2 Bo tarbaja suma ekipa

KE KI SIGNIFIKA

Ora ku omi ku minjer na tarbaja suma un ekipa na kasamenti, e ta sedu suma pilotu ku si ajudanti ku tene mesmu planu di vou. Mesmu ora ki ten difikuldadis, kada un delis ta fala “anos”, en ves di fala “ami.”

PRINSIPIU DI BIBLIA: “E ka ta sedu mas dus, ma e ta sedu un kurpu son.” — Mateus 19:6.

“Kasamenti i ka un kusa individual. Omi ku minjer dibi di tarbaja juntu pa e sedu filis.” — Christopher.

PABIA KI IMPORTANTI

Ora ku purblema ten, omi ku minjer ku ka sedu ekipa ta ataka n̈utru, en ves di ataka purblema. Kusasiñus ta bin torna un purblema garandi.

“Kasamenti i un tarbaju di ekipa. Si ami ku ña omi no ka sedu un ekipa no na sedu suma kolegas di kuartu, en ves di omi ku minjer — suma dus jintis ku mora juntu, ma ku tene opinion diferenti na ora di toma disisons importanti.” — Alexandra.

KE KU BU PUDI FASI

FASI ES TESTI

• Sera ki N ta pensa kuma diñeru ku N ta gaña i “son pa mi”?

• Sera ki N pirsisa di afasta di ña parseru pa N pudi sta mas avontadi?

• Sera ki N ta ivita familia di ña parseru, mesmu si N sibi kuma el i tene un relason forti ku elis?

KOMBERSA KU BU PARSERU

• Na kal aria o arias ku no ta tarbaja ben na kasamenti suma un ekipa?

• Na kal aria o arias ku no pudi minjoria?

• Ke ku no pudi fasi pa minjoria no diseẑu di tarbaja juntu suma ekipa?

SUẐESTONS

• Imaẑina bo sta na juga tenis kada un di bos sta na un ladu. En ves di kila, ke ku abo ku bu parseru bo pudi fasi pa bo sta na mesmu ekipa i juga kontra publema?

• En ves di pensa: ‘Kuma ku N pudi gaña?’ Pensa na: ‘Kuma ku no pudi gaña?’

“Ka bu pensa na kin ku tene roson o ku kin ku tene kulpa. Ke ki importanti i pa bu tene pas ku union na kasamenti.” — Ethan.

PRINSIPIU DI BIBLIA: ‘Bu ka dibi di jubi son pa bu interes, ma pa di utru tambi.’ — Filipensis 2:3, 4.