3 SARA
I nega jubi pa tras
SARA kasa ku Abraon, omi ki ama ciu. E ta viviba na Ur, un sidadi ku tene mura garandi pertu di garandi riu Eufrates. Jintis di ki sidadi ta adoraba manga di deusis falsu, ma Abraon ku Sara seduba diferenti delis. E ta adoraba Deus di bardadi, Jeova. Ma i ka na tarda, Sara na pirsisa di mostra inda mas fe ku koraẑen. Pabia?
Abraon falal di kuma Jeova papia ku el! Sara dibi di staba ku presa di sibi ke ku Jeova falal. Ma ke ku Jeova falaba Abraon pa fasi, ka seduba fasil. E tenba ku disa se kasa ku se familias na Ur i bai pa un tera lunju. E tenba ku fasi un bias kumpridu tambi i na seduba lentu, i e tenba ku vivi na tendas. Pa kila, Sara ka na vivi mas na sidadi ku rodiadu ku mura garandi ku guardas. Tambi, i ka na vivi mas na un kasa garandi ku tene yagu kanalizadu ku utrus kusas konfortavel. Nin i ka na pudi bai fera di Ur pa kumpra kusas di kume ku utrus kusas. I tenba manga di difikuldadis. Ma mesmu asin, Sara staba prontu pa bai. I pui fe na Jeova, i ruma si kargus, i dispidi si familias ku si amigus, i bai ku Abraon pa tera ke ka kunsi.
En ves di nsisti na fala Abraon pa e riba pa vida suguru ke teneba na se kasa na Ur, Sara apoia si disison di bai na kualker kau ku Jeova manda elis.
Sara mostra koraẑen mas di utru manera. Apostolu Paulu fala sin aserka del ku si omi: “Si na bardadi se sintidu staba na nunde ke sai, e tenba manera di riba.” (Eb 11:15) Sara pudiba fika i ba ta pensa na kasa ki teneba na Ur ku suguransa ki teneba la. Ma en ves di kila, ku koraẑen i nega jubi pa tras.
Oca ke ciga na tera di Kanaan, Sara oja di kuma, la ka tene riu garandi suma Eufrates ku barkus pa tisi kusas di kume, ku utrus kusas ke pudi kumpra. Pa kila, oca ku fomi ten na Kanaan, e tenba ku bai pa utru ladu. Apesar di kuma i seduba difisil, Sara ka nsisti na fala Abraon pa e riba pa Ur. En ves di kila, i staba dispostu pa viaja ku Abraon pa Ejitu.
Suma Sara bonitaba dimas, Abraon mediba pa ka algin bin matal pa fika ku el. Abraon pidi Sara pa i fala di kuma el i si ermon. Ma es ka seduba di ajuda oca ku rei di Ejitu obi faladu di bonitasku di Sara. I da ordi pa toma Sara na mon di Abraon pa lebal na si palasiu. Na bardadi, vida na palasiu pudi parsi mas suguru i konfortavel, di ki munda di un ladu pa utru i vivi na tendas. Ma sera ki Sara disidi bandona Abraon i fika na palasiu pa vivi sabi ku rei di Ejitu? Nau. I mostra koraẑen ku fe na Jeova, i Jeova salval! Nin i ka tarda, i ribantadu na mon di si omi ki gosta ciu del.a
Jeova purmitiba di kuma, un nason garandi na bin atraves di Abraon. Ma Sara ka pudiba tene fiju. Es seduba difisil pa rel. Ma, dipus di manga di anus na Kanaan, Jeova bensua Sara. Apesar di kuma i teneba 90 anu, Jeova bensual, i dal ke ki mas mistiba. I padi un fiju macu! Jeova fala pa mininu comadu Isaki ku signifika “ri.” Abraon ku Sara ri di kontentamentu oca ke obi di kuma e na tene un fiju macu, i Sara staba konvensidu di kuma jintis na ri ku el ora ke obi di milagri ku Jeova fasi pa rel.
Sara vivi manga di anu, kila pirmitil kiria si fiju i ojal na sedu un omi ku ama Deus. Es seduba pusivel pabia Sara seduba un mame amorosu ku tene koraẑen pa proteẑil oca ki na gozadu i tratadu mal. Tok i muri, Sara ka pensa riba tras pa un vida sabi. En ves di kila, i konsentraba na un futuru bonitu. Sara ku si familia ka oja kumprimentu di purmesas di Jeova pa futuru. Ma, no tene sertesa di kuma, nin i ka na tarda e na ojal!
Lei es storia na Biblia:
Kumsada 12:1-20; 15:18; 16:1, 2; 17:3-8, 15-19; 18:9-15; 20:1-17; 21:1-13
Atus 7:1-7
Pa kombersa del:
Di kal maneras ku Sara mostra koraẑen?
Fasi piskisa pa ntindi minjor
1. Sera ki i seduba mal manera ku Sara ku Abraon kasa apesar di e junta pape? (wp17.3-TPO paẑina 12 paragrafu 5, nota bas di paẑina.)
2. Konta ke talves ku Sara disa pa tras oca ki sai di Ur. (wp17.3-TPO paẑina 13 paragrafu 4 te paẑina 14 paragrafu 3) A
Photograph taken by courtesy of the British Museum
Foto A: Un pesa di joias ku disinteradu na antigu Ur
3. Ke ku ta mostra di kuma Abraon aẑi ku jiresa oca ki fala Sara pa ka i konta di kuma el i si omi? (wp17.3-TPO paẑina 14 paragrafu 7 te paẑina 15 paragrafu 2)
4. Sara teneba rispitu garandi pa Abraon suma ŝef di familia. Ma sera ki es signifika di kuma, nunka i konta Abraon ke ki i na sinti mesmu se tene opinion diferenti? Splika. (g-T 1/08 paẑina 29 paragrafu 4 ku 5) B
Diseñu B
Pensa na kuma di aplika es lisons
Kompara Sara ku minjer di Lo.
Di kal manera ke parsi? (Kum 12:1; 13:5-7; 19:12, 15)
Di kal manera ke diferenti? (Kum 19:17, 26; Luk 17:28-32)
Ke ku no pudi aprindi di disisons ke toma, ku ke ku kontisi ku elis?
Sara bonitaba dimas, i si omi seduba riku. Ke ku no pudi aprindi del si no sta na mesmu situason? (Dit 31:30; 1 Tim 6:17-19)
Kuma ku bu pudi kopia koraẑen di Sara na bu vida? C
Foto C
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Sara ora ki resusitadu?
Aprindi mas
Sera ki isemplu di Sara i so pa minjeris? Sera ki omis tambi pudi aprindi di si isemplu?
Jubi ke ku Sara ku Abraon fasi pa kada un delis sinti di kuma i rispitadu.
“Fasi pa ’fugu forti di SIÑOR’ kontinua sindi” (w23.05 paẑina 24 ku 25 paragrafu 15 te 17)
a Algun tempu dipus, Sara pasa mesmu situason oca ku un rei comadu Abimeleki tomal na mon di Abraon. Ku koraẑen Sara sigi orientason ku Abraon dal, mas un bias Jeova salval.