9 SIFRÁ, PUÁ, ANRAN, JOKEBEDI, MIRIAN
Pabia di se fe e proteẑi Moisés
I FASIBA ja mas di 60 anu ku José muri. Ejipsius diskisi di e omi fiel ku Jeova usa pa salva se nason di fomi. Gosi, i ten nobu Faraó, ku na manda na Ejitu i odiaba israelitas, tambi i ta mitiba elis medu. Israelitas staba na aumenta ciu pabia Jeova staba na bensua elis. Pa kila, ejipsius pui pa israelitas sedu se skravu i e ta trataba elis mal. Mesmu asin es skravus kontinua na aumenta.
Dipus Faraó tenta fasi un kusa mau dimas. I da ordi pa tisil dus parteras israelitas Sifrá ku Puá. Bu pudi imaẑina kuma ke sinti, oca e guvernati ku tene puder da elis ordi di kuma, ora ke juda minjeris na partu pa e mata tudu mininu macu! Ma es dus minjer koraẑosu “tenba medu di Deus”. E sibi di kuma, nin un omi, nin si kontra i tene puder i ka tene diritu di pui elis disobdisi Jeova, algin mas Garandi na universu. Rispitu garandi ke tene pa Deus juda elis mostra koraẑen. “E ka fasi suma ku rei di Ejitu fala elis.” En ves di kila e fasi kontrariu: E juda na proteẑi i salva manga di mininus ke pudi salva. Faraó staba ku raiba, ma e ka kontal ke ke fasi. Jeova oja ke ke staba na fasi. Pabia di kila, “Deus fasi bondadi pa ki parteras”. Ku tempu i da elis se propi familia.
Si kontra parteras, papes di Moisés ku si irma ka mostraba koraẑen, ke talves ku na kontisiba ku el ocal bebe?
Oca Faraó nota di kuma si planu ka da sertu i disidi fasi utru kusa mas pior inda: I manda ejipsius pa e bota tudu mininu macu israelitas na riu Nilu! Duranti ki tempu difisil, un kasal israelita comadu Anran ku Jokebedi tenba ku toma un disison difisil. E teneba ja dus fiju, Mirian ku Aron. Ma oca ku Jokebedi preña se turseru fiju, el ku Anran e sibi di kuma, si kontra e tene un fiju macu, i na sta na pirigu garandi. Oca ku se fiju macu padidu e tenta sukundil mas tempu ke pudi. Ma i ka fasil sukundi un mininu. Oca ki tene tris mis, Jokebedi kumpu sestu di paja i foral ku alkatron, i dipus i ditanda mininu la. I bai i sukundi ki sestu entri pajas ku sta na riu Nilu. Si fiju femia Mirian, sukundiba pertu i na jubi ke ku na kontisi ku si ermonsiñu.
Na ki mumentu fiju femia di Faraó bin laba kurpu na riu Nilu. I oja sestu i manda un bajuda ku sedu si skravu, pa i bai buskal ki sestu. Oca ki yabri sestu i oja un mininu macu bonitu ku na cora, i sinti pena del. I disidi krial suma si fiju. Ma i nota di kuma i na pirsisa di un mame ku na mamantal. Mirian sibi logu ke ki dibi di fasi, ku koraẑen i kuri i bai nunde fiju femia di Faraó i puntal si pudi ranja un minjer ku na mamantal mininu, kila seta. Dipus Mirian tisi si mame propi. Imaẑina kontentamentu ku Jokebedi tene di sibi di kuma i pudi mamanta si fiju ku suguransa i kuida di si bebe ki gosta ciu del, riba di kila i na pagadu mas! Ku sertesa el ku Anran e fasi tudu ke pudi pa nsina se fiju aserka di Jeova. Ma oca ku mininu kirsi e dibi di ribantal na mon di fiju femia di Faraó. Kila pul nomi di Moisés.
Sera ki Jeova paga Anran, Jokebedi ku Mirian pa fe ku koraẑen ke mostra? Sin duvida! Anran ku Jokebedi kria Mirian ku Aron pa e sedu servus fiel di Jeova. E konsigi oja kuma ku Jeova proteẑiba Moisés. Biblia ka konta si kontra e vivi manga di tempu pa oja kal tipu di omi ku Moisés bin sedu. (Sai 6:20) Ma ku sertesa Mirian ku Aron oja. E oja Jeova usa Moisés pa fasi milagris. Elis tris e mostra un fe garandi dimas ku koraẑen. Na prosimu kapitulu, no na aprindi kuma ku Moisés kirsi i disidi sirbi Jeova.
Lei es storia na Biblia:
Saida 1:6–2:10
Atus 7:17-21
Ebreus 11:23
Pa kombersa del:
Di kal manera ku parteras, ku familia di Moisés mostra koraẑen?
Fasi piskisa pa ntindi minjor
1. Ke ku piskisaduris fala ku ta mostra di kuma es storia i bardadi? (g04-T 8/4 paẑina 4 paragrafu 4 te paẑina 5 paragrafu 1)
2. Ke ku ta apoia ke ku Biblia fala, aserka di sestu ku kumpudu ku papiru, ku ordi ku Faraó da pa mata mininus israelita? (g04-T 8/4 paẑina 6 paragrafu 1 ku 2) A
Christine Osborne Pictures/Alamy Stock Photo
Foto A: Mesmu aos, paja comadu papiru ku ta nasi na riu ta usadu pa kumpu kanuas
3. Ke ku no sibi aserka di parteras israelita, i kuma ke abensuadu? (w03-T 1/11 paẑina 8 paragrafu 3 ku 4; it-T “Parteira”) B
Diseñu B
4. Kuma ku Mirian mostra fe garandi na si bejisa? (ijwia -TPO artigu 7 paragrafu 14 te 18)
Pensa na kuma di aplika es lisons
Ke ku papes pudi aprindi di Anran ku Jokebedi?
Ke ku muninus ku tene ermonsiñu pudi aprindi di Mirian ocal mas joven? C
Fotos C
Kuma ku bu pudi kopia koraẑen di Sifrá ku Puá?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Sifrá, Puá, Anran, Jokebedi ku Mirian ora ke resusitadu?
Aprindi mas
Jubi kuma ku no pudi aprindi di minjeris ku tene koraẑen di disobdisi ordi di Faraó.
“Minjeris ku kontenta korson di Jeova” (w03-T 1/11 paẑina 8 ku 9 paragrafu 3 te 5)
Sera ki Jeova kontinua kuida di kilis ku obdisil ku koraẑen suma guvernanti en ves di omis?