Bibliap 63 kaq libron: 2 Juan

Qillqaq: Apóstol Juan

Maypitaq qillqakurqa: Efesopi chayri qayllanpi

Maykʼaqtaq qillqakuyta tukukurqa: Ichapis 98 watapi

JUANPA iskay kaq cartanqa, juk chhikalla —ichapis juk papiro hojallapi qillqakurqa— chaywanpis achkha yachachiykunata tarinchik. Kay cartaqa, “ajllasqa mamaman, wawasninman ima” qillqasqa kachkan. Qillqakuchkaptinqa, “Kyria” (griegopi “señora”) suti riqsisqa karqa, chayrayku wakin qillqaqkunaqa, ajina sutiyuq warmiman qillqasqa kasqanta ninku. Wakintaq, “ajllasqa mamaman” nispa, juk qutuchakuyman qillqasqa kasqanta ninku. Ichapis jinata qillqanman karqa, qhatiykachaqkuna mana reparanankupaq. Jina kaptinqa, tukukuynin pʼitipi “ñañaykej” napaykuynin nisqanqa, wak qutuchakuymanta hermanosmantachá parlachkanman karqa. Chayrayku Juanpa iskay kaq cartanqa, manachá ñawpa kaq cartanjina, tukuyniqman chayananpaqjinachu, qillqarqa. Sutʼita rikukunjina kay cartaqa, juk runallaman chayri juk qutuchakuyllaman qillqasqa karqa (v. 1).

² Juanpuni kay cartata qillqasqanmanta, mana iskaychakusunmanchu. Imaptinchus qillqaqqa, paymanta “Noqa kuraq runaqa” nispa nin. Kayta nisqantaq Juanpuni kay cartap, qillqaqnin kasqanta rikuchiwanchik, mana kuraq runa kasqanraykullachu manaqa qutuchakuypi ‘kuraqkunamanta’ (columnas) kasqanrayku (Gál. 2:9), Jesuspa apostolesninmantapis payllaña kawsachkarqa, chayrayku payqa qutuchakuypi juk allin ‘anciano’ karqa. Juanqa may riqsisqa karqa, chayrayku mana imatawanpis paymanta ninanta necesitakurqachu. Chantapis ñawpa kaq cartan, Juan Evangeliopi qillqakusqanwan ima, mayta rikchʼakun kay iskay kaq cartanwan. Juanpa ñawpa kaq cartanjina, kay cartaqa Éfeso llaqtallapitaq chayri qayllanpi qillqakurqa, 98 wata qayllapi. Kay 2, 3 Juan cartasmanta parlaspa kay Cyclopedia de McClintock y Strong ajinata nin: “2, 3 Juan cartas mayta rikchʼanakusqankurayku, Juanpa ñawpa kaq cartanmanta mana unayninmanchu Éfeso llaqtapi qillqakurqa. Kay iskay cartasqa, ñawpa carta imaynatachus Dios nisqanmanjina cristianos kawsanankuta sutʼinchanankupaq qillqakurqa”.a Kay carta Diospa yuyaychasqanpuni kasqan sutʼita yachakun, imaptinchus Ireneo (II siglo), Alejandriamanta Clemente ima chayta sutʼinchanku.b Chantapis Juanpa cartasninqa, Fragmento Muratoriano nisqapi rikhurin.

³ Ñawpa kaq cartajina, kay cartaqa qutuchakuyman llullata yachachiqkuna hermanospa iñiyninkuta chinkachinayachkasqankurayku qillqakurqa. Juanqa, kay cartanta ñawiriqkunaman, chiqa kaqpi purispa, munakuypi ima, chay llulla yachachiqkunamanta jarkʼakunankupaq qillqarqa.

IMAYNATATAQ YANAPAWANCHIK

⁵ Kunan pʼunchaykunapijina, ñawpa tiempopiqa, wakin runas mana Cristop chʼuwa, allin yachachiyninwan tukuy sunquchu karqanku. Chay runasqa, paykunallapi yuyaspa, jatunchakuyta munaspa, chay tiempomanta yachayniyuq runasjina kayta munarqanku. Paykunataq, munaynillankuta taripanankupaq, qutuchakuyta pantachiyta, tʼaqanachiyta ima munachkarqanku. Juanpaqqa, aswan allin karqa qutuchakuy jukchasqa kanan, munakuypi, chiqa yachachiypi Dioswan Jesuswan ima khuska kanankupaq. Kunan pʼunchaykunapi kikillantataq ñuqanchikqa, qutuchakuy jukchasqa kasqanta jatunpaq qhawananchik tiyan, Diosta wasanchaq runas mana chiqa yachachiyta yachachisqankuraykutaq, mana napaykunallanchikpischu tiyan. Diospa kamachisqanmanjina, paypa llaqtanpi ima kaptinchikqa, “Diospa qhasilla kʼacha yanapaynin, khuyakuy, sonqo tiyaykuytaj Dios Tatamanta, paypa Churin Jesucristomantawan, cheqa kajpi, munakuypi ima”, kasunchik (v. 3). Chiqamantapuni Juanpa iskay kaq cartanqa, qutuchakuy jukchasqa kaptin, achkha tʼinkasta japʼinanchikta rikuchiwanchik.

[Sutʼinchaykunasnin]