LECCION 01
Quiquintaca ¿imashinati Bibliaca ayudi pudin?
Achcacunami causimunda, llaquicunamunda, guañuimunda, shamuc funllacunapishi ima tucunamunda tapurinchi. Cada funllami precupacioncunata charinchi. Familiata mantiningapu o paicuna alli causachunmi precuparinchi. Achca gentecunami cai tapuicunamunda Biblia yachachicta, alli consejocunata cucta cuenta cushcacuna. ¿Quiquinpu rricsishcacunataca Biblia ayudi pudinchu?
1. ¿Ima tapuicunatati Bibliaca contestan?
Bibliaca cai tapuicunatami contestan. ¿Imashinati causica callarirca? ¿Imaputi causanchi? ¿Imamundati alli gentecunaca sufrin? Guañushca jipaca ¿imati tucunchi? Tuquicuna alli causangapu munacpishi ¿imamundati achca guerracuna tiyan? Cai Allpaguanca ¿imashi tucunga? Cai tapuicunapu respuestacunataca Bibliapimi tari pudinchi. Achca guaranga guaranga gentecunaca, Biblia imata yachachicta rricushaca contentomi sintirishcacuna.
2. Bibliaca ¿imashinati cada funlla alli causachun ayudan?
Bibliaca alli consejocunatami cun. Por ejemplo, familiacuna contento causangapu imata rrana queshcatami yachachin. Shinaiti, estres ungui ama japichun ima rrana queshcata, contento trabajangapushi imata rrana queshcatami yachachin. Cai folletota yachesha catishaca, quiquinllatimi caimunda, cutishuc cosascunamundashi Bibliapi yachangui. Quiquinllatimi ‘Dios escribichishca tuqui shimicuna alli queshcata intindingui’ (2 Timoteo 3:16).
Cai folletoca na Bibliachu can. Pero Bibliata intindichunmi ayudanga. Chimundami cada leccionpi tiyishca tuqui versocunata liyichun animanchi. Shinaiti quiquin ima yachacushcata Bibliapi rricuchunmi animanchi.
CAIMUNDA MAS YACHASHUN
Biblia cutishuccunata imashina ayudashcata, Bibliata liyina munita charingapu imata rrana queshcata, Bibliata intindingapu cutishuccunapu ayudata imamunda mashcana queshcatashi rricushun.
3. Bibliami ayudan
Bibliaca shuc luz cuentami ñucunchi maita rrina ñanta rricuchin. Alli decisioncunata japichun, shamuc funllacunapi ima tucugrishcata yachachunshimi ayudan.
Salmo 119:105ta liyichi. Jipaca, cai tapuicunamunda parrlichi:
Salmo librota escribic runaca ¿Bibliamundaca imatati yuyarca?
Quiquinca Bibliamundaca ¿imatati yuyangui?
4. Bibliaca ñucunchi rrarishca tapuicunatami contestan
Shuc guarmica achca guatacunata rrarishca tapuicunata Biblia contestactami rricurca. VIDEOTA rricuichi. Jipaca, cai tapuicunamunda parrlichi:
Videopi rricushca guarmica ¿ima tapuicunatati charirca?
Bibliamunda yachanaca ¿imashinati paitaca ayudarca?
Bibliaca tapuicunata rrachunmi animan. Mateo 7:7ta liyichi. Jipaca, cai tapuicunamunda parrlichi:
¿Quiquin charishca tapuicunataca Bibliaca conteste pudingachushi? ¿Ima tapuicunata?
5. Bibliata liyina munitami chari pudinchi
Achcacunaca Bibliata liyinatami munancuna. Bibliata liyishaca achcatami beneficiarincuna. VIDEOTA rricuichi. Jipaca, cai tapuicunamunda parrlichi:
Videopi rricushca jovencunaca, liyinamundaca ¿imatati yuyancuna?
Pero Bibliata liyinamundaca ¿imatati yuyancuna?
Bibliaca contento causachun, esperanzata charichunshimi ayudan. Romanos 15:4ta liyichi. Jipaca, cai tapuimunda parrlichi:
¿Contento causanamunda, esperanzata charinamundaca Bibliapi mas yachasha ninguichu?
6. Cutishuccunapu ayudaguanmi Bibliata mas intindi pudinchi
Paicunallati Bibliata liyishashi, achcacunaca cutishuccunapu ayudaguanmi mas intindi pudishcacuna. Hechos 8:26-31cama liyichi. Jipaca, cai tapuimunda parrlichi:
Bibliata intindingapuca ¿imatati minishtinchi? (Verso 30, 31ta rricuichi).
Etiopia llactamunda runaca Diospu Shimimunda intindichisha ayudachunmi minishtirca. Cunun funllacunapishi cutishuccuna ayudacpimi Bibliata yachi pudincuna
GUAQUINCUNACA CAITAMI NIN: “Bibliata yachacushaca tiempotami perdicunchi”.
Quiquinca ¿imatati ninguimu? ¿Imamundati shina ningui?
CAITAMI YACHASHCANCHI
Bibliaca cada funlla alli causachunmi consejocunata cun. Shinaiti ñucunchi rrarishca tapuicunatami contestan. Contento causangapu, esperanzata charingapushimi ayudan.
Yuyarishun
Bibliapica ¿ima laya consejocunatati tarinchi?
Bibliaca ¿ima laya tapuicunatati contestan?
Quiquinca ¿imatati Bibliapica yachasha ningui?
MAS YACHANGAPU
Cunun funllacunapi Bibliapu consejocuna imamunda alli queshcata yachi.
Shuc jari uchillamundaiti na alli yuyicunaguan güiñashcacpishi, Biblia imashina ayudacta rricui.
Familiaguan contento causangapu, Biblia ima consejocunata cucta rricui.
“Familiaguan alli causangapu 12 ayudacuna” (¡Despertad!, núm. 2 2018)
Achca gentecunaca cai mundotaca Diosmi mandacun nin. Caimunda Biblia ima nishcata yachi.
¿Imamundati Bibliata yachana canchi? (Version completa) (3:14)