Diciembre

Apóstol Pedroj tiemponpi ashkha cristianos Satanasmanta jamoj chʼampaykunata aguantananku karqa. Chayrayku may sumaj kanman llakiykunapi sinchʼita sayajkunaj kausayninkumanta yachakunanchej. Imaraykuchus chayqa yanapawasunchej cheqa sonqo kanapaj, aguantanapaj, cheqa sonqo kajtinchej Jehová Dios wiñay kausayta qonawanchejta mana qonqanapaj ima (Sant. 5:11). Ancianos manachayri superintendentes kanchej chayqa, ashkha llankʼaykunasniyoj kasqanchejmanta phutikusunman. Jina kajtenqa, apóstol Pabloj kausaynin yanapawasun. Payqa may qhatiykachasqa karqa, hermanosmantataj mayta llakikoj (2 Cor. 11:23-29). Jinapis llakiykunasninwan mana atipachikorqachu, chaytaj wajkunata yanaparqa aguantanankupaj (2 Cor. 1:6). Noqanchejpis aguantasunchej chayqa, wajkunata yanapasunchej kikinta ruwanankupaj. w16.04 2:11, 14

Jesus nerqa kay pʼunchaykunapi Diospa gobiernonmanta sumaj willaykuna tukuy runasman willakunanta. Kay tiempopitaj Jehovaj testigosnenqa Jallpʼantinpi may rejsisqas kanchej Diosmanta willamusqanchejrayku. Wakin runasqa willayninchejta uyariyta munanku. Wakin runastaj mana uyariyta munaspapis, willayninchejta jatunpaj qhawanku (Mat. 24:14). Ashkha religiones ninku Jesuspa yachachisqanmanta paykuna willashasqankuta. Paykunaqa iglesiapi, telepi, Internetpi parlay, Diosmanta willay kasqanta yuyanku. Wakin runasqa yuyanku imaynatachus Jesusta rejsisqankumanta wajkunaman parlariy, Diosmanta willay kasqanta. Wajkunataj yuyanku yanapata necesitajkunata doctores jina, enfermeras jina, profesores jina yanapariy, Diosmanta willamuy kasqanta. Chaywanpis, ¿cheqamantapunichu Jesús yachachisqasninman ajinata willanankuta kamacherqa? w16.05 2:1, 2

Kay 1914 watamantapacha tukuy gobiernos Diospa gobiernonpa contrankupi churakusqankutaqa, Jehová Diosqa tumpamantawan chay gobiernosta chinkachenqa (Sal. 2:2, 7-9). Jehová Diosqa kay pachapi gobiernos kanankuta saqen, mana ancha chʼampaykuna kananpaj. Chaytaj yanapawanchej Diospa gobiernonmanta willamunapaj (Rom. 13:3, 4). Jehovaqa tukuy kamachejkunapaj mañapunanchejta niwanchej, Payta allin kausaypi yupaychanallapajpuni (1 Tim. 2:1, 2). Pillapis qhasimanta ñakʼarichiwajtinchejtaj, apóstol Pablo jina kamachejkunamanta yanapata mañakusunman. Bibliaqa Satanaspa atiyninpi kay pachamanta gobiernos kasqankuta nin. Jinapis mana ninchu sapa uj kamachejta munasqanman jina ruwachisqanta (Luc. 4:5, 6). Chayrayku ni jaykʼaj ninanchejchu tiyan Satanás munasqanman jina uj kamachejta ruwachishasqanta. Imaraykuchus Bibliaqa ni pipaj sajrata rimananchejta nin (Tito 3:1, 2). w16.04 4:5, 6

¿Imaynatá yachasunman imachus Jehová Diosta kusichisqanta? Wakin imasmanta Biblia mana sutʼitachu parlajtinpis, reparananchej tiyan imachus Jehovaj munaynin kasqanta. Nisunman mayta kallpachakunanchej tiyan yachanapaj imatachus Jehová ruwananchejta munasqanta. ¿Imaynatá chayta ruwasunman? Jehovamanta mañakunanchej tiyan, atiyninwantaj yanapachikunanchej tiyan. Jesusqa imachus tatanpa munaynin kasqanta reparananpaj mayta kallpachakorqa. Sutʼincharinapaj, iskay kutispi niraj milagrosta ruwashaspa Diosmanta mañakorqa, yarqhasqa runasman mikhuchinanpaj (Mat. 14:17-20; 15:34-37). Chaywanpis chʼin pampapi kashaspa yarqhachikojtin, Satanasqa rumista tʼantaman tukuchinanta nerqa, paytaj chay kutipi mana milagrota ruwayta munarqachu (Mat. 4:2-4). Imaraykuchus Jehovata sumajta rejserqa. Yacharqataj Jehovaj atiyninta allinnillanpaj apaykachajtin Jehová mana kusikunanta. Payqa tatan yanapananta, necesitajtin mikhuyta jaywananta ima yacharqa. w16.05 3:7, 8

Cheqamantapuni nisunman Bibliamanta wakin cheqasqa uj runapaj chayri ashkha runaspaj qhelqakusqanta. Chayrayku niraj Bibliata leeshaspa, Jehová Diosmanta yanapata mañakuna tukuy sonqo leenapaj, yachayta qonawanchejpaj ima. Ajinamanta imatachus Jehová yachakunanchejta munasqanta yachakusunchej (Esd. 7:10; Sant. 1:5). Bibliata leeshaspaqa, kay kinsa tapuykunata tapurikuna: “¿Imatataj Jehovamanta kay yachachiwan? ¿Imaynatataj kay leesqay yanapawan? ¿Imaynatataj kay leesqaywan wajkunata yanapayman?”, nispa. Bibliata leeshaspa kay tapuykunapi tʼukurisun chayqa, sumajta yanapachikusun. Sutʼincharinapaj, ancianos ima kamachiykunatachus juntʼanankupi tʼukurina (1 Tim. 3:2-7). Mana tukuychu ancianos kasqanchejrayku, ichá yuyasunman chay versiculosqa mana noqanchejpajchu kasqanta. Chaywanpis chay kinsa tapuykunapi tʼukurisun chayqa, chay versiculosmanta mayta yachakuyta atisqanchejta reparasun. w16.05 5:7, 8

Judiosta Babiloniaman presochasqasta apashajtinku, chay llajtaqa llulla diosesta yupaychaymanta, supaykunata yupaychaj runasmanta ima juntʼa kasharqa. Jinapis Daniel, kinsa amigosnin, waj cheqa sonqo judíos ima mana Babiloniamanta runas jinachu ruwarqanku (Dan. 1:6, 8, 12; 3:16-18). Paykunaqa Jehovata cheqanchajninkuta jina qhawarqanku, payllatataj yupaycharqanku. Daniel tukuy kausayninpi Babiloniapi kausakojtinpis, paymanta Diospa angelnin nerqa: “Diospa may munasqa kamachin”, nispa (Dan. 10:11, 19). Ñaupa tiempopi manka llutʼaj runaqa, llinkʼi tʼurumanta imatachá ruwayta munan chayta ruwananpaj imapichus ruwaj chayman churaykuytawan ñitʼiykoj. Noqanchejqa yachanchej Jehovalla Tukuyta Kamachej kasqanta, llajtasta cheqanchananpaj atiyniyoj kasqanta ima (Jer. 18:5, 6). Sapa ujninchejta cheqanchanawanchejpajpis atiyniyojllataj. Jinapis saqen imatapis noqanchej ajllakunanchejta, munantaj payta munakusqanchejrayku kasukunata. w16.06 2:1, 2

Satanasqa ashkha qolqeyoj kaspalla kusisqa kananchejta yuyachiyta munawanchej. Chayrayku pachanwan, “ñawispa rikusqanta munapayay[wan]”, kapuwasqanchejmanta astawan munanallapajpuni tanqawanchej (1 Juan 2:15-17; Gén. 3:6; Pro. 27:20). Mosoj imasta rantiyta munananchejpaj jina tukuy tiempo willaykunata uyarinchej chayri qhawanchej. ¿Maykʼajllapis imallatapis ranterqanchejchu tiendapi kʼachituta rikukusqanraykulla chayri willaykunata uyarisqanchejraykulla? Ranterqanchej chayqa, ichá tiemponman repararqanchej mana necesitasqanchejta. Mana necesitasqanchej imasta rantillasunpuni chayqa, kausayninchej may llakiy kanqa. Imaraykuchus chay imasqa Jehovata sirvinapaj mana yanapawasunchu. Nitaj Bibliata estudianapaj, tantakuykunaman chayri willayman rinapaj, wakichikunapaj ima tiemponchej kanqachu. Apóstol Juan nisqanta, ¡ama qonqanachu! Pay nerqa: “Kay mundoqa tukukapushan, munayninpis tukukapushallantaj”, nispa. w16.07 1:3, 4

Ñaupa tiempo cristiana congregacionpeqa judíos, griegos, romanos waj llajtasmanta ima karqanku. Paykunaqa waj costumbresniyoj, waj yuyaykunasniyoj ima karqanku. Chayrayku wakenqa congregacionpi yachakusqankuman jina mana kausayta atillarqankuchu chayri ñaupa kausayninkuta mana saqeyta atillarqankuchu. Chayrayku apóstol Pablo yuyaricherqa cristianos uj Diosniyojlla kasqanchejta, chay Diostaj Jehová. Kunanpis cristiana congregacionqa, ñaupa tiempopi jinallataj. Sutʼincharinapaj, profeta Isaías “qhepa pʼunchaykunapi”, tukuy llajtasmanta runas Jehová Diosta ujchasqas yupaychanankuta nerqa. Ninankutaj karqa: “Payqa ñankunanmanta yachachiwasunchej, chaki ñankunampi purinanchejpaj”, nispa (Isa. 2:2, 3). Chay profecía juntʼakushasqanmantataj, mayta kusikunchej. Chayraykutaj Diospa llajtanpeqa tukuynejmanta kanchej, imaymana parlayniyoj, imaymana costumbresniyoj ima. Jinapis Jehová Diosta ujchasqas yupaychanchej. w16.06 3:15, 16

Jesucristowan khuska ajllasqa cristianos kamachimojtinku, imastachus Jehová Diosta paykunaman qonanpi tʼukuriyta mana atillanchejchu (Luc. 22:28-30; Fili. 3:20, 21; 1 Juan 3:2). Ajllasqa cristianos “Mosoj Jerusalén”, Cristoj noviantaj kanqanku (Apo. 3:12; 17:14; 21:2, 9, 10). Paykuna Jesuswan khuska llankʼanqanku ‘nacionesta jampichispa’. Runastapis yanapanqanku juchamanta, wañuymantawan kacharichisqa kanankupaj. Juntʼa runasmantaj tukuchenqanku (Apo. 22:1, 2, 17). Jehová Diosqa kʼacha yanapayninta rikuchillanqataj wañusqasta kausarichispa (Job 14:13-15; Juan 5:28, 29). Jesús niraj wañupushajtin cheqa sonqo qharis, warmis ima wañupojkuna, kay qhepa pʼunchaykunapi waj ovejasmanta kaj cheqa sonqo wañupojkunapis, Jehová Diosta sirvinankupaj kausarimonqanku (Juan 10:16). w16.07 4:13-15

Jehovaj pʼunchayninpaj rijchʼarisqallapuni, wakichisqallapuni kanapaj, ¿imataj yanapawasun? Cheqan kajta ruwayta munananchej tiyan. ¿Imatawan ruwananchej tiyan? Jesús niraj wañupushaspa yachachisqasninman nerqa Jehovaj yanapayninta mañakunallankutapuni (Luc. 21:36). Kay qhepa pʼunchaykunapi wakichisqallapuni kanapajtaj, Diospa yanapayninta mañakunallapuni tiyan (1 Ped. 4:7). Jesusqa yachachisqasninman kay pachaj tukukuynin “mana yuyasqaykichej horapi” jamonqa nerqa (Mat. 24:44). Chayrayku tukuy tiempo wakichisqallapuni kana. Astawanpis Jehovawan, Jesuswan wakichisqas kanapaj imatachus ruwanata Biblianejta niwanchej. Chayrayku Bibliaj profeciasnin imaynatachus juntʼakushasqanta allinta reparana. Jehovaman qayllaykunallapuni, gobiernontataj kausayninchejpi ñaupajman churanallapuni. Ajinamanta kay pachaj tukukuyninpaj wakichisqas kasunchej (Apo. 22:20). Imaraykuchus kausayninchejqa wakichisqas kananchejmanta kashan. w16.07 2:15-17

¿Imataj casarasqasta yanapanman sumaj ujchasqas kanankupaj? Biblia nin: “Ujkuna ujkunawan aguantanakullaychejpuni, tukuy sonqotaj perdonanakuychej”, nispa. Iskayninku pantaj runas kasqankurayku, imapipis pantanqanku, chʼampaykunapitaj rikukonqanku. Jinapi rikukuspaqa, pantasqasninkumanta yachakunkuman, jinallataj perdonanakuyta, Diospa yuyaychaykunasninman jina munakuyta rikuchiytapis. Imaraykuchus chay jina “munakoyqa” runasta sumajta ujchan (Col. 3:14). Casarasqasqa chay jina munakuyta rikuchinkuman, paciencianakuspa, kʼachas kaspa, ‘contrankupi ima sajrata ruwasqankumantapis’ mana yuyarikuspa (1 Cor. 13:4, 5). Ima chʼampaytapis usqhayllata allinchananku tiyan, niraj inti yaykushajtin (Efe. 4:26, 27). “Perdonaway sonqoykita nanachisusqaymanta” ninapaj, mayta kallpachakuna, llampʼu sonqostaj kana. Perdonta mañakoyqa casarasqasta chʼampaykunata allinchanankupaj yanapan, astawantaj ujchan. w16.08 2:6

Jesusqa Diospa gobiernonmanta willaspa mayta llankʼarqa. Jinapis yachachisqasninta yachachinanpaj tiempochakorqa. Yachacherqa imaynatachus wajkunaman yachachinankuta, imaynatachus Diospa llajtanta qhawanankuta ima. Yachachisqasnintaj sumaj yachachejkuna, sumaj michejkuna ima kayta yachakorqanku (Mat. 10:5-7). Felipe hermanoqa Diosmanta willananpaj tukuy tiemponta churarqa, warmi wawasnintapis kikinta ruwanankupaj yanaparqa (Hech. 21:8, 9). Kay tiempopipis wajkunata yanapananchej tiyan. ¿Imaraykú? Tukuy congregacionespi mosoj yachakojkuna tiyan, pikunachus manaraj bautizasqaschu kanku. Paykunaqa yanapanata necesitanku. Yanapananchej tiyan, sapallankumanta Diospa Palabranta leey, estudiay ima, may sumaj kasqanta entiendenankupaj. Chantapis Diosmanta willamunankupaj, yachachimunankupaj ima yanapanallanchejtaj tiyan. Kunallanraj bautizakoj hermanospis siervos ministeriales, ancianos ima kanankupaj yanapananchejta necesitanku. Tukuy congregación mosojkunata yanapayta atisunman. w16.08 4:1, 2

Hermanosninchejwan khuska llankʼayqa, paykunawan ujchasqas, sumaj amigostaj kanapaj yanapawanchej. Chantá yanapallawanchejtaj, Diospa jamoj bendicionesninta tukuy sonqo suyakunapaj, mayqenkunatachus Gobiernon kamachishajtin qowasunchej. Wajkunata kallpacharispaqa, paykunata yanapanchej chʼampaykunasninkuta aguantanankupaj, imachus kananmanta mana llakikunankupaj ima (Isa. 35:4). Chayta ruwayqa noqanchejtapis kallpachawasun, yanapawasuntaj ñaupajman rinallapajpuni. Jehovaqa ñaupa tiempopi cheqa sonqo kamachisninta yanaparqa, jarkʼarqataj. Chaypi tʼukureyqa creeyninchejta sinchʼiyachin, astawantaj paypi atienekunchej. Chayrayku chʼampaykunasniyoj chayri llakisqa kajtinchej, ama makisninchejta llauchhiyachinachu (Sof. 3:16). Jehovamanta yanapata mañakojtinchej, payqa jatun atiyninwan kallpachawasun. Pisimantawantaj Gobiernon Jallpʼata kamachimushajtin, ashkha bendicionesta qowasunchej (Sal. 73:23, 24). w16.09 1:16-18

Diospa kamachisnenqa ima ropatapis ajllashaspa, tukuy imapaj uj tiempo kasqanta yachanchej. Tiempota qhawarispa chayri waj imaspi tʼukurispa, ima ropatachus churakunanchejta ajllanchej. Jinapis Jehovaj kamachiykunasnenqa kikillanpuni (Mal. 3:6). Qʼoñi lugarpi tiyakuspaqa, mana atillanchejchu maychus kajta pʼachallikuyta. Jinapis hermanosninchejqa sumajpaj qhawanqanku, mana tukuy imanchejta rikuchej ropata churakojtinchej (Job 31:1). Mayuman chayri piscinaman rispapis, yakuman yaykunanchej ropaqa uj cristianopaj jina kanan tiyan (Pro. 11:2, 20). Runaspa yakuman yaykunanku ropaqa, tukuy imankuta rikuchin. Jinapis noqanchejqa, llimphu Diosninchej Jehovata jatunchanapaj jina pʼachallikuna tiyan. w16.09 3:11, 12

Jesusqa yachachisqasninta sapa kuti tapurej, imatachus yuyasqankuta yachananpaj. Tatas, Jesús jina ruwaychej. Wawasniykichejwan parlarishaspa chayri imallatapis ruwashaspa, paykunata tapuriychej imachus sonqonkupi kasqanta, kutichisqankutataj sumajta uyariychej. Wawasniyki Bibliaj mayqen yachachiynintapis mana creejtinkoqa, pacienciakuy. Tapuykunasninkoj kutichiyninta tarinankupaj yanapay. Wawasniyki tapukunankoqa may allin, imaraykuchus entiendeyta munasqankuta rikuchinku. Jesuspis wawa kashaspa tapukojpuni (Luc. 2:46). Wawasniykita allinta rejsiy. Ama yuyaychu wawasniyki Jehovapi creesqankuta willayman, tantakuyman ima risqankuraykulla. ¿Imatá sonqonkupi yuyanku Jehovamanta, Bibliamanta ima? Wawasniykita tapuriy: “¿Imaspitaj Jehovaman mana cheqa sonqo kayta atillankichu?”, nispa. Sapa día imallatapis wawasniykiwan ruwashaspa, Jehovamanta paykunawan parlariy. Sapallaykipi chayri paykunawan kashaspapis, Diosmanta paykunapaj mañapuy. w16.09 5:3-5

Kunanqa Jehovaj ashkha testigosnin mayta yanapakushanku Apocalipsis 14:6 versiculopi kaj profecía juntʼakunanpaj. Chay versiculopi nin: ‘Sumaj willaykuna tukuy nacionesman, tukuy ayllusman, tukuy laya parlayniyojkunaman, tukuy laya runasman willakunanta’, nispa. Qanrí, ¿waj parlaytachu yachakushanki? Wakenqa misioneros jina Jehovapaj llankʼashanku chayri pisi willajkuna kanku chay suyuspi willashanku. Wakintaj suyullankupitaj waj parlaypi kaj congregacionman rishanku. Diospa kamachisnenqa Diosmanta astawan yachakuyta ñaupajman churananchej tiyan, familianchejmanpis Diosmanta yachachinanchej tiyan. Chaywanpis wakin kutisqa mana tiempoyoj kasqanchejrayku, Bibliata mana sumajta estudiayta atillasunchu. Waj parlaypi kaj congregacionman ripojkunataj, astawanraj mana estudiayta atinkuchu. Waj parlaypi kaj congregacionpi kajkunaqa, uj mosoj parlayta yachakunanku tiyan. Chantapis kallpachakunanku tiyan ‘Diospa pakasqa yachayninmanta’ yachakunallankupajpuni (1 Cor. 2:10). w16.10 2:1-3

Jehovaj testigosnenqa Diosta kusiywan sirvishallankupuni sinchʼi qhatiykachasqa kaspapis. Paykunamanta ashkhas Eritreapi, Singapurpi, Corea del Surpi ima wisqʼasqas kashanku, “espadata” mana oqhariyta munasqankurayku. Mana tukuy hermanoschu carcelespi kashanku chayri ñakʼarichisqa kashanku. Jinapis ashkhas ñakʼarishanku wajchayay, sinchʼi llakiykuna, guerras kasqanrayku. Wakintaj Abraham jina, Isaac jina, Jacob jina, Moisés jina ruwanku. Jehovata tukuy atisqankuta sirvinankupajtaj may rejsisqa chayri qhapaj kayta qhesachanku. ¿Imataj hermanosninchejta yanapan Diosta kusiywan sirvinallankupajpuni? Diosta munakusqanku, Diospa nisqasninpi sinchʼita creesqanku ima. Yachankutaj Jehová cheqa sonqo kamachisninman paraisopi wiñay kausayta qonanta. Chaypitaj cheqan kausaylla kanqa (Sal. 37:5, 7, 9, 29). w16.10 3:15, 16

Profeta Jeremías mancharisqa, llakisqataj kashajtin, Jehová yanapananta nerqa (Jer. 1:6-10). Machuyasqa profeta Danielta kallpachananpajtaj uj angelta kacharqa. Angeltaj nerqa Diospa “may munasqa kamachin” kasqanta (Dan. 10:8, 11, 18, 19). Qanrí, ¿wajkunata kallpachariwajchu? Precursoresta, kuraj hermanitostapis kallpachariwaj. Paykunaqa niña ñaupajta jinachu ruwayta atinku. Jehovawan Jesuswanqa may chhika unayta khuska karqanku. Jinapis Jesús Jallpʼaman jamojtin, Jehovaqa Wawanta kallpachallarqapuni. Jesusqa Tatanta iskay kutita cielomanta parlamojta uyarerqa: ujtaqa predicayta qallarishajtin, ujtataj wañupunan watapi. Chay kutispi Jehová nerqa: “Kaymin munasqa Wawayqa, paytaqa allinpaj qhawani”, nispa (Mat. 3:17; 17:5). Jehovataj uj angelta kacharqa Jesusta kallpachananpaj, sonqochananpajtaj (Luc. 22:43). w16.11 1:7, 8

Wakin kutisqa sonqonchejta mana ñitʼiykukuyta atillanchejchu. Ichá pipis costumbresninchejrayku, rijchʼayninchejrayku chayri yurajchus yanachus kasqanchejrayku, imatapis niwasunman chayri imatapis ruwawasunman. Ajinapi rikukuspa llakikusunman chayri phiñakusunman. Congregacionmanta uj hermano chayta ruwawajtinchejtaj, sonqonchejqa astawanraj nanawasunman. Chayrayku Jehovaqa Palabranpi kay jinata yuyaychawanchej: “Ama imamantapis usqhayllata phiñakuychu”, nispa. Chay yuyaychayta kasukoyqa, sonqonchejta ñitʼiykukunapaj maytapuni yanapawasunman (Pro. 16:32). Bibliaqa nillawanchejtaj runamasinchejta perdonanata. Jesús nerqa runasta mana perdonajtinchejqa, Jehovapis nillataj perdonanawanchejta (Mat. 6:14, 15). Chayrayku tapurikuna: “¿Pacienciayojchu kani? ¿Wajkunata perdonayta atillanichu?”, nispa. Sonqonchejta mana ñitʼiykukuspaqa, phiñasqalla purisunman, wajkunatapis chejnikuyta qallarisunman. Chayri waj hermanosta noqanchej jina yuyanankupaj tanqasunman (Lev. 19:17, 18). w16.11 3:4-6

Charles Taze Russellqa 1870 wata chaynejta waj runaswan khuska Bibliata allinninmanta estudiarqanku. Hermano Rusellqa yachayta munarqa, mayqen iglesiachus cheqanta yachachishasqanta. Payqa Bibliaj yachachisqanta kikincharqa, iglesiaspa yachachisqankuwan, waj religionespa yachachisqankuwanpis. Repararqataj ni mayqen religionpis Bibliaj nisqanman jinapunichu ruwashasqanta. Chayrayku hermano Russellqa, tiyakorqa chay qayllapi religionesta kamachejkunawan parlarqa. Payqa munarqa chay runas japʼikunankuta imatachus paywan amigosninwan Bibliapi tarisqankuta, chaytataj iglesiasninkupi yachachinankuta. Iglesiata kamachejkunarí mana imatapis yachayta munarqankuchu. Bibliamanta Yachaqajkunaqa sutʼita repararqanku, chay pantasqa iglesiaswan khuska Diosta mana yupaychanankuchu kasqankuta. w16.11 4:14

Noqanchejqa mana qhenchachakunchejchu, nitaj machanchejchu, nillataj waj jatuchaj juchastapis ruwanchejchu. Mana chayllachu, imastachus Jehová chejnisqantaqa, nillataj ruwayta munanchejchu. Chayrayku mana khuchichakuyllatachu qhesachanchej, manaqa millay imaswan sonqonchejta kusirichiytapis (1 Cor. 6:9-11). Jinallataj mana machayllatachu sajrapaj qhawanchej, manaqa yuyayninchejta chinkachinakama tomaytapis. Ichapis chay sajra ruwaykunata saqenapaj, mayta kallpachakunanchej kanqa. Jinapis atipayta atisunman. Pablo nerqa: “Amaña saqeychejchu wañoj cuerpoykichejpi jucha kamachinanta. Ajinamanta cuerpoykichejpa munayninta amaña kasunaykichejpaj”, nispa. Chay nisqanman jina ruwanapaj kallpachakuna (Rom. 6:12; 7:18-20). w16.12 1:16, 19-21

Jesús nerqa: “Cielopi kashaj Tataykichejqa atiyninta qonqa mañakojkunaman”, nispa (Luc. 11:10-13). Diospa atiynenqa, Pay jina kʼacha kaykunasniyoj kanapaj yanapawanchej (Col. 3:10). Bibliaqa chay kʼacha kaykuna, Diospa atiyninmanta poqoy jina kasqanta nin. Diospa atiyninwan yanapachikojtinchej, wajkunawan aswan allinta kausakusun, manataj imapis anchata llakichiwasunchu. “Diospa atiyniyoj makinpi” churakunapajqa, kʼumuykukuyniyoj kananchej tiyan, jinallataj phutiyninchejta payman saqenapajpis (1 Ped. 5:6, 7). Kʼumuykukoj sonqo kasunchej chayqa Jehová yanapawasunchej, jarkʼawasunchejtaj. Maykamallachus ruwayta atisqanchejta reparaspaqa, mana noqallanchejpichu atienekusun, manaqa Jehovapi atienekusun. Ajinamantataj pisillataña llakikusunchej (Miq. 6:8). w16.12 3:7, 12

Noé imatachus mana ruwayta atisqanmanta llakikunanmantaqa, imastachus ruwayta atisqanpi yuyarqa. Chayrayku mana saykʼuspa Jehová Diospa nisqanta willarqa. Chay ruwasqanqa, maytachá yanaparqa sinchʼi creeyniyoj kananpaj. Chantapis Noeqa Jehová Diospa kamachisqanman jina arcata ruwarqa (Heb. 11:7). Kay tiempopipis noqanchejqa, Noé jinallataj “Señorpa ruwayninpi” mayta llankʼashanchej (1 Cor. 15:58). Tantakuna Wasista, Jatun Tantakuna Wasista ima ruwaysikusunman chayri allinchaysikusunman. Jatun tantakuykunapitaj imallapipis yanapakusunman. Chantapis Betelpi chayri waj parlayman tijrachinapaj oficinaspi yanapakusunman. Jinapis astawanqa runasman Diosmanta willamunchej. Chaytaj yanapawanchej, imatachus suyakushanchej chayta japʼinanchejpi atienekunapaj. Chay suyakuymanta wajkunaman willarejtinchejtaj, imatachus suyakusqanchejta japʼinanchejmanta mana iskayrayanchejchu (1 Cor. 9:24). w17.01 1:8, 9

Wajkuna kausayninkupi imatapis ajllasqankuta jatunpaj qhawananchej tiyan. Tukuyninchej ajllayta atinapaj ruwasqa kasqanchejrayku, mana kikintachu imatapis ajllasun. Imaynatachus kausanata, imaynatachus Diosta yupaychanatapis, sapa uj ajllananchej tiyan. Chayta entiendespaqa, wajkunaj ajllasqankuta mana qhawarasunchu. Chayrayku hermanosninchej imatapis ajllajtinku, juchʼuy imas kajtinpis, jatunpaj qhawananchej tiyan (1 Cor. 10:32, 33). Jehovaqa imatachus ruwananchejta ajllajta saqewanchej, chaytaj cheqamantapuni kacharichiwanchej (2 Cor. 3:17). Chayta ruwasqanchejta, may sumajpaj qhawanchej. Imaraykuchus ajllayta atisqanchejwanqa, Jehovata munakusqanchejta rikuchiyta atinchej. Chayrayku Diosta jatunchanapaj jina imatapis ajllana, wajkunaj ajllasqankutapis ama qhawaranachu. Chayta ruwaspaqa Jehová qowasqanchej regalota, jatunpaj qhawasunchej. w17.01 2:15, 17, 18

Alaraco kanamanta chayri allinpaj qhawachikuyta maskʼanamantaqa, ‘llampʼu sonqoyoj’ kayta munanchej (1 Ped. 3:3, 4; Jer. 9:23, 24). Imatachus noqanchejmanta yuyasqanchejqa, parlasqanchejpi, ruwasqanchejpitaj rikukonqa. Ichá sumaj runaspaj qhawachikuyta munasunman, ruwasqanchejmanta, yachasqanchejmanta, chayri pikunatachus rejsisqanchejmanta parlaspa. Manachayqa runasta creechisunman, imapis sumaj llojsinanpaj noqallanchej yanapakusqanchejta, wajkuna yanapawajtinchejpis. Jesuspi tʼukurina, may yachayniyoj kasqanwan runata tʼukuchinman karqa. Jinapis payqa yachachishaspa Diosmanta Qhelqasqapi nisqanta oqharej. Jesusqa mana runaswan jatunchachikuytachu maskʼarqa. Astawanqa Jehovatapuni jatunchayta munarqa. w17.01 4:12

Huertapeqa may chhika mikhuna karqa. Chayrayku chay kamacheyqa entiendeyta, kasukuyta atinapaj jinalla karqa. Kuraj Supay Satanasqa, Evata uj katarinejta chʼaukiyarqa Tatan Jehovata mana kasukunanpaj (Gén. 3:1-5; Apo. 12:9). Runasqa ‘huertapi kaj tukuynin sachʼasmanta’, uj sachʼaj poqoynillanta mana mikhunankuchu karqa. Satanastaj chayta mana allinpajchu qhawachiyta munarqa. Evaman kaytapis nishanman jina karqa: “Nichá imatapis munasqaykiman jina ruwayta atinkichu á”, nispa. Chantá llullakuspa nerqa: “Chayqa mana jinachu; mana wañunkichejchu”, nispa. Jehovata Eva mana kasukunanpajtaj, nerqa: “Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta”, nispa. Chaywantaj Satanasqa kaytapis nishanman jina karqa: “Jehovaqa mana munanchu yachayniyoj kanaykichejta, chayrayku chay sachʼamanta jarkʼakusunkichej”, nispa. Engañayta tukunanpajtaj, Evaman nerqa: “Dios jina kankichej, yachankichejtaj imachus allin kajta, mana allin kajtapis”, nispa. w17.02 1:8, 9

Isaiasqa chay runamanta nerqa, Diosqa payta llajtanpaj “kamachejta, yachachejta ima” churananta (Isa. 55:4). Danielrí “Kamachej Mesías” chayamunanmanta parlarqa (Dan. 9:25). Jesustaj Jallpʼaman jamuspa, Diospa llajtanmanta “Yachachej” kasqanta nerqa (Mat. 23:10). Jesuspa yachachisqasnenqa payta tukuy sonqo qhaterqanku, creerqankutaj Diospa ajllakusqan kasqanta (Juan 6:68, 69). Jesús bautizakusqantawan, Juan Bautistaqa rikorqa ‘cielota kicharikushajta, Diospa atiynintataj palomata jina Jesuspa patanman uraykamushajta’ (Mar. 1:10-12). Jesús runasman willashajtenqa, Jehová atiyninwan yanaparqa yachachinanpaj, milagrosta ruwananpaj ima (Hech. 10:38). Chantapis yanapallarqataj runasta munakunanpaj, kusikuyniyoj, sinchʼi creeyniyoj ima kananpaj (Juan 15:9; Heb. 12:2). Ni pí kamachejpis, Jesús jina rikucherqachu Diospa atiyninwan yanapasqa kasqanta. Paytapuni Jehová ajllarqa kamachej kananpaj. w17.02 3:15, 16

Apostolesqa Pentecostés 33 watapi, Diospa llajtanta ñaupajman apayta qallarerqanku. Chay kutipi, Pedro “11 apostoleswan khuska” sayarerqa, may chhika runasmantaj Diosmanta yachacherqa (Hech. 2:14, 15). Chay diaqa ashkha runas cristianosman tukorqanku. Paykunataj “apostolespa yachachisqankuta” tukuy sonqo japʼikuspa, uj sonqolla kasharqanku (Hech. 2:42). Apostolesqa Diospa llajtanpa qolqenmanta cuentayoj karqanku (Hech. 4:34, 35). Chantapis Diospa llajtanta yachachej kanku, Diosmantataj mañapoj kanku. Chayrayku nerqanku: “Diosmanta mañakuspallapuni kasqayku, palabranta yachachispallapunitaj”, nispa (Hech. 6:4). Apostolesqa sumaj wakichisqa cristianosta, waj lugarespi predicanankupaj kacharqanku (Hech. 8:14, 15). Qhepamantaj congregacionesta ñaupajman pusanankupaj, waj ajllasqa ancianos apostolesman ujchaykukorqanku. Paykunataj ñaupa tiempomanta Diospa llajtanta kamacherqanku (Hech. 15:2). w17.02 4:4

Ashkha runasqa, Satanaspa mundonmanta runas jina ruwanku. Wakin qharista, warmista ima, uj diosta jina jatunchanku, nitaj Jehová Diospa nisqanman jinachu ruwanku. Wakin runastaj iglesiata kamachejkuna jina, wakin políticos jina, pujllajkuna jina, chayri peliculaspi llojsej runas jina pʼachallikunku. Cheqa cristianosqa yachanchej runasta jatunchay mana allinchu kasqanta. Tukuy runasmanta nisqaqa, Jesuslla mana pantaj runa karqa, chayrayku payllamanta yachakuyta atinchej (1 Ped. 2:21). Tukuy runas juchallikusqanchejraykutaj, “Diospa jatun kayninta mana taripayta” atinchejchu (Rom. 3:23). Chayrayku mana pi runatapis jatunchanachu tiyan. Runasta jatunchaspaqa, Jehovata llakichisun. w17.03 1:6-8

¿Imaynatá yachasunman Jehová Diosta tukuy sonqochus manachus yupaychashasqanchejta? Tapurikuna: “Ima llakiy kajtinpis, ¿Jehovata kasukunichu? Congregación llimphu kananpaj, ¿yanapakuyta munanichu?”, nispa. Tʼukurina, juchallikoj familiarninchej chayri amigonchej, mana pesachikusqanrayku congregacionmanta qharqochikojtin, ¿imatá ruwasun? ¿Paykunawan niña masichakunapaj kallpachakusunchu? ¿Imata ruwanapajtaj sonqonchej tanqawasun? Wakin kutisqa, rey Asa jinallataj uj jatun llakiypi rikukusunman. Ichapis Jehovaj testigon kasqaykirayku, escuelamanta compañerosniyki chayri profesoresniyki asipayasunku. Manachayri trabajomanta compañerosniyki sonso kasqaykita yuyanku, jatun tantakuypaj vacacionta orqhosqaykirayku chayri astawan trabajayta mana munasqaykirayku. Jina kajtin, Jehová Diosqa Asata jina yanapasunkiman (2 Cró. 14:11). Chayrayku Paymanta kallpata mañakuna, allin kajta ruwanapaj yanapanawanchejta ima. Jehovataj Asata jinallataj kallpachawasun. w17.03 3:6-8

Diospa Palabranqa niwanchej, mana imatapis patan uranta ruwanata. Imatachus ruwananchejta sumajta ajllanapajqa, tukuy imata allinta reparanapaj tiempocharikuna tiyan (1 Tes. 5:21). Familiamanta uma kajkunaqa, familiankupaj niraj imatapis ajllashaspa Bibliaj nisqanta, publicacionespa yuyaychasqanta ima qhawarinanku tiyan. Chantapis allin kanman familianmanta kajkunata waturinanku. Yuyarikunachej, Jehová Diosqa Abrahamman nerqa: “Kasuy warmiyki Sara imatachá nisunki chayta”, nispa (Gén. 21:9-12). Ancianospis Bibliata, publicacionesta ima qhawarinankupaj tiempochakunanku tiyan. Publicacionespi astawan yuyaychaykunata tarejtinkutaj, mana manchachikuspa imatachus nisqankuta waj jinamanta ruwanku. Kʼacha, llampʼu sonqotaj kaj ancianosqa, imatapis waj jinamanta ruwananku kajtin, waj jinamanta ruwanku. Tukuyninchej paykuna jina ruwananchej tiyan. Ajinamanta congregacionpi allin kausay kanqa, ujchasqallapunitaj kasun (Hech. 6:1-4). w17.03 2:16