Purguntas di kilis ku ta lei no publikasons
Kal “sintidu” ku Jeova na pui pa guvernus des mundu tene, nin i ka na tarda?
Aserka di kumsada di garandi tribulason, Apokalipsi 17:16, 17 fala sin: “Ki des cifri ku bu oja, ku besta, elis e na odia ki minjer di mau vida. E na tiral tudu ki tene, e na disal nun. E na kume si karni, e na kemal na fugu. Pabia Deus pui na se korson pa e fasi ke ki teneba na si sintidu pa fasi; i pui elis pa e ten un sintidu son, pa e ntrega besta se otridadi”. Antis ba, no publikasons ta falaba di kuma “sintidu” ku Jeova na pui na korson di guvernus des mundu, i pa kaba ku riliẑion falsu.
Ma i pirsis fasi mudansa. “Sintidu” ku Jeova na pui na korson di guvernus des mundu, i pa e ntrega “besta se otridadi”. No na ruspundi es purguntas ku sta bas, pa pudi ntindi kuma kes profesia na kumpri.
Kin ku faladu del na profesia? “Minjer di mau vida” comadu tambi di “Garandi Babilonia”. I ta representa tudu riliẑions falsu. “Besta di kor burmeju” ta representa Nasons Unidu. Es organizason kumsa na 1919, ku objetivu di manti pas na tudu mundu. I ta comaduba Liga di Nasons. (Apok 17:3-5) “Des cifri” na representa tudu guvernus di mundu ku ta apoia besta.
Kal ki ligason ku ten enti minjer di mau vida ku besta di kor burmeju? Minjer di mau vida ‘monta riba’ di besta. Kila signifika di kuma, i sta na apoial i tenta kontrolal.
Ke ku na kontisi ku minjer di mau vida? Besta juntu ku des cifri ku ta apoial, “na odia ki minjer di mau vida”, e na tiral tudu kusas ki tene i mostra tudu jintis si maldadi. Tambi e na kaba ku el, ku sedu, e na fasi ke propi ku Jeova falaba i na kontisi. (Apok 17:1; 18:8) Es na sedu fin di tudu riliẑions falsu. Ma, antis di kila kontisi, Jeova na pui pa guvernus di mundu fasi un kusa ku nunka ciga di kontisi antis.
Ke ku Jeova na pui pa guvernus di mundu fasi? I na pui na korson di des cifri “si sintidu”, ku sedu, “e na ntrega se forsa ku otridadi na mon di besta” kor burmeju, ku sedu, Nasons Unidu. (Apok 17:13) Es signifika kuma, ideia di ntrega puder ku otridadi pa besta i ka na bin di guvernus! Profesia mostra di kuma i Jeova propi ku na pui pa e fasil. (Dit 21:1; komparal ku Isaias 44:28.) Es mudansa ka na kontisi puku-puku! Ma i na kontisi rapidu. Dipus, besta na kaba ku tudu riliẑions falsu di un bias.
Ke ku no pudi spera pa i kontisi na futuru? No ka dibi di spera oja na notisias di kuma, guvernus sta na apoia kada bias mas Nasons Unidu. Ke ku no dibi di spera i es: Di repenti, Jeova na pui pa tudu guvernus ntrega se puder pa Nasons Unidu. Ora ku es kontisi, no na sibi di kuma garandi tribulason pertu kumsa. Nkuantu es ka kontisi, no kontinua sta “sempre cordados i prontos”, pabia es mudansas na kontisi nin i ka na tarda! — 1 Tes 5:6, NOBO TESTAMENTO NA CRIOL.