2 Reyes
21 Manasesqa+ 12 watasniyoj kashaspa rey jina kamachiyta qallarerqa. Jerusalenpitaj 55 watasta kamacherqa.+ Mamanpa sutenqa Hefziba karqa. 2 Manasesqa Jehová Diospa qhawayninpi sajra kajta ruwarqa, chay waj naciones jinallataj millay imasta ruwarqa.+ Chay nacionesta Jehová Diosqa qharqorqañapis Israel nacionpa ñaupaqenmanta.+ 3 Manasesqa tatan Ezequías urmacherqa chay pata lugarestapis+ watejmanta ruwachillarqataj. Chantapis Baalpaj altaresta ruwacherqa, yupaychana kʼullu postetapis* ruwachillarqataj,+ imaynatachus Israelpa reynin Achab* ruwarqa kikinta.+ Manasesqa kʼumuykukuspa imaschus cielopi kan chay tukuy imasta yupaycharqa.+ 4 Chantá Jehová Diospa wasinpi ruwachillarqataj altaresta waj diosesta yupaychananpaj.+ Jehová Diosqa chay wasinmanta nerqañapis: “Jerusalén llajtaman sutiyta churasaj”,+ nispa. 5 Manasesqa Jehová Diospa wasinpa iskaynin patiosninpi+ altaresta ruwachillarqataj, imaschus cielopi kan chay tukuy imasta yupaychananpaj.+ 6 Qhari wawantapis ninapi ruphaykucherqa,* layqeriosta ruwacherqa, suertesta qhawachikorqa.+ Aysirista, adivinostawan+ churarqa. Manasesqa Jehová Diosta phiñachinanpaj may chhika millay imasta ruwarqa.
7 Manasesqa llajllaspa ruwarqa chay Aserá santota*+ Diospa wasinman apaykorqa. Chay wasinmantaqa Jehová Diosqa Davidman, wawan Salomonmanpis nerqaña: “Kay wasipi, jinallataj Jerusalén llajtapipis sutiyta churasaj chaypi kananpaj. Noqamin Jerusalén llajtata ajllakuni Israelpa tukuy ayllusninmanta.*+ 8 Sichus israelitasqa tukuy kamachisqayta sumajta kasukonqanku,+ kamachiy Moisés paykunaman qosqan Leytapis kasukonqanku chayqa, ñaupa tatasninkuman qorqani chay nacionmanta niña jaykʼajpis paykunata karunchachisajchu”,+ nispa. 9 Israelitastaj mana kasukorqankuchu, Manasespis paykunataqa juchaman urmachillarqapuni. Payqa israelitasta millay imastapuni ruwacherqa, Jehová Dios ñaupaqenkumanta chinkacherqa chay nacionesmantapis+ aswan millay imastaraj.
10 Jehová Diosqa profetasninnejta israelitasman kutin kutinta willacherqa:+ 11 “Judamanta rey Manasesqa millay imastapuni ruwan. Paymanta ñaupajta kausarqa chay amorreosmantapis+ aswan millay imastaraj ruwan.+ Payqa chay millay santosninwan Judá nacionta juchaman urmachin. 12 Chayrayku Israelpa Diosnin Jehovaqa kayta nin: ‘Jerusalenman, Judá nacionmanpis sinchʼi ñakʼariyta apachimusaj,+ pillapis chay ñakʼariymanta uyarejqa sinchʼitapuni mancharikonqa.*+ 13 Ima qʼaytuwanchus+ Samaria llajtata+ miderqani, chayllawantaj Jerusalén llajtatapis midisaj, ima plomadatachus Achabpa familianpaj+ oqharerqani, chayllatataj Jerusalenpajpis oqharisaj. Jerusalentaqa llimphuta llimphucharpasaj, imaynatachus uj fuenteta llimphuchaytawan kʼumpurparinchej ajinata.+ 14 Puchoj herenciaytaqa+ saqerparisaj, enemigosninkoj makinkumantaj entregaykusaj. Tukuy enemigosninkoqa paykunata presosta apakaponqanku, tukuy imasninkutapis suwakaponqanku.+ 15 Paykunaqa qhawayniypi sajra imasta ruwarqanku. Paykunaqa kunankama rabiachishallawankupuni ñaupa tatasninku Egipto nacionmanta llojsimusqankumantapacha’, nispa”.+
16 Manasesqa mana juchayoj runasta may chhikata wañucherqa, ashkha yawartapuni jichʼarqa Jerusalén llajtaman kʼuchuy kʼuchuta juntʼachinankama.+ Chantapis juchallikullarqataj Jehová Diospa ñaupaqenpi Judá nacionta juchaman urmachispa. 17 Manasespa tukuy kausayninmanta, tukuy ima ruwasqanmanta, juchata ruwasqanmantapis qhelqasqa kashan Judajpa reyesninmanta parlaj libropi. 18 Chantá Manasesqa ñaupa tatasnin jina wañuporqa, pʼamparqankutaj wasi huertanpi, Uzaj huertanpi.+ Wawan Amontaj paypa cuentanmanta rey jina kamachiyta qallarerqa.
19 Amonqa+ 22 watasniyoj kashaspa rey jina kamachiyta qallarerqa, Jerusalenpitaj iskay watata kamacherqa.+ Mamanqa Mesulémet sutikorqa, Jotbamanta Haruzpa wawan karqa. 20 Amonqa tatan Manasés jinallataj Jehová Diospa qhawayninpi sajra imasta ruwarqa.+ 21 Payqa tatanpa chakinta qhatillarqataj, tatan jinallataj chay millay santosta kʼumuykukuspa yupaycharqa.+ 22 Manasesqa ñaupa tatasninpa Jehová Diosninkuta saqerparerqa. Payqa mana Jehová Diospa ñanninpichu purerqa.+ 23 Chantá kamachisnillantaj rey Amonta wañuchinankupaj yachachinakorqanku, kikin wasinpitaj wañucherqanku. 24 Judá nacionmanta runastaj chay runasta wañucherqanku, pikunachus rey Amonta wañuchinankupaj yachachinakorqanku chaykunata. Chantá Amonpa wawan Josiasta churarqanku rey jina kamachinanpaj.+ 25 Amonpa tukuy kausayninmanta, imastachus ruwasqanmantapis qhelqasqa kashan Judajpa reyesninmanta parlaj libropi. 26 Chantá Amonta sepulturanpi pʼamparqanku, Uzaj huertanpi.+ Wawan Josiastaj+ paypa cuentanmanta rey jina kamachiyta qallarerqa.