Pabia ku no pirsisa di sakrifisiu di Jesus

1-2. Pabia ku no pirsisa pa un algin libertanu? (Romanus 7:​22-24) (Jubi tambi diseñu.)

IMAẐINA es situason: Un prediu kai riba di un algin. I sta inda di vida, ma i ka pudi sai nunde ki sta. Uniku kusa ki pudi fasi i grita pa pidi ajuda, ku speransa di kuma un algin na bin libertal.

² Anos tudu no sta na mesmu situason. Di kal manera? Oca Adon disobdisi Jeova, i pasa tene pekadu. Dipus, i pasanta pekadu pa si fijus. Pekadu paña tudu pekaduris, suma ki omi ku prediu kai riba del. Suma ki omi, no pirsisa pa un algin bin libertanu. Na si karta pa Romanus, Paulu fala di kuma, anos tudu no sedu katibu di pekadu. (Lei Romanus 7:​22-24.) I pidi pa un algin libertal di si situason. Paulu sintiba di kuma, i pañadu pa pekadu ki yarda di Adon, ku na lebal pa mortu. (Rom 6:23) Anos tambi no sta na mesmu situason, no pirsisa pa un algin libertanu!

3. Di kal maneras ku sakrifisiu di Jesus pudi libertanu?

³ Paulu ka fala so di mau kusas ku pekadu ta tisi, ma tambi i danu speransa. Dipus ki punta: “Kin ku na libran de kurpu ku na leban pa mortu?”, i ruspundi asin: “Deus obrigadu pabia di Jesus Kristu no Siñor!” (Rom 7:25) Li, Paulu staba na fala di kuma, Jeova libertanu atraves di mortu di Jesus. Suma Jeova da si Fiju pa nos, (1) i pudi purda no pekadus, (2) danu speransa di bin vivi sin pekadu, i (3) no pudi tene amisadi ku el. Ora ku no na fala des kusas, no amor pa Jeova, “Deus, ku ta da speransa” na aumenta. (Rom 15:13) Tambi no gardisimentu pa Jesus ku libertanu na aumenta. — Kol 1:14.

PABIA DI SAKRIFISIU DI JESUS JEOVA PUDI PURDA NO PEKADUS

4-5. Pabia ku anos tudu no pirsisa di sakrifisiu di Jesus? (Eklesiastis 7:20)

⁴ No pirsisa di sakrifisiu di Jesus, pa Jeova pudi purda no pekadus. Anos tudu no ta fasi erus, pa ke ku no ta papia o fasi. (Lei Eklesiastis 7:20.) I ten pekadus ku sedu mas gravi di ki utrus. Pur isemplu, Lei di Moisés fala di kuma un israelita ku fasi adulteriu o mata, dibi di matadu. (Sir 20:10; Num 35:​30, 31) Ma, mesmu si un pekadu ka sedu gravi, i kontinua inda sedu pekadu. Pur isemplu, Davi fala sin: “N fala kuma N na toma sintidu ku ke ku N na fasi pa N ka peka ku lingua.” (Sal 39:1) Es ta mostra di kuma, mesmu ke ku no ta fala pudi sedu pekadu. — Tiagu 3:2.

⁵ Pensa na ke ku bu fala o fasi. Sera ki bu ciga ja di papia kusas pa utrus ku bu ka mistiba papia? Sera ki bu ciga ja di fasi kusas ku mas tardi bu bin ripindi? Na bardadi, anos tudu no ciga ja di fasi kila. Biblia fala sin: “Si no fala kuma no ka tene pekadu, no na ngana no kabesa; bardadi ka sta na nos.” — 1 Jon 1:8.

6-7. Ke ku pui pa i sedu pusivel pa Jeova purda no pekadus? (Jubi tambi diseñu.)

⁶ Justisa perfeitu di Jeova ta iziẑi pa i ten un motivu pa i pudi purda no pekadu. Sakrifisiu di Jesus pui pa i sedu pusivel pa Jeova purda no pekadu. (Ef 1:7) Ma, es ka signifika di kuma Jeova ka ta mporta ora ku no fasi pekadu. Jeova ka misti pa no fasi pekadu. — Isa 59:2.

⁷ Lei di Moisés ta iziẑiba pa israelitas fasi sakrifisius di limaria, pa pudi kubri se pekadus. (Sir 4:​27-31; 17:11) Es sakrifisius ta mostra di kuma, pekaduris pirsisa di sakrifisius mas minjor. I sakrifisiu di Jesus ku na tisi manga di bensons pa pekaduris. Mortu di Jesus pui pa i sedu pusivel pa Jeova purda no pekadus. Paulu ntindiba kal ki balur di sakrifisiu di Jesus, suma ki mostradu na ke ki skirbi pa kristons na Korintu. Oca ki skirbi pa kristons na Korintu, i fala di mau kusas ke ta fasiba na pasadu, i dipus i fala elis: ‘Bo labadu, bo santifikadu, bo ocadu justu na nomi di Siñor Jesus Kristu, pa spiritu di no Deus.’ — 1 Kor 6:​9-11.

8. Ke ku bu pudi pensa nel, na semanas antis di Memorial?

⁸ Antis di mati Memorial, toma tempu pa pensa na ke ku purdon di Jeova signifika pa bo. Pur isemplu, pabia di sakrifisiu di Jesus, bu ka pirsisa di sinti kulpadu pa erus ku bu fasiba i ku bu ripindi ja del. Ke gora si i sedu difisil pa seta es? Talves bu pudi fala bu kabesa: ‘N ntindi di kuma Jeova pudi purda, ma N ka pudi purda ña kabesa.’ Si bu ta sinti des manera, lembra des: Jeova i uniku algin ku ta purda, i da si Fiju otridadi pa julga. Jeova ka dau, nin i ka da utru algin otridadi di disidi kin ki na purda o kin ki ka na purda. Si no sta na yanda na lus, Jeova purmiti di kuma ‘sangi di Jesus, si Fiju, i ta limpanu di tudu pekadu.’ (1 Jon 1:​6, 7) No pudi fia di kuma es i bardadi, suma ku no fia na utrus nsinus di Biblia. Pabia di sakrifisiu di Jesus, Jeova tene diritu pa purdanu, i Biblia fala di kuma i “sta pruntu pa purda.” — Sal 86:5.

NO TENE SPERANSA DI SEDU PERFEITU PABIA DI SAKRIFISIU DI JESUS

9. Di akordu ku Biblia, ke ku pekadu signifika? (Salmu 51:5)

⁹ Na Biblia, palabra “pekadu” ka ta rifiri so mau kusas ku no ta fasi, ma tambi i ta rifiri imperfeison ku no padidu ku el. (Lei Salmu 51:5.) Pabia di pekadu ku no yarda, no ka ta pensa so na mau kusas o fasi mau kusas, ma tambi no ta tene frakesas ku ta punu duensi, beju i muri. E ku manda te mesmu mininus ku kumsa padidu, ku ka fasi nada di mal, ta duensi i te mesmu muri. Tambi i pabia di kila ku pui mau jintis suma bon jintis ta sufri i muri. Anos tudu no sta nes mau situason, pabia di pekadu di Adon.

10. Kuma ku Adon ku Eva sinti dipus ke fasi pekadu?

¹⁰ Pensa na kuma ku Adon ku Eva sinti dipus ke fasi pekadu. Pekadu fasi elis sinti mal dimas. Dipus ke fasi pekadu, Adon ku Eva kumsa ku sinti mal, pabia e disobdisi lei di Jeova. (Rom 2:15) E pudiba sinti di kuma i ten un kusa ku staba mal. E sinti di kuma e dibi di kubri partis di se kurpu, i sukundi di kin ku kumpu elis. (Kum 3:​7, 8) Pa purmeru bias, Adon ku Eva sinti kulpadu, e tene borgoña, i ku manga di kudadi. Tambi e kontinua tene es sentimentus te oca ke muri. — Kum 3:​16-19.

11. Kuma ku pekadu ta fasinu sinti?

¹¹ Suma anos tudu no ta fasi pekadu, utrora no ta sinti kulpadu, ku borgoña i ku manga di kudadi. No ta tene kansera ku dur, pabia di pekadu. Mesmu si no sforsa pa minjoria no vida, ivita di purblemas, sempri no na tene purblemas ku no ka na pudi risolvi. Biblia splika di kuma suma Adon ku Eva peka, tudu pekaduris na tene purblemas. (Rom 8:20) No ka ta oja es so na nos, ma tambi na tudu pekaduris. Pur isemplu, manga di guvernus aos ta sforsa pa kuida di tera, kaba ku violensia, kaba ku koitadesa i kaba ku geras. Ma, e ka pudi risolvi es purblemas. Pabia di sakrifisiu di Jesus, no tene speransa di bardadi. Es i kal speransa?

12. Kal speransa ku sakrifisiu di Jesus danu?

¹² Pabia di sakrifisiu di Jesus, no pudi tene speransa di kuma, kusas ku Deus kumpu “na libradu di katiberasku di podrisa”. (Rom 8:21) Es signifika di kuma, ora ku no bin sedu perfeitu na paraísu, no ka na duensi mas o sta disanimadu. No ka na sinti mas kulpadu o ku manga di kudadi. Tambi, “Rei di Pas” ku sedu Jesus ku muri ja pa nos, na bin rena. I na juda tudu pekaduris kaba ku tudu purblemas ke ka pudi kaba ku el. — Isa 9:​6, 7.

13. Ke ku bu na gostaba di pensa nel ora ku bu na purpara pa mati Memorial des anu?

¹³ Pensa na kuma ku vida na sedu ora ku no sedu perfeitu. Imaẑina kuma ku vida na sedu ora ku kada dia ku bu na korda bu na sinti ben, vivi sin medu di kuma abo o kilis ku bu ama na tene fomi, sta duenti o muri. Mesmu gosi, bu pudi tene kalma, ora ku bu na pensa fundu na bu speransa pa futuru. (Eb 6:​18, 19) Pensa sempri aserka di bu speransa pudi aumenta bu fe i judau nguenta kualker purblemas ku bu sta na pasa. Bu pudi tene sertesa di kuma, Jeova na “da pagamentu tambi pa kilis ku buskal.” (Eb 11:6) I so pabia di sakrifisiu di Jesus, ku bu pudi tene konsolu gosi i tene speransa di bardadi pa futuru.

PABIA DI SAKRIFISIU DI JESUS, PEKADURIS PUDI TORNA TENE MAS AMISADI INTIMU KU JEOVA

14. Dipus ku Adon ku Eva peka, ke ku kontisi ku no amisadi ku Jeova, i pabia di ke?

¹⁴ Oca ku Adon ku Eva peka, pekaduris ka konsigi mas tene amisadi intimu ku Jeova. Te mesmu Biblia fala di kuma, i ten inimisadi entri tudu pekaduris ku kin ku kumpu elis. (Rom 8:​7, 8; Kol 1:21) Pabia? Pabia suma Jeova i perfeitu, i ka ta kontenti ku pekadu. Biblia fala sin aserka di Jeova: “Manera ku bu uju puru dimas, bu ka pudi seta mal; bu ka pudi kontinua jubi pa jinti ku na fasi mal.” (Aba 1:13) Pekadu pui pa amisadi ku ten entri Jeova ku pekaduris danadu. Nin un di nos ka pudi torna tene es amisadi ku Jeova, si kontra es mal ka torna kumpudu. Sakrifisiu di Jesus pui pa i pusivel pa no torna tene amisadi ku Jeova.

15. Kuma ku mortu di Jesus, pui pa pekaduris torna tene amisadi intimu ku Jeova?

¹⁵ Biblia fala di kuma, “pabia di sakrifisiu di Kristu ku no pekadu pudi tiradu”. (1 Jon 2:2) Kuma ku sakrifisiu di Jesus pui pa pekaduris tene amisadi ku Jeova? Mortu di Jesus da no Deus perfeitu, diritu di torna tene amisadi intimu ku pekaduris. (Rom 3:​23-26) Te mesmu i pudi nkara suma justu kilis ku adoral ku fidelidadi, antis di mortu di Kristu. (Kum 15:​1, 6) Pabia ki sedu asin? Pabia Jeova tene tudu sertesa di kuma, si Fiju Jesus na da si vida pa nos. (Isa 46:10) Sakrifisiu di Jesus pui pa no tene bon amisadi ku Deus.

16. Ke mas ku bu pudi pensa nel na dias ku semanas antis di Memorial? (Jubi tambi diseñu.)

¹⁶ Pensa na bon vida ku bu pudi tene gosi, pabia di amisadi intimu ku bu tene ku Jeova. Pur isemplu, bu pudi coma Jeova di bu “Pape”, suma ku Jesus nsinanu fasi. (Mat 6:9) Utrora, bu pudi te mesmu coma Jeova di bu “amigu”. Ora ku no na coma Jeova di no “Pape” o “Amigu,” no dibi di fasil ku rispitu garandi i ku umildadi. Pabia di ke? Pabia anos i pekaduris, i anos so no ka pudi pertusi di Jeova. I so pabia di sakrifisiu di Jesus, ku no pudi tene amisadi ku Jeova. I Jeova ku da si Fiju pa no torna tene amisadi ku el. (Kol 1:​19, 20) E ku manda no pudi tene amisadi ku Jeova, mesmu pa manera ku no ta fasi pekadu.

SAKRIFISIU DI JESUS TA MOSTRA DI KUMA JEOVA AMANU

17. Kuma ku sakrifisiu di Jesus ta mostra di kuma Jeova amanu dimas? (Efésius 2:​4, 5)

¹⁷ Sakrifisiu di Jesus ta mostra di kuma Jeova “ta ten pena dimas di jinti”. I “vivifikanu . . . oca no spiritu staba inda mortu pabia di no pekadu.” (Lei Efésius 2:​4, 5.) Suma algin ku prediu kai riba del, jintis umildi ta nota di kuma pekadu toma konta delis, i e pirsisa di sedu libertadu. E ta pidi ajuda. (At 13:48) Jeova ta juda es jintis, ora ki pui pa e obi bon noba aserka di Renu, asin pa e pudi kunsil i kunsi si Fiju, Jesus. (Jon 17:3) Satanas yaraba ciu oca i pensa di kuma pekadu di Adon ku Eva pudi pui pa Jeova ka kumpri ke ki mistiba fasi.

18. Ora ku no na pensa fundu na sakrifisiu di Jesus, ke ku no pirsisa di lembra del?

¹⁸ Ora ku no na pensa fundu na kuma ku sakrifisiu di Jesus ta judanu, no pirsisa di lembra di motivu mas garandi ku pui Jeova da vida di si Fiju. I da vida di si Fiju i ka so pa salvanu, ma tambi pa fasi un kusa mas importanti. Sakrifisiu di Jesus i manera di Jeova ruspundi akusason ku Satanas lantanda na jardin di Eden. (Kum 3:​1-5, 15) Atraves di sakrifisiu di Jesus, Jeova mostra di kuma, mau kusas ku Satanas konta kontra el i ka bardadi. Tambi Jeova libertanu di pekadu ku mortu, asin i mostra di kuma el i Deus di amor. Pabia di si bondadi ku no ka mersi, mesmu manera ku no ta fasi pekadus, Jeova disanu pa no mostra di kuma mintidas ku Satanas konta kontra el i ka bardadi. (Dit 27:11) Kuma ku bu pudi mostra di kuma bu da balur pa sakrifisiu di Jesus? No na ruspundi es purgunta na studu ku na bin.