“Deus amau ciu”!

1-2. Ke ku pudi judanu tene sertesa di kuma no tene balur na ujus di Jeova?

SERVUS di Jeova tene balur garandi pa rel. Ma alguns pudi sinti di kuma, na bardadi Jeova ka ama elis. Es pudi sedu, pabia un algin fasi elis sinti di kuma e ka tene balur. Sera ki es ciga di kontisi ku bo? Si sedu asin, ke ku pudi judau tene sertesa di kuma bu tene balur na ujus di Jeova?

² Un kusa ku pudi judau, i lei na Biblia kuma ku Jeova misti pa jintis tratadu. Si Fiju, Jesus, ta rispitaba jintis i trata elis ku bondadi. Oca i fasil, i mostra di kuma kilis ku ta sinti di kuma e ka tene balur, e tene balur pa rel i pa si Pape. (Jon 5:19; Eb 1:3) Nes studu no na bin oja: (1) kuma ku Jesus juda jintis ntindi kuma na bardadi e tene balur pa Jeova (2) kuma ku no pudi konvensi no kabesa di kuma na bardadi no tene balur na ujus di Deus. — Aẑeu 2:7.

KUMA KU JESUS JUDA JINTIS NTINDI DI KUMA E TENE BALUR PA JEOVA

3. Kuma ku Jesus trata jintis di Galileia oca ke bin pidil ajuda?

³ Oca Jesus staba na prega na Galileia, manga di jintis bai sukutal i pa sedu kuradu. Jesus fala di kuma e staba “disorientadu, pirdidu, suma karnel ku ka tene bakiadur.” (Mat 9:36; jubi nota di studu.) Ŝefis riliẑiosu ta njutiba elis, te mesmu i ta coma elis di “maldisuadu.” (Jon 7:​47-49, nota di studu) Ma Jesus ta daba elis balur, manera ki ta toma tempu pa nsina elis i kura elis di se duensa. (Mat 9:35) Alen di kila, pa juda mas jintis, i forma si apostolus pa prega, i da elis otridadi pa e kura duentis. — Mat 10:​5-8.

4. Ke ku no pudi aprindi pa manera ku Jesus ta trataba kilis ku njutidu?

⁴ Manera ki ta trataba kilis ku ta obil ku bondadi ku i rispitu, Jesus mostra di kuma el ku si Pape, e ta ojaba es jintis ku ta njutidu pa utrus suma kilis ku tene balur. Si bu sta na sirbi Jeova, ma bu pensa di kuma bu ka tene balur pa rel, pensa na kuma ku Jesus ta trataba es jintis ku mistiba aprindi aserka del. Si bu fasil, kila pudi judau nota di kuma, bu tene balur na ujus di Jeova.

5. Kal ku seduba situason di minjer ku Jesus kontraba kel na Galileia?

⁵ Jesus ka nsinaba so grupu di jintis, ma tambi i nsinaba kilis ku staba elis so. Pur isemplu, oca ki staba na prega na Galileia, Jesus kontraba ku un minjer ku staba na pirdi sangi pa 12 anu. (Mar 5:25) Lei falaba di kuma i seduba impuru, pa kila, kualker algin ki tokaba i ta seduba tambi impuru. Pa kila, talves i ta pasaba manga di tempu el so. Alen di kila, i ka pudiba pertusi di utrus na kaus di adorason o na mumentus di festivalis. (Sir 15:​19, 25) Asin es minjer ka staba so na sufri di duensa ma tambi, talves i ta sintiba di kuma i ka amadu. — Mar 5:26.

6. Ke ku minjer fasi pa i sedu kuradu?

⁶ Es minjer ku staba duenti mistiba pa Jesus kural. Ma i ka pertusi del pa i pidil pa i kural. Pabia di ke? Talves i staba ku borgoña, pabia di si duensa. O talves i teneba medu di kuma Jesus na serkal, pabia i sedu impuru, i normalmenti i ka dibi di staba na metadi di jintis. Pa kila, i toka na si ropa, pabia i teneba sertesa di kuma kila na kural. (Mar 5:​27, 28) I teneba motivu di tene es fe forti! Si duensa kuradu! Dipus Jesus punta kin ku tokal, minjer kontal di kuma i el ku tokal. Kuma ku Jesus tratal?

7. Kuma ku Jesus trata es minjer ku staba na sufri ciu? (Markus 5:34)

⁷ Jesus trataba es minjer ku bondadi i ku rispitu. I notaba di kuma minjer staba na “tirmi ku medu”. (Mar 5:33) Pa kila, i seduba bon dimas ku el i nkoraẑal. Te mesmu i comal di “Ña fiju”. Oca i usa es palabras, Jesus ka sta so na mostra rispitu pa rel, ma tambi i staba na mostra bondadi ku amor. (Lei Markus 5:34.) Es i uniku bias na Biblia ku nunde Jesus coma un minjer di ‘ña fiju’, talves i usa es palabra di bondadi nes situason, pabia i notaba di kuma es minjer mediba mal. Tambi Jesus nkoraẑal pa ke ki fala, asin minjer ka na sinti kulpadu pa manera ki toka ropa di Jesus, i sta na metadi di jintis. Jesus mistiba fasi mas di so kural, i mistiba fasil sibi di kuma i seduba fiju femia ku tene balur pa si Pape ku sta na seu, ku ta mostra amor.

8. Kal purblemas ku un irma na Brazil tene?

⁸ Aos tambi, alguns servus di Jeova tene duensa ku ta fasi elis sinti tristi dimas o sinti di kuma e ka bali nada. Maria,a i un pioneru regular na Brazil, ka teneba dus pes nin mon skerda oca i padidu. I fala sin: “Ña kolegas di skola ta comanba nomis di gozu. Tambi utrora, te mesmu ña familia ta tratanba di un manera ku ta fasin sinti di kuma N ka bali nada.”

9. Ke ku juda Maria sibi di kuma i tene balur na ujus di Jeova?

⁹ Ke ku juda Maria? Oca ki torna Tustumuña di Jeova, ermons ku irmas mostral amor garandi i e judal oja si kabesa suma ku Jeova ta ojal. I fala sin: “I ten manga di ermons ku irmas ku judan! N na gardisi Jeova ciu pa manera ki dan es familia bonitu na kongregason.” Na bardadi, es ermons ku irmas juda Maria sinti di kuma, i tene balur na ujus di Deus.

10. Kal purblemas ku ta puiba Maria Madalena sufri ciu? (Jubi tambi diseñus.)

¹⁰ Jubi kuma ku Jesus juda utru algin, ku sedu Maria Madalena. I teneba seti dimonius! (Luk 8:2) Talves dimonius ta pulba fasi kusas strañu, i talves pabia di kila jintis ta kuriba del. I ta sufriba ciu, tambi i dibi di sinti medu garandi, i pensaba di kuma ningin ka amal, o ningin ka pudi judal. Jesus tira dimonius ku staba nel, i pasa sedu si sigidur.

11. Kuma ku Jesus mostra Maria Madalena di kuma, i tene balur garandi na ujus di Jeova? (Jubi tambi diseñus.)

¹¹ Di kal utru manera ku Jesus juda Maria Madalena pa ntindi kuma, i tene balur na ujus di Jeova? Jesus kumbidaba Maria Madalena pa i kumpañal na pregason di tabanka pa tabanka.b Asin, i pudiba kontinua benefisia ora ki na obi Jesus na nsina utrus. Tambi Jesus parsi pa rel na mesmu dia ki lantandadu. I seduba purmeru disipulu ki pabia ku el na ki dia. Te mesmu, Jesus pidil pa i konta si apostolus di kuma i lantandadu. Es tudu ta mostra di kuma, na bardadi i teneba balur na ujus di Jeova! — Jon 20:​11-18.

12. Ke ku pui Lidia pensa di kuma i ka bali nada?

¹² Suma Maria Madalena, manga di jintis ta pensa di kuma e ka bali nada. Lidia, un irma di Spaña fala di kuma, oca ku si mame staba ku si bariga, i mistiba tiral. Lidia lembra di kuma ocalba joven, si mame ta njutilba i ta kobalba mal. I fala sin: “Suma ña mame ka ta mostran amor, sempri N ta mistiba pa jintis aman i pa e sedu ña amigus. N teneba medu di kuma, i ka mporta ke ku N fasiba, jintis nunka ka na aman, pabia ña mame punba na kabesa di kuma N ka sedu bon algin.”

13. Ke ku juda Lidia nota di kuma i tene balur na ujus di Jeova?

¹³ Oca Lidia kumsa ku studa Biblia kusas muda. Ora Jeova, lei Biblia, bon palabras ku bon kusas ku ermons ku irmas ta fasi, judal ntindi di kuma i tene balur na ujus di Jeova. I fala sin: “Sempri ña omi ta falan di kuma i aman ciu. Sempri i ta lembranta di ña bon maneras di sedu. Utrus bon amigus ta fasi mesmu kusa.” Sera ki bu pensa na un algin ku pirsisa di ajuda pa ntindi di kuma, i tene balur na ujus di Jeova?

KUMA KU NO PUDI OJA NO KABESA SUMA KU JEOVA TA OJANU

14. Kuma ku 1 Samuel 16:7 ta judanu oja no kabesa suma ku Jeova ta ojanu? (Jubi tambi kuadru “Pabia ku povu di Jeova tene balur garandi pa rel?”)

¹⁴ Lembra di kuma Jeova ka ta ojau suma ku jintis di mundu ta ojau. (Lei 1 Samuel 16:7.) Manga di jintis na mundu ta da balur pa un algin konformi si aparensia, kuantidadi di diñeru ki tene o kal ki nivel di si skola. Ma Jeova ka ta pensa des manera. (Isa 55:​8, 9) Pa kila, tenta jubi bu kabesa suma ku Jeova ta fasi, i ka di manera ku jintis na mundu ta fasi. Biblia fala si jintis ku utrora ta pensa di kuma e ka bali nada, suma Elias, Noemi ku Ana. Ora ku bu na lei aserka delis nota kuma ku Jeova na bardadi ama elis. Tambi, bu na misti skirbi kusas ku kontisi na bu vida ku ta mostra di kuma na bardadi Jeova amau tambi i dau balur. Bu pudi tambi jubi informasons na no publikasons ku na fala aserka di jintis ku ta pensa di kuma e ka bali nada.c

15. Pabia ku Jeova oja Daniel suma algin ki “ama ciu”? (Daniel 9:23)

¹⁵ Lembra sempri di kuma i bu fidelidadi ku ta pui pa bu tene balur na ujus di Jeova. Na un sertu mumentu, i pusivel di kuma oca ki i tene mas di 90 anu, profeta Daniel staba kansadu dimas i disanimadu. (Dan 9:​20, 21) Kuma ku Jeova nkoraẑal? I manda anju Gabriel pa lembranta Daniel di kuma i ‘amal ciu’ tambi si orasons obidu. (Lei Daniel 9:23.) Ke ku pui pa Daniel tene balur na ujus di Deus? Pabia Daniel ama ke ki justu tambi i sedu fiel. (Eze 14:14) Jeova manda skirbi isemplu di Daniel na Biblia pa pudi nkoraẑanu. (Rom 15:4) Bu tene balur na ujus di Jeova pabia bu ta fasi ke ki justu, i tambi bu sedu fiel. Suma ku Jeova obi orasons di Daniel i na obi tambi bu orasons. — Mik 6:8; Eb 6:10.

16. Ke ku pudi judau oja Jeova suma un Pape ku amau?

¹⁶ Oja Jeova suma un Pape ku amau. Jeova misti judau i ka pa buska falias na bo. (Sal 130:3; Mat 7:11; Luk 12:​6, 7) Pensa nes, juda manga di jintis ku tene sintimentus di kuma e ka bali nada. Jubi isemplu di un irma na Spaña comadu Michelle, i ta pensaba di kuma jintis ka amal tambi i ka bali nada, pabia si omi ta kobalba mal pa manga di anus. I fala sin: “Ora ku N sinti di kuma N ka bali nada, N ta tenta imaẑina Jeova pegan ku si mons, i na gian ku amor i proteẑin.” (Sal 28:9) Lauren, un irma na Afrika di Sul, fala sin: “Suma Jeova judan pertusi del, kila pui pa N kontinua sedu si amigu pa manga di anus. Te mesmu Jeova usanba pa N nsina utrus, pa kila, N tene sertesa di kuma i ta ojan suma algin ku tene balur.” — Ose 11:4.

17. Ke ku pudi judau sta konvensidu di kuma bu tene fabur di Jeova? (Salmu 5:12) (Jubi tambi foto.)

¹⁷ Sta konvensidu di kuma bu tene fabur di Jeova. (Lei Salmu 5:12.) Davi kompara fabur di Jeova ku un ‘tajadera garandi’ ku ta proteẑi jintis justu. Sibi di kuma bu tene fabur di Jeova ku si ajuda pudi proteẑiu suma un tajadera, si bu kumsa ku pensa di kuma bu ka sedu bon algin. Kuma ku bu pudi sibi di kuma bu tene fabur di Jeova? Suma ku no oja Jeova danu Biblia pa kontanu ke ki ta sinti aserka di nos. Tambi i ta usa ansions, amigus intimu ku utrus jinti, pa lembrantau di kuma bu tene balur na si uju. Kuma ku bu dibi di sinti ora ku utrus nkoraẑau?

18. Pabia ku bu dibi di seta ora ku utrus ngabau?

¹⁸ Ora ku utrus ku kunsiu i ku amau fala bon kusas aserka di bo, ka bu pensa di kuma e ka sta na konta bardadi. Lembra di kuma, Jeova pudi usa elis pa e judau sibi di kuma bu tene si fabur. Michelle ku faladuba na kumsada fala sin: “Puku-puku N aprindi fia na palabras di nkoraẑamentu di utrus. I difisil fia na bon kusas ku utrus ta fala aserka di mi.” Ansions tambi juda Michelle ku bondadi pa i oja di kuma Jeova amal. Gosi i sta na sirbi suma pioneru i suma voluntariu pa Betel.

19. Pabia ku bu pudi tene sertesa di kuma bu tene balur pa Jeova?

¹⁹ Jesus lembrantanu ku bondadi di kuma, no tene balur garandi na ujus di no Pape ku sta na seu. (Luk 12:24) Pa kila, no pudi tene sertesa di kuma Jeova danu balur. Ka no diskisi nunka des. Tambi no fasi no minjor pa ajuda utrus sibi di kuma e tene balur na ujus di Deus!