Mwaren Koht nan Nting Sarawi kan en Kristian ni Lokaiahn Krihs

Irail me samanih Paipel kin pohnese me mwaren Koht, me ntingkihdi mesen nting kan me adaneki Tetragrammaton (יהוה), kin pwarada kereniong pak 7,000 ni ahnsou me Palien Paipel ni Lokaiahn Ipru tepin ntingdi. Ahpw, me tohto medewe me e sohte pwarada ni ahnsou me Nting Sarawi kan en Kristian ni Lokaiahn Krihs (Madiu—Kaudiahl) tepin ntingdi. Pwehki kahrepe wet, pali laud en kawehwehn Paipel en ahnsouwet sohte kin doadoahngki mwar wet Siohwa ni ar kin kawehwehdi palien Paipel me re kin kahdaneki Kadehde Kapw. Pil ni ahnsou me re kin kawehwe iren Paipel kan me kohsang ni Palien Paipel ni lokaiahn Ipru, wasa me Tetragrammaton pwarada loale, pali laud en sounkawehwe kan kin doadoahngki “Kauno” a kaidehn mwaren Koht.

Paipel—Kawehwehn Sampah Kapw sohte kin idawehn koasoandi wet. E kin doadoahngki mwar wet Siohwa pahn pak 237 nan Nting Sarawi kan en Kristian ni Lokaiahn Krihs. Ni arail pilada en wia met, sounkawehwe kan pohnese ire mehlel riau pwukat: (1) Pelien nting en mahs akan en Palien Paipel ni Lokaiahn Krihs me mi rehtail rahnwet kaidehn uhdahn me tepin wiawihda. Pali laud en pelien nting kid kei me miehier rahnwet wiawihda sounpar riepwiki mwurin Palien Paipel ni Lokaiahn Krihs eh tepin wiawihda. (2) Ni ahnsowo, irail kan me kin pwurehng ntingihda mahsen kan en Paipel kin wiliankihdi Tetragrammaton ong Kyʹri·os, lepin lokaiahn Krihs ehu me wehwehki “Kauno.” De re kin pwurehng ntingihda sang pelien nting kan me wiliankihdier Tetragrammaton Kyʹri·os.

Pwihn en Kawehwehn Paipel en Sampah Kapw uhdahn kamehlele me mie mehn kadehde me Tetragrammaton pwarada nan tepin pelien nting kan ni lokaiahn Krihs. Pilipil wet poahsoanda pohn mehn kadehde pwukat me mi pah:

• Palien Paipel ni Lokaiahn Ipru me kadoadoahk ni mwehin Sises oh sapwellime wahnpoaron ko kin audaudki Tetragrammaton nan Paipelo pwon. Sangete mahso pali laud en aramas sohte kin akupwungki met. Oh pwehki pelien nting en Palien Paipel ni Lokaiahn Ipru sang ni mwehin tepin Kristian akan dierekdahr karanih Qumran, mehn kadehde wet uhdahn sansal kahrehda kitail sohte kak peikasalki met.

• Ni mwehin Sises oh sapwellime wahnpoaron ko, Tetragrammaton pil pwarada nan Palien Paipel ni Lokaiahn Ipru me kawehwehdi ni lokaiahn Krihs. Erein sounpar epwiki kei, me samanih Paipel kan kin medewe me Tetragrammaton sohte pwarada nan Palien Paipel ni Lokaiahn Ipru me kawehwehdi ni lokaiahn Krihs me adaneki Septuagint. Nanpwungen pahr 1940 lel pahr 1950, kisin tehn doaropwe kei me kisehn Septuagint me mi ni mwehin Sises, sansaldahr ong me samanih Paipel kan. Kisin tehn doaropwe pwukat kin audaudki mwaren Koht ni mesen nting en Ipru. Eri ni mwehin Siseso, mie mwaren Koht nan Paipel ni lokaiahn Krihs. Ahpw, mpen sounpar 300 mwurin mwehin wahnpoaron ko, pelien nting kan en Septuagint ni lokaiahn Krihs me pali laud kin doadoahngki, duwehte Codex Vaticanus oh Codex Sinaticus, mwaren Koht sohte mie nan pwuhk kan sang Senesis lel Malakai (wasa kan me mie mwaren Koht nan doaropwehn Paipel en mahs kan). Ihme kahrehda e sohte kapwuriamwei me nan pelien nting kan me nekinekla ahnsowo, mwaren Koht sohte dierek nan Kadehde Kapw, de Palien Paipel ni Lokaiahn Krihs.

  Sises ketin mahsanih ni sansal: “I kohkihdo ni mwaren Semei.” E pil ketin kasalehda me e kin ketin wia sapwellime doadoahk ni ‘mwaren Seme’

• Nting Sarawi kan en Kristian ni Lokaiahn Krihs kasalehda me Sises kin ketin doadoahngki oh kasalehda mwaren Koht ong meteikan. (Sohn 17:6, 11, 12, 26) Sises ketin mahsanih: “I kohkihdo ni mwaren Semei.” E pil ketin kasalehda me e kin ketin wia sapwellime doadoahk ni ‘mwaren Seme.’—Sohn 5:43; 10:25.

• Pwehki Koht me ketin kahrehiong Nting Sarawi en Kristian ni Lokaiahn Krihs (Madiu—Kaudiahl) en patehng Palien Paipel ni Lokaiahn Ipru, eri e sohte pahn pwung ma mwaren Siohwa pahn mwadangete salongasang nan Nting Sarawi kan en Kristian ni Lokaiahn Krihs. Nan mpen pahr 49 , tohnpadahk Seims ndaiong me mah kan nan Serusalem: “Semion kawehwehda mwahu duwen Koht eh tepin sohpeiong mehn liki kan pwe en ketikihsang nanpwungarail aramas ekei ong mware.” (Wiewia 15:14) E sohte pahn pwung Seims en nda soahng pwukat ma sohte me ese de kin doadoahngki mwaren Koht ni mwehin tepin Kristian ko.

• Kamwotepen mwaren Koht pwarada nan Nting Sarawi kan en Kristian ni Lokaiahn Krihs. Mwaren Koht mi nan lepin lokaia wet “Aleluia” nan Kaudiahl 19:1, 3, 4, 6. E kohsang ni lepin lokaiahn Ipru ehu me wehwehki “Kapinga Iah.” “Iah” iei kamwotepen mwaren Siohwa. Eden aramas tohto me pwarada nan Nting Sarawi en Kristian ni Lokaiahn Krihs kin kohsang ni mwaren Koht. Ni mehlel, pwuhk en roporop kan me pid ire wet kawehwehda me mwaren Sises kin wehwehki “Siohwa Iei Komour.”

• Nting en mehn Suhs akan mahs kasalehda me Kristian mehn Suhs kan kin doadoahngki mwaren Koht nan neirail pwuhk kan. Ehu pwuhk me wiawihda mpen pahr 300 oh audaudki ekei kosonned en mehn Suhs kan, me adaneki Tosefta koasoiahki nein Kristian ko pwuhk kan me isihsla ni rahnen Sapad: “Pwuhken Sounkalohki Rongamwahu kan oh pwuhk kan en minim [mehn Suhs Kristian kan] kin isihsla. Re mweidohng pwuhk ko en isihsla, iangahki wasa kan me Mwaren Koht pwarada ie nan pwuhk pwukat.” Pwuhk wet pil doula koasoia duwen dahme Sounpadahk men me ede Yosé mehn Kalili, me kin momour nan pahr 100 samwa koasoia. E nda me rahn teikan liki nan wihko, “mie me kin kihsang wasa kan me Mwaren Koht mi ie nan pwuhk pwukat [me kin dokedoke nein Kristian pwuhk kan] oh nekidala mepwukat, a luhwe ko kin isihsla.”

• Ekei me samanih Paipel pohnese me e mwomwen me mwaren Koht pwarada nan wasa kan me iren Paipel kan sang nan Palien Paipel ni Lokaiahn Ipru kin dierek nan Nting Sarawi kan en Kristian ni Lokaiahn Krihs (Madiu—Kaudiahl). Pahnangin oaralapo “Tetragrammaton nan Kadehde Kapw,” ehu dikseneri (The Anchor Bible Dictionary) koasoia: “Mie ekei mehn kadehde me Tetragrammaton, Mwaren Koht, Yaweh, pwarada nan ekei de koaros iren Paipel kan en K[adehde] M[ering] me dierek nan K[adehde] K[apw] ni ahnsou me K[adehde] K[apw] tepin ntingdi.” George Howard, emen ohl me samanih Paipel koasoia: “Tetragrammaton ntingdi nan Paipel ni lokaiahn Krihs [Septuagint] me wia Paipel me tepin Kristian kan kin doadoahngki. Kahrehda e konehng en nda me irail kan me ntingihada K[adehde] K[apw] kin doadoahngki Tetragrammaton ni arail kin pwurehng ntingihedi mahsen kan sang nan Palien Paipel [ni Lokaiahn Ipru].”

• Sounkawehwe ndand kan kin doadoahngki mwaren Koht nan Nting Sarawi kan en Kristian ni Lokaiahn Krihs (Madiu—Kaudiahl). Ekei sounkawehwehn Paipel pwukat doadoahngkihier mwaren Koht pil mwohn Kawehwehn Sampah Kapw eh wiawihda. Iet sounkawehwe pwukat oh arail kawehwehn Paipel kan: A Literal Translation of the New Testament . . . From the Text of the Vatican Manuscript, sang Herman Heinfetter (1863); The Emphatic Diaglott, sang Benjamin Wilson (1864); The Epistles of Paul in Modern English, sang George Barker Stevens (1898); St. Paul’s Epistle to the Romans, sang W. G. Rutherford (1900); The New Testament Letters, sang J.W.C. Wand, Pisop en London (1946). Pil kapatahiong mepwukat, nan ehu kawehwehn Paipel ni lokaiahn Spein me wiawihda nan pahr 1919, sounkawehwe men me ede Pablo Besson kin doadoahngki “Jehová” nan Luk 2:15 oh Sud 14, oh tohtohsang pak 100 nan nting tikitik kan me mi pah (footnote) nan nah kawehweo, e kin kasalehda me mie mwaren Koht nan wasa pwukat. Pil sounpar tohto mwohn kawehwe pwukat, Nting Sarawi kan en Kristian ni Lokaiahn Krihs me kawehwehdi ni lokaiahn Ipru me wiawihda nan pahr 1500 samwa kin doadoahngki Tetragrammaton nan iren Paipel tohto. Ni lokaiahn Sehmen kelehpw, kawehwehn Paipel 11 de tohtohsang kin doadoahngki “Siohwa” (de “Yahweh” ni nting en lokaiahn Sehmen) nan Nting Sarawi kan en Kristian ni Lokaiahn Krihs, oh sounkawehwe pahmen kin kapatahiong mwaren Koht nan parentheses ( ) mwurin “Kauno.” Kawehwehn Paipel ni lokaiahn Sehmen me tohto sang 70 kin doadoahngki mwaren Koht nan nting tikitik kan me mi pah (footnotes) de nan kawehwehn lepin lokaia kan.

  

• Kawehwehn Paipel ni lokaia kan me daulih silipwiki kin audaudki mwaren Koht nan Palien Paipel ni Lokaiahn Krihs. Kawehwehn Paipel tohto ni lokaiahn Aperika, Amerika (Native American), Eisia, Iurop, oh dekehn Pacific kan kin doadoahngki mwaren Koht ni saledek. (Kilang eden lokaia kan nan pali 2126 oh 2127.) Sounkawehwehn Paipel kan en kawehwe pwukat pilada en doadoahngki mwaren Koht pwehki kahrepe kei duwehte me kohda nan parakrap en mwoweo. Ekei kawehwehn Paipel pwukat en Nting Sarawi kan en Kristian ni Lokaiahn Krihs (Madiu—Kaudiahl), ahpwtehn wiawihda, me duwehte kawehwehn Paipel ni lokaiahn Rotuma (1999) me kin doadoahngki “Jihova” pahn pak 51 nan iretikitik 48, oh Paipel ni lokaiahn Batak (Toba) (1989) nan Indonesia, me kin doadoahngki “Jahowa” pahn pak 110.

  

Eri uhdahn mie kahrepe mwahu oh sansal en kapwuredohng mwaren Koht, Siohwa, nan Nting Sarawi kan en Kristian ni Lokaiahn Krihs. Ih met me sounkawehwehn Kawehwehn Sampah Kapw kan wiadahr. Re uhdahn wauneki mwaren Koht oh uhdahn perki kihsang mehkot me mi nan Paipel ni ahnsou me e tepin ntingdi.—Kaudiahl 22:18, 19.