5 ABRAON
Nin si kontra i seduba difisil, i obdisi Deus
ABRAON sta na yanda lentu pa bai pa lugar ku Jeova falal pa i bai. I staba disididu pa bai la. Es bias pudi leba so alguns dias, ma na tudu si vida, es i bias mas difisil pa rel.
I kontinua kuda aserka di ke ku Jeova pidil pa i fasi: ‘Toma Isaki, bu uniku fiju, kil ku bu ama, bu bai pa tera di Moriá, bu matal riba di altar, bu kemal suma oferta, riba di un di montañas ku N na mostrau.’ Jeova sibiba kuma Abraon gostaba ciu di Isaki. Pabia di ke gora ki pidil pa i fasi un kusa des? I kuma ku Abraon pudi konsigi fe ku koraẑen ki pirsisa del pa obdisi?
Biblia coma Abraon di “pape di tudu kilis ku fia”. (Rom 4:11) I mostraba ja fe pa manga di anus antis des kontisi, i Jeova judal torna si fe mas forti. Pur isemplu, manga di anus atras, Jeova fala Abraon di kuma i na kaba ku sidadi di Sodoma ku Gomora ku teneba jintis mau. Abraon staba preokupadu, i punta Jeova si na bardadi i na kaba ku jintis bon juntu ku jintis mau. Ku pasensa, Jeova fala Abraon di kuma i ka na kaba ku ki sidadis si kontra i oja la nin si so alguns jintis justu. (Kum 18:16-33) Abraon aprindi di kuma Jeova i justu tambi i ta purda. Nunka i ka na diskisi des.
Jeova pidi Abraon pa i fasi un kusa ku nin un pape ku ama si fiju, ka na ciga di pensa fasi. Kuma ki konsigi tene koraẑen pa obdisil?
Nin i ka tarda, Jeova fasi un kusa dimiradu pa Abraon ku Sara. Apesar di kuma Sara teneba kuas 90 anu i Abraon tene kuas 100 anu, Jeova fasi un kusa impusivel pa relis, e tene un fiju, Isaki! Abraon aprindi di kuma nada ka impusivel pa Jeova; i pudi da vida pa un kusa ku parsi di kuma i muri. (Rom 4:18, 19) Es lison staba tambi na pensamentu ku korson di Abraon.
Serka di 25 anu dipus, ku sertesa Abraon fika i na pensa nes lisons nkuantu i na bai pa Moriá. I ciga es konkluson di kuma: Mesmu si Isaki muri, Jeova tene puder ku diseẑu di lantandal! (Eb 11:19) Es speransa dal koraẑen ki pirsisa del, pa kila, Abraon bai pa lugar ku Jeova falal.
Oca ku Abraon oja di lunju lugar ku Jeova kuji, i fala si servus pa e peral, nkuantu el ku Isaki e na subi pa bai fasi sakrifisiu. Ku konfiansa i fala di kuma, el ku Isaki e na riba. Apesar di kuma Isaki seduba joven tambi i mas si pape tene forsa, i disa pa kila maral mon ku pe, dipus i ditandal na altar. Abraon staba prontu pa fasi ke ku nunka un pape ku ama si fiju, ka na ciga di pensa fasi. I pega faka, i yalsal. Na ki ora un anju comal ku forsa i falal: “Ka bu pui mon na rapas; ka bu fasil nada.” Abraon para.
Dipus Deus ngaba Abraon pa si fe ku obdiensia. I ripiti si purmesa di kuma i na bensua Abraon, i na pui pa si jorson ciu, tambi i na pui pa “tudu nasons di mundu” pudi risibi bensons garandi pabia di ke ku Abraon staba dispostu pa fasi.
Es purmesa ku Jeova fasi Abraon sta inda na kumpri. Es na tisi bensons ku ka ta kaba. Storia di Abraon mostra utru kusa aserka di Jeova. Jeova danu un amostra di dur ki na bin pasa pa pudi salva tudu jintis fiel. Suma ku Abraon staba dispostu pa sakrifika si fiju ki ama ciu, asin tambi ku Jeova staba dispostu pa da si uniku fiju, Jesus, asin tudu jinti na pudi tene un futuru bonitu. (Jon 3:16) Pa kila, ora ku no aprindi aserka di kuma ku Abraon staba dispostu pa da un kusa mas importanti pa rel, no ta aprindi te kal pontu ku Jeova amanu.
Suma Abraon, no fe na torna mas forti si no ka diskisi nunka ke ku Jeova fala i fasi na pasadu. Nkuantu no fe na kirsi, no na tene mas koraẑen. No ka pirsisa di preokupa si Deus na pidinu pa no fasi un kusa suma kil ki i pidi Abraon pa i fasi. Nunka i ka ciga di pidi utru algin pa fasi mesmu kusa. Ma no pudi tene es sertesa: Kualker kusa ku no Deus pidinu pa fasi, no fe nel na danu koraẑen di obdisil. I no obdiensia na tisi mas bensons ku no ka pudi imaẑina!
Lei es storia na Biblia:
Kumsada 22:1-19
Ebreus 11:11, 12, 17-19
Pa kombersa del:
Di kal maneras ku Abraon mostra koraẑen nes mumentu di si vida?
Fasi piskisa pa ntindi minjor
1. Kuma ku no sibi di kuma Abraon izisti? (g-T 5/12 paẑina 18, kuadru; it-T “Abrão” paragrafu 22 ku 23) A
Foto A: Un skritura antigu na Karnak, Ejitu, fala di “Kampu di Abron”
2. Kuma ku Abraon aprindiba aserka di Jeova? (ia-T paẑina 26 paragrafu 4 ku 5)
3. Pabia ku Jeova seta adorason di Abraon? (rr-TPO paẑina 20 paragrafu 18)
4. Kuma ku purmesa di Jeova pa Abraon na Kumsada 22:17 ta prova di kuma Biblia i bardadi? (g88-T 8/4 paẑina 25) B
Foto B
Foto B
Pensa na kuma di aplika es lisons
Kuma ku speransa di Abraon judal sedu koraẑosu? Kuma ku konsentra na no speransa na judanu sedu koraẑosu? C
Fotos C
Kuma ku no pudi kopia koraẑen di Abraon i fasi sakrifisiu ora ku. . .
no tene oportunidadi di papia ku algin aserka di Jeova? (Eb 13:15)
no na disidi kuma ku no na usa no kusas material? (Dit 3:9)
no sibi di kuma no ermon o irma pirsisa di no ajuda? (Fil 4:18)
Di kal utru manera ku bu pudi kopia koraẑen ku Abraon mostra nes storia?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Abraon ora ki resusitadu?
Aprindi mas
Nes video, jubi kusas ku faladu del nes storia.
Kuma ku Abraon konsigi sedu amigu intimu di Jeova, i kuma ku bu bu pudi fortalisi bu amisadi ku Jeova?