Bon konsijus ku minjoria vida di jintis

IMAẐINA ki nobu dutur munda pa zona ku bu sta. Na kumsada talves bu ka na fia di kuma i bon dutur. Ma ke ku bu na fasi si bu amigus bai konsulta na si mon, i se saudi minjoria ciu? Bu ka na bai konsulta na mon di ki dutur tambi?

Di mesmu manera, Palabra di Deus i suma ki dutur. Sertus jintis ka ta fia konsultal. Ma ora ke aplika si bon konsijus, se vida ta minjoria ciu. Jubi alguns isemplus.

Resolvi purblemas di kasamenti

Un minjer comadu Sumiatun fala sin: “Desdi sedu na ña kasamenti, N ta sintiba ki Dumas, ña omi, ta disprezan, pa kila, manga di bias, N ta kobal mal, N ta fercal kusas, te mesmu N ta dal pankada. I ta ten bias ku N ta staba nkomodadu dimas, tok N ta pirdi sintidu.

“Oca Dumas kumsa studa Palabra di Deus, N ta gozalba. Ma sin fasil sibi, N ta fikaba na sukuta si studu na utru kuartu. Un dia, N obi sertus versikulus ki fala sin: ‘Abos minjeris, bo fika bas di bo omis, suma ku bo sta bas di Siñor . . . Minjer dibi di rispita si omi.’ (Efésius 5:22, 33) Es palabras toka ña korson. N pidi Deus pa i purdan pa manera ku N ta trataba ña omi mal. N pidil pa i judan torna bon minjer. I ka tarda N kumsa studa Palabra di Deus juntu ku Dumas.”

Palabra di Deus fala tambi: “Omi dibi di ama si minjer suma si kurpu propi.” (Efésius 5:28) Sumiatun fala sin: “Aprindi es kusas tokanu ciu. N kumsa ku tisi Dumas un kopu di ŝa ora ki riba di tarbaju, i papia ku el di bon manera. Dumas, pa si ladu, kumsa ku gosta mas di mi, tambi i ta judan ku tarbaju di kasa. Anos tudu dus no kumsa ku sedu ‘bon pa n̈utru, sinti pena di n̈utru, purda n̈utru.’ (Efésius 4:32) Asin, no amor ku rispitu pa n̈utru kontinua kirsi. No pasa ja mas di 40 anus na un bon kasamenti. Bon konsijus di Palabra di Deus salba no kasamenti!”

Kontrola raiba

Un omi comadu Tayib fala sin: “N ta lestuba di paña raiba, N ta matiba na manga di geras, N ta ameasa jintis ku pistola. Tambi ora ku N paña raiba, N ta sutaba Kustriyah, ña minjer, tok N batil na con. Manga di jintis ta mediba mi.

“Un dia N lei palabra di Jesus ki fala asin: ‘N na da bos mandamentu nobu, pa bo ama n̈utru; suma ku N ama bos.’ (Jon 13:34) Es tokan ciu, i N disidi muda. Ora ki raiba toma konta di mi, N ta pidi Deus pa i judan manti kalmu. Logu ña raiba ta pasa. Ami ku ña minjer, no sigi konsiju ku sta na Efésius 4:26, 27 ki fala sin: ‘Nin ka bo fika ku raiba tok sol kai. Ka bo da diabu lugar pa i yentra.’ No ta lei Palabra di Deus i no ta ora juntu tudu noti. Es ta kaba ku purblemas di kada dia. I ta punu sta mas unidu.

“Gosi N kunsidu suma omi di pas. Ña minjer ku ña fijus gosta di mi i e rispitan. N tene manga di amigus. N ta sinti mas pertu di Deus. Na bardadi ami i omi ki sta filis.”

Vensi abusu di droga

Um omi comadu Goin fala sin: “N fasi parti di banda di jovens pirigosus. N ta fumaba ciu. N ta cami, i durmi na rua manga di bias. N ta fuma droga i N ta bindil. Es drogas seduba yamba ku droga comadu ecstasy. Pa bindil, N ta sukundilba bas di ña ropa anti-bala. N teneba kara meduñu, i N seduba duru. Ma mesmu asin N ta viviba sempri ku medu.

“I ka tarda un algin mostran es palabras: ‘Ña fiju, ka bu diskisi di ña nsinamentu; . . . pabia e na buriu anus di vida; tudu na kuri diritu ku bo.’ (Ditus 3:1, 2) N gostaba ciu di tene vida kumpridu i susegadu! N lei tambi es palabras: “Ermons ku N ama, suma ku no ten e purmesas, no limpa di tudu susidadi di kurpu ku di spiritu, pa no kompleta no santidadi ku rispitu pa Deus.” (2 Koríntius 7:1) Pabia di kila N disa droga, N para junta ku banda di jovens pirigosus, N kumsa sirbi Deus.

“Gosi N sta livri di droga mas di 17 anu. N sta na goza di bon saudi, bon familia, bons amigus i konsiensia limpu. N ka ta durmi mas na rua ku biñu na kurpu. N ta durmi susegadu na kama tudu noti.”

Para odia utru rasas

Un omi comadu Bambang fala sin: “Suma joven, N ta lebaba un vida di kriminosu. Manga di kilis ku N ta molostra seduba di un etnia pikininu ki N odiaba.

“Ku tempu, N kumsa buska Deus. Ña buska leban pa un grupu ku kustumaba junta pa studa Palabra di Deus. N risibidu ku tudu amor pa jintis ki fasi parti di kil propi etnia ku N odiaba! N notaba tambi ki na kil grupu di studu, diferenti rasas ta mistura ku n̈utru sin purblema. Kila dimiran ciu! N pasa ntindi palabras ki fala sin: ‘Deus ka ta fasi skuju di jinti, ma i ta seta tudu, di kalker rasa, ku rispital, ku ta fasi kil ki justu.’ — Atus 10:34-35.

“Gosi, ña korson sta livri di odiu kontra utrus. Sertus di ña minjor amigus fasi parti di etnia ki N odiaba. Ku si Palabra, Deus sinan ama.”

Bandona violensia

Un omi comadu Garoga fala sin: “Ocan mas nobu, mprindidu tris bias — dus bias pabia di furtu, un bias pabia N fakia un omi risu. Mas tardi N junta ku un grupu rebeldi, N mataba manga di jintis. Dipus ki gera kaba, N pasa sedu ŝef di un grupu di kriminosus. No ta ameasaba jintis pa e pudi danu diñeru o danu sertus nformasons. Ña guarda kostas ta kumpañan na tudu kau. N seduba algin pirigosu ku ta abusaba riba di utrus.

“Un dia N lei es palabras: ‘Amor i sufridur, i bon. Amor i ka nveẑosu; amor ka ta njata, i ka orgulyosu, i ka mal-kriadu, i ka intereseru, i ka lestu di raiba, i ka rankorosu.’ (1 Koríntius 13:4,  5) Es palabras toka ña korson. N munda pa utru ladu. N kumsa studa Palabra di Deus i aplika si konsiju na ña vida.

“Gosi, N ka sedu mas algin ku ta abusa riba di utrus. Ma, N rispitadu suma sinadur di Palabra di Deus. Ña vida tene sintidu.”

Palabra di Deus tene forsa

Es isemplus i ku utrus inda ta mostra ki “Palabra di Deus i bibu, i forti.” (Ebreus 4:12) Si konsijus i simplis. I ta da bon rusultadu. I ta buri forsa.

Sera ki Palabra di Deus pudi judau tambi? Sin, i pudi, na tudu bu purblemas ku bu sta na pasa. “Tudu Skritura, i Deus ku nspiral; i ten purbitu pa nsina, pa raprindi, pa kuriẑi, pa mostra manera di yanda diritu, pa omi di Deus pudi sta kompletu, trenadu diritu pa tudu bon tarbaju.” — 2 Timótiu 3:16, 17.

Pa kila, no na jubi alguns di nsinus prinsipal ki sta na Palabra di Deus.