Usa bon palabras na bon mumentu ora ku bu na nsina bardadis di Biblia

1. Ke ku no dibi di fasi pa pudi fasi parti di familia di Jeova?

ORA ku no kontra pa purmeru bias ku un ermon o irma, un di purguntas ku no ta fasil i es: “Kuma ku bu kunsi bardadi?” Alguns ta ruspundi: “N kriadu na bardadi.” I utrus ta fala: “I ka tarda ku N kunsi bardadi.” No ta ruspundi des maneras, pabia bardadi di Palabra di Deus influensia tudu no manera di vivi. Pabia? Pabia no sibi di kuma, no pudi fasi parti di familia di Jeova so si no mostra di kuma no ama bardadis i no ta vivi di akordu ku el. Es nklui sedu onestu na no palabras ku no asons. — Sal 15:​1-3.

2. (a) Ke ku jintis sibiba aserka di Jesus? (b) Kal efeitu ku talves bardadi ku Jesus nsinaba na tene na jintis?

² Jesus sempri ta konta bardadi. Te si inimigus rikuñisi di kuma i ta konta bardadi, mesmu manera ku utrora e ka ta kontenti ku ke i ta fala. (Mat 22:16) Jesus fala sin aserka di efeitu ku bardadi ki nsina na tene na jintis: “N bin pa dividi omi kontra si pape, fiju femia kontra mame, minjer kontra mame di si omi.” (Mat 10:35) Jesus ka mistiba pa jintis reaẑi mal pa mensaẑen ku el ku si disipulus e staba na prega, ma i sibiba di kuma kila na kontisi. (Mat 23:37) I sibiba di kuma si mensaẑen na dividi mundu na dus grupu, kilis ku gosta di bardadi di Biblia ku kilis ku ka gosta. — 2 Tes 2:​9-11.

3. Ke ku no na bin fala del nes studu?

³ Suma Jesus, no ta fasi sforsu di sedu onestu, i konta bardadi na tudu situason, mesmu si fasi kila na pui jintis sta kontra nos. No ta prega i nsina bardadis di Biblia, mesmu si alguns paña raiba o fika mal ku ke ku no fala. Sera ki es signifika di kuma no ka dibi di mporta ku kuma ku no na konta bardadi di Biblia i na kal mumentu ku no dibi di kontal? Nau i ka kila! Nes studu, purmeru no na ruspundi es purgunta: Nunde ku no pudi oja bardadi? Dipus no na ruspundi utru purgunta ki sta ligadu ku el: Pabia ku no dibi di konta bardadi, kuma ku no na kontal i na kal mumentu ku no na kontal? Resposta des purguntas na judanu minjoria no manera di konta bardadis di Biblia ku rispitu, i na bon mumentu.

NUNDE KU NO PUDI OJA BARDADI?

4. Pabia ku no pudi fala di kuma bardadi bin di Jeova?

⁴ Bardadi bin di Jeova. Tudu ki fala i bardadi. Pur isemplu, ke ki fala aserka di ke ki bon ku ke ki mal i bardadi. (Sal 19:9; 119:​142, 151) Tudu si purmesas aserka di futuru ta kumpri. (Isa 55:​10, 11) I ka na maina ku ke ki purmiti. (Num 23:19) Na bardadi, Jeova ka pudi konta mintida! (Eb 6:18) Pabia des ku pui Jeova comadu di “Deus di bardadi”. — Isa 65:16.

5. Pabia ki ka difisil oja Deus di bardadi? Bu pudi splika. (Atus 17:27)

⁵ Alguns jintis ta fala di kuma i difisil kunsi Jeova, Deus di bardadi. Ma e sta eradu. Na no volta i ten manga di kusas ku ta prova di kuma Deus ten. (Rom 1:20) Oca ki na papia ku un grupu di gregus jiru na Atenas, apostolu Paulu fala di kuma Deus misti pa e ‘ojal’ i di kuma “i ka sta lunju di kada un di nos”. (Lei Atus 17:27.) Na bardadi, Jeova ta tisi jintis umildi pa rel, jintis ku sta na buska kunsi bardadi. — Jon 6:44.

6. Kal ki alguns bardadis ku sta na Biblia, i pabia ku bu kontenti kunsi elis?

⁶ Un di maneras ku no pudi oja Jeova i atraves di studa Biblia. Omis ku skirbi Biblia nspiradu pa spiritu santu di Deus. (2 Ped 1:​20, 21) Pa kila, tudu ku sta na Biblia i bardadi, i mersi no konfiansa. Pur isemplu, no pudi fia na ke ku Biblia fala aserka di oriẑen di seu, i di tudu kusas bibu ku sta na tera. (Kum 1:​1, 26) No pudi fia na ke ki fala aserka di ke ku manda anos tudu no tene pekadu, i pabia ki ten manga di sufrimentu ku mortu. (Rom 5:12; 6:23) No pudi tene tudu konfiansa manera ku Biblia fala di kuma Jeova, atraves di si Fiju i na bin kaba ku tudu mal ku Satanas, “pape di mintida” kausa. (Jon 8:44; Rom 16:20) No pudi fia na purmesa ku Biblia fasi di kuma Jesus na bin kaba ku Satanas, i na lantanda kilis ku muri, i na torna tera na paraísu, tambi i na judanu sedu perfeitu. (Jon 11:​25, 26; 1 Jon 3:8) Jeova danu oportunidadi garandi! I nsinanu bardadi, i danu tambi oportunidadi di nsina utrus el. — Mat 28:​19, 20.

PABIA KU NO TA KONTA BARDADI

7-8. Sera ki motivu ku ta lebanu na konta bardadi importanti? Bu pudi da un isemplu. (Markus 3:​11, 12) (Jubi tambi fotos.)

⁷ Suma ku no ojaba, no dibi di konta bardadi si no misti fasi parti di familia di Jeova. Ma pa kontenta Jeova, i pirsis mas di ki so konta bardadi. Motivu ku na lebanu na konta bardadi i importanti pa Jeova. Pensa na un kusa ku kontisi oca Jesus staba na tera. (Lei Markus 3:​11, 12.) Oca Jesus staba na prega pertu di Mar di Galileia, manga di jintis bai pertu el. Entri elis i sta alguns jintis ku dimoniu yentra ku mborka dianti di Jesus i ku grita: “Abo i Fiju di Deus!” Pabia ku dimonius konta bardadi aserka di Jesus? Talves se objetivu seduba di ngaña konfiansa di kilis ku na sukutaba elis, i dipus disvia elis di sirbi Jeova. Ke ku dimonius fala i bardadi, ma se motivus seduba iguista. Jesus ka kontentiba ku kila, pabia i sibiba diritu kal ki se motivason. E ku manda i da elis ordi pa e ka prega na si nomi.

⁸ Ke ku no pudi aprindi des isemplu? Motivu ku ta pui no konta bardadi i importanti pa Jeova. Pa kila, i muitu importanti pa no nsina utrus bardadi pabia di amor ku no tene pa Jeova, i si utrus tenta ngabanu pa mensaẑen ku no ta prega, no ngaba Jeova en ves di ngaba no kabesa! — Mat 5:16; komparal ku Atus 14:​12-15.

9. Ke ku no dibi di ivita del, i pabia di ke?

⁹ Pensa na utru situason nunde ku no pirsisa di ivita ngaba no kabesa. Imaẑina kuma un ansion kontau un kusa konfidensial, i dipus bu bin bai konta utrus el. Si kilis ku bu konta bin diskubri di kuma ke ku bu fala elis i bardadi, e pudi fika dimiradu ku bo, i pensa di kuma bu sibi manga di kusas konfidensial. E pudi kumsa ku ojau suma un algin importanti, ma i ka asin ku Deus na ojau. (Dit 11:13) Pabia? Pabia ke ku bu konta i bardadi, ma bu ka teneba diritu di kontal pabia i konfidensial, tambi bu fasil ku mau motivason.

KUMA KU NO TA KONTA BARDADI

10. Ke ku signifika kombersa “sabi”? (Kolosensis 4:6)

¹⁰ Lei Kolosensis 4:6. Apostolu Paulu lembranta kristons ku mora na Kolosus di kuma, se kombersa sempri “dibi di sabi”. Ke ku kila signifika? Palabra gregu ku usadu li signifika di kuma, ke ke na fala dibi di juda utrus, tambi i dibi di sedu bon i atraenti.

11-12. Pabia ku no dibi di nsina bardadi ku kuidadu? Bu pudi da un isemplu. (Jubi tambi fotos.)

¹¹ No pirsisa di aplika konsiju di Paulu i tene kombesa sabi ora ku no na nsina utrus bardadi. Biblia kompara bardadi ku sta dentru del suma un spada ku pudi dividi no alma ku spiritu. I signifika di kuma i pudi judanu oja kin propi ku no sedu i kal ki no motivasons. (Eb 4:12) Ma si no ka usal diritu i pudi pui pa un algin paña raiba di nos o no pudi ranja jus ki ka pirsis. Kuma ku kila pudi kontisi?

¹² Imaẑina es situason. Na pregason, bu kontra ku un omi ku ta ora sempri dianti di imaẑens i ku gosta di fasi festa di Natal ku Paskua juntu ku si familia. Bu pudi usa Biblia pa mostral di kuma i tulesa ora dianti di statua ku ka tene vida, i mostral provas di kuma Natal ku Paskua i festas pagon. (Isa 44:​14-20; 2 Kor 6:​14-17) Si bu fasi kila logu na purmeru kombesa ku el, bu kontal bardadi, ma bu ka usa Palabra di Deus diritu.

13. Kuma ku no pudi tempra no palabras pa i da gustu pa obi?

¹³ Paulu fala tambi di kuma, no dibi fasi pa no palabras sabi suma un kumida ku tempradu diritu. Es ka signifika di kuma no dibi di kamufla bardadi o sugundil. En ves di kila, i fala pa no usa palabras “ku ta da gustu pa obi”, asin no na nsina utrus bardadi di Biblia di un manera ki na sedu atraenti o sabi pa kilis ku na obi. (Jo 12:11) Ma i pudi sedu difisil fasi kila. Na kasu di kumida literal, no pudi pensa di kuma ke ku sabi pa nos, na sabi tambi pa utrus. Di mesmu manera, no pudi pensa di kuma no manera di papia i atraenti pa tudu jintis. Ma i ka asin ki sedu. Pur isemplu, na alguns kultura jintis pudi da se opinion di manera diretu, mesmu ora ke na papia ku kilis ku mas elis garandi. Jintis di utru kultura pudi oja di kuma es i ka bon manera di papia, i te mesmu i falta di rispitu. Paulu fala no dibi di sibi kuma di “ruspundi kada un.” Es signifika di kuma no dibi di tempra ke ku no na fala, i ka di akordu ku no gustu o kultura, ma di akordu ku gustu di kilis ku na obinu.

NA KAL MUMENTU KU NO TA KONTA BARDADI

14. Oca Jesus staba na tera, sera ki nsina si disipulus tudu ke ki sibi? Bu pudi splika.

¹⁴ Jesus sempri ta papia diritu ku si sigiduris, ku bondadi, i nsina elis manga di kusas. (Mar 6:34) Ma i tenba inda manga di kusas ke dibi di aprindi. Jesus ka tenta nsina elis tudu ke ki sibi. I leba en konta se limitason. I sibiba di kuma i ka seduba bon mumentu pa e aprindi alguns bardadis. Na bardadi, i fala elis di kuma e ka na pudiba nguenta ki bardadis. (Jon 16:12) Ke ku no pudi aprindi des?

15. Sera ki no dibi di nsina no studantis di Biblia tudu ke ku no sibi di un bias? Bu pudi splika. (Ditus 25:11) (Jubi tambi foto.)

¹⁵ Isemplu di Jesus mostra kuma kunsi bardadi ka signifika di kuma no dibi di nsina tudu ke ku no sibi di un bias. Kuma ku no pudi kopia isemplu di Jesus? No dibi di pensa na situason di jintis. Pensa mas na ki omi ku gosta di fasi festa di Natal ku Paskua juntu ku si familia. No sibi di kuma es festas tene oriẑen pagon i Deus ka ta setal. Ma imaẑina di kuma bu kumsa studa Biblia ku ki omi un o dus semana antis di Natal. Sera ki bu kombersa na sabi, si bu mostral ke ku Biblia fala aserka di festas pagon, i bu spera kuma i na para logu fasi Natal? I bardadi di kuma alguns studantis pudi aplika logu tudu ke ke aprindi na Biblia. Ma utrus ta leba tempu pa muda se manera di pensa ku se asons. No pudi juda no studantis di Biblia fasi progresu, si no konta elis ke ke pirsisa di sibi na bon mumentu, ku sedu na mumentu ke na pudi nguental. — Lei Ditus 25:11.

16. Kuma ku no pudi juda no studantis di Biblia “yanda na bardadi”?

¹⁶ Un di kusas ku ta danu kontentamentu garandi, i juda utrus kunsi bardadi aserka di Jeova. No pudi juda elis “yanda na bardadi” si no kontinua sedu un bon isemplu pa elis. (3 Jon 3, 4) Sertifika di kuma bu manera di vivi ta mostra di kuma bu fia na purmesas ku sta na Palabra di Deus. Konta bardadi ku bon motivason. Nsina bardadis di Biblia ku rispitu i usa bon palabras na bon mumentu. I ora ku bu ngabadu, ngaba Jeova, en ves di ngaba bu kabesa. Si bu fasi kila, bu na mostra di kuma bu ta adora Jeova, Deus di bardadi.