siohwa pahn ketin kalokehkin uhk mpwos me kamedek oh sohte kak mwahula ni pwukiomw kan oh nehmw kan, sang patehn nehmw kan leldahla ni kadoken moangomw. 36 Siohwa pahn ketin kahrehiong uhk oh nanmwarki me ke kasapwiladahng pein kowe en kohla nan wehi ehu me kowe oh semomw mehn mahs ako sehse,+ oh wasao ke pahn papah koht teikan, koht kan me wiawihkihda tuhke oh takai.+ 37 Oh aramas koaros me Siohwa ketin kadaruhkalahng pahn masepwehkada oh kouruhrkin uhk oh mwamwahlikin uhk.*+

38 “Ke pahn kamwarak werentuhke tohto nan mwaht, ahpw ke pahn dolung me malaulau,+ pwehki loukust kan pahn kangala. 39 Ke pahn padokedi oh koadoahke mwetin kreip kan, ahpw ke sohte pahn nim wain oh dolung mehkot,+ pwehki mwahs pahn kangala. 40 E pahn mie tuhkehn olip nan sapwomw kan koaros, ahpw ke sohte pahn keiehkin uhk leh, pwehki omw olip kan pahn pwupwudisang. 41 Ke pahn nainekihda pwutak kan oh serepein kan ahpw re sohte pahn wiahte noumw, pwe re pahn kalipilipala.+ 42 Mwuten kisin mahn tikitik kan* pahn kauwehla omw tuhke kan oh wahn sapwomw kan koaros. 43 Mehn liki men me kin mi nanpwungamwail pahn kekehlailla ahpw ke pahn luhluwetala. 44 E pahn kamangaiong uhk mwohni, ahpw ke sohte pahn kamangaiong ih mwohni.+ E pahn wiahla moangomw, a ke pahn wiahla pwadaiki.+

45 “Keria pwukat koaros+ uhdahn pahn kohdiong pohmw oh pwakihiuk oh poweiukedi lao ke kamwomwmwomwla,+ pwehki ke sohte rong kapitien Siohwa omw Koht ni omw sohte kapwaiada sapwellime kehkehlik kan oh koasoandi kan me e ketin kehkehlingkihong uhk.+ 46 Oh re pahn mihmihte pohmw oh kadaudokomw kan nin duwen kilel oh mehn kataman ehu kohkohlahte,+ 47 pwehki ke sohte papah Siohwa omw Koht ni peren oh nsenamwahu en omw mohngiong ni ahnsou me soahng koaros me ke ahneki tohto.+ 48 Siohwa pahn ketin kadarowohng uhk omw imwintihti kan, oh ke pahn papah irail+ erein omw men mwenge+ oh men nimpil oh sohla omw likou oh sohla mehkoaros. E pahn ketikihong mehn wisik mete ni tepinweromw lao e kamwomwuhkala.

49 “Siohwa pahn ketin kadarodo wehi ehu me doh pwehn mahweniong uhk,+ sang ni imwin sampah; e pahn tahr duwehte ikel men,+ e pahn wia wehi ehu me ke sohte pahn wehwehki eh lokaia,+ 50 wehi lemei ehu me sohte pahn wauneki me mah de poakehla me pwulopwul.+ 51 Re pahn kangala wahn noumw pelinmen oh wahn sapwomw lao ke kamwomwmwomwla. Re sohte pahn kihdiong uhk krein, wain kapw de leh kapw, koupwul de sihmpwul lao re kamwomwuhkala.+ 52 Re pahn kapiluhkpene, ritinguhkedi nan omw kahnimw kan* koaros nan sapwomw kan pwon lao omw dihd ile oh kehlail kan me ke kin koapworopworki pahn rengkidi. Ei, re uhdahn pahn kapiluhkpene nan omw kahnimw kan koaros nan sapwomw pwon me Siohwa omw Koht ketikihong uhk.+ 53 Eri ke pahn kangala pein noumw seri kan,* uduken noumw pwutak kan oh noumw serepein kan+ me Siohwa omw Koht ketikihong uhk, pwehki omw imwintihti kan ar kapilpene omw kahnimw kan oh kalokeiuk.

54 “Pil ohl me keieu kadek oh keneinei nanpwungamwail sohte pahn poakehla rie pwutak de eh pwoud kesempwal de nah seri kan me luhwehdi reh, 55 oh e sohte pahn ehukihong irail uduken nah seri kan me e pahn tungoale, pwehki sohte mehkot me e ahneki, pwehki omw imwintihti kan ar kapilpene oh kaloke omw kahnimw kan.+ 56 Oh lih me kadek oh keneinei nanpwungamwail me sohte pahn pil medewehda en kihdi patehn neh nanpwel pwehki e me nohn keneinei,+ sohte pahn kasalehda eh poakehla eh pwoud kesempwal de nah pwutak de nah serepein, 57 pil ong iengen seri me kohsang nanpwungen neh kan oh ong seri kan me e naitikihada, pwe e pahn kangirailla ni rir pwehki omw imwintihti kan ar kapilpene oh kaloke omw kahnimw kan.

58 “Ma ke sohte pahn kanahieng kapwaiada mahsen en Kosonned wet koaros me ntingdi nan pwuhk wet+ oh ke sohte lemmwiki mwar wet me lingan oh kapwuriamwei,+ iei mwaren Siohwa+ omw Koht, 59 Siohwa pahn ketin kalokehkin uhk oh kadaudokomw kan kalokolok kan me uhdahn apwal, kalokolok laud oh werei,+ oh soumwahu apwal me sohte kak mwadang mwahula. 60 E pahn ketin kapwuredohng pohmw soumwahu en Isip koaros me ke kin masak mahso, oh re uhdahn pahn tengediong uhk. 61 Oh pil, Siohwa pahn ketikidohng pohmw soumwahu de kalokolok koaros me sohte ntingdi nan pwuhken Kosonned wet lao ke kamwomwmwomwla. 62 Mendahki amwail tohtohla duwehte usuhn nanleng,+ me malaulaute rehmwail pahn luhwehdi,+ pwehki ke sohte rong kapitien Siohwa omw Koht.

63 “Oh duwehte Siohwa eh ketin kupwurperenki wiahiong kumwail en pweida mwahu oh katohtohweikumwailla mahso, eri Siohwa pahn ketin kupwurperenki kasohreikumwailla oh kamwomwkumwailla; oh kumwail pahn pehdsang nan sahpw me ke pahn sapwenikihla.

64 “Siohwa pahn ketin kihiukpeseng nan wehi kan koaros, sang ni imwin sampah lel ni imwi teio,+ oh wasao ke pahn papah koht kan me wiawihkihda tuhke oh takai, me kowe oh semomw mehn mahs ako sehse duwe.+ 65 Ke sohte pahn ahneki popohl nan wehi pwukat+ oh pil sohte wasahn kommoal ehu ong patehn nehmw kan. Ahpw wasao, Siohwa pahn ketikihong uhk mohngiong pwunod,+ mas edied oh pepehm en sohla koapworopwor.+ 66 Omw mour pahn mi nan keper laud, oh ke pahn masepwehk nipwong oh nin rahn; oh ke pahn sehse ma ke pahn pitila. 67 Nimenseng ke pahn nda, ‘Ma e nin soutikte!’ oh nin soutik ke pahn nda, ‘Ma e nimensengte!’ pwehki masak me ke pahn pehm nan omw mohngiong oh pwehki dahme mesomw kan pahn kilang. 68 Oh Siohwa uhdahn pahn ketin kapwureiukodo Isip pohn sohp, seiloak ehu me I ndaiong uhk, ‘Ke sohte pahn pwurehng kilang met,’ oh wasao kumwail pahn anahne netikinkumwailla rehn omw imwintihti kan nin duwen lidu ohl oh lih, ahpw sohte me pahn pwain.”

29 Iet mahsen kan en inou lap me Siohwa ketin kehkehlingkihong Moses en wiahiong aramas en Israel kan nan sapwen Mohap, patehngete inou lap me e ketin wiahiong irail nan Orep.+

2 Moses eri ekerpene mehn Israel kan koaros oh ndaiong irail: “Kumwail kilangehr mehkoaros me Siohwa ketin wiahda mwohn masamwail kan nan sapwen Isip ong Parao oh nah ladu kan koaros oh sapweo pwon,+ 3 kopwung* laud kan me mesomw kan kilang, kilel oh manaman kapwuriamwei kan.+ 4 Ahpw Siohwa sohte ketikihong uhk mohngiong ehu pwe ken wehwehki oh mesomw pwe ken kilang oh salengomw pwe ken rong, leledo rahnwet.+ 5 ‘Ni ei kahluwei kumwail nan sapwtehno erein sounpar 40,+ amwail likou kan sohte meringla oh amwail suht kan sohte ohla.+ 6 Kumwail sohte tungoale pilawa, oh kumwail sohte nim wain de sakau teikan, pwe kumwail en ese me ngehi me Siohwa amwail Koht.’ 7 Kumwail eri kohdo wasaht, oh Sihon nanmwarkien Espon+ oh Ok nanmwarkien Pasan+ kohieido pwehn mahweniong kitail, ahpw kitail kaloweirahdi.+ 8 Mwurin mwo kitail kihsang sapwara ko oh kihong mehn Reupen kan, mehn Kad kan, oh elep keinek en mehn Manase kan nin duwen sohso ehu.+ 9 Kahrehda, kapwaiada mahsen kan en inou lap wet oh peikiong mepwukat, pwe mehkoaros me kumwail pahn wia en pweida.+

10 “Kumwail koaros uh mwohn silangin Siohwa amwail Koht rahnwet, moangen amwail keinek kan, ohl mah kan, amwail kaun akan, ohl en Israel koaros, 11 noumwail seri kan, amwail pwoud kan,+ oh mehn liki+ me kin kousoan nan omw kahnimpwal, me kin wesei tuwi ong uhk oh me kin idipil ong uhk. 12 Ke mi wasaht pwehn kahukihla inou ehu pwe ken iang pedolong nan inou lap en Siohwa omw Koht, me Siohwa omw Koht pahn ketin wiahiong uhk rahnwet+ 13 pwe en ketin koasoanehdi ken wiahla sapwellime aramas rahnwet+ oh en ketin wia omw Koht,+ duwehte me e ketin inoukihong uhk oh duwehte me e ketin kahukihong semomw mehn mahs ako, Eipraam,+ Aisek+ oh Seikop.+

14 “Eri kaidehn kumwail kelehpw me I wiahiong inou lap wet oh kahukihong inou wet, 15 ahpw pil irail me iang kitail uh mwohn silangin Siohwa atail Koht rahnwet oh irail me sohte iang kitail mi wasaht rahnwet. 16 (Pwe kumwail uhdahn ese duwen atail mour nan sapwen Isip oh duwen atail kotehla soangsoangen wehi kan nan atail seiloak.+ 17 Oh kumwail ahnla kilang arail soahng kasaut kan oh arail dikedik kasaut kan*+ me wiawihkihda tuhke oh takai, silper oh kohl, me kin mi nanpwungarail.) 18 Kumwail kanahieng pwe e sohte pahn mie ohl emen de lih emen, peneinei ehu de keinek ehu nanpwungamwail rahnwet me eh mohngiong sohpeisang Siohwa atail Koht pwehn kohla papah koht en wehi pwukat,+ pwe e sohte pahn mie kalewe pwoat nanpwungamwail me kin kairada wahntuhke pwoisin oh tuhke sadik.+

19 “Ahpw ma emen rong mahsen en kahula wet oh suweiki nan eh mohngiong, nda ‘I pahn ahneki popohl mendahki ei ngihtehtehki wia nsenei,’ oh soahng koaros* pahn ohla nan eh ahl, 20 Siohwa sohte pahn ketin kupwurki mahkohng ih.+ Ahpw, Siohwa pahn ketin engiengda kowahlap pahn aramaso, oh keria koaros me ntingdi nan pwuhk wet uhdahn pahn kohdiong powe,+ oh Siohwa uhdahn pahn ketin kasohrehla edeo sang sampah. 21 Siohwa eri pahn ketin katohrehla aramaso sang keinek en Israel pwon oh ketikidiong powe kahpwal nin duwen keria koaros en inou lapo me ntingdi nan pwuhken Kosonned wet.

22 “Ni dih en noumwail seri kan me pahn kohdo oh mehn liki sang sahpw doh ehu ar pahn kilang kalokolok en sahpwo, kahpwal kan me Siohwa ketikihdiong powe— 23 suwepel oh soahl oh kisiniei, pwe sahpwo pwon sohte pahn kamwarak de wosada, dihpw kan pil sohte pahn wosada loale, duwehte kamwomwmwomwlahn Sodom oh Komora,+ Adma oh Sepoiim,+ me Siohwa ketin kamwomwala ni eh ketin engiengda kowahlap⁠— 24 irail oh wehi kan koaros pahn nda, ‘Dahme Siohwa ketin wiahkihong sahpwet met?+ Dahme kahrehda engieng mwuledek wet en wiawi?’ 25 Eri, aramas akan pahn nda, ‘Pwehki re kesehla inou lap en Siohwa,+ Koht en samarail mehn mahs ako, inou lap me e ketin wiahiong irail ni eh ketin wairaildo sang nan sapwen Isip.+ 26 Ahpw irail kohla oh papah koht teikan oh poaridiong irail, koht kan me re sehse oh me e sohte ketin mweidohng irail en kaudokiong.*+ 27 Sapwellimen Siohwa engieng kowahlap eri kohdiong pohn sahpwo ni eh ketikihdiong powe keria koaros me ntingdi nan pwuhk wet.+ 28 Kahrehda, Siohwa ketin usirailda sang nan sapwarailo ni eh ketin engiengda kowahlap+ oh ketin kalipeirailla nan ehu sahpw tohrohr, wasa me re mihmi ie rahnwet.’+

29 “Siohwa atail Koht kin ketin mwahngih soahng rir kan,+ E kin ketin kasalehiong kitail oh kadaudokatail kan soahng kan nan erein dih kan, pwe kitail en kapwaiada mahsen en Kosonned wet pwon.+

30 “Ni mahsen pwukat koaros ar lelohng uhk, kapai oh keria me I kihdi mwohmw,+ oh ke tamanda mepwukat*+ nan wehi koaros me Siohwa omw Koht ketin kihiukpeseng ie,+ 2 oh ke pwurodo rehn Siohwa omw Koht+ oh rong kapitie nin duwen mehkoaros me I kehkehlingkihong uhk rahnwet, kowe oh noumw seri kan, sang nan omw mohngiong unsek oh mour* unsek,+ 3 Siohwa omw Koht ahpw pahn ketin kapwureiukodo sang sensel+ oh kasalehiong uhk kadek kalahngan+ oh pwurehng kihiukpene sang rehn aramas akan koaros wasa me Siohwa omw Koht ketin kihiukpeseng ie.+ 4 Mehnda ma noumw aramas akan mwarahkpeseng lel ni imwin sampah, sang wasao Siohwa omw Koht pahn ketin kihiukpene oh kapwureiukodo.+ 5 Siohwa omw Koht pahn ketin waiukalahng nan sahpw me semomw ko sapwenikihla, oh ke pahn sapwenikihla sahpwo; oh e pahn ketin wiahiong uhk ken pweida mwahu oh katohtohweiukala tohtohsang semomw ko.+ 6 Siohwa omw Koht pahn ketin kamwakelehda* omw mohngiong oh mohngiong en kadaudokomw,+ pwe ken poakohng Siohwa omw Koht sang nan omw mohngiong unsek oh mour* unsek oh ken kak mour.+ 7 Eri, Siohwa omw Koht pahn ketikihdo keria pwukat koaros pohn omw imwintihti kan, me kin kailongki oh kalokeiuk.+

8 “Eri ke pahn pwurodo oh rong kapitien Siohwa oh kapwaiada sapwellime kehkehlik kan koaros me I kehkehlingkihong uhk rahnwet. 9 Siohwa omw Koht pahn ketin wiahiong uhk ken uhdahn pweida mwahu nan doadoahk koaros me ke wia,+ oh e pahn ketin katohtohwehla noumw seri kan oh noumw pelinmen oh wahn sapwomw, pwe Siohwa pahn ketin pwurehng kupwurperenki wiahiong uhk ken pweida mwahu, duwehte me e ketin kupwurperenki wiahiong semomw mehn mahs ako.+ 10 Eri ke pahn rong kapitien Siohwa omw Koht oh kapwaiada sapwellime kehkehlik kan oh koasoandi kan me ntingdi nan pwuhken Kosonned wet, oh ke pahn pwurodo rehn Siohwa omw Koht sang nan omw mohngiong unsek oh mour* unsek.+

11 “Kosonned wet me I kehkehlingkihong uhk rahnwet sohte nohn apwal ong uhk, de pil sohte dohsang uhk.+ 12 E sohte mi nanleng, pwe ken nda, ‘Ihs me pahn kohdahla nanleng oh wadohng kitail, pwe kitail en rong oh kapwaiada?’+ 13 E pil sohte mi palio sehdo, pwe ken nda, ‘Ihs me pahn kotehla sehdo oh wadohng kitail, pwe kitail en rong oh kapwaiada?’ 14 Pwe mahseno kin mihmihte limwahmw, nan ewomw oh nan omw mohngiong,+ pwe ken kapwaiada.+

15 “Kilang, rahnwet I kihdi mwohmw mour oh mwahu, oh mehla oh suwed.+ 16 Ma ke rong kehkehlik kan en Siohwa omw Koht me I kehkehlingkihong uhk rahnwet, ni omw poakohng Siohwa omw Koht,+ ni omw kekeid nan sapwellime ahl akan, oh ni omw kapwaiada sapwellime kehkehlik kan oh koasoandi kan oh kosonned kan, eri ke pahn mour+ oh tohtohla, oh Siohwa omw Koht pahn ketin kapaiaiukada nan sahpw me ke pahn sapwenikihla.+

17 “Ahpw ma omw mohngiong sohpeila+ oh ke sohte rong oh ke pitida oh poaridiong koht teikan oh papah irail,+ 18 I ndaiong kumwail rahnwet me kumwail uhdahn pahn sohrala.+ Kumwail sohte pahn mour werei nan sahpw me kumwail pahn kotehla Sordan pwehn sapwenikihla. 19 Rahnwet I wiahki nanleng oh sampah nin duwen sounkadehde kei ong kumwail, me I kihdi mour oh mehla mwohmw, kapai oh keria;+ oh ke anahne pilada mour pwe ken momour,+ kowe oh kadaudokomw kan,+ 20 ni omw poakohng Siohwa omw Koht,+ ni omw rong kapitie, oh ni omw loalopwoatohng ih,+ pwehki ih me omw mour oh pwehki ih ke pahn dadaurete ahnsou werei nan sahpw me Siohwa ketin kahukihla en ketikihong semomw mehn mahs ako, Eipraam, Aisek oh Seikop.”+

31 Moses eri kohieila oh koasoiaiong Israel pwon mahsen pwukat, 2 ndaiong irail: “Rahnwet I sounparehr 120.+ I solahr kak kahluwaiuk,* pwe Siohwa ketin mahsanihong ie, ‘Ke sohte pahn kotehla Sordan wet.’+ 3 Siohwa omw Koht me pahn ketin kotehla mwohmw, oh pein ih pahn ketin kamwomwala wehi pwukat me mi mwohmw, oh ke pahn kasareirailla.+ Sosua me pahn kahluwaiuk kotehla,+ duwehte me Siohwa ketin mahsanih. 4 Siohwa pahn ketin wiahiong irail duwehte me e ketin wiahiong Sihon+ oh Ok,+ nanmwarkien mehn Amor kan, oh sapwara ko ni eh ketin kamwomwirahla.+ 5 Siohwa pahn ketin kaloweiraildi ong kumwail, oh kumwail pahn wiahiong irail nin duwen kehkehlik ko pwon me I kihong kumwail.+ 6 Kommwad oh kehlail.+ Dehr masak de salohda mwohrail,+ pwe Siohwa omw Koht pahn ketin iang uhk karis kohla. E sohte pahn ketin mweisang uhk de pil keseiukala.”+

7 Moses eri ekerodo Sosua oh ndaiong ih mwohn mesen Israel pwon: “Kommwad oh kehlail,+ pwe kowe me pahn wahla aramas pwukat nan sahpw me Siohwa ketin kahukihong samarail mehn mahs ako me e pahn ketikihong irail, oh ke pahn kihong irail nin duwen sohso ehu.+ 8 Siohwa me pahn ketin karis mwohmw, oh e pahn kin ketin ieiang uhk.+ E sohte pahn ketin mweisang uhk de pil keseiukala. Ke dehr perki de masak mehkot.”+

9 Moses eri ntingihedi Kosonned wet+ oh kihong samworo mehn Lipai kan, me kin wa kohpwahn inou lap en Siohwa, oh rehn ohl mah koaros en Israel. 10 Moses kehkehlingkihong irail, nda: “Ni imwin sounpar isuh koaros, ni ahnsou me kileldi nan pahr en kasaledek,+ erein Kasarawien Impwal kan,*+ 11 ni Israel pwon ar uh mwohn silangin Siohwa+ omw Koht nan wasa me e ketin pilada ie, ke pahn wadek Kosonned wet ong Israel pwon pwe ren rong.+ 12 Kapokonepene aramas akan,+ ohl akan, lih akan, seri kan,* oh noumw mehn liki me kin kousoan nan omw kahnimw kan,* pwe ren rong oh esehla oh lemmwiki Siohwa amwail Koht oh kanahieng kapwaiada mahsen en Kosonned wet koaros. 13 Eri neirail seri kan me sehse duwen Kosonned wet pahn rong+ oh esehla lemmwiki Siohwa amwail Koht erein rahn koaros me kumwail momour nan sahpw me kumwail pahn kotehla Sordan pwehn sapwenikihla.”+

14 Siohwa eri ketin mahsanihong Moses: “Kilang! Omw ahnsoun mehla kerendohr.+ Ekerodo Sosua, oh kumwa kohla ni impwal en mihtingo, pwe I en idihada ih.”+ Moses oh Sosua eri kohla ni impwal en mihtingo. 15 Siohwa eri ketin pwarada ni impwalo ni uhren depwek, oh uhren depweko mi ni wasahn pedolong en impwalo.+

16 Siohwa eri ketin mahsanihong Moses: “Kilang! Ke pahn kereniongehr mehla,* oh aramas pwukat pahn tepida kaudokiong* koht en liki kan me mi limwahrail nan sahpw me re kohkohla ie.+ Re pahn keseiehla+ oh kauwehla ei inou lap me I wiahiong irail.+ 17 Ni ahnsowo I pahn engiengda pahrail,+ oh I pahn keseirailla+ oh ekihsang irail silangiet+ lao re mwomwla. Eri mwurin kahpwal oh lokolok tohto ar lelohng irail,+ re pahn nda, ‘Pwehki atail Koht sohte ketiket nanpwungatail me kahrehda kahpwal pwukat lelohng kitail?’+ 18 Ahpw I pahn usehlahte sohpeisang irail ni ahnsowo pwehki suwed koaros me re wiahda ni ar sohpeiong koht teikan.+

19 “Eri ntingihedi koul wet ong kumwa+ oh padahkihong mehn Israel kan.+ Irail en esehla met,* pwe koul wet en wia ei mehn kadehde ong aramas en Israel kan.+ 20 Ni ei pahn wairailla nan sahpw me I kahukihong samarail mehn mahs ako+—sahpw ehu me inenen pwelmwahu*+—oh re tungoal lao re medla oh pweida mwahu,*+ re pahn sohpeilahng koht teikan oh papah irail oh mwamwahlikiniehla oh kauwehla ei inou lapo.+ 21 Ni kahpwal oh lokolok tohto ar lelohng irail,+ koul wet pahn wia mehn kadehde ehu ong irail (pwe kadaudokarail kan en dehr manokehla met), pwe I eseier dahme re kin medemedewe en wia+ pil mwohn ei pahn wairailla nan sahpw me I kahukihla duwe.”

22 Moses eri ntingihedi koul wet ni rahno oh padahkihong mehn Israel kan.

23 Ih* eri ketin idihada Sosua+ nein Nun oh mahsanihong: “Kommwad oh kehlail,+ pwe kowe me pahn wahla mehn Israel kan nan sahpw me I kahukihong irail,+ oh I pahn kin ieiang uhk.”

24 Ni ahnsou me Moses kanekehla eh ntingihedi mahsen kan en Kosonned wet pwon nan pwuhk ehu,+ 25 Moses kehkehlingkihong mehn Lipai kan me kin wa kohpwahn inou lap en Siohwa, nda: 26 “Ale pwuhken Kosonned wet+ oh kihdi ni keilen kohpwahn+ inou lap en Siohwa amwail Koht, oh e pahn wia mehn kadehde ehu ong uhk wasao. 27 Pwe I uhdahn ese omw kin uhwong+ oh omw keptakai.*+ Ma kumwail kin uhwongada Siohwa ni ei momour, eri, ia uwen eh pahn laud en amwail uhwong mwurin ei mehla! 28 Kapokonepene rehi ohl mah kan koaros en amwail keinek kan oh amwail kaun akan, oh I pahn koasoia mahsen pwukat ni ar rongorong, oh I pahn wiahki nanleng oh sampah nin duwen sounkadehde kei ong irail.+ 29 Pwe I uhdahn ese me mwurin ei mehla kumwail uhdahn pahn wia me suwed+ oh sohpeisang ahl me I kehkehlingkihong kumwail. Oh ni imwilah, kahpwal uhdahn pahn lelohng kumwail,+ pwehki kumwail pahn wia dahme suwed mwohn silangin Siohwa oh kumwail pahn kansensuwedihala ih sang ni doadoahk en pehmwail kan.”

30 Eri ni mwomwohdisohn Israel pwon ar rongorong, Moses koasoia mahsen kan en koul wet sang ni tapio lel ni imwi:+

 3 Pwe I pahn lohki mwaren Siohwa.+

Koasoia duwen lapalap en atail Koht!+

 5 Irail me wia mwekid suwed.+

Irail kaidehn sapwellime seri, pein irail me sapwung.+

Irail dih ehu me suwed oh dipan!+

15 Ni Sesurun* eh mworouroula, e kik ni kahngohdi.

Ke mworouroula, ke toutoula, ke medla.+

29 Ma re loalokongete!+ Re pahn medemedewe mwahu met.+

Re pahn medewe dahme pahn wiawihong irail.+

Ren uhda oh sewesei kumwail.

Ren wiahla amwail wasahn ruk.

I kin kemehla, oh I kin kamourada.+

44 Moses eri kohdo oh koasoia mahsen kan koaros en koul wet ni aramas ako ar wie rongorong,+ ih oh Osea*+ nein Nun. 45 Mwurin Moses eh kaimwisekala eh koasoiaiong Israel pwon mahsen pwukat koaros, 46 e ndaiong irail: “Kumwail katengehdiong nan amwail mohngiong mahsen pwukat koaros me I panawihekin kumwail rahnwet,+ pwe kumwail en kehkehlingkihong noumwail seri kan ren kanahieng kapwaiada mahsen en Kosonned wet koaros.+ 47 Pwe kaidehn koasoi mwahl ehu met ong kumwail, ahpw e pid amwail mour,+ oh pwehki mahsen wet kumwail kak mour werei nan sahpw me kumwail pahn kotehla Sordan pwehn sapwenikihla.”

48 Ni rahnohte Siohwa ketin mahsanihong Moses: 49 “Kohdahla pohn nahnahn Aparim+ wet, Nahna Nepo,+ me mi nan sapwen Mohap, me sallahng Seriko, oh kilenglahng sapwen Kenan, me I pahn kihong mehn Israel kan ren sapwenikihla.+ 50 Eri ke pahn mehla pohn nahna me ke pahn kohdahla ie, oh ke pahn seridi duwehte semomw mehn mahs ako, duwehte riomw Aaron eh mehla pohn Nahna Or+ oh seridi duwehte seme mehn mahs ako, 51 pwehki kumwa koaros sohte lelepek ong ie nanpwungen mehn Israel kan ni pihl en Meripa+ en Kades nan sapwtehn en Sinn, pwehki kumwa sohte kasarawihiehla mwohn aramas en Israel kan.+ 52 Ke pahn kilang sahpwo sang wasa doh, ahpw ke sohte pahn pedolong nan sahpw me I pahn kihong aramas en Israel kan.”+

33 Eri iet kapai me Moses ohlen Koht mehlelo ndaiong mehn Israel kan mwohn eh mehla.+ 2 E nda:

 7 Oh e nda kapai wet duwen Suda:+

 8 Duwen Lipai e nda:+

12 Duwen Pensamin e nda:+

13 Duwen Sosep e nda:+

18 Duwen Sepulon e nda:+

19 Irail pahn ekerodo aramas akan ni nahna.

Irail pahn wiahda meirong ni pwung wasao.

20 Duwen Kad e nda:+

“Aramas me katehlapahla irepen sapwen Kad en ale kapai.+

Kaunen aramas akan pahn pokonpene.

22 Duwen Dan e nda:+

“Dan rasehng kisin laion men.+

E pahn lusieisang Pasan.”+

23 Duwen Napdali e nda:+

Sapwenikihla palikapi oh palieir.”

24 Duwen Aser e nda:+

“Aser alehdi kapai en naineki seri tohto.

29 Meid peren kowe, Israel!+

34 Moses eri kohdahla sang sapwtehn en Mohap kohla Nahna Nepo,+ leldahla kadoken Piska,+ me sallahng Seriko.+ Oh Siohwa ketin kasalehiong ih sahpwo pwon, sang Kilead lellahng Dan,+ 2 oh Napdali pwon oh sapwen Epraim oh Manase, oh sapwen Suda pwon lella ni sehden palikapi,*+ 3 oh Nekep+ oh sapwen Sordan,+ wasa patapat en wahun Seriko, kahnimw en tuhke pahm,* lella Soar.+

4 Siohwa eri ketin mahsanihong ih: “Ih sahpwet me I kahukihong Eipraam, Aisek oh Seikop, ni ei nda, ‘I pahn kihong kadaudokomw sahpwet.’+ I mweidohng uhk ken kilangki mesomw kan, ahpw ke sohte pahn kotehla oh kohla wasao.”+

5 Mwurin mwo sapwellimen Siohwa ladu Moses ahpw mehla nan sapwen Mohap duwehte me Siohwa ketin mahsanih.+ 6 E ketin sarepedi ih nan wahun sapwen Mohap, palilahsang Ped-peor, oh sohte me ese wasa me eh sousowo mi ie leledo rahnwet.+ 7 Moses sounpar 120 ni eh mehla.+ Mese ko sohte ediedla, oh eh kehl mihmihte reh. 8 Aramas en Israel ko eri sengisengki Moses nan sapwtehn en Mohap erein rahn 30.+ Eri rahnen sengiseng oh mwahieiki Moses ahpw imwisekla.

9 Sosua nein Nun ahpw direkihla erpit,* pwe Moses pwil peho powe;+ oh mehn Israel kan tepida rong ih, oh re kapwaiada duwehte me Siohwa ketin kehkehlingkihong Moses.+ 10 Ahpw sohte soukohp emen nan Israel me duwehte Moses,+ me Siohwa uhdahn ketin mwahngih.*+ 11 E wiahda kilel oh manaman kapwuriamwei koaros me Siohwa ketin poaronehla ih en wia nan sapwen Isip rehn Parao oh nah ladu kan koaros oh nan sapweo pwon,+ 12 iangahki wiewia kapwuriamwei kan oh manaman kamasepwehk me Moses kasalehda mwohn mesen Israel pwon.+