Enero

Uj runa uj maqanakupi atipasqanmanta wasinman kutinpushasqanpi tʼukurina. Wawanqa payta rikuspa “panderetata tocarispa, tusurispataj” taripaj llojsimorqa. Chay runataj wawanta rikuytawan pʼachanta llikʼikorqa, nerqataj: “Ay, wawáy, qannejta jatun llakiypi rikhurini”, nispa. Chay sipasqa chayta uyarispa, pʼachanta llikʼikusqanta rikuspa maytachá tʼukorqa. Chay runataj imatachus Jehovaman nisqanta willarqa. Jinapis chay sipasqa tatanman nerqa, imatachus Diosman nisqanta juntʼananta. Ajinata nispataj, sinchʼi creeyniyoj kasqanta rikucherqa. Yacharqataj Jehovata tukuy imapi kasukuy may sumajpuni kasqanta (Jue. 11:34-37). Chay runaqa mayta kusikorqa wawan sinchʼi creeyniyoj kasqanmanta. Yacharqataj wawan Diosta kusichinanpaj jina ruwashasqanta. Chay runaqa Jefté sutikorqa. Pay, wawan imataj Jehovapi, imastachus ruwasqanpi ima, tukuy sonqo atienekorqanku. Llakiykunapi rikukuspapis Diosman cheqa sonqosllapuni karqanku. Munarqankutaj Jehovaj ñaupaqenpi allinpaj qhawasqa kayta, chayraykutaj tukuy imata ruwayta munarqanku. w16.04 1:1, 2

Ichapis wakin kuti llakikusunman amigonchej chayri familiarninchej sonqonchejta nanachinawanchejpaj jina imatapis niwajtinchej. Chayri ichá may onqosqa kashanchej, manachayri familianchejmanta pillapis wañupusqanrayku mayta ñakʼarishanchej. Ima llakiypi kaspapis Jobpa kausaynin yanapawasunman (Job 1:18, 19; 2: 7, 9; 19:1-3). Jobqa mana yacharqachu imaraykuchus llakiykunapi rikukusqanta. Jinapis llakiykunasninwan mana atipachikorqachu. Jehovata munakusqan, kusichiyta munasqan ima aguantananpaj yanaparqa (Job 1:1). Munarqataj Jehovata kusichiyllatapuni. Diostaj ruwasqasninmanta parlarqa, may atiyniyoj kasqanta reparachinanpaj. Chaytaj Jobta yanaparqa, Jehová maychus tiemponpi llakiyninta chinkachinanpi atienekunanpaj (Job 42:1, 2). Jehovaqa tukuy llakiyninta chinkacherqa. ‘Kutichiporqataj ñaupaj kapusqanmanta iskay jinastawan’. Allin machuña ‘ashkha watasniyojtaj’ wañuporqa (Job 42:10, 17). w16.04 2:11, 13

“Sumaj yuyayniyoj” kanchej, ima chʼampaykunapichus rikukunanchejpi ñaupajmantaña tʼukurispa. Chantá “mana juchachana” kanchej, kay pachaj chʼampaykunasninpi mana satʼikuspa. Runas politicamanta parlajtinku sumajta qhawarikunanchej tiyan. Pillawanpis Diospa gobiernonmanta parlashanchej chayqa, ama uj gobierno chayri uj partido político ruwasqanta jatunchanachu nitaj qhawaranachu. Uj gobierno runaj chʼampaykunasninta chinkachinanpaj imatachus ruwayta munasqanmanta parlananchejmantaqa, imaynatachus Diospa gobiernon chʼampaykunata wiñaypaj chinkachinanmanta Bibliawan sutʼinchana. Pillapis qharipura manachayri warmipura casarakuymanta chayri wawata orqhochikuymanta parlayta munan chayqa, imatachus Biblia chaymanta parlasqanta, Bibliaj nisqanman jina kausakusqanchejta ima sutʼinchasunman. Pillapis wakin leyes cambiakunanta chayri chinkachisqa kananta nejtin, mana imatapis ninachu, nitaj waj jinata yuyananpaj tanqanachu. w16.04 4:8, 9

Jesuspa yachachisqasnenqa, runasta yachachisqasninman tukuchimunanku karqa, bautizananku karqa, yachachimunanku karqa ima. Niraj chayta ruwashaspataj, ñaupajtaqa runasta maskʼaj rinanku karqa. Bibliamanta yachaj uj runa, nerqa: “‘Riychej’ nisqa kamachiyta sapa uj creyente kasukunan tiyan, chayta ruwanankupaj mayta kallpachakunanku kajtinpis”, nispa (Mat. 10:7; Luc. 10:3). ¿Imatataj Jesús suyarqa yachachisqasninmanta? ¿Munarqachu yachachisqasnin sapallanku willamunankuta chayri uj qotu jina sumaj wakichisqa willanankuta? Sutʼita rikunchej, uj cristianollaqa Jallpʼantinpi mana willamuyta atisqanta. Chayrayku cristianosqa tukuyninku uj qotu jina sumajta wakichikunanku tiyan. Jesusqa yachachisqasninman “runa japʼej pescadoresman tukuchisqaykichej” nishaspa, chaymanta parlasharqa (Mat. 4:18-22). Jesusqa mana parlasharqachu sapa uj yachachisqan, anzuelowan challwata sapallan japʼej runa jina kananta. Mayqenchus suyakun, challwa anzuelota khaniykunanta. Astawanpis Jesusqa, challwata chʼipawan japʼej runasmanta parlasharqa. Chʼipawan challwata japʼinapajtaj astawan llankʼana tiyan, astawan wakichikuna tiyan, ashkha ukhutaj llankʼana tiyan (Luc. 5:1-11). w16.05 2:3, 4

¿Imaynatataj yachasunman imatachus Jehová yuyasqanta? Bibliata sapa pʼunchay leespa, estudiaspa ima. Bibliata leeshaspa, estudiashaspa imaqa tapurikusunman: “¿Imatataj Jehovamanta kay yachachiwan? ¿Imaraykutaj ajinata ruwarqa?”, nispa. David jina ruwana, Jehovamantataj yanapata mañakuna payta sumajta rejsinapaj. David nerqa: “Cheqan kayniykinejta pusaway, yachachiwaytaj. Qanmin kanki salvaj Diosniy. Tukuynin pʼunchay qampi suyakuni”, nispa (Sal. 25:4, 5). Jehovamanta astawan yachakuspaqa, imaspichus chay yachakusqanchejman jina ruwananchejpi tʼukurina. ¿Imaynatá familiapi, escuelapi, llankʼaypi, willaypi ima, yachakusqanchejman jina ruwasunman? Kaykunamanta mayqellanpipis tʼukurisun chayqa, imatachus Jehová ruwananchejta munasqanta yachasunchej. w16.05 3:9, 11

Jehovaqa ancianospaj kamachiykunata churan. Suyantaj chayta sumajta juntʼanankuta. Imaraykuchus congregacionqa Jehovapaj may valorniyoj (1 Tim. 3:2-7). Bibliataj “Wawanpa yawarninwan” Jehová rantisqanta nin (Hech. 20:28). Chayrayku Jehovaqa munan, ancianos wajkuna paykunamanta yachakunankupaj jina kanankuta. Chantapis ancianosqa Jehovaman cuentata qonanku kanqa, imaynatachus hermanosta qhawashasqankumanta. Jehovaqa munan ancianos sumajta qhawanawanchejta, ni imamanta manchachikunanchejta ima (Isa. 32:1, 2). Jehová kamachiykunata ancianospaj churasqanta leespaqa, yachakunchej Jehová noqanchejmanta mayta llakikusqanta. Jehovaqa suyan tukuy kamachisnin “allin yuyayniyoj” kanankuta (Fili. 4:5; 1 Ped. 4:7). Ancianos kʼachas kajtinkoqa, paykunamanta mayta yachakusunman, ‘paykuna jinataj creeyniyoj’ kasunman (1 Ped. 5:3; Heb. 13:7). w16.05 5:8-10

Sonqonchejta mana rumiyachinapajqa, mana jatunchakunachu nitaj juchallikunachu, nitaj saqenachu creeyninchej pisiyananta. Chaykunamanta mana sumajta qhawarikojtinchejqa, Diosta mana kasukusunchu, kʼullu runasmantaj tukusun (Dan. 5:1, 20; Heb. 3:13, 18, 19). Ajinapi Judamanta rey Uzías rikukorqa (2 Cró. 26:3-5, 16-21). Qallariypi payqa kasukoj runa karqa, Jehovawanpis sumaj amigos karqa. Chayraykutaj Jehová jatun atiyniyojman tukucherqa. “Jatun atiyniyojña kaspa[taj], sonqompi runaykachayta qallarerqa”. Maytapuni jatunchakusqanrayku, Diospa Templonman yaykuspa inciensota qʼoshñichiyta munarqa, sacerdoteslla chayta ruwananku kajtinpis. Sacerdotes “mana qanpa ruwanaykichu” nejtinkutaj, mayta phiñakorqa. Chayrayku Jehovaqa payta kʼumuykachacherqa, wañunankamataj leprawan onqoykucherqa (Pro. 16:18). Jatunchakuspaqa, wajkunamanta aswan sumaj kasqanchejta yuyasunman, Bibliaj yuyaychaykunasnintapis qhesachasunman (Pro. 29:1; Rom. 12:3). w16.06 2:3, 4

¿Imaynatá qhawanchej waj lugaresmanta hermanosta? Ichapis paykunaqa waj parlayniyoj, waj costumbresniyoj ima kanku, chayri waj jinata pʼachallikunku, waj mikhunasta mikhunku. ¿Chay hermanoswan masichakunchejchu chayri noqanchej jina costumbresniyojllawanchu astawan masichakunchej? Congregacionninchejpi noqanchejmanta aswan joven ancianosta, waj lugarmanta, waj costumbresniyoj ancianosta, ¿imaynatataj qhawanchej? Suyunchejmanta kajkunallawan, noqanchej jina costumbresniyoj kajkunallawan masichakuspaqa, congregacionta tʼaqanachisunman. Chay chʼampaypi mana urmanapajtaj, imatachus apóstol Pablo Éfeso cristianosman yuyaychasqanta kasukuna. Chay llajtaqa may qhapaj karqa, chaypitaj tukuynejmanta runas tiyakoj kanku (Efe. 4:1-3). Pabloqa parlarqa llampʼu sonqo kaymanta, pacienciakuymanta, kʼacha kaymanta, munakuymanta ima. Chay kʼacha kaykunaqa wasej sayantasnin jina, mayqenchus wasi mana urmaykunanpaj yanapan. w16.06 3:17, 18

Satanasqa ashkha qolqeyoj kanapaj tukuy kallpanchejta churananchejta munan, manataj Jehovata sirvinanchejpajchu (Mat. 6:24). Qolqeyoj chayri kapuyniyoj kayllata maskʼasun chayqa, kausayninchej qhasi mana kajlla kanqa, nitaj kusisqachu kausakusun, qolqeraykutaj chʼampaykunallapi rikhurisun. Astawantaj Jehovapi, gobiernonpi ima niña atienekuyta atisunchu (1 Tim. 6:9, 10; Apo. 3:17). Jesusqa “waj imasta munapayaypis” khishkas jina kasqankuta nerqa, mayqenkunachus Diospa Palabranta pʼampaykunku, nitaj Diospa Palabranpi wiñajta saqenkuchu (Mar. 4:14, 18, 19). Kunanpis tumpamantawan Satanaspa pachanqa chinkachisqa kanqa. Chayrayku mana allinchu kay tiempopi tukuy imayoj kayta maskʼananchej. Mana yuyananchejchu tiyan manchay ñakʼariy tiempo pasasqantawan imaschus kay tiempopi tiyapuwanchej chay imas kapunallawanchejtapuni, may valorniyoj kajtinpis (Pro. 11:4; Mat. 24:21, 22). w16.07 1:5, 6

Uj runa uvas huertayoj karqa. Uj diataj tutamanta huertanpaj llojserqa mercado plazaman peonesta maskʼaj. Peoneswantaj parlarqa mashkhatachus pagananta, peonestaj llankʼayta munarqanku. Peonesta astawan necesitaspataj ujtawan maskʼaj llojserqa. Chay diataj uvas huertayojqa kutin kutita peonesta maskʼaj llojserqa. Tukuyninkuwantaj parlarqa mashkhatachus pagananmanta. Wakin peonesqa diantinta llankʼarqanku, wakintaj uj horallata. Jinapis huertayojqa tukuyninman kikinta pagaporqa. Diantinta llankʼajkunaqa huertayojpaj mayta rimarqanku. Huertayojtajrí paykunata yuyaricherqa mashkhatachus pagananta parlasqankumanta. Nillarqataj qolqenwanqa munasqanta ruwayta atisqanta. Chantá nerqa: “Kʼacha kajtiychu, sajra ñawiwan qhawa[shawankichej]?”, nispa (Mat. 20:1-15). Jesusqa uvas huertayoj runamanta parlarqa, Diospa qhasilla kʼacha yanapayninmanta uj sumaj imata yachachinawanchejpaj (2 Cor. 6:1). w16.07 3:1, 2

Kay pachaj tukukuynin qayllitapiña kashan. Chayrayku Diospa gobiernonmanta sumaj willaykunata mana jaykʼaj jina willamunanchej tiyan (Mar. 13:10). Chantapis yuyarikunanchej tiyan, sumaj willaykunata willashaspaqa Diosta jatunchananchej kasqanta. ¿Imaynatá chayta ruwasunman? Jehovaj kʼacha yanapayninraykulla mosoj pachapi bendicionesta japʼinanchejta, runasman willaspa. Runasman Diosmanta willashaspa, Jesucristo kamachimushajtin wañuyninwan yanapachikuyta atisqankuta, pisimanta pisitaj juntʼa runaman tukunankuta ima sutʼincharisunman. Biblia nin: “Diospa tukuy ima ruwasqan juchaj atiyninmanta, wañuymantawan kacharichisqa kananpaj. Chay jinamanta Diospa wawasnin jina kacharichisqa kanqanku, chaytaj may sumajpuni”, nispa (Rom. 8:21). Kaytaj, Diospa kʼacha yanapayninraykulla kanqa. w16.07 4:17-19

Bibliaqa qhariwarmis munakuyta rikuchinakunankuta nin. Chaywanpis imaynasmantachus chayta ruwanankuta, mana kamachinchu (Cant. 1:2; 2:6). Rikunchej jina, qhariwarmis munanakunanku tiyan. Wakenqa qhariwarmi kausayninkupi llakiyta rikhurichinku, khuchichakuymanta millay fotosta, videosta ima qhawasqankurayku chayri wajpi yuyasqankurayku. Chay ruwaykuna jucha kasqanrayku, qhariwarmisqa mayta kallpachakunanku tiyan chaykunata atipanankupaj. Jehovata, runa masinkuta ima mayta munakojtinku, qhariwarmi kausayninkuta ni ima tukuchinanta saqenqankuchu. Chayrayku ni imata ruwanankuchu tiyan, wajta coqueteashasqankuta yuyachinankupaj. Imaraykuchus coqueteaspaqa, qosankuta chayri warminkuta mana munakusqankuta rikuchinku. Jehovaqa yachan imatachus ruwasqanchejta, imaraykuchus imatapis ruwasqanchejta ima. Chayta yuyareyqa Jehovata kusichinallapajpuni yanapawasun, jinallataj qosanchejta chayri warminchejta mana wasanchanapaj (Mat. 5:27, 28; Heb. 4:13). w16.08 2:7-9

Pabloqa Colosasmanta cristianosman sutʼincharqa kunan diapaj texto nisqanta. ¿Imaraykú may sumaj karqa Bibliata leenanku, estudiananku ima? Imaraykuchus chayqa yachayniyoj kanankupaj yanaparqa, ‘Diosta yupaychajkuna ruwanku, chay imasta ruwanankupaj. Ajinamanta payta kusichinankupaj’. Yanapallarqataj Jehovaj munayninta ‘ruwanankupaj’, astawantaj sumaj willaykunata willanankupaj (Col. 1:10). Pillamanpis Bibliamanta yachachishanchej chayqa, yanapananchej tiyan entiendenanpaj Bibliata sapa pʼunchay leey, estudiay ima Jehovata sirvinanpaj yanapayta atisqanta. Bibliata sapa pʼunchay leey, chaypitaj tʼukureyqa cheqamantapuni kausayninchejpi, willaypi ima yanapawasun. Sutʼincharinapaj, willaypi kashajtinchej pillapis mana kutichiyta atinapaj jina tapuwajtinchej, Bibliawan kutichiyta atillasun. Bibliapi yachakusqanchejta, imaynatachus yanapawasqanchejta ima wajkunaman willarejtinchej, paykunata kikinta ruwanankupaj yanapasunman. w16.08 4:3, 4

Mayta kallpachakunanchej tiyan, kay mundoj yachachiynin, yuyaynin ima, ama umanchejta muyuchinawanchejpaj. Kallpachakunallataj tiyan sajra ruwaykunasninpi mana urmanapaj, nisunman khuchichakuypi, pitaypi, machaypi, drogakuypi ima. Chantapis llakiykunasninchejwan, juchasapa kayninchejwanpis maqanakuna tiyan (2 Cor. 10:3-6; Col. 3:5-9). ¿Chay atiyniyoj enemigosta atipayta atisunmanchu? Arí, mana atinapaj jina kajtinpis. Pabloqa tinkupi maqanakoj runawan kikinchakorqa. Pay nerqa: “Maqanakupi sajmajkuna jinataj, mana wayrallatachu sajmashani”, nispa (1 Cor. 9:26). Noqanchejpis tinkupi jina enemigosninchejwan maqanakunanchej tiyan. Jehovataj chayta ruwanapaj yanapawanchej, wakichiwanchejtaj. ¿Imaynatá wakichiwanchej? Biblianejta, publicacionesnejta, tantakuykunanejta, jatun tantakuykunanejta ima. ¿Kallpachakushanchejchu chaykunapi yachakusqanchejman jina ruwanapaj? w16.09 2:2, 3

Jesusqa Diospa munayninta, wajkunata yanapayta ima ñaupajman churarqa, nitaj gustusnintachu valecherqa. Noqanchejpis Jesús jina ruwananchej tiyan. Wakin ropas noqanchejpaj kʼachitu kajtinpis, predicanchej chay runasta pantachinman. Chayrayku mana chay jina ropata churakusunmanchu (Rom. 15:2). Cristiano tatasqa wawasninkuta yachachinanku tiyan, Bibliaj yuyaychaykunasninta kasukunankupaj. Paykuna, wawasninkupis, kallpachakunanku tiyan pʼachallikusqanku, kʼachanchakusqanku ima Diosta kusichinanpaj (Pro. 22:6; 27:11). ¿Imaynatá tatas wawasninkuta yachachinkuman Diosninchejta, kamachiykunasninta ima jatunpaj qhawanankupaj? Ñaupajtaqa paykunaraj maychus kajta pʼachallikunanku tiyan. Chantá wawasninkuta munakuywan yachachinanku tiyan, imaynatachus, maypitajchus allin ropata tarinankuta. Wawasninkoqa ropata ajllashaspa mana munasqallankupichu yuyananku tiyan, manaqa Jehová Diosta jatunchaypi. Imaraykuchus paypa sutinpi purinchej. w16.09 3:13, 14

Jesusqa Jehová Diosta munakoj, Palabrantapis sumajta rejsej. Chantapis runasqa Jesús paykunata munakusqanta reparaj kanku. Chayrayku Jesusta sumajta uyarej kanku (Luc. 24:32; Juan 7:46). Ajinallatataj, wawasniyki Jehová Diosta munakusqaykita reparanqanku chayqa, paykunapis Jehovata munakullanqankutaj (Deu. 6:5-8; Luc. 6:45). Diospa Palabranta sumajta estudiallaypuni, publicacionestapis leellaypuni. Diospa ruwasqasnintapis astawan rejsiy (Mat. 6:26, 28). Jehová Diosta astawan rejsispaqa, wawasniykiman astawan yachachiyta atinki. Jehová Diosmanta imatapis yachakuspaqa, wawasniykiman willariy. Chaytaqa ima ratollapis ruway, nitaj tantakuykunapaj wakichikushaspallachu chayri familiapi Jehová Diosta yupaychashaspallachu. w16.09 5:6, 7

Bibliaj yachachiykunasninta waj parlaypi mana sutʼita entiendespaqa, Jehová Diosmanta karunchakusunman. Nehemiasqa Jerusalenman kutispa repararqa wakin wawas hebreota mana parlayta atisqankuta. Chay wawasqa Diospa Palabranta mana sutʼita entienderqankuchu. Chayraykutaj Diosmanta karunchakorqanku (Neh. 8:2, 8). Waj parlaypi kaj congregacionespi sirvej tatasqa, reparanku wawasninku Jehová Diosmanta karunchakushasqankuta. Jinapis waj parlaypi Diospa Palabranta leesqanchejqa, ichapis mana parlayninchejpi jinachu sonqonchejman chayanman. Chantapis waj parlaypi wajkunawan parlarikuyta mana atillanchejchu. Chayrayku ichá saykʼusunman, chaytaj Jehová Diosta yupaychayninchejpi mana yanapawasunmanchu. Waj parlaypi kaj congregacionpi Jehová Diosta sirviyta munaspaqa, Jehovawan amisgollapuni kanapaj mayta kallpachakunanchej tiyan (Mat. 4:4). w16.10 2:4-6

Mana tukuy runaschu Jehovapi creeyniyoj kanku (2 Tes. 3:2). Chaywanpis Jehová Diosqa ‘sapa ujman creeyta qon’ (Rom. 12:3; Gál. 5:22). Chayrayku tukuy creeyniyoj kajkuna Jehová Diosman mayta agradecekunanchej tiyan. Diosqa Wawanta qorqa, Jesuspi tukuy creejkunaj juchasninku perdonasqa kananpaj. Chayraykutaj Jehová Dioswan amigos kayta, wiñaypaj kausakuyta ima atinchej (Juan 6:44, 65; Rom. 6:23). Jehová Diosninchejqa may kʼachapuni tukuy noqanchejwan. Juchasapas kajtinchejpis, wañuchisqas kananchejpaj jina kajtinchejpis, kʼacha imasta ruwananchejta yachan (Sal. 103:10). Chayrayku Jesusmanta, runasrayku Jesús wañusqanmanta ima yachachiwanchej. Jesuspi creeyta qallarisqanchejmanta, yachachisqasninman tukusqanchejmanta imataj, wiñaypaj kausakuyta suyakunchej (1 Juan 4:9, 10). w16.10 4:1, 2

Apóstol Pabloqa allintapuni hermanosmanta parlarqa. Wakin hermanostaqa sumajta rejserqa, paykunawan unayta viajasqanrayku. Jinapis mana pantasqasninkumantachu qhelqarqa. Astawanpis allin imasta ruwasqankumanta parlarqa. Payqa Timoteomanta nerqa, “munasqa waway jina” nispa. Chantapis nerqa hermanospa allinninkutapuni maskʼasqanta (1 Cor. 4:17; Fili. 2:19, 20). Titomantapis Corinto congregacionman nerqa: Payqa kausaqey, “qankunaj allinniykichejpajtaj yanapawajniy” (2 Cor. 8:23). Chayta yachaspa, Timoteowan Titowanqa maytachá kusikorqanku. Pablowan Bernabewanqa hermanosta kallpachanankurayku, kausayninkutapis wañuy pataman churarqanku. Paykunataqa Listramanta runas wañuchiyta munarqanku. Jinapis chayman kutiykuspa, mosoj cristianosta kallpacharqanku creesqankupi sinchʼita sayanankupaj (Hech. 14:19-22). Aswan qhepaman Pablo Éfeso llajtapi kashajtin, runasqa chʼajwata jataricherqanku. Jinapis payqa chaypi qhepakorqa hermanosta kallpachananpaj (Hech. 20:1). w16.11 1:10, 11

Kay tiempopi, Jehovaqa Jallpʼapi llajtanta ñaupajman pusashan, yachachishantaj. ¿Imaynatá chayta ruwashan? Payqa Cristota congregacionpa uman kananpaj churan. Cristotaj ‘allin kamachi, yuyayniyojta’ churan, Diospa llajtanta ñaupajman pusananpaj, yachachinanpajtaj (Mat. 24:45-47; Efe. 5:23). ‘Allin kamachi, yuyayniyojqa’ Bibliata Diospa Palabranta jina qhawan, imaynatachus ñaupa tiempomanta Diospa llajtanta kamachejkuna qhawarqanku, ajinata (1 Tes. 2:13). Bibliaqa niwanchej, “amataj tantakuykunaman riyta saqenachu”, creeypipis uj yuyaylla kananchejta (Heb. 10:24, 25). Nillawanchejtaj Diospa Gobiernonta ñaupajman churanata (Mat. 6:33). Chantapis Bibliaqa kamachiwanchej, wasimanta wasi Diosmanta willananchejta, jinallataj plazaspi, mercadospi chayri maypi kashajtinchejpis (Mat. 28:19, 20; Hech. 5:42; 17:17; 20:20). Ancianostataj nin, congregacionta llimphuta japʼinankuta (1 Cor. 5:1-5, 13; 1 Tim. 5:19-21). Nillawanchejtaj juchamanta tʼaqakunata, Jehovaj chejnisqan imastapis chejnikunata (2 Cor. 7:1). w16.11 3:7, 8

Ñaupaj kaj Guerra Mundialmanta aswan ñaupajtaña, Charles Taze Russellqa waj runaswan khuska, repararqanku cristiano nichikojkuna mana Bibliaman jinachu yachachishasqankuta. Chayrayku paykunaqa mana llulla religionman chhapukuyta munarqankuchu. Kay 1879 watapiña Zionʼs Watch Tower (La Torre del Vigía de Sión) revista nerqa: “Mayqen iglesiallapis Cristoj novian kasqanta nishaspa gobiernosta yanapan chayqa, [Jatun Babiloniawan] ujchasqa kashan. Biblia nin jinataj khuchi warmiwan ninakun”, nispa (Apo. 17:1, 2). Cheqa sonqo runasqa yacharqanku, Jehová mana bendecinanta llulla religionta yanapallajtinkupuneqa. Chayrayku ashkhas iglesiasninkuman cartasta apacherqanku, chay iglesiasta saqepushasqankuta ninankupaj. w16.11 5:2, 3

Jesuspa Wañuyninta Yuyarinapaj tiempopi, ichapis Romanos 8:15-17 versiculosta leerqanchej. Chay versiculospi sutʼinchakun, imaynatachus uj cristiano yachan cielopi kausananpaj ajllasqa kasqanta. Romanos 8:1 nin, ajllasqa cristianos “Cristo Jesuswan” ujchasqa kasqankuta. Romanos 8 capituloqa, ajllasqa cristianospajpuni qhelqakorqa. Paykunaqa “Diospa atiyninta” japʼinku, suyakunkutaj ‘Dios wawasninpaj rejsikapunanta’, cuerponkumanta ‘kacharichisqa’ kaytapis (Rom. 8:23). Aswan qhepamanqa cielopi Diospa wawasnin kanqanku. Jesuspa wañuyninraykutaj, Jehovaqa juchasninkuta perdonarqa. Chantapis wawasnin kanankupaj, paykunata cheqan runaspaj qhawarqa (Rom. 3:23-26; 4:25; 8:30). Apóstol Pabloqa, Romanos libroj qallariyninpi uj runamanta qhelqarqa. Chay runa cielopi kausakunanpaj mana ajllasqachu kajtinpis, Jehovaqa payta cheqan runapaj qhawarqa. Kunanpis Jehovaqa creeyniyoj cristianosta cheqan runapaj qhawayta atillantaj. Paykunaqa Jallpʼapi wiñaypaj kausakuyta suyakushanku. Romanos 8 capitulopi nisqanqa, paykunatapis yanapallanmantaj. w16.12 2:1-3

Ichapis chay yuyaychayman jina mana ruwayta atillanchejchu. Jinapis, ¿imatá Jesús niyta munasharqa? Jesusqa, Diospa kamachisnin mana ni jaykʼaj llakikunankumantachu parlasharqa. Astawanpis Jesusqa yachachisqasninta entiendechisharqa, anchata llakikoyqa ni imapi yanapakusqanta. Sapa día llakiykuna kanqapuni. Chayrayku mana allinchu kanman imaschus karqa chaykunamanta chayri imachus qhepaman kananmanta llakikunanchej. Wakin kutis, cristianosqa imachus qhepaman kananmanta llakikunku. Jinapis imachus manaraj kasqanmanta llakikoyqa qhasilla. ¿Imaraykú? Imaraykuchus mana yuyasqanchejman jinapunichu imapis kanqa. Chayrayku ama iskayrayanachu, Diosqa cheqa sonqo kamachisninta bendecinanmanta, jinallataj tukuy llakiyninkuta chinkachinanmantapis. w16.12 3:13, 16

Jehovaqa Saulta rey kananpaj ajllashajtin, Saulqa llampʼu sonqo karqa (1 Sam. 9:1, 2, 21; 10:20-24). Jinapis rey kasqantawan, jatunchakuyta qallarerqa. Uj kuti, may chhika filisteo soldados tantakorqanku israelitaswan maqanakunankupaj. Saulqa profeta Samuel chayamunanta suyanan karqa, Jehovapaj uj jaywanata qʼolachinanpaj. Jinapis israelitasqa mancharikorqanku, ashkhastaj ripusharqanku. Chayta rikuspa Saulqa manaña Samuelta suyarqachu, pay kikintaj qʼolachina jaywanata qʼolacherqa. Chaytaqa Samuellla ruwanan karqa. Chayrayku Jehová mayta phiñakorqa (1 Sam. 13:5-9). Samuelqa Saúl kasharqa chayman chayaytawan, payta kʼamerqa Jehovata mana kasukusqanrayku. Saultajrí Samuelpa kʼamisqanta japʼikunanmantaqa, achakista churarqa, pantasqanmantataj wajkunata juchacharqa (1 Sam. 13:10-14). Chaymantapacha Saulqa jatunchakuyta qallarerqa. Chayrayku Jehovaqa Saulta qhesacharqa, nerqataj manaña rey kananta (1 Sam. 15:22, 23). Saulpa kausaynenqa qallariypi sumaj karqa, jinapis llakiypi tukukorqa (1 Sam. 31:1-6). w17.01 3:1, 2

Rey Davidqa Diosta mana wasancharqachu, Jehovataj payta mayta munakoj. Jinapis Davidqa Betsabewan qhenchachakuspa mayta juchallikorqa (2 Sam. 11:1-21). Davidqa juchallikorqaña, niñataj imatapis ruwayta aterqachu. Juchanraykutaj llakiykunaqa wañupunankama qhatirinan karqa (2 Sam. 12:10-12, 14). Chayrayku sinchʼi creeyniyoj kanan karqa. Davidqa tukuy sonqo pesachikojtin, Jehová perdonananpi atienekunan karqa. Chantá atienekunallantaj karqa, juchallikusqanrayku ñakʼarisqanta aguantananpaj Dios yanapananpi. Juchasapas kasqanchejrayku, tukuy pantanchej. Wakin juchasqa aswan sinchʼi kanku. Wakin kutistaj pantasqanchejta allinchanapaj, niña imatapis ruwayta atisunchu. Pantasqanchejraykutaj ichá ñakʼarinanchej kanqa (Gál. 6:7). Jinapis imatachus Jehová niwasqanchejpi atienekuna. Payqa pesachikojtinchej yanapanawanchejta nin, juchanchejrayku ñakʼarishajtinchejpis (Isa. 1:18, 19; Hech. 3:19). w17.01 1:10-12

Llampʼu sonqo kayqa, imatapis allinta ajllanapaj yanapawasun, chay ajllasqanchej imapichus tukunanta mana yachajtinchejpis. Ichá Diospaj astawan llankʼayta munashanchej. Jinapis, ¿imatá ruwasun onqoykojtinchej? ¿Imatá ruwasun tatanchej chayri mamanchej onqoykuspa yanapata necesitajtinku? ¿Imatá ruwasun machitusña kaspa? Diosmanta mañakuspapis, imatachus ruwananchejpi tʼukurispapis, mana chay tapuykunaman kutichisunmanchu. Jehovapi atienekuspaqa, atisqanchejman jinalla imatapis ruwasun, allinta tʼukurisun, wajkunaj yuyaychayninkutataj maskʼasun. Astawanqa Diosmanta mañakuspa, paypa atiyninwan pusachikusun (Ecl. 11:4-6). Jehovaqa ima ruwaytachus ajllasqanchejta bendecinman, chayri waj jinamanta ruwanapaj yanapawasunman (Pro. 16: 3, 9). w17.01 4:14

Adanwan Evawanqa imatachus ruwanankuta ajllananku karqa. ¿Diostachu kasukunkuman karqa chayri Satanastachu? Paykunaqa Satanasta kasukorqanku (Gén. 3:6-13). Adanwan Evawanqa Diospa kamachisqanta mana kasukusqankurayku, juchasapa runasman, paypa enemigosninmantaj tukorqanku. Imaraykuchus Jehovaqa juchata chejnikun, nitaj “qhawallaytapis atinchu” (Hab. 1:13). ¿Imataj kanman karqa ñaupa tatasninchejpa juchallikusqankuta qhawallanman karqa chay? Cielopi, jinallataj Jallpʼapi kausajkuna manaña ujchasqachu kankuman karqa, nitaj allintachu kausakunkuman karqa. Angelespis, runaspis yuyankuman karqa, Diosqa parlasqanta mana juntʼasqanta. Jehovatajrí nisqanta juntʼanpuni, nitaj jaykʼajpis qonqanchu (Sal. 119:142). Adanwan Evawan imatachus ruwanankuta ajllayta atispapis, mana Jehovaj leyesninta pisipaj qhawanankuchu karqa. Diospa contranpi oqharikusqankurayku wañorqanku, Dios nisqanman jinataj jallpʼaman tukorqanku (Gén. 3:19). w17.02 1:8, 10, 11

Jesusqa wañuy patapi kashaspapis, Mesiasmanta parlaj profeciasta oqharerqa (Mat. 27:46; Luc. 23:46). Tiemponmanta religionta kamachejkunaqa, mana pay jinachu karqanku. Paykunaqa Diospa Palabran yachachisqankuman churanakojtin, mana valechejchu kanku. Jesustajrí paykunamanta parlananpajpis, Diospa Palabranta oqharerqa. Nerqataj: “‘Kay runasqa simillankuwan yupaychawanku, sonqonkutajrí noqamanta may karunchasqa kashan. Qhasillata yupaychawanku. Paykunaqa runaspa kamachisqallanta yachachinku Diospa yachachiyninpis kanman jina’”, nispa (Mat. 15:7-9). Jesusqa Diospa Palabranwanpuni yachachej. Religionta kamachejkuna Jesusta pantachiyta munaspa tapojtinku, payqa mana yuyasqanman jinachu, nitaj kausayninpi yachakusqanman jinachu kutichej. Jesusqa Diospa Palabranmantapuni yachachej (Mat. 22:33-40). w17.02 3:18, 19

Jehovaj testigosnenqa autoridadesta respetanapaj kallpachakunchej. Sapa suyupi runasqa waj jina costumbresniyoj kanku. Chayrayku gobiernosqa mana tukuy suyuspichu kikinta kamachinku. Maypi tiyakuspapis autoridadespa ruwasqankuta jatunpaj qhawanchej. Jinapis Diospa kamachisqasninta mana kasukunata niwajtinchejqa, mana paykunata kasunchejchu. Astawanpis runasta kasukunamantaqa Jehovallata kasukunchej (1 Ped. 2:13-16). Bibliaqa willawanchej, Jehovaj kamachisnin autoridadesta respetasqankuta, kasukusqankuta ima. Josemantawan Mariamantawan parlarina. Romamanta autoridadesqa, kamachisharqanku chay jallpʼaspi mashkha runaschus tiyakusqankuta yachayta munarqanku. Chaypajtaj runasta yupachikunankuta nerqanku. José, María imataj chay kamachiyta kasukuspa Belenman rerqanku, María jatun onqojña kajtinpis (Luc. 2:1-5). Apóstol Pablomanta yachakullasunmantaj, paypis autoridadesta respetarqa. Pabloqa sajra imasta ruwasqanta nispa tumpajtinku, Herodes Agripaj ñaupaqenpi, Judeamanta kamachej Festoj ñaupaqenpi ima respetowan parlarerqa (Hech. 25:1-12; 26:1-3). w17.03 1:9, 10

Ashkha israelitas cananeos jina llulla diosesta yupaycharqanku, khuchichakuy juchapitaj urmarqanku. Jehovaqa israelitasta mana kasukusqankurayku enemigosninkumanta mana jarkʼarqachu (Jue. 2:1-3, 11-15; Sal. 106:40-43). Chay tiempopi Jehovata munakoj familiasqa, nichá atillarqankuchu Jehovaman cheqa sonqollapuni kayta. Chaywanpis Bibliaqa wakin israelitas Jehovata kusichiytapuni munasqankumanta parlan. Chaykunamanta wakintaj Jefté, wawan, chantá Elcana, Ana, Samuel ima karqanku (1 Sam. 1:20-28; 2:26). Kay tiempomanta runaspis cananeos jinallataj khuchichakuyllapi, maqanakuyllapi, qolqellapi ima yuyanku. Chaywanpis Jehovaqa chaykunamanta jarkʼakunata niwanchej. Payqa israelitasta jina sajra ruwaykunamanta jarkʼayta munawanchej. ¿Imatataj israelitas pantasqankumanta yachakusunman? (1 Cor. 10:6-10). Kay pachamanta runas jina ni jaykʼaj yuyanapaj mayta kallpachakunanchej tiyan (Rom. 12:2). w16.04 1:4-6

Jehovaqa Biblianejta sumajta yuyaychawanchej. Chayrayku yuyaychaykunasninta maskʼana, yanapaynintataj mañakuna. Imatapis munasqanman jina allinta ruwanapaj yanapawasun. Niraj imatapis ruwanata ajllashaspataj, tapurikunachej: “Kayta ruwaspa, ¿rikuchisajchu Diosta munakusqayta? ¿Familiayta yanapasajchu kusisqa, sumajtataj kausakunanpaj? ¿Kʼachataj, pacienciayojtaj kasqayta rikuchisajchu?”, nispa. Diosqa mana tanqawanchejchu payta munakunapaj, nitaj payta sirvinapajpis. Astawanpis ajllajta saqewanchej. Chayta ruwanapaj derechoyoj kasqanchejtataj respetan (Jos. 24:15; Ecl. 5:4). Diosqa suyan, Bibliapi niwasqanchejman jina imatapis ajllanata. Chay yuyaychaykunasninta japʼikusun, chayman jinataj ruwasun chayqa, imatapis allinta ajllasun. (Sant. 1:5-8; 4:8). w17.03 2:17, 18