2 Reyes
20 Chay pʼunchaykunapi rey Ezequiasqa sinchʼita onqoykorqa, wañuy patallapiña kasharqa.+ Amozpa wawan profeta Isaiastaj watukoj jamuspa nerqa: “Jehová Diosqa kayta nin: ‘Wasiykipi kajkunata encargasqata saqey, qanqa wañupunkipuni. Niña sanoyankichu’,+ nispa”. 2 Ezequiastaj chayta uyariytawan perqa ladoman kutirikuspa Jehová Diosmanta mañakorqa: 3 “Jehová Diosníy, yuyarikullay ari, noqaqa ñankunasniykita mana wistʼuykuspa tukuy sonqo purerqani. Yuyarikullay ari, qhawayniykipi allin imasta ruwarqani”,+ nispa. Chantá Ezequiasqa sonqo nanayta waqarikorqa.
4 Isaías niraj chaupi patioman llojsimushajtintaj Jehová Diosqa kayta nerqa:+ 5 “Kutirispa nacionniypa kamachejnin Ezequiasta nimuy: ‘Ñaupa tatayki Davidpa Diosnin Jehovaqa kayta nin: “Mañakuwasqaykita uyarini. Waqasqaykita rikuni.+ Noqa sanoyachisqayki.+ Minchhataj Jehová Diospa wasinman wicharinki.+ 6 Noqaqa 15 watastawan kausachisqayki. Qantapis kay llajtatapis Asiriaj reyninmanta salvasqaykichej.+ Kay llajtataqa sutiyrayku jarkʼakusaj, jinallataj kamachiy Davidrayku”,+ nispa’”.
7 Chantá Isaiasqa reypa kamachisninta nerqa: “Kʼisa higosta qʼapisqata apamuychej”, nispa. Paykunataj chayta apamuspa Ezequiaspa qʼetayasqa heridanman churaykorqanku. Ezequiastaj pisimanta pisi sanoyaporqa.+
8 Ezequiasqa onqosqa kashaspallaraj Isaiasta tapusqa: “¿Imaynapitaj yachayman+ Jehová Dios sanoyachinawanta, minchhataj Jehová Diospa wasinman wicharinayta?”, nispa. 9 Isaiastaj kuticherqa: “Jehová Diosqa kay señalta rikuchisonqa, Jehová Dios nisqanta juntʼanantapuni yachanaykipaj: ¿Mayqenta munawaj? ¿Llanthu chunka gradasta* ñaupajman rinantachu, chayri chunka gradasta qhepaman kutirinantachu?”,+ nispa. 10 Ezequiastaj nerqa: “Llanthoqa chunka gradasta ñaupajman rillanmansina, pero nisina chunka gradasta qhepaman kutiriyta atinmanchu”, nispa. 11 Profeta Isaiastaj Jehová Diosmanta mañakorqa. Diostaj Ajazpa* gradasninmanta llanthuta chunka gradasta kutiricherqa.+
12 Chaypachasllataj Baladanpa wawan, Babiloniamanta rey Berodac-Baladanqa uyarerqa Ezequías onqoykusqanta, chayrayku cartasta apacherqa, uj regalotawan.+ 13 Ezequiastaj chunka makiwan japʼikorqa chay imasta apamoj runasta, paykunamantaj rikucherqa tukuynin waqaychasninta:+ qolqe metalta, qorita, bálsamo aceiteta, waj valesqa aceitesta, guerrapaj armasninta, imachus jallchʼana wasisninpi karqa chay tukuy imastawan. Tukuy imastapuni rikucherqa, imaschus wasinpi* karqa, imaschus nacionnintinpi karqa chay tukuy imasta.
14 Chaymantataj profeta Isaiasqa rey Ezequiaspaman yaykuspa taporqa: “¿Imatá nisunku chay runas? ¿Maymantá jamusqanku?”, nispa. Ezequiastaj kuticherqa: “Karu llajtamanta jamusqanku, Babiloniamanta jamusqanku”,+ nispa. 15 Isaiastaj taporqa: “¿Imastá wasiykipi rikorqanku?”, nispa. Ezequiastaj kuticherqa: “Wasiypi tukuy imasta rikorqanku. Tukuy valorniyoj imasniyta paykunaman rikucherqani”, nispa.
16 Isaiastaj Ezequiasman nerqa: “Uyariy, Jehová Diosqa kayta nin:+ 17 ‘Uj pʼunchayqa Babiloniaman apakaponqanku wasiykimanta tukuy imata, ñaupa tatasniykej kunankama tukuy ima tantasqankutapis.+ Chay pʼunchayqa qayllaykamushanña. Ni imata saqenqankuchu’, nispa nin Jehová Diosqa. 18 Payqa nillantaj: ‘Niraj nacenkuchu chay wawasniykitapis wakinta Babiloniaman apakaponqanku,+ chaypitaj reypa kamachina wasinpi cargosniyoj kanqanku’,+ nispa”.
19 Chayta uyarispa Ezequiasqa Isaiasta nerqa: “Jehová Diospa nisqanta willawasqaykeqa sumaj kashan”,+ nispa. Chantá nillarqataj: “Sichus kausashajtiy allin kausay kanqa, nitaj ima chʼajwapis kanqachu chayqa, chay niwasqaykeqa allillan”,+ nispa.
20 Ezequiaspa tukuy kausayninmanta, sumaj atiyniyoj kasqanmanta, imaynatachus estanqueta ruwachisqanmanta,+ imaynatachus jallpʼa ukhunta juskʼuchispa llajtaman yakuta apaykusqanmantapis+ qhelqasqa kashan Judajpa reyesninmanta parlaj libropi. 21 Chantá Ezequiasqa ñaupa tatasnin jina wañuporqa,+ paypa cuentanmantataj wawan Manasés+ rey jina kamachiyta qallarerqa.+