Livru di Jo pudi judau ora ku bu na da konsiju

1-2. Pabia ki ka seduba fasil pa tris amigu di Jo ku Eliu dal konsolu?

OCA Jo pirdi tudu si rikesas, manga di jintis ku mora na diferentis kau obi ke ku kontisi ku el. Oca ku tris amigu di Jo, Elifaz, Bildadi ku Zofar sibi ke ku kontisi ku el, e viaẑa te Uz pa bai konsolal. Ma e ka staba purparadu pa ke ke oja oca ke ciga la.

² Pensa nes situason. Jo staba na sufri pabia i pirdi manga di kusas di balur ki teneba. I pirdi manga di karnelis, bakas, kamelus ku burus. Si fijus ku maioria di si servus matadu. Tambi kasa nunde ku si fijus matadu dana. Dipus des tudu, Jo duensi risu. I tene cagas na kurpu disna di pata di pe te na kabesa. Oca ku Elifaz, Bildadi ku Zofar ciga, e oja Jo sinta na sinza, i staba tristi dimas. Kuma ke reaẑi? Duranti seti dia e ka fala nin un palabra pa ki omi ku staba ku dur garandi. (Jo 2:​12, 13) Tambi un joven comadu Eliu ciga i sinta pertu delis. Jo kumsa ku papia i maldisua dia ki padidu, i mistiba muri. (Jo 3:​1-3, 11) Na bardadi, Jo pirsisa pa si amigus nkoraẑal! Ke ku es omis fala i manera ke falal na mostra si na bardadi e sedu amigus di Jo, i si e ta preokupa ku el.

3. Ke ku no na bin fala del nes studu?

³ Jeova pui pa Moisés skirbi ke ku tris amigu di Jo ku Eliu fala i fasi. I parsi di kuma alguns kusas ku Elifaz fala bin di un spiritu mau. Ma ke ku Eliu fala, bin di Jeova. (Jo 4:​12-16; 33:​24, 25) E ku manda na livru di Jo no pudi oja bon konsiju ku mau konsiju. No na oja kuma ku livru di Jo pudi judanu ora ku no pirsisa di da un amigu konsiju. Purmeru, no na oja mau isemplu di tris amigu di Jo. Dipus no na oja bon isemplu di Eliu. Na kada situason, no na oja kuma ku israelitas benefisia di livru di Jo i kuma ku no pudi benefisia tambi del.

KUMA KU TRIS AMIGU DI JO KONSIJAL

4. Pabia ku tris amigu di Jo ka konsigi konsolal? (Jubi tambi diseñu.)

⁴ Biblia fala di kuma tris amigu di Jo bai pa rel “pa falal manteña, pa konsolal”, dipus ke obi tudu mau kusas ku kontisi ku el. (Jo 2:11) Ma e ka konsigi konsolal. Pabia di ke? Pabia di tris motivus. Purmeru, e ka toma tempu pa sukuta Jo i pa tenta ntindi si situason. Pur isemplu, e yaraba mal manera ke akusa Jo di kuma, i sta na kastigadu pabia di pekadu ki fasiba.a (Jo 4:7; 11:14) Sugundu, manga di konsijus ku es omis daba Jo ka judal, e ka fasil ku bondadi, tambi e pulba fika mal. Pur isemplu, tudu es tris omis fala di kusas ke pensaba di kuma i sedu bon, ma na bardadi e ka teneba prova. (Jo 13:12) Sin bondadi, Bildadi fala dus bias di kuma Jo ta papia ciu. (Jo 8:2; 18:2) Zofar fala tambi di kuma Jo “tulu”. (Jo 11:12) Terseru, mesmu manera ke ka jusia ku Jo, ke ke fala i manera ke falal pul pa i sinti kulpadu, i sinti di kuma i ka amadu. (Jo 15:​7-11) Pa fin, es omis konsentra mas na prova di kuma Jo staba eradu, en ves di konsolal o torna si fe forti.

5. Kal ku sedu rusultadu di konsiju di tris amigu di Jo?

⁵ No ka fika dimiradu, manera ku konsiju di tris amigu di Jo ka tene bon rusultadu. Jo fikaba tristi ku se palabras. (Jo 19:2) E ku manda no ntindi pabia ki pirsisaba di difindi si nomi. Jo fala kusas ki ka dibi di falaba. (Jo 6:​3, 26) Amigus di Jo ka fala kusas ku staba di akordu ku manera di pensa di Jeova, tambi e ka tratal ku bondadi. Pa kila, Satanas usa elis pa disanima Jo. (Jo 2:​4, 6) Ke ku servus di Jeova na pasadu aprindi di storia di Jo? I ke ku no pudi aprindi del aos?

6. Ke ku ansions na Israel pudiba aprindi di mau isemplu di tris amigu di Jo?

⁶ Kuma ku israelitas pudiba judadu. Dipus ku Jeova forma nason di Israel, i kuji omis kualifikadu, ku sedu ansions, pa julga si povu di akordu ku si normas justu. (Lei 1:​15-18; 27:1) Ali alguns lisons ku ansions na Israel pudi aprindi di storia di Jo. Es omis pirsisa di sukuta diritu antis de da konsiju o julga un algin. (2 Kron 19:6) E pirsisa tambi di fasi purguntas, en ves di pensa di kuma e sibi tudu informason. (Lei 19:18) E pirsisa di papia ku bondadi ku kilis ku bin buska ajuda na se mon. Pabia di ke? Pabia si e paña raiba, kila pudi disanima un algin ku mistiba konta elis ke na bardadi ki sta na sinti. — Sai 22:​22-24.

7. Alen di ansions na Israel, ba kin ku pudi da konsiju, i kuma ku storia di Jo pudi juda elis? (Ditus 27:9)

⁷ Ansions na Israel i ka uniku jintis ku pudi da konsiju. Kualker algin pudi juda un amigu minjoria si amisadi ku Jeova. Tambi kualker algin pudi kuriẑi un amigu ora ki fasi un kusa di mal. (Sal 141:5) Es tipu di konsiju ta mostra di kuma, ki algin i amigu di bardadi. (Lei Ditus 27:9.) Si israelitas pensa na kuma ku Elifaz, Bildadi ku Zofar papia ku Jo, e pudi aprindi ke ke ka dibi di papia i fasi ora ke na da konsiju.

8. Ke ku no dibi di ivita ora ku no na da utrus konsiju? (Jubi tambi fotos.)

⁸ Kuma ku no pudi benefisia. Ora ku no ermons ku irmas sta na sufri, sempri no ta misti juda elis. Ma, si no papia i aẑi suma ki tris amigu di Jo, no ka na pudi konsola no ermons ku irmas. Pa kila, purmeru, no dibi di ivita julga no ermons rapidu, ma no pirsisa di tene tudu informasons antis di da konsiju. Sugundu, no konsiju dibi di sempri basia na Palabra di Deus, en ves di basia na no propi opinion, suma ku Elifaz fasi manga di bias. (Jo 4:8; 5:​3, 27) Terseru, no pirsisa di ivita papia palabras duru o kritika. Lembra di kuma, Elifaz ku si amigus papia alguns palabras ku seduba di bardadi. Mas tardi, apostolu Paulu te mesmu skirbi alguns di palabras di Elifaz. (Kompara Jo 5:13 ku 1 Koríntius 3:19.) Ma maioria di ke ku Elifaz, Bildadi ku Zofar fala aserka di Deus ka seduba bardadi, e pui pa Jo fika mal. Pa kila, Jeova fala elis di kuma e ka konta bardadi. (Jo 42:​7, 8) Ora ku no na da utrus konsiju, no pirsisa di tene sertesa di kuma, ke ku no na fala ka na pui nunka pa Jeova parsi sedu algin ku ka sedu bon o ku ta fasi pa si servus sinti di kuma, i ka ama elis. Gosi no na fala di ke ku no pudi aprindi di isemplu di Eliu.

KUMA KU ELIU KONSIJA JO

9. Splika pabia ku Jo pirsisa di ajuda, dipus ku si amigus para papia, i kuma ku Jeova judal.

⁹ Jo ku si tris amigu diskutiba pa manga di tempu. E papia ciu, tok se palabras ciga 28 kapitulu di Biblia. Tambi manga di kusas ke papia, mostra di kuma e sinti mal, te mesmu e staba ku raiba. No pudi ntindi ke ku manda Jo staba disanimadu! I staba na pirsisa di konsolu ku koreson. Kuma ku Jeova juda Jo? I usa Eliu pa dal konsiju. Ma pabia ku Eliu pera te oca ku ki utrus kaba diskuti? I fala sin: “Ami N nobu inda, abos bo tene ja idadi; e ku manda N medi”. (Jo 32:​6,7) Eliu sibiba ke ku manga di jintis sibi aos: Jintis di idadi, manga di bias ta sedu mas jiru, pabia e vivi mas tempu, tambi e pasa manga di kusas na se vida di ki jovens. Ma dipus di sukuta ku pasensa Jo ku si amigus, Eliu ka pudiba kontinua kala. I fala asin: “I ka idadi ku ta pui algin jiru, nin i ka bejus ku ta ntindi kil ki retu.” (Jo 32:9) Ke ku Eliu fala dipus, i kuma ki falal?

10. Ke ku Eliu fasi antis di da Jo konsiju? (Jo 33:​6, 7)

¹⁰ Antis di Eliu da kualker konsiju pa Jo, i mistiba pa i kalma, i pa i sta pruntu pa sukuta ke ki na falal. Kuma ku Eliu fasil? Pabia di kusas ku Eliu obi, fasil paña raiba, i sforsa pa manti kalmu antis di papia ku Jo. (Jo 32:​2-5) Pa kila, Eliu mostra sempri bondadi, i ka papia duru ku Jo. I seduba umildi. I papia ku Jo suma un bon amigu. Pur isemplu i fala Jo asin: “Dianti di Deus N sedu suma bo”. (Lei Jo 33:​6, 7.) Dipus, Eliu mostra di kuma i sukuta Jo diritu. Antis di konsija Jo, i ripiti alguns pontus importanti di kombersa di Jo. (Jo 32:11; 33:​8-11) Eliu fasi mesmu kusa oca ki na da mas Jo konsiju. — Jo 34:​5, 6, 9; 35:​1-4.

11. Kuma ku Eliu konsija Jo? (Jo 33:1)

¹¹ Oca Eliu da Jo konsiju, i fasil di un manera ku na mostra rispitu pa es omi fiel. Pur isemplu, Eliu usa nomi di Jo, ma parsi di kuma ki tris amigu ka fasilba. (Lei Jo 33:1.) Talves Eliu lembra di kuma ki mistiba papia, oca Jo ku si amigus staba na diskuti. Pa kila, Eliu da Jo oportunidadi di papia oca ki na konsijal. (Jo 32:4; 33:32) Tambi Eliu mostra Jo di manera klaru pabia ku alguns kusas ki fala i fasi ka sedu bon. Tambi ku bondadi i lembranta Jo aserka di jiresa, puder, justisa ku amor fiel di Jeova. (Jo 36:​18, 21-26; 37:​23, 24) Talves bon konsiju ku Eliu da Jo, purparal pa i sukuta konsiju ku Jeova na bin dal tambi. (Jo 38:​1-3) Kuma ku isemplu di Eliu juda israelitas na pasadu, i kuma ki pudi judanu aos?

12. Kuma ku Jeova usa profetas pa juda si povu, i kuma ku bon isemplu di Eliu juda israelitas?

¹² Kuma ku israelitas pudiba judadu. Manga di bias, Jeova usa profetas pa nsina israelitas. Pur isemplu, na tempu di ŝefis Jeova usa profeta Debora pa gia si povu, tambi Jeova usa Samuel mesmu oca i seduba joven pa i nsina israelitas. (Ŝef 4:​4-7; 5:7; 1 Sam 3:​19, 20) Dipus na tempu di reis, Jeova usa sempri profetas pa juda israelitas kontinua adoral di bon manera. Tambi oca ku si povu disobdisil, i manda profetas pa e kuriẑi elis. (2 Sam 12:​1-4; At 3:24) Bon isemplu di Eliu ku faladu del na livru di Jo, pudiba juda omis ku minjeris fiel pa sibi ke ke na fala i kuma ke na falal, ora ke na da konsiju.

13. Kuma ku kristons aos ta nkoraẑa se ermons na fe?

¹³ Kuma ku no pudi benefisia. Suma es profetas, anos tambi no pudi usa Biblia pa fasi pa vontadi di Deus kunsidu, ora ku no na konta utrus ke ku sta na si Palabra. Tambi suma elis, no ta usa no palabras pa konsola i nkoraẑa no ermons na fe. (1 Kor 14:3) Ansions dibi di sempri papia ku bondadi i ku amor, mesmu ora ku un algin fika mal o i papia kusas ki ka dibi di papia. — 1 Tes 5:14; Jo 6:3.

14-15. Da isemplu di kuma ku un ansion pudi kopia Eliu ora ki na da konsiju.

¹⁴ Imaẑina es situason: Un ansion diskubri di kuma un irma di si kongregason sta disanimadu. Ansion juntu ku utru ermon, bai visita ki irma pa nkoraẑal. Duranti visita, irma splika di kuma mesmu manera ki ta prega i mati runions, i ka ta sinti filis. Ke ku ansion na fasi?

¹⁵ Purmeru, ansion na sforsa pa ntindi minjor kuma ku irma sta na sinti. Pa kila, i na pirsisa fasil purguntas, dipus sukuta diritu ke ku irma na fala. Sera ki i ta pensa di kuma i ka bali nada na ujus di Deus? Sera ki “kudadi de mundu” ta pul i fika disanimadu? (Luk 21:34) Sugundu, ansion na sforsa pa ngaba irma pa bon kusas ki ta fasi. Pur isemplu, i pudi ngabal pa manera ki ta mati runions i prega, mesmu si ka tudu ora ki sedu fasil pa rel. I terseru, ora ku ansion ntindi minjor situason di ki irma, i pabia ki ta sinti des manera, i na usa Biblia pa judal tene sertesa di kuma Jeova amal. — Gal 2:20.

KONTINUA BENEFISIA DI LIVRU DI JO

16. Kuma ku no pudi kontinua benefisia di livru di Jo?

¹⁶ Na bardadi, i tene manga di lisons ku no pudi aprindi ora ku no na studa livru di Jo! Na studu ku pasa, no aprindi di kuma, livru di Jo ta nsinanu pabia ku Deus disa sufrimentu, i kuma ku no pudi kontinua sedu fiel pa Jeova ora ku no na sufri. Tambi nes studu, no fala kuma ku anos tudu no pudi da bon konsiju ora ku no kopia bon isemplu di Eliu, en ves di kopia isemplu di Elifaz, Bildadi ku Zofar. Talves bu pudi jubi mas, lisons di livru di Jo antis di bu da konsiju pa un algin. Si tarda ja ku bu lei livru di Jo, fiksa objetivu pa leil mas. Sin duvida, bu na diskubri manga di lisons importanti ku sta nes livru.